Matewuzhi 27

Yesu onopelekiwa wa Pilatu

(Maruku 15.1; Luka 23.1-2; Zhuwawu 18.28-32)

1Ode ogasile bebeheene, apogo aatene a anamakutha ni apogo a nlogo yahipanganelaga wi empe Yesu. 2Aliwa ommaga, omudhowagana wa kuminadori Pilatu.

Okwa wa Zhudasi

3Vano Zhudasi, muliba ompeleka, vooniligiiye wi Yesu ohukoniwa, ahuubuwelelaga, wiira: <<Geerela ddi?>> Ahaawelihedhaga korowa nde makumi maraaru dha parata apogo a anamakutha ni apogo a nlogo, wiira: 4<<Gihithega voopeleka mwazi wa muthu ahithegile>>. Aliwa yahimwaakulaga, wiira: <<Hiyo niire avi? Ndo saawo weeka>>.

5Vevale Zhudasi ahivokedhaga korowa nde dha parata mu nyuba ya Mulugu, odhowa wiimagelela.

6Apogo a anamakutha yahithukulaga korowa nde, wiira: <<Kadhifwaneelele wi nihele moologolela korowa dha mvahi vowi sa mutheengo wa mwazi>>. 7Vano yahiiwananelaga ogulana korowa ndo mudda wa namooba dhibale wi elogohiwegewo anaweendda. 8Mwahaya buuyene mudda ole ofiyedha peeno oneethaniwiiwa <<Mudda wa Mwazi>>. 9Ndala dhihaakwanela dhawogile namavuhulela Zheremiya, eeriliiye: <<Ehithukula korowa makumi maraaru dha parata, mutheengo oyene wathomile ahima amohi aEzarayeli, 10oguliwana mudda wa namuuba dhibale wona mwemo Nabwiya mwagilamuleliiye>>.#27.10 Moone Zheremiya 19.1-13; 32.6-9; Zakariya 11.12-13.

Yesu omuthegoni wa miladdu wa kuminadori Pilatu

(Maruku 15.1-15; Luka 23.1-5, 13-25; Zhuwawu 18.33 ofiyedha 19.16)

11Yesu ahiimelaga vameentoni va kuminadori, oliye ahimukohaga, wiira: <<We oli mwene a aZhudewu?>> Yesu ahimwaakulaga, wiira: <<Onawoga di nyo>>.

12Vano apogo a anamakutha ni apogo a nlogo emusumelaga kaawaakulege yego. 13Pilatu ahimukohaga, wiira: <<Kuneewa dhaatedhene dhinoosumeliisuna?>> 14Yesu kaakulilege naari ndhu nimohi; mwa ela kuminadori Pilatu ahitikinaga vajinji.

15Sowi, mudhidhi wa Othabela wa Paxkwa, kuminadori ahilemeelela omutapula munyakaambura mmohi, oyene athu yamfuniisu. 16Mudhidhi olene yahikanna munyakaambura mmohi oononeya ni bili ya bure eethaniwa Baraba. 17Athu egatugumane, Pilatu ahaakohaga, wiira: <<Munamfuna aani wi gimutapule, Baraba naari Yesu, oneethaniwa Kirixtu?>>#27.17 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 22. 18Vowi oliye ahinonaga wi empelekele mwaha woomugana.

19Pilatu agakaraatile mmuthegoni mwa miladdu, mwihiyanaaye ahirumihaga mutheenga wi yamwaaddele wi: <<Pole-pole, ahimukone owogoowa ole, mwaha wi miyo mahiyu gihoona goyi moorohani mwaha waaye>>.

20Mbwenye apogo a anamakutha ni apogo a nlogo yowaathuzha athu wi emulobe Baraba, empihe Yesu.

21Pilatu ahiwelelaga waakoha dila ya nabiili, wiira: <<Mwa abiili ala munamfuniinyu wi gimutapule baani?>> Aliwa yahaakulaga, wiira: <<Baraba!>>

22Vano Pilatu ahaakohaga, wiira: <<Gimwiirena avi Yesu, ola oneethaniwa Kirixtu?>> Yahaakulaga aatene, wiira: <<Mmukomele vamuraddini!>>

23Pilatu ahaakohaga, wiira: <<Yabure ddi yiiriliiyena?>> Mbwenye yoweenjedhedhagave okuwa, yiiraga: <<Akomeliwe vamuraddini!>>

24Pilatu agoonile wi kanaddoddavo yego athu ehambeela wiinyuwela, ahaalobaga mahinje, ohaba mmadani vameentoni va athu aatene, wiira: <<Miyo kaginna muladdu ni mwazi wa muthu ola, mwiirege dhinafuniinyu>>.

