1 Abagabe 21

Ahabu okunyaga omusiri gwa Nabosi

1Kandi hakaba hariho omushaija orikwetwa Nabosi owa Yezereeli, owaabaire aine omusiri gw'emizaabibu haihi n'ekikaari kya Ahabu omugabe wa Samaria. 2#1 Sam 8:14. Bwanyima Ahabu yaagira Nabosi ati: Mpa omusiri gwawe gw'emizaabibu, ngugire ogw'okuhingamu emboga, ahabw'okuba guri haihi n'eka yangye; naanye niinyija kukuha ogundi musiri gw'emizaabibu ogurikuguhita; nari shi, ku oraabe nookisiima, nkuhe empiiha ezigushemereire. 3#Lev 25:23; Kub 36:7; Ezk 46:18. Nabosi yaagira Ahabu ati: Nikikabure nyowe okukuha obuhunguzi bwa baatatenkuru. 4#1 Bag 20:43. Ahabu yaagaruka omuka aine enaku, kandi agwirwe kubi ahabw'ekigambo eki Nabosi owa Yezereeli yaamugambira; ahakuba akamugira ati: Tindikwija kukuha buhunguzi bwa baatatenkuru. Yaabyama aha kitanda kye, ahugikire omushaya, yaayanga n'okurya.

5Bwanyima Yezebeeli omukazi we yaija, yaamubuuza ati: N'enki ekikugwisize kubi, kikakuzibira kurya? 6Onu yaamugarukamu ati: Ahabw'okuba naagira Nabosi owa Yezereeli nti: Mpa omusiri gwawe gw'emizaabibu, ngugure empiiha, nari hsi, ku oraabe nokisiima, nkuhe ogundi omu mwanya gwagwo; nawe yangarukamu ati: Tindikwija kukuha musiri gwangye. 7Omukazi we Yezebeeli yaamugarukamu ati: Reeba mihi, tiiwe orikutegyeka Israeli? Imuka orye, omutima gwawe gushemererwe. Nyowe niinyija kukuha ogwo musiri gwa Nabosi owa Yezereeli.

8 # 1 Bag 20:7; Rus 4:2; Est 3:12. Atyo Yezebeeli yaahandiika ebaruha omu iziina rya Ahabu, yaazitaho akamanyiso ka Ahabu, yaazitwekyera abakuru b'orurembo n'abakungu abaabaire batwire na Nabosi omuri orwo rurembo. 9Yaahandiika omuri ezo baruha ati: Murangirire abantu boona, beesiibyekwo, mute Nabosi omu maisho g'abantu omu mwanya ogurikureebwa; 10#Kur 22:28; Lev 24:16; Byak 6:11; 23:5. omu maisho ge mutemu abashaija babiri abataine ku bari, bamwomesereze nibagira bati: Okyeenire Ruhanga n'omugabe. Bwanyima mumushohoze aheeru, mumuteere amabaare, afe. 11Abashaija b'omuri orwo rurembo, abakuru baarwo n'abakungu abaabaire barutwiremu, baakora nk'oku Yezebeeli abatumireho omu baruha ze ezi abatwekyeire. 12Baarangirira abantu okwesiibyakwo, baata Nabosi omu maisho g'abantu omu mwanya ogurikureebwa. 13Bwanyima abo bashaija babiri abataine ku bari baija, baashutama omu maisho ga Nabosi, baamwomeserereza omu maisho g'abantu, nibagira bati: Nabosi akyeenire Ruhanga n'omugabe. Omuri ako kaanya baamushohoza aheeru y'orurembo, baamuteera amabaare, yaafa. 14Bwanyima baatuma ahari Yezebeeli bati: Nabosi baamuteera amabaare, yaafa.

15Yezebeeli, ku yaahuriire ngu Nabosi baamuteera amabaare, yaafa, yaagira Ahabu ati: Imuka, otware omusiri gw'emizaabibu ogu Nabosi owa Yezereeli abaire ayangire kukuguza; ahabw'okuba Nabosi yaafa, takiriho. 16Ahonaaho Ahabu ku yaahuriire ngu Nabosi yaafa, yaimuka, yaashuuma omuri ogwo musiri gw'emizaabibu ogwa Nabosi owa Yezereeli kugutwara.

Eliya okutumwa kukyeena Ahabu

17 # Zab 9:12. Bwanyima ekigambo kya MUKAMA kyaija ahari Eliya owa Tishubi, nikigira kiti: 18Imuka oshuume, obugane Ahabu omugabe wa Israeli, otwire Samaria; reeba, ari omu musiri gwa Nabosi gw'emizaabibu, ogu yaashuuma kutwara; 19#1 Bag 22:38; 2 Bag 9:26. omugire oti: Oku nikwo MUKAMA arikugamba naagira ati: Oitsire, kandi waataho nokunyaga? Kandi omugire oti: Oku nikwo MUKAMA arikugamba. Omu mwanya ogu embwa zikombeiremu eshagama ya Nabosi, nimwo zirikombera eshagama yaawe wenka. 20#1 Bag 18:17; 2 Bag 17:17. Ahabu yaagira Eliya ati: Iwe muzigu wangye 'we, wandeeba? Yaamugarukamu ati: Naakureeba, ahakuba okeehayo kukora ebirikwangwa MUKAMA. 21#1 Bag 14:10; 2 Bag 9:8. Niinyija kukureetaho akabi, nkwihireho kimwe, nkumareho buri mwana weena ow'omwojo, yaaba muhuuku nari ow'obusingye omuri Israeli; 22#1 Bag 14:16; 15:29; 16:3, 11. ndyagira enju yaawe nk'eya Yeroboamu mwene Nebati, kandi nk'eya Baasha mwene Ahiya, ahabw'okungwisa kubi, n'okucumuza Abaisraeli. 23#2 Bag 9:36. Kandi ebya Yezebeeli nabyo, MUKAMA yaabigambaho ati: Embwa ziryariira Yezebeeli haihi n'orugo rw'amabaare orw'orurembo Yezereeli. 24#1 Bag 14:11; 16:4. Omuntu wa Ahabu weena origwa omu rurembo aryariibwa embwa; kandi origwa omu ishwa aryashokoorwa amahungu.

25 # 1 Bag 16:30-33. Tihariho n'omwe owaayehaireyo kukora ebirikwangwa MUKAMA nka Ahabu, ou Yezebeeli omukazi we yaayohize. 26#2 Bag 17:12; 21:11; Kut 15:16. Akakora ebihagaro bingi munonga omu kukuratira ebishushani ebirikuramibwa, nk'ebi Abaamori baakozire byona, abu MUKAMA yaabingire omu maisho g'Abaisraeli, oku byabaire biri. 27#2 Sam 12:16. Ahabu ku yaahuriire ebigambo ebyo, yaataagura ebijwaro bye, yaajwara ebiguniya, yaayesiibyakwo abyami omu biguniya, yaagyenda ayeinamiriire. 28Bwanyima ekigambo kya MUKAMA kyaija ahari Eliya owa Tishubi, nikigira kiti: 29#2 Bag 9:25. Oreebire Ahabu oku ayecureize omu maisho gangye? Ahabw'okwecureeza omu maisho gangye, tindireeta kabii omu busingye bwe; kureka omu busingye bw'omutabani nimwo ndireetera akabi aha nju ye.

Currently Selected:

1 Abagabe 21: RR64

Highlight

Copy

Compare