1 Abagabe 15

Ebya Abiyamu omugabe wa Yuda

1 # 2 Bus 13:1-2. Omu mwaka gwa ikumi na munaana ogw'omu busingye bw'omugabe Yeroboamu mwene Nebati, Abiyamu akatandika kutegyeka Yuda. 2Yaategyekyera emyaka eshatu omuri Yerusaalemu. Nyina akaba naayetwa Maaka, muhara wa Abishalomu. 3#1 Bag 8:61; 11:4. Abiyamu ogwo yaaguma naagyendera omu bibi byona ebi ishe owaamubandiize yaakozire; ahabw'okuba omutima gwe gwona gukaba gutari gw'amazima ahari MUKAMA Ruhanga we, nk'ogwa ishenkuru. 4#1 Bag 11:36. Kwonka ahabwa Daudi, MUKAMA Ruhanga we yaamuha etabaaza omuri Yerusaalemu, yaataho omwana we owaamuhunguiire, kandi yaahamya Yerusaalemu, 5#2 Sam 11:14, 15; 12:9; 1 Bag 9:4; 14:8. ahabw'okuba Daudi akakora ebirikusiimwa MUKAMA, tiyaateshuka kyona eki yaamuragiire ebiro byona eby'amagara ge, okwihaho ebya Uriya Omuhiiti. 6Kandi haaguma nihabaho obweme ahagati ya Rehoboamu na Yeroboamau ebiro byona eby'amagara ge. 7#2 Bus 13:2-20, 22. Endiijo mirimo ya Abiyamu n'ebi yaakozire byona, tibihandiikirwe omu kitabo ky'eby'omu busingye bw'abagabe ba Yuda? Kandi haaguma nihabaho obweme ahagati ya Abiyamu na Yeroboamu. 8#2 Bus 14:1. Bwanyima Abiyamu yaagwejegyera, yaashanga baishenkuru, baamuziika omu rurembo rwa Daudi. Omutabani Asa yaategyeka omu mwanya gwe.

Ebyabaireho omu busingye bwa Asa

9Omu mwaka gwa makumi abiri gw'omu busingye bwa Yeroboamu omugabe wa Israeli, Asa akatandika kutegyeka Yuda; 10yaategyekyera emyaka makumi ana na gumwe omuri Yerusaalemu. Kandi nyina akaba naayetwa Maaka, muhara wa Abishalomu. 11#2 Bus 14:2. Asa ogwo akakora ebirikusiimwa MUKAMA nk'oku Daudi ishenkuru yaakozire. 12#1 Bag 14:24; 2 Bus 15:8. Yaabinga ebitingwa omu nsi, kandi yaihaho ebishushani byona ebi baishenkuru baakozire. 13#2 Bus 15:16-18. Kandi yaabinga na nyima Maaka, yaamwiha aha bwanyin'omugabe, naamutura ekishushani ky'ekihagaro eki yaakoreire Ashera; ekyo kishushani Asa yaakitema, yaakyokyeza aha kagyera Kidirooni.#Kur 32:20. 14#1 Bag 22:43; 2 Bag 12:3; 14:4. N'ekya buzima emyanya mikuru ey'okuramizamu teraihirweho. Kwonka omutima gwa Asa gwaguma guri ogw'amazima ahari MUKAMA ebiro bye byona. 15#1 Bag 7:51. Yaareeta omu nju ya MUKAMA ebintu ebi ishe yaashoroire, n'ebindi ebi yaashoroire ahabwe, efeeza, ezaabu n'ebintu by'okukoresa.

