1 Eby'omu Busingye 28

Daudi okwehanangiriza abantu

1 # 1 Bus 11:10-47; 23:2; 27:1-15, 16-22, 25-31. Daudi yaateeranira Yerusaalemu abakuru ba Israeli boona, ab'enganda n'abategyeki b'emitwe y'abantu abaabaire baheereza omugabe omu mbu, n'abakuru b'engabo rukumi-rukumi, n'aba igana-igana, n'ababiiki b'ebintu by'omugabe, abarikureeberera amasyo ge n'ag'abatabani, hamwe n'abakuru b'ekikaari, n'abashaija bari ab'amaani amamanzi boona. 2#1 Bus 22:7; Zab 132:7; Isa 66:1. Bwanyima Daudi yaimuka, yaagira ati: Imwe beene tata n'abashaija bangye, mumpurire. Nkashangwa nkiinie aha mutima kwombekyera eshanduukye y'endaagano ya MUKAMA enju y'okugitamu, n'okuba akatebe k'ebigyere ka Ruhanga; kandi nikwo naabaire nyetegwire ntyo. 3#2 Sam 7:5, 13. Kwonka Ruhanga yangira ati: Torikwija kwombekyera iziina ryangye nju, ahabw'okuba ori omushaija omurwani, kandi okasheesha eshagama nyingi. 4#Kut 49:8; 1 Sam 16:12, 13; 1 Bus 5:2; 17:23, 27; Zab 78:68. N'obu kiraabe kyabaire kiri kityo, MUKAMA Ruhanga wa Israeli akantoorana omu ruganda rwa baatatenkuru rwona kuba omugabe wa Israeli ebiro byona; ahabw'okuba akatoorana Yuda kuba omwebembezi, omu ruganda rwa Yuda yaatoorana enju ya tata, kandi omuri beene tata yaaba niinye yaihamu, yanshemerererwa, yangira omugabe wa Israeli yoona. 5#1 Bus 3:1-9; 22:9. bwenu omuri batabani bangye boona, (ahabw'okuba Ruhanga akampa abaana b'aboojo baingi,) yaatooranamu mutabani wangye Sulemaani kuba niwe yaaza aha kitebe ky'obugabe bwa MUKAMA kutegyeka Israeli. 6#2 Sam 7:13, 14. Yangira ati: Mutabani waawe Sulemaani niwe aryombeka enju yangye, n'ebikaari byangye, ahabw'okuba mmutooraine kuba omwana wangye, naanye nkaba ishe. 7#1 Sam 17:23, 27; 22:13. Ku arigumizamu kworobera ebiragiro byangye n'ebi naataireho, nk'oku ari hati, ndyahamya obugabe bwe. 8N'ahabw'ekyo hati omu maisho ga Israeli yoona, nigwo mutwe gw'abantu ba MUKAMA abateeraine, kandi omu maisho ga Ruhanga waitu orikutuhurira, mute omutima aha biragiro bya MUKAMA Ruhanga waanyu byona, mubiijukye, mubone kukubuura ensi egi enungi, nyentsya mugitsigire abaana baanyu abaribakurata, ebe obuhunguzi bwabo ebiro byona.

9 # 1 Sam 16:7; 1 Bag 8:61; 2 Bus 15:2. Naiwe Sulemaani mwana wangye, omanye Ruhanga wa sho, ogume omuheereze n'omutima gwawe gwona kandi ogwekundiire; ahabw'okuba MUKAMA acaaka emitima yoona, kandi amanya enaama zoona n'ebiteekateeko byona. Ku orimusherura, oryamubona; kwonka ku orimurugaho, aryakucwa obutagaruka. 10#1 Bus 28:20; Ezr 10:4; Hag 2:4. N'ahabw'ekyo mbwenu oyerinda; ahabw'okuba MUKAMA akutooraine kwombekyera Obutaaho bwe enju: ba ow'amaani, ogikore.

