1 Abatesalonika 2

Emitwarize ya Paulo omuribo

1Ahakuba naimwe, B'eishe-emwe, nimumanya ngu okubataayaayira kwaitu tikurabaire kwa busha; 2#Byak 16:20-24; 17:1-5. kwonka, n'obu turaabe twabonabonesiibwe tukahemangurwa munonga omuri Filipi, nk'oku murikumanya, tukagira obumanzi omuri Ruhanga waitu kubabuurira engiri ye omu kuhakanisibwa kwingi. 3Mumanye ngu okubuurira kwaitu ti kw'okuhabya, ti kw'ebihagaro, kandi tikurimu bugobya; 4#Gal 1:10. kureka, nk'oku twasiimirwe Ruhanga kukwatsibwa engiri, nikwo tugamba, ti habw'okushemeza bantu, kureka okushemeza Ruhanga ocaaka emitima yaitu. 5#Byak 20:33; 2 Pet 2:3. Nimumanya ngu titukakoresaga bigambo by'okushunga, n'obu byakuba eby'okushwekyerera okwetenga okubi, Ruhanga niwe kareebi; 6#Yoh 5:41, 44. kandi titukendaga bantu kutuha ekitiinisa, yaaba imwe, nari abandi, n'obu turaabe twabaire tushemereire kubarusya nk'entumwa za Kristo. 7Kwonka tukatwaza gye omuriimwe, nk'oku omurezi arera abaana be. 8N'ahabw'ekyo, ahabw'okubasaasibwa munonga, tukashemerererwa okubaha, ti ngiri ya Ruhanga yonka, kureka n'okuhayo amagara gaitu, ahabw'okuba mukahinduka abaitu ab'aha mara.

9 # 1 Kor 4:12. B'eshe-emwe, nimwijuka okukora kwaitu n'okufa kubi kwaitu; tukaba tukora nyomushana na nyekiro, ngu tutagira ou twarusya omuriimwe, nitubabuurira engiri ya Ruhanga. 10Imwe muri baakareebi, hamwe na Ruhanga, abarikuhamya emitwarize yaitu ahariimwe abarikwikiriza, ku yaabaire eri erikwera, ey'okuhikiirira, kandi etarikugaywa; 11#Byak 20:31. ahakuba nimumanya oku twabaire twehnangiriza omuntu weena omuriimwe nitubagumya, kandi nitubaragiira, nk'oku omushaija ahana abaana be, 12#2 Tes 1:5. ngu mutwaze nk'oku kishemereire aba Ruhanga orikubeeta kutaaha omu bukama bwe n'ekitinisa kye.

13Kandi hoona eki tusiimira Ruhanga obutoosha n'eki; ahakuba, ku mwahuriire ekigambo ky'engiri ya Ruhanga eki twabagambiire, mwakyakiira; kandi timwakyakiira nk'ekigambo ky'abantu, kureka nk'ekigambo kya Ruhanga ekirikukora omuriimwe abarikwikiriza; kandi omu mazima nikwo kiri. 14Kandi, B'eishe-emwe, mukakuratira amakanisa ga Ruhanga aga Buyudaaya agari omuri Kristo Yesu; ahakuba ebi mwabonabonesiibwe beene waanyu bikashusha nk'ebi ab'ago makanisa baabonabonesiibwe Abayudaaya, 15#Byak 7:52. abaitsire Mukama waitu Yesu na baanabi, naitwe bakatubinga, bakagwisa kubi Ruhanga, bakaba abazigu b'abantu boona, 16#Mat 23:32, 33. nibatuzibira kubuurira Abanyamahanga eby'okujunwa, ngu babone kuhikiiriza batyo obutoosha orugyero rw'ebibi byabo. Kwonka ekiniga kya Ruhanga kiizire kubamariraho kimwe.

Paulo okubagirira orushusho

17Kwonka itwe, B'eishe-emwe, ku twabaihirweho okumara omwanya mukye, omu mubiri ti mu mutima, twayeyongyera munonga kugira orushusho rw'okwenda kureebana naimwe; 18ahakuba tukamariirira kwija owaanyu, nangwa nyowe Paulo nkenda kwija, ti rimwe ni kabiri; kwonka Sitaane yaatuzibira. 19#Fil 4:1. Mbwenu amatsiko gaitu niki, nari okushemererwa kwaitu nari ekirunga kyaitu eky'okwesiimiraho? Tiimwe, omu maisho ga Mukama waitu Yesu ku ariija? 20Ahakuba niimwe kitiinisa kyaitu n'okushemererwa kwaitu.

Currently Selected:

1 Abatesalonika 2: RR64

Highlight

Copy

Compare