1 Samueli 22

Daudi okuhungira omu nyanga

1 # 2 Sam 23:13. Bwanyima Daudi yaarugayo, yaahungira omu nyanga ya Adulaamu; beene waabo n'ab'omu ka ya ishe boona ku baakihuriire, baashuuma, baamushangayo. 2Omuntu weena owaabaire ari omu naku, n'owaabaire aine amabanja, n'owaabaire aine eki arikwetomboita, baateeranira ah'ari; yaaba omukuru waabo; kandi abaamweteeraniireho baahika abantu nka magana ana.

3 # Kur 20:12; Enf 10:1; Efe 6:2. Bwanyima Daudi yaarugayo, yaaza Mizipe omuri Moabu; yaagira omugabe wa Moabu ati: Ninkweshengyereza, oikirize tata na maawe bafurukire kunu, batuure naiwe, okuhitsya ahu ndaamanyire eki Ruhanga arankorere. 4Yaabatsigira omugabe wa Moabu, baaguma nawe ebiro byona ebi Daudi yaamazire omu kigo. 5#2 Sam 24:11. Bwanyima nabi Gaadi yaagira Daudi ati: Reka kuguma omu kigo; rugamu oze omu nsi ya Yuda. Daudi nikwo kurugayo, akaza omu kibira kya Heresi.

Saulo okwita abanyamurwa naabatura okuhwera Daudi

6Eizooba rimwe Saulo akaba ashutami Gibea ahansi y'omunyinya omuri Raama, aine eicumu omu ngaro, n'abagaragwa be boona beemereire bamwehinguririize. Yaahurira ku Daudi abonekire n'abashaija abu yaabaire aine. 7Saulo yaabuuza abagaragwa be abamwehinguririize ati: Imwe Babenyamiini 'mwe, nimuhurire! Hari nimugira ngu mwene Yese ogwo naija kuha buri muntu omuriimwe emisiri n'emizaabibu, kandi mwena nikwo aribagira abakuru b'engabo rukumi-rukumi n'ab'eigana-igana, 8#1 Sam 23:21. mwaza kuza omu naama kungomera? Tihariho n'omwe orikummanyisa ku mutabani wangye ari omu naama na mwene Yese; kandi tihariho n'omwe omuriimwe orikunsaasibwa, nari orikummanyisa ku mutabani wangye angomeseize omugaragwa kundwanisa, akangwera, nk'oku angwereire hati. 9#1 Sam 21:1, 7. Ahonaaho Doegi Omunyaedomu, owaabaire ayemereire aha rubaju rw'abagaragwa ba Saulo, yaagira ati: Ndeebire mwene Yese naija Noobu, owa Ahimeleki mwene Ahitubu. 10#1 Sam 21:6, 9. Ahimeleki yaamuhanuuriza ahari MUKAMA, yaamuha eby'okurya, kandi yaamuha rurara ya Goliasi Omufilistia.

11Omugabe ku yaakihuriire, yaatuma Ahimeleki omunyamurwa, mwene Ahitubu, n'ab'enju ya ishe boona, abanyamurwa abaabaire bari Noobu. Boona baija aha mugabe. 12Saulo yaagira ati: Hurira, iwe mwene Ahitubu! Onu yaamugarukamu ati: Gamba, Nyakusinga! 13Saulo yaamugira ati: Ahabw'enki iwe na mwene Yese mungiiriire omu naama, okamuha emigaati na rurara, kandi okamuhanuuriza ahari Ruhanga, ngu aimukye kundwanisa, n'okungwera, nk'oku angwereire hati? 14#1 Sam 19:4, 5. Ahimeleki yaagarukamu omugabe ati: Beitu omu bagaragwa baawe boona, n'oha orikwesigwa nka Daudi, mukwe w'omugabe, oshutama omu mibonano y'enaama zaawe, kandi ow'ekitiinisa omu ka yaawe? 15Noogira ngu hati nibwo naatandika kumuhanuuriza ahari Ruhanga? Ngaaha! Omugabe arekye kwomesereza omwiru we ekintu kyona, n'obu baakuba ab'enju ya taata boona; ahakuba omwiru waawe taine ki arikumanya ahari ebyo byona, yaaba bingi nari bikye. 16Omugabe yaagira ati: Iwe Ahimeleki, okufa kwo noija kufa, n'ab'enju ya sho boona. 17Yaagaruka yaagira abarinzi abaabaire beemereire bamwehinguririize, ati: Muhindukye, mwite abanyamurwa ba MUKAMA, ahakuba nabo bakwataniise na Daudi, kandi bakamanya ku yaahungire, tibaakimmanyisa. Kwonka abagaragwa b'omugabe baayanga kugorora emikono yaabo kwita abanyamurwa ba MUKAMA. 18#1 Sam 2:31. Omugabe yaagira Doegi ati: Hinduka ogurukire abo banyamurwa, obaite. Doegi yaahinduka, yaabagurukira, yaabaita; eryo izooba yaita abantu abaabaire bajwara efodi ya kitaani makumi munaana na bataano. 19Bwanyima yaacwekyereza Noobu orurembo rw'abanyamurwa na rurara; abashaija n'abakazi, abaana n'abarikwonka, ente, endogoya n'entaama ebyabaire birimu yaabiitsa rurara.

20 # 1 Sam 23:6. Kwonka omwe ahari batabani ba Ahimeleki mwene Ahitubu orikwetwa Abiasaari yaahonokaho, yaahunga, yaakurata Daudi. 21Abiasaari yaagambira Daudi ku Saulo aitsire abanyamurwa ba MUKAMA. 22Daudi yaagira Abiasaari ati: Buri, obu Doegi Omunyaedomu yaabaire ariyo, nkamanyira kimwe ku arikwija kugambira Saulo. N'ahabw'ekyo ab'eka ya sho boona niinye bazizire. 23#1 Bag 2:26; Yoh 15:20, 21. Mbwenu guma naanye, otatiina; ahakuba orikumpiiga kuunyita, naiwe niwe arikukuhiiga kukwita; mbwenu obu wampikire, tokifa.

Currently Selected:

1 Samueli 22: RR64

Highlight

Copy

Compare