Daido okuha Sulemaani eky'okureeberaho ky'enju

11 # Kur 25:17, 40; 1 Bag 6:3; 1 Bus 28:19; 2 Bus 3:4. Bwanyima Daudi yaaha omutabani Sulemaani eky'okureeberaho ky'ekisasi kya hekalu, n'eky'amaju gaayo, n'eky'amabiikiro gaayo, n'eky'ebishengye byayo eby'ahaiguru, n'eby'omunda, n'eky'ekishengye ky'ekitebe ky'okusaasira; 12#1 Bus 26:20. kandi eky'okureeberaho ky'ebi yaabaire aine omu mutima byona, eky'ebikaari by'enju ya MUKAMA, n'ebishengye byona ebigyehinguririize, n'amabiikiro g'enju ya Ruhanga, n'ag'ebintu by'emitoijo ebyashoroirwe; 13#1 Bus 23:6; 24:1. kandi n'eby'embu z'abanyamurwa n'Abaleevi, n'eby'emirimo yoona ey'okukorerwa omu nju ya MUKAMA; n'eby'ebintu byona eby'okukoresibwa omu nju ya MUKAMA. 14Kandi yaamugambira oburemeezi bw'ezaabu ahabw'ebintu by'ezaabu eby'okukoresa emirimo yoona, n'oburemeezi bw'efeeza ahabw'ebintu by'efeeza ahabw'emirimo yoona, 15#Kur 25:31-37. n'oburemeezi bwe'ekikondo ky'amatabaaza n'amatabaaza gaakyo eby'ezaabu, n'oburemeezi bw'ezaabu ahabw'ekikondo kyona n'amataabaza gaakyo, nka buri kikondo oku kirikoresibwa omu buheereza bwabo, 16n'oburemeezi bw'ezaabu za buri meeza y'emigaati y'okumurikwa, n'obw'efeeza ahabw'emeeza z'efeeza, 17n'obw'ezaabu eshemeziibwe ahabw'eby'okwihuza enyama, n'enyabya, n'ebikopo; n'obw'ezaabu za buru bakuri y'ezaabu, n'obw'efeeza za buri bakuri y'efeeza; 18#1 Bag 6:23-28; Kur 25:18-22; 30:1. kandi n'eky'okureeberaho ky'eitambiro ry'okwotereraho obubaane, ery'okukorwa omu zaabu eshemeziibwe, n'oburemeezi bwayo; kandi n'eky'okureeberaho ky'ekigaari ky'ezaabu ekya baakerubi, abashashanwire amapapa gaabo, gakashweka eshanduukye y'endagaano ya MUKAMA. 19#Kur 25:40; 1 Bus 28:11, 12. Daudi yaagira ati: Ebyo byona nkabimanyisibwa ebyahandiikirwe omukono gwa MUKAMA; egyo niyo mirimo yoona nk'eky'okureeberaho kyayo oku kiri.

20 # 1 Bus 22:13; Yos 1:5. Bwanyima Daudi yaagira omutabani Sulemaani ati: Ba ow'amaani, ohame, okikore. Otatiina, kandi otahahaaza omutima; ahabw'okuba MUKAMA Ruhanga, niwe Ruhanga wangye, ari hamwe naiwe; tarikutsigaho, kandi tarikuhemukaho, okuhitsya ahu emirimo yoona ey'ebirikorwa omu nju ya MUKAMA erihwera. 21#Kur 35:25, 26; 36:1, 2; 1 Bus 24:26; 28:13. Kandi reeba, hariho embu z'abanyamurwa n'Abaleevi ahabw'omurimo gwona ogw'obuheereza bw'omu nju ya Ruhanga; kandi omuri egyo mirimo yoona, oryaba oine omuntu weena oyekundiire, omunyamwoga w'okukora omurimo gwa buri muringo; kandi n'abategyeki hamwe n'abantu boona baryaba bari omu bushoboorozi bwawe kuhurira eki orikubaragiira.

Currently Selected:

1 Eby'omu Busingye 28: RR64

Highlight

Copy

Compare