2 Abagabe 15

Eby'omu busingye bwa Uziya

1 # 2 Bag 11:13; 14:21. Omu mwaka gwa makumi abiri na mushanju ogw'omu busingye bwa Yeroboamu omugabe wa Israeli #15:1 Uziya nari Azaria. Uziya mutabani wa Amaziya omugabe wa Yuda akatandiaka kutegyeka. 2#2 Bus 26:1, 3, 4. Yaatandika kutegyeka aine emyaka ikumi na mukaaga; yaategyekyera emyaka makumi ataano n'ebiri omuri Yerusalemu. Eiziina rya nyina akaba ari Yekolia owa Yerusaalemu. 3Yaakora ebirikusiimwa MUKAMA, nk'ebi Amazia ishe yaakozire byona oku byabaire biri. 4#2 Bag 12:3. Kwonka emyanya mikuru ey'okuramizamu teraihirweho; abantu bakaba bagitambiramu, kandi bagyoteerraho obubaane. 5#2 Bus 26:21-23. Bwanyima MUKAMA yaateera omugabe, yaarwara ebibembe, yaaguma omu nganyo okuhitsya aha izooba eri yaafeereireho. Kandi Yosamu omutabani niwe yaabaire ari omukuru w'ekikaari, naategyeka abantu b'omuri egyo nsi.#Lev 13:46. 6Mbwenu endiijo mirimo ya Uziya n'ebi yaakozire byona, tibihandiikirwe omu kitabo ky'eby'omu busingye bw'abagabe ba Yuda? 7Uziya yaagwejegyera, yaashanga baishenkuru, baamuziika hamwe nabo omu rurembo rwa Daudi; Yosamu omutabani yaategyeka omu mwanya gwe.

Okuhungurirana kw'abagabe babi omuri Israeli

8Omu mwaka gwa makumi ashatu na munaana ogw'omu busingye bwa Uziya omugabe wa Yuda, Zekaria mutabni wa Yeroboamu akategyekyera Israeli omuri Samaria ameezi mukaaga. 9#1 Bag 14:16. Yaakora ebirkwangwa MUKAMA, nk'oku baishenkuru baakozire. Tiyaareka bibi bya Yeroboamu mwene Nebati, ebi yaasiisiise Israeli. 10#Amo 7:9. Eizooba rimwe Shalumu mwene Yabeshi yaamugirira enaama, yaamwitira omu maisho g'abantu, yaategyeka omu mwanya gwe. 11Endiijo mirimo ya Zekaria n'ebi yaakozire bihandiikirwe omu kitabo ky'eby'omu busingye bw'abagabe ba Israeli. 12#2 Bag 10:30. Okwo nikow kuragaanisa kwa MUKAMA oku yaaraganiise Yehu naagira ati: Batabani baawe baryashutama aha kitebe ky'obugabe okuhitsya aha bwijukuru bwa kana. Kandi nikwo kyabaire.

13 # 1 Bag 16:24; 2 Bag 15:1. Omu mwaka gwa makumi ashatu na mwenda ogw'omu busingye bwa Uziya omugabe wa Yuda, Shalumu mwene Yabeshi akatandika kutegyeka; yaategyekyera okwezi kumwe omuri Samaria. 14Bwanyima Menahemu mwene Gaadi yaaruga Tiruza, yaija Samaria, yaitirayo Shalumu mwene Yabeshi, yaategyeka omu mwanya gwe. 15Endiijo mirimo ya Shalumu yoona, n'okugoma oku yaagomire, reeba bihandiikirwe omu kitabo ky'eby'omu busingye bw'abagabe ba Israeli. 16Bwanyima omu biro ebyo Menahemu akateera Tifusa, yaagicwekyereza n'abaabaire barimu boona, n'ebyaro byayo byona okuruga Tiruza okuhika aha myatano yaayo; eki yaagicwekyerereize n'ahabw'okuba bakanga kumwigurira amarembo, kandi n'abakazi baamwo abaabaire baine enda yaabashatura aha nda.