25Athu aatene yahaakulaga, wiira: <<Muladdu wa mwazi waaye onimorele hiyo vamohi ni ahima eehu!>>

26Vevale Pilatu ahaatapulelaga Baraba, olamula wi Yesu awaxuliwe, nuwindo ompeleka wi akomeliwe vamuraddini.

Anyakoddo enoomunyemula Yesu

(Maruku 15.16-20; Zhuwawu 19.2-3)

27Vevale anyakoddo a Pilatu yahimuthukulaga Yesu, omudhowagana nyuba yoolibihiwa ya kuminadori.#27.27 Naari wi: Peretoriyo. Nikuru naatenene na anyakoddo yahitugumanaga omwaapeelela. 28Omukuguula dhoowara dhaaye, omuwariha mukanjo woofiila.#27.28-29 Mukanjo woofiila ni kara yaali etoonyihedho ya omwene wa aRoma, ni aZhudewu. 29Yahiluwaga kara ya miinga, omuwariha mmuruni mwaaye. Vano omwihiddeeliha bango mundadani naaye na moono wooja, okokoraga vameentoni vaaye, ombeddaga, yiiraga: <<Nnowuulojelani, Mwene a aZhudewu!>> 30Yoomutaperaga mare, othukula bango ele omuddwadhagana vamuru. 31Nuwindo, egamalile ombeddabedda, yahimukuguulaga mukanjo ole woofiila, omuwariha dhoowara dhaaye. Vooharela yahimuthukulelaga ode wi yamukomele vamuraddini.

Okomeliwa wa Yesu vamuraddini

(Maruku 15.21-32; Luka 23.26-43; Zhuwawu 19.16-27)

32Emaruwaga yahigumanaga ni muthu mmohi a nluwa na oSirene eethaniwa Simawu, ola yahimuwaddihedhaga othukula muraddi. 33Egafiyile mburo oneeriwa Gologotha (enatapulela <<Mburo wa Egarigadhi>>), 34yahimvahaga vinyu oomutaganyihedha ni cowe wi amung'we, mbwenye oliye agamulawihile kamfunilege omung'wa. 35Nuwindo, egamukomele, yahigawanaga dhoowara dhaaye, yahombezelaga gari wi yoone kadda muthu yaathukuliiye.#27.35 Moone Masaalimu 22.18. 36Yahikaraatigi vevale omwiing'anelaga. 37Vamuraddini, vadhulu va muru wa Yesu, yahikomelagavo ntabwa, valebiwege madhu oomusumelana, owi: <<OLA DI YESU, MWENE A AZHUDEWU>>. 38Yesu ahikomeliwana vamuraddini ambava abiili, mmohi omoononi waaye wooja, mmohiya omoononi waaye woong'oto. 39Athu yaviraga vevale, yoomunyemulaga, ethikaga miru, 40yiiraga: <<Kahuwo weene weera: <Ginoodha gibwanyule nyuba ya Mulugu, gimage dila biili mwa malabo maraaru>? Akala oli Mwaana a Mulugu, okite vamuraddinivo, wiivulumuse weeka!>>

41Mwa mukalelo mmohive, apogo a anamakutha ni anamasuuziha a Malamulo ni apogo a nlogo yoomunyemulaga yiiraga: 42<<Waavulumusa athu amohi, vano kunaanda wiivulumusa weeka. Oliye di mwene a Ezarayeli! Akita dhiinoveva vamuraddini vale, nneere omuroromela. 43Amuroromela Mulugu; adhe dhiinova amvulumuse, akala ebaribareene onomudhivela. Vowi onowoga, eeraga: <Gili Mwaana a Mulugu> >>. 44Vano ambava ale yakomeliwigiiyena yoombeddaga ni mukalelo mmohive.

Okwa wa Yesu

(Maruku 15.33-41; Luka 23.44-49; Zhuwawu 19.28-30)

45Okuma wora ya neekumi nabiili ya mutana yiihi yahikuneelaga elabo yaatene, yahilogelaga wora thaaru ogali wooribawene. 46Okuma wora thaaru dha ciguwo, Yesu ahikuwaga moolibiha, wiira: <<Eli, Eli, lama sabakathani?>> Enatapulela wi: <<Mulugu aaga, Mulugu aaga, mugihiyele ddi?>>#27.46 Masaalimu 22.1.

