1 Samueli 10
10
Saulo okushukwaho amajuta okuba omugabe
1 #
1 Sam 16:13; Bir 32:9. Ahonaaho Samueli yaakwata eihembe ry'amajuta, yaagamushuka aha mutwe, yaamunywegyera, yaagira ati: MUKAMA tiyaakushukaho amajuta kuba omugabe w'abantu be Israeli? 2Eri izooba ku orandugyeho, noija kubugana abashaija babiri aha kituuro kya Rakeeli, ahari Zeliza omu mwatano gwa Benyamiini, bakugire bati: Endogoya ezi obaire ogiire kusherura, zibonekire; mbwenu sho takyemereize mutima ahabw'endogoya, kureka agwemereize ahabwawe, naagira ati: Mbwenu ngire nta ahabw'omwana wangye? 3Bwanyima orugye aho, ogumizemu; ku oraahikye aha mwela gwa Tabora, noija kubugana abashaija bashatu nibainamuka Beseeli ahari Ruhanga, omwe ayekoreire abaana b'embuzi bashatu, ondi aine emigaati eshatu, n'ondiijo ayekoreire efurebe ya viinyo; 4bakuramutsye, bakuhe emigaati ebiri, ogyakiire. 5#2 Bag 3:15. Bwanyima noija kuhika aha kibungo kya Ruhanga, ahu engabo z'Abafilistia ziteire orusiisira; ku oraahikye omu rurembo, noija kubuganamu omutwe gwa baanabi nibaruga omu mwanya mukuru gw'okuramizamu, endingiri n'ebitaasa n'emikuri n'enanga bibeebembeire; kandi noija kushanga nibaragura. 6#Kub 11:25; 1 Sam 19:23. Omwoyo wa MUKAMA naija kukwijaho n'amaani, oragure nabo, ohindukye omuntu musya. 7#Bar 6:12. Kandi obwo bumanyiso ku buraakuhikyeho, okore nk'oku kiraabe nikyetengwa; ahakuba Ruhanga ari naiwe. 8Bwanyima oshuume Gilugaali, ombandizeyo; naanye niinyija kukushangayo, kutamba ebitambo by'okwotsya n'eby'okusiima ahabw'obusingye; omareyo ebiro mushanju ontegyereize, okuhitsya obu ndaija, nkakushobororera eki oshemereire kukora.
9Ku yaateire ati Samueli amabega kumurugaho, Ruhanga yaamuha ogundi mutima; obw'okureeberaho obwo bwona bwahikiirira eryo izooba. 10#1 Sam 19:20. Ku baahikire ahari ekyo kibungo, omutwe gwa baanabi gwamubugana, Omwoyo wa Ruhanga yaamwijaho n'amaani, yaaragura nabo. 11#Mat 13:54. Boona abaabaire nibamumanya obunyakare, ku baareebire naaragura hamwe na baanabi, baagambirana bati: Beitu mwene Kiishi yaaba ata? Saulo nawe ari omuri baanabi? 12#Yoh 3:8. Omwe aha batwire omu mwanya ogwo yaabagarukamu naagira ati: Beitu shi ni beene oha? N'ahabw'ekyo kyahinduka enfumu, ngu: Saulo nawe ari omuri baanabi? 13Ku yaaherize kuragura, yaaza omu mwanya mukuru gw'okuramizamu.
14 #
1 Sam 14:50. Ishento wa Saulo yaamubuuza n'omwiru we ati: Mubaire mugiire hi? Yaamugarukamu ati: Tubaire tugiire kusherura endogoya; ku tureebire zitaaboneka, twaza owa Samueli. 15Ishento yaagaruka yaagira ati: Ninkweshengyereza, ngambira ebi Samueli akugambiire. 16Saulo yaagarukamu ishento ati: Atugambiriire kimwe ku endogoya zibonekire. Kwonka ebirikukwata aha by'obugabe, ebi Samueli agambire, tiyaabimugambira.
17 #
Bar 20:1; 1 Sam 11:15. Bwanyima Samueli yaayeta abantu kuteeranira Mizipa omu maisho ga MUKAMA; 18#Bar 6:8. yaagambira Abaisraeli ati: Oku nikwo MUKAMA Ruhanga wa Israeli arikugamba naagira ati: Nkaiha Abaisraeli Misri, naabajuna naabaiha omu mikono y'abanyamisri, n'omu mikono y'abagabe boona abaabaire nibabaita kubi; 19#1 Sam 8:7; 12:12. kwonka eri izooba mwayanga Ruhanga waanyu, obajuna omu kabi kaanyu koona n'omu busaasi bwanyu; mbwenu mwangira muti: Ngaaha, kureka otuteereho omugabe. N'ahabw'ekyo hati mweyorekye omu maisho ga MUKAMA muri omu nganda zaanyu n'omu nkumi zaanyu.
20 #
Yos 7:14. Atyo Samueli yairiza haihi enganda za Israeli zoona, oruganda rwa Benyamiini rwatooranwa. 21Yairiza haihi oruganda rwa Benyamiini bari omu miryango yaabo, omuryango gwa Matiri gwatooranwa; na Saulo mwene Kiishi yaatooranwa. Kwonka ku baamusherwire, tiyaaboneka. 22N'ahabw'ekyo baayongyera kwehanuuza ahari MUKAMA, nibamubuuza bati: Ogwo mushaija aizire aha? MUKAMA yaabagarukamu ati: Reeba, ayesherekire omu bintu. 23Baagyenda nibairuka, baamwihayo; ku yaayemereire ahagati yaabo, yaakira abantu boona aha mutwe, baamugarukira aha ibega. 24Samueli yaagira abantu boona ati: Nimureeba ou MUKAMA atooraine? Tihariho ori nkawe omu bantu boona. Abantu boona baateera akaari, nibagira bati: Omugabe nakaramaare!
25 #
Bir 17:14; 1 Sam 8:11. Bwanyima Samueli yaashobororera abantu emitwarize y'obugabe, yaagihandika omu kitabo, yaakibiika omu maisho ga MUKAMA. Samueli yaaraga abantu boona, buri omwe yaagaruka omu ka ye. 26Saulo nawe yaataaha owe Gibea, yaagyenda n'omutwe gw'amamanzi, abu MUKAMA yaakozire aha mutima, bamushendekyereize. 27#1 Sam 11:12; Byak 7:35, 51, 52; 1 Bag 4:21; 10:25. Kwonka abashaija bamwe abataine mugasho baagira bati: Omushaija ogu naabaasa ata kutujuna? Baamugaya, baayanga kumureetera entabaarutsyano. Kwonka we yaayehunamira.
Currently Selected:
1 Samueli 10: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
