2 Samueli 1
1
Daudi okubikirwa Saulo na Yonasaani
1 #
1 Sam 30:17, 26. Bwanyima y'okufa kwa Saulo, Daudi akatabaaruka naaruga kwita Abaamaleki; ku yaahikire Zikulaagi, yaamarayo ebiro bibiri. 2#2 Sam 4:10; 1 Sam 4:12. Aha kiro kya kashatu haija omushaija naaruga omu rusiisira rwa Saulo, emyenda ye etaagukire, aine eitaka omu mutwe; ku yaahikire ahari Daudi, yaajuumara ahansi, yaamutangirira. 3Daudi yaamubuuza ati: Nooruga hi? Onu yaamugarukamu ati: Naacwa omu rusiisira rw'Abaisraeli. 4Daudi yaamubuuza ati: Bibaire bita? Ninkweshengyereza, ngambira. Onu yaamugarukamu ati: Abantu bahungire aha rugamba, baingi omuribo bagwire, baafa, kandi Saulo n'omutabani Yonasaani nabo bafiire. 5Daudi yaabuuza ogwo mutsigazi owaamubikira ati: Beitu shi omanyisiibwe ki Saulo n'omutabani Yonasaani ku bafiire? 6#1 Bus 10:1-3. Ogwo mutsigazi owaabaire naamubikira yaagira ati: Ku mbaire niinyegyendera, naahika aha kibungo Giliboa, naareeba Saulo ayegamiire eicumu rye; kandi naareeba ab'ebigaari n'ab'embaraasi bamubingire bamuhambize. 7Ku agarwire amaisho enyima, yandeeba, yaanyeta, naanye naamwetaba nti: Ndi aha, Nyakusinga! 8Yambuuza ati: Ori oha? Naamugarukamu nti: Ndi Omuamaleki. 9Yangira ati: Mpika haihi, onyite; ahakuba nyine obusaasi bwingi, kandi tinkakabire. 10#Bar 9:54. Ntyo naamuhika haihi, naamwita, ahakuba mmanyiire kimwe ku atari w'okukira yaagwire; bwanyima naamucwijura ekirunga ky'aha mutwe gwe n'engoro ebaire emuri aha mukono; mbwenu mbibi, mbikureeteire, mukama wangye. 11#2 Sam 3:31; 13:31. Daudi yaataagura emyenda ye, n'abashaija boona abu yaabaire aine baakora batyo. 12Baacura nibaborooga, baayesiibyakwo okuhitsya omu mwabazyo, ahabwa Saulo n'omutabani Yonasaani, n'ahabw'abantu ba MUKAMA n'enju ya Israeli okumarwa rurara.
13Daudi yaabuuza omutsigazi owaamubikira ati: Nooruga hi? Onu ati: Ndi omwana w'omunyaihanga, Omuamaleki. 14#1 Sam 24:6. Daudi ati: Kirugire hi iwe okutatiina kubanga omukono kwita ou MUKAMA yaashukireho amajuta? 15#1 Sam 22:17, 18; 2 Sam 4:10. Daudi yaayeta omwe aha batsigazi, yaamugira ati: Irooko omuhikye haihi, omugurukire. Yaamucumita, yaafa. 16Daudi yaamugira ati: Orubanja rw'eshagama yaawe rube niiwe rwabaho, ahabw'okuba akanwa kaawe niko mushinja ku waahamya noogira oti: Nyitsire ou MUKAMA yaashukireho amajuta.
Ekyeshongoro ky'okucurira Saulo na Yonasaani
17Bwanyima Daudi yaacurira Saulo n'omutabani Yonasaani n'ekyoshongoro eki, 18#Yos 10:13. (kandi yaaragiira kukyegyesa Abayuda; reeba kihandiikirwe omu kitabo kya Yashari.) naagira ati:
19Ai bambe Israeli, ekitiinisa kyawe kiitiirwe aha bibungo byawe.
Amamanzi ka gagwire!
20 #
Bar 9:54. Mutakigamba omuri Gaasi;
Mutakibuzya omu mihanda ya Ashikelooni,
Abaishiki b'Abafilistia bakeesima,
N'abaishiki b'abatashazirwe bakeehimbisa.
21 #
1 Sam 10:1. Imwe ebibungo bya Giliboa,
Mutatondwaho orume, mukaguubwaho enjura,
N'obu kwakuba okugira emisiri y'empongano!
Ahakuba okwo niyo engabo y'emanzi enagirwe kubi,
Engabo ya Saulo, nk'otarashukirweho majuta.
22 #
1 Sam 14:6. Obuta bwa Yonasaani bukaba butagaruka nyima
Kuruga aha shagama y'abaitsirwe, n'aha mamanzi ebikaaka;
Kandi rurara ya Saulo ekaba etagaruka busha.
23Saulo na Yonasaani bakaba bari barungi kandi abarikukundwa bakiriho,
N'omu kufa kwabo tibataanisiibwe.
Bakaba barahuka okukira empungu,
Kandi baine amaani okukira entare.
24Imwe abaishiki ba Israeli mucurire Saulo,
Owaabaire abajweka emyenda ya karari erikunekaneka,
Akahunda emyenda yaanyu ezaabu.
25Amamanzi ka gagwire
Ahagati y'orugamba!
Yonasaani aitiirwe aha bibungo byawe.
26 #
1 Sam 18:1, 3; 20:17. Ninshaasha munonga ahabwawe, mwene waitu Yonasaani;
Okaba onshemeza munonga.
Okukunda kwawe ahariinye kukaba kuri okw'okutangaaza,
Okukira okukunda kw'abakazi.
27Amamanzi ka gagwire,
N'eby'okurwanisa ka bicwekyereire!
Currently Selected:
2 Samueli 1: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
