ARoma 1

Madhu owambeela

1Wa nyo aKirixtu muli oRoma. Di miyo Pawulo, mwiimeleli a Yesu Kirixtu. Mulugu ohugisakula wi gikale murumiwi, ogithoma wi galaleye Muselu Wapama waaye.#1.1 Moone Meerelo a Arumiwi 9.15; 13.2. 2Muselu oyo oliye ahiroromeliha wale odheela wa anamavuhulela aaye mMalebani Ootaleleya. 3Muselu Wapama onawoga dha Mwaanaye. Voowoga dha omuthu wa Mwaana oyo: oliye namabaliwelamo a Davidi,#1.3 Moone Samuweli a Nabiili 7.12-16; Matewuzhi 1.6. 4vano ohuthwiwa okala Mwaana a Mulugu ni owodha, odheela Muneba Woweela mwa ovenyihiwa waaye muukwani, oyo di Yesu Kirixtu Nabwiya eehu. 5Odheela mwa Kirixtu gihaakela mahala ni mvahi wookala murumiwi wi gaakamihedhege athu a malogo maatene eroromelege, yiiwelelege wi ndina naaye niriihiwege.#1.5 Moone Meerelo a Arumiwi 26.16-18. 6Nyo teto muli vaari va athu owiithaniwa wi mukale a Yesu Kirixtu.

7Ginowuulebelani nyo mwaatene muli oRoma, nyo Mulugu onoodhiveliiyeni teto wuwiithaniliiyeni wi mukale athu aaye ootaleleya.

Mulugu Babiihu ni Nabwiya Yesu Kirixtu yuuvaheni mahala ni murenddele mmirimani mweenyu.

Pawulo onofuna wawoona aKirixtu a oRoma

8Vowambeela, odheela mwa Yesu Kirixtu ginomutthettheela Mulugu aaga mwaha wa nyo mwaatene, vowi elabo yaatene enowoga dha nroromelo neenyu. 9Mulugu ginamweebedhiimi ni muneba waaga waatene voolaleya Muselu Wapama wa Mwaanaye, di namoona aaga wi ginowuwuubuwelelanive mmalobeloni aaga maatene, 10gimulobaga Mulugu wi arumeedhela dhiinova gifwanye mpatha woodha wa nyo.

11Ginorabulela wuwoonani wi guugaweleni mvahi mwa muneba woolibiha dhigumi dheenyu. 12Ela sowi vinakaliihu vamohi nilibihanege. Nyo mugilibihe ni nroromelo neenyu, miyo guulibihagani ni nroromelo naaga. 13Addibilaga, arogoraga, munone wi dila dhijinjidhene gahifuna odha wa nyo, mbwenye ofiyedha dhiinova dhihikala dhinagihiiha. Ginafuna vaari va nyo gidhe gihiddevo mabasa enadhiiha dhoohadda wona mweereliiwa vaari va athu amohi a malogo mamohi.

14Gihiwaddihedhiwa waalaleyela aatene: AGerego ni ale ehili aGerego, atthottho ni oohunonelamo. 15Mwahaya buuyene ginafuneliimi teto wuulaleyelani Muselu Wapama wa nyo muli oRoma.

Kopolo ya Muselu Wapama

16Miyo kaginakanna manyazo ni Muselu Wapama, eehi, vowi si kopolo ya Mulugu enaavulumusa athu aatene enaroromela, wambeela aZhudewu, ofiyedha wa aGerego. 17Muselu Wapama ola onavuhulela wogoowa wa Mulugu. Wogoowa wula onaakeliwa mwa nroromelo, onakaraateyave munroromeloni baahi. Vowi Maleba yiire: <<Muthu owogoowa onokalanaave egumi odheela mwa nroromelo>>.#1.17 Habakuki 2.4.

Owali wa Mulugu mwaha wa dhoothega

18Vano teto owali wa Mulugu onovuhuleleya odhulu. Onoludduwa mwaha wa dhohogoowa dhaatedhene ni ohumuriiha Mulugu wa athu. Odheela mwa dhohogoowa dheewa enopideedha ebaribari. 19Vowi dhinaandeya wi aliwa enone dha Mulugu dhili dhowooneya vaari va aliwa mwaha wi Mulugu mwiinyeene ohawooneyihedha. 20Vowi okuma omapaddusiwelo wa elabo ya vati athu yahikala edidelaga mikalelo miinddi dhohooneya dha Mulugu: Kopolo dhaaye dhoohumala teto omulugu waaye woohumala. Yoodidela vowoona dhedho Mulugu dhapaddusiliiye. Ndo kinna woothawela. 21Mwaha wi naari yamunonileve Mulugu, kayamuthithimihile naari omutthettheela wona mwafuneyeliiwa. Moohiyaniha, moobuwelelo eewa yahisadduwa okala eebeweene teto mirima dheewa dhoolodhowa mwahidhaala yiihi. 22Naari aliwa yiiraga wi ba tthottho, enosadduwa okala ataduwa. 23Ocenja omuthithimiha Mulugu oohukwa, waweebedhaga amilugu oosemiwa wona athu enakwa wona balame, aneenyama a meddo minnayi ni dhowiiburula.

24Bumwahaya Mulugu waapelekeliiye wi yiiregena dhoojeberuwe dhedho mirima dheewa dhinafuniiwa, ohaahiya onyemula mwiili dheewa vikaleliisu. 25Vowi aliwa ehicenja ebaribari ya Mulugu ni dhooratha. Wambeela weebedha ni wiimelela dhoopaddusiwa vamburoni va omweebedha ni omwiimelela Mpaddusi oli oothithimiheya okala ni okala. Ameni.#1.25 Ameni enatapulela Dhikale ndo, naari wi Siibaribareene.

26Mwaha wa dhedho Mulugu ohaapeleka wi eharege dhikwaminigwa dhookaliha manyazo. Ahiyana ehicenja ogona ni alobwana, ogonihanaga ahiyanave, meerelo ehili oobaliwana. 27Emodha-modhave alobwana ehicenja ogona ni ahiyana, waakalelaga minigwa vajinji alobwana akwiiwa wiiragana dhookaliha manyazo vikaleliisu mowindo yahiyiithanela goyi yoofwaneelela mooligana ni dhoovirigana dheewa.

28Mwaha wi aliwa yahimunyemula Mulugu teto Mulugu ohaapeleka mmoobuweloni mweewa ootakala wi yiiregena dhego dhoohufwaneelela. 29Aliwa ehidhaaliwa ni dhohogoowa dha misawo dhaatedhene, obure, nrima, dhootakala. Ehidhaaliwa nihidda, opanana, owana, oratha wiiddana, onanlalave, 30enowiirana dha odhuvudhuvu teto enowiiddana ni Mulugu. Beebewe, owiithukulela, oogaya. Enosayela dila dhixa dhowiirana dhootakala. Kinawiiwelela abaabi eewa. 31Ataduwa, oohuroromeleya, ootakala mirima naari ohukanna thagaraga. 32Naari eganonileve magano a Mulugu owi athu owiirana dhowindala boofwaneelela okwa, aliwa enowiirana dhedho teto enofiyedha waatthettheela ale eneerana.

Currently Selected:

ARoma 1: tke

Highlight

Copy