Matewuzhi 26

Opanganela dha ompa Yesu

(Maruku 14.1-2; Luka 22.1-6; Zhuwawu 11.45-57)

1Yesu agamalile dhosuuziha dhaatedhene dhedhi, ahawiirelaga anamasuuza aaye: 2<<Muhunona wi ehalile malabo meenddi wi athabeliwe Paxkwa,#26.2 Paxkwa yaali mathanga oofuneyesesa a aZhudewu. Moone Okuma 12.1-27. Vowi Yesu avenyihiwe nlabo nenddo na Paxkwa, hiyo dhiinova Paxkwa eehu nnathabela ovenyihiwa wa Yesu muukwani. vano miyo, Mwaana a Muthu, ginopelekiwa wa amwiiddani wi egikomele vamuraddini>>.

3Mudhidhi oyene apogo a anamakutha ni apogo a aZhudewu yahitugumanaga vaade va musogoleli a anamakutha, eethaniwa Kayifa. 4Vano yahiiwananelaga mukalelo wowi emwihidde Yesu mowiipiteya wi empe. 5Aliwa yowiiraga: <<Ohukale mudhidhi woothabela Paxkwa wi nnaadhe nitatamule wiinyuwela vaari va athu>>.

Mwihiyana mmohi onomukuthulela makura Yesu oBetaniya

(Maruku 14.3-9; Zhuwawu 12.1-8)

6Yesu agali oBetaniya vaade va Simawu muliba maredda.#26.6 Maredda mu ewogelo ya eGerego kinaagana mareddave, mbwenye teto dhiredda dhoohiyana-hiyana dha nikupa na muthu. 7Vevale Yesu ajaga, mwihiyana mmohi ahimwaaddamelaga aganna garaafwa noosasanyiwa ni alabasuturu#26.7 Alabasuturu naali nibwe noozhazhaala na mooneyelo oweela nasasanyiwana mino, milinga ni magaraafwa a makura oonukwela. mwaaligi makura oonukwela a mutheengo wookwima. Ahifugulaga garaafwa ndde, makuraya omukuthulela Yesu mmuruni.

8Vano anamasuuza a Yesu egoonile nda yahitakaleliwaga, wiira: <<Makura ala enanoongeliwa ddi? 9Vowi makura ala aheere waaguliha, aguliha korowa dhijinji, ndo eere waagawela athu oorabula>>.

10Yesu aganonile dhedhi, ahawiirelaga: <<Munamukathamihela ddi mwihiyana ola? Egiireliiye sapama. 11Athu oorabula enaakalege ni nyo malabo maatene, mbwenye miyo kaginaakalege vamohi ni nyo mudhidhi waatene. 12Voogikuthulela makura ala mwiili waaga, oliye osasanyedhe ologohiwa waaga. 13Ebaribareene ginowuwaaddelani wi oli waatewene mwiilaboni onaalaleyiwege Muselu Wapama ola, athu eneerege omuwoga mwihiyana ola, emuubuwelelaga mwaha wa dhedho dhigiireliiye>>.

Zhudasi onowiiwanana ni apogo a aZhudewu dhoompeleka Yesu

(Maruku 14.10-11; Luka 22.3-6)

14Vevale mmohi mwa anamasuuza aaye kumi ni abiili eethaniwa Zhudasi a oEsikariyothi, ahidhowaga ogumana ni apogo a anamakutha. 15Ahaakohaga, wiira: <<Ki munagivahe ddi gadha gimpeleka Yesu oyo wa nyo?>> Aliwa yahimulivaga korowa dha parata makumi maraaru. 16Zhudasi okuma mudhidhi olene, odhowa osogolo oosayela mpatha wowi ampeleke Yesu.

Yooja ya Nabwiya

(Maruku 14.12-26; Luka 22.7-23; Zhuwawu 13.18-30)

17Nlabo nowambeela na Mathanga a Mikaathe Dhoohuheliwa Emela, yahidhaaga anamasuuza wa Yesu omukohaga, wiira: <<Munafuna nasasanyedhe waani wi mujewo Mathanga a Paxkwa?>>

18Vano oliye ahawaakulaga, wiira: <<Dhowani muluwani, munomfwanya muthu mmohi, mwawoge, mwiire: <Namasuuziha wiire: mudhidhi waaga ohaaddamela, vaade veenyu finamuthabeliimi Paxkwa ni anamasuuza aaga> >>. 19Aliwa yahiiragana wona mwawaaddelege Yesu. Vevale yahisasanyedhaga Mathanga a Paxkwa.

20Ociguwoni, Yesu agakaraatile vameeza vamohi ni anamasuuza aaye kumi ni abiili, 21ejaga, oliye ahiiraga: <<Ebaribareene ginowuwaaddelani wi mmohi mwa nyo onogiguliha wa amwiiddani aaga>>.

22Aliwa yookubanyaga vajinji, wambeela owogaga: <<Ebaribareene kahuwo miyo, Nabwiya>>.

23Oliye ahawaakulaga, wiira: <<Oyene onareha mukaathe muziwo mmohive ni miyo, dinagipeleke. 24Miyo, Mwaana a Muthu, onookwa wona mulebeliwiiwa dha oliye, mbwenye oddilu oli ni olene onampeleke Mwaana a Muthu! Yaali yapama muthu oyo aheere ahibaliwa!>>

25Nuwindo, Zhudasi ole afunaga ompeleka, ahiiraga: <<Ebaribareene kahuwo miyo, namasuuziha>>. Yesu ahimwaakulaga, wiira: <<Ee, diweene>>.

26Vano ejagave, Yesu ahithukulaga mukaathe, otamaalela wa Mulugu, ogwaddanya, wawinka anamasuuza aaye, wiira: <<Akelani, muje, ola bu mwiili waaga>>.

27Vooharela ahimuthukulaga nakoma,#26.27 Naari wi: kopo. Moone teto maverisikulu 39 ni 42. otamaalela wa Mulugu, wawinka anamasuuza aaye, wiira: <<Mmung'we mwaatene, 28vowi ola bu mwazi waaga, mwazi wa nipangano no waandana onakuthuleliwa athu ajinji wi eleveleliwe dhoothega dheewa. 29Ginowuwaaddelani wi okuma dhiinova, odhowa osogolo, kagidha gimung'waga vinyu dila emohi ofiyedha nlabo nddo nnaadhiimi gimung'we vinyu muxa vamohi ni nyoovo muuMweneni wa Ababa>>.

30Vano egeebile njibo noomutamaala Mulugu, yahimaruwaga, odhowa oMwaangoni wa Olivera.