47Vano amohi yaaligi vevale yamwiiwaga, yowiiraga: <<Onamwiithana namavuhulela Eliyazi>>.

48Mowaaguva mmohi mwa aliwa ahithamagaga, othukula nthoje, obwiniha mvinyuni oonyuunya oseredha obangoni, omvaha Yesu wi amung'we. 49Amohi yowiiraga: <<Kamwihiyeni! Nimoone akala Eliyazi onaadhe amvulumuse!>>

50Yesu ahikuwaga dila ya nabiili ni ndhu nooliba, okwa.

51Mudhidhi olene guwo yagawa nyuba ya Mulugu#27.51 Guwo yagawa nyuba ya Mulugu yaali guwo yatomeyiwe munyuba ya Mulugu yagawa Mburo Woweela ni Mburo Woweelesesa. Moone Okuma 26.33. yahitaleyaga dhipaddi biili, okuma vadhulu ofiya muddibani, elabo yahithikeyaga, mabwe yahiparuwaga, 52masiye yahifuguwaga, athu oweela mirima ajinji yakwile wale yahivenyihiwaga muukwani. 53Egakumile mmasiye mweewa yahivolowaga muZheruzalemi, nluwa noweela, okumelela wa athu ajinji, nda dheereyilege Yesu agavenyihiwe muukwani. 54Sinturiyawu#27.54 Asinturiyawu yaali asogoleli a anyakoddo zana (100) a aRoma. ni ale yamwiing'anelaga Yesu, vooniligiiwa othikeya wa elabo ni dhaatedhene dheereyaga, yahikalagana woova wuulubale, wiira: <<Ebaribareene, ola aali Mwaana a Mulugu>>.

55Vevale vahikalaga ahiyana ajinji, yoonelaga woolapelawene. Yaaligi ale yadhaaga emuharaga Yesu okuma oGalileya wi emukamihedhege. 56Mwa aliwa aaligi Mariya a oMagadala, Mariya, amaaye a Tiyago ni a Zhuuze, ni mwihiyana a Zebedeyo.

Ologohiwa wa Yesu

(Maruku 15.42-47; Luka 23.50-56; Zhuwawu 19.38-42)

57Ociguwoni ahifiyaga muthu mmohi ooreela a oArimateya, ndina naaye Zhuuze. Ola teto aali namasuuza a Yesu. 58Oliye ahidhowaga wa Pilatu, omuloba mwiili wa Yesu. Vano Pilatu ahirumihaga wi emwinke. 59Vevale Zhuuze agathukule mwiili ole, ahihuruwedhaga ni guwo yoweela ya liinyu. 60Ohela munsiyeni#27.60 Masiye a mudhidhi olene yakala wona nikungu. nixa natopiwe vanibweni. Opigirisa nibwe nuulubale, ofugana omulago wa nsiye ndde, ovenyawo. 61Mariya a oMagadala vamohi ni Mariya mmohi, yaaligi vevo, okaraati vakukuuve ni nsiye ndde.

Anamaang'anela a nsiye na Yesu

62Nlabo nooharela, nigavirile nlabo noomusasanyedha sabuddu, yahitugumanaga apogo a anamakutha ni aFarizi, odhowa wa Pilatu. 63Omwaaddela, wiira: <<Nabwiya, nnowuubuwelela wi namaratha ole agali mugumi ahiwoga wi: <Yavira malabo maraaru ginoodha givenyihiwe muukwani>. 64Mulamule wi onsiyeni wule waang'aneliwege ni anyakoddo ofiyedha malabo maraaru wi dhinaapadduwe edhe anamasuuza aaye emwiiyemo, yawaaddelege athu wi <oliye ohuvenyihiwa muukwani>. Vano oratha woogomihedha wula onaakale wootthabwesesa okwaranya wowambeela>>.

65Pilatu ahawaaddelaga, wiira: <<Mwaathukule anyakoddo ala, edhowe yaang'anelegewo onsiyeni wo wona munoobuweleliinyu>>. 66Aliwa yahidhowaga, obandiha selu#27.66 Selu si etoonyihedho enabandihiwana yego yafugiwa wi yafuguliwa yooneyege wi ehifuguliwa. vanibweni nafugiwegena onsiyeni wule, waahiyavo anamaang'anela.

Currently Selected:

Matewuzhi 27: tke

Highlight

Copy

Compare