1 Petero 5

Oku abakuru bashemereire kutegyeka ekanisa

1 # Rom 8:17. Mbwenu niinyehanangiriza abakuru omuriimwe, nk'omukuru mugyenzi waanyu, kareebi w'okubonabona kwa Kristo, kandi okwataniise naimwe ekitiinisa ekirishuuruurwa; 2#Byak 20:28. Muriise gye obusyo bwa Ruhanga, obu mwakwatsiibwe, mutaburiisa nk'abagyemirwe, kureka muburiise mweyendeire nk'oku Ruhanga arikukunda; ti habw'omururu mubi gw'okutunga ebintu, jureka mwine omutima ogurikukunda, 3#Tit 2:7. murekye kutegyekyesa eikama obusyo obu mwakwatsiibwe, kureka mube eky'okureeberaho aharibwo. 4Bwanyima Omuriisa omukuru ku aryorekwa, muryaheebwa ekirunga ky'ekitiinisa ekitarikuhunduuka. 5#Efe 5:21; Yoh 13:4, 14. Nikwo naimwe abato mworobere abakuru. Mwena mwezirikye obucureezi, mubone kuheerezana; ahakuba Ruhanga arwanisa ab'amaryo, kwonka abacureezi abaha omugisha.

6 # Yob 22:29. N'ahabw'ekyo mwecureeze ahansi y'omukono gwa Ruhanga ogw'amaani, obunaku ku burihika abatunguure. 7#Zab 55:22; Fil 4:6. Mumwegyekyerere okushoberwa kwanyu kwona, ahabw'okuba naabataho omutima. 8#Yak 4:7. Mwerinde; mugume nimureeba. Sitaane omuzigu waanyu naashooba nk'entare erikutsinda, naasherura ou araarye. 9Mumurwanise, muhamire omu kwikiriza kwanyu, nimumanya ngu ab'eishe-emwe abari omu nsi yoona nabo bahikwaho obusaasi nk'obwanyu. 10#1 Pet 1:6. Kandi Ruhanga ow'embabazi zoona, owaabeeteire ekitiinisa kye ekitahwaho omuri Kristo, ku muriheza kubonabonesibwa akaanya kakye, aryabagarura busya, abagumye, abahe amaani. 11Aheebwe obutegyeki ebiro n'ebiro. Amiina. 12Naabahandiikira nincwera ahagufu, nimpandiikisa Siluwano, ow'eishe-emwe orikwesigwa, nk'oku ndikuteekateeka; nimbeehanangiriza, kandi nimpamya ngu ezi nizo mbabazi za Ruhanga ez'amazima; mube nizo mwahamiramu. 13Ekanisa ya Babulooni eyaatooraimwe nkaimwe yaabaramutsya; kandi na Mako omwana wangye yaabaramutsya. 14Muramukanise okunywegyera kw'okukunda. Mugume n'obusingye, imwe mwena abari omuri Kristo.

Currently Selected:

1 Petero 5: RR64

Highlight

Copy

Compare