17Omu mwaka gwa makumi ashatu na mwenda ogw'omu busingye bwa Uziya omugabe wa Yuda, Menahemu mwene Gaadi akatandika kutegyeka Israeli, yaategyekyera emyaka ikumi omuri Samaria. 18Yaakora ebirikwangwa MUKAMA; omu biro bye byona tiyaareka bibi bya Yeroboamu mwene Nebati ebi yaasiisiise Israeli. 19#1 Bus 5:26. Eizooba rimwe Puuli omugabe wa Asiria yaateera egyo nsi; Menahemu yaamuhongyera etalanta z'efeeza rukumi, ngu amuhwere abone kuhama omu bugabe bwe. 20Kandi ezo mpiiha Menahemu akaba aziihire omu batungi boona ab'omuri Israeli, buri muntu omuribo shekeli z'efeeza makumi ataano, ngu abone kuziha ogwo mugabe wa Asiria. N'ahabw'ekyo omugabe wa Asiria yaakuba yaagarukayo, tiyaaguma muri egyo nsi. 21Mbwenu endiijo mirimo ya Menahemu n'ebi yaakozire byona, tibihandiikirwe omu kitabo ky'eby'omu busingye bw'abagabe ba Israeli? 22Menahemu yaagwejegyera, yaashanga baishenkuru; omutabani Pekahia yaategyeka omu mwanya gwe. 23Omu mwaka gwa makumi ataano ogw'omu busingye bwa Uziya omugabe wa Yuda Pekahia mwne Menahemu akatandika kutegyekyera Israeli omuri Samaria; yaamar aemyaka ebiri ari aha ngoma. 24#1 Bag 14:16. Yaakora ebirikwangwa MUKAMA, tiyaareka bibi bya Yeroboamu mwene Nebati, ebi yaasiisiise Israeli. 25Bwanyima Peeka mwene Remalia, omukru w'engabo ze, yaamugiira omu naama, yaamwitira Samaria omu kigo ky'omu kikaari ky'omugabe. Ku yaaherize kumwita, yaategyeka omu mwanya gwe. 26Mbwenu endiijo mirimo ya Pekahia n'ebi yaakozire byona, bikahandiikwa omu kitabo ky'eby'omu busingye bw'abagabe ba Israeli.

27Omu mwaka gwa makumi ataano ogw'omu busingye bwa Uziya omugabe wa Yuda Peeka mwene Remalia akatandika kutegyekyera Israeli omuri Samaria, yaamara emyaka makumi abiri ari aha ngoma. 28Yaakora ebirikwangwa MUKAMA, tiyaareka bibi bya Yeroboamu, ebi yaasiisiise Israeli.

29 # 1 Bag 15:20; 2 Bag 16:7; 1 Bus 5:6, 26. Omu biro bya Peeka omugabe wa Israeli Tigulaasi-pileseeri omugabe wa Asiria yaija, yaakwata Iyooni, Abeelibesi-maaka, Yanoa, Kedeshi, Hazori, Gileadi na Galilaaya, ensi yoona eya Nafutaali; kandi abantu yaabatwara Asiria bari enkwatwa. 30#2 Bag 17:1. Bwanyima Hoshea mwene Ela yaagiira Peeka mwene Remalia omu naama, yaamuteera, yaamwita; yaatandika kutegyeka omu mwanya gwe omu mwaka gwa makumi abiri ogw'omu busingye bwa Yosamu mwene Uziya. 31Mbwenu endiijo mirimo ya Peeka n'ebi yaakozire byona bikahandiikwa omu kitabo ky'eby'omu busingye bw'abagabe ba Israeli. 32Omu mwaka gwa kabiri ogw'omu busingye bwa Peeka mwene Remalia omugabe wa Israeli Yosamu mwene Uziya omugabe wa Yuda akatandika kutegyeka. 33#2 Bus 27:1, 2. Obu yaatandikire kutegyeka, akaba ahikize emyaka makumi abiri n'etaano, yaamara emyaka ikumi na mukaaga ari aha ngoma omuri Yerusaalemu. Kandi nyina akaba naayetwa Yerusha mwne Zadoki. 34#2 Bag 15:3; 2 Bus 27:6. Akakora ebirikusiimwa MUKAMA, nk'ebi Uziya ishe yaakozire byona. 35#2 Bag 12:3; 2 Bus 27:3. Kwonka emyanya mikuru ey'okuramizamu tiyaasheenywa; kureka abantu bakaguma bagitambiramu ebitambo, bagyotereramu obubaane. Kandi yaayombeka eirembo ry'ekikaari kya MUKAMA ery'aharuguru.

36Mbwenu endiijo mirimo ya Yosamu n'ebi yaakozire byona tibihandiikirwe omu kitabo ky'eby'omu busingye bw'abagabe ba Yuda? 37#2 Bag 16:5; Isa 7:1. Omu biro ebyo MUKAMA akatandika kutuma Rezini omugabe wa Siria na Peeka mwene Remalia kurwanisa Yuda. 38Bwanyima Yosamu yaagwejegyera, yaashanga baishenkuru, baamuziika hamwe nabo omu rurembo rwa Daudi ishenkuru; Ahazi omutabani yaategyeka omu mwanya gwe.

Currently Selected:

2 Abagabe 15: RR64

Highlight

Copy

Compare