16Kandi haaguma nihabaho obweme ahagati ya Asa na Baasha omugabe wa Israeli ebiro byabo byona. 17#2 Bus 16:1-6. Baasha ogwo omugabe wa Israeli yainamuka, yaateera Yuda, yaayombeka Raama, ngu azibire omuntu weena okuruga omu bugabe bwa Asa omugabe wa Yuda, nari okubwijamu. 18#1 Bag 11:24; 14:26; 2 Bag 12:18. Bwanyima Asa yaatwara efeeza n'ezaabu zoona, ezaabaire zitsigaire omu bintu by'obuguzi bwingi ebibiikirwe omu nju ya MUKAMA, n'ebindi ebibiikirwe omu nju y'omugabe, yaabiha abagaragwa be; yaabatuma ahari Benihadadi mwene Taburimooni, mwijukuru wa Hezioni, omugabe wa Siria, owaabaire atwire Damasiko, naagira ati: 19#2 Bus 16:7. Ka tukore endagaano y'okukwatanisa nyowe naiwe, nk'oku tata na sho baabaire bagiine. Kandi reeba naakutwekyera ekiconco ky'efeeza n'ezaabu; irooko oite endagaano yaawe na Baasha omugabe wa Israeli, abone kundugaho. 20Benihadadi yaikiriza eki omugabe Asa yaamushaba, yaayohereza abakuru b'amahe ge kuteera endembo za Israeli, yaakubuura Iyooni, Daani, Abeeli-besimaaka, na Kineroosi yoona hamwe n'ensi yoona eya Nafutaali. 21Baasha ku yaakihuriire, yaarekyera aho kwombeka Raama, yaaguma Tiruza. 22Bwanyima omugabe Asa yaarangirira omu Bayuda boona, tiyaagira u yaatsiga, baaza Raama, baihayo amabaare n'ebiti ebi Baasha yaabaire ayombekyeise; omugabe Asa yaabyombekyesa Geeba ya Benyamiini na Mizipa. 23#2 Bus 15:11-14. Mbwenu endiijo mirimo yoona eya Asa, amaani ge goona, ebi yaakozire byona, n'endembo ezi yaayombekire, tibihandiikirwe omu kitabo ky'eby'omu binsigye bw'abagabe ba Yuda? Kwonka omu bugurusi bwe ebigyere bye bikarwara. 24#2 Bus 17:1. Bwanyima Asa yaagwejegyera, yaashanga baishenkuru, yaaziikwa hamwe nabo omu rurembo rwa Daudi ishenkuru; Yehoshafaati omutabani yaategyeka omu mwanya gwe.

Ebya Nadabu na Baasha, abagabe ba Israeli

25 # 1 Bag 14:20. Omu mwaka gwa kabiri ogw'omu busingye bwa Asa omugabe wa Yuda, Nadabu mwene Yeroboamu akatandika kutegyeka Israeli; yaategyekyera Israeli emyaka ebiri. 26#1 Bag 12:30; 14:16. Yaakora ebirikwangwa MUKAMA, yaagyendera omu muhanda gwa ishe, n'omu kibi kye eki yaasiisiise Abaisraeli.

27 # 1 Bag 14:14. Bwanyima Baasha mwene Ahiya ow'omu ruganda rwa Isakaari yaamugiira omu naama, yaamwitira Gibesooni, ey'Abafilistia; ahakuba Nadabu na Israeli yoona bakaba bagotsire Gibesooni. 28Omu mwaka gwa kashatu ogw'omu busingye bwa Asa omugabe wa Yuda nibwo yaamwita, akategyeka omu mwanya gwe. 29#1 Bag 14:10, 14. Ku yaaherize ati kuza aha ngoma, yaita ab'enju ya Yeroboamu muntu weena orikwitsya, okuhitsya obu yaagicwekyereize, nk'ekigambo kya MUKAMA eki yaarabize omu mwiru we Ahiya owa Shiilo oku kyabaire kiri, 30ahabw'ebibi ebi Yeroboamu yaakozire, n'ebi yaasiisiise Abaisraeli, n'ahabw'okwitsa ekiniga MUKAMA, Ruhanga wa Israeli.

31Mbwenu endiijo mirimo ya Nadabu n'ebi yaakozire byona, tibihandiikirwe omu kitabo ky'eby'omu busingye bw'abagabe ba Israeli? 32Kandi haaguma nihabaho obweme ahagati ya Asa na Baasha omugabe wa Israeli ebiro byabo byona.

33Omu mwaka gwa kashatu ogw'omu busingye bwa Asa omugabe wa Yuda, Baasha mwene Ahiya akatandika kutegyeka Israeli yoona ari Tiruza, yaamara aha ngoma emyaka makumi abiri n'ena. 34Yaakora ebirikwanga MUKAMA, naagyendera omu muhanda gwa Yeroboamu, n'omu kibi kye eki yaasiisiise Abaisraeli.

Currently Selected:

1 Abagabe 15: RR64

Highlight

Copy

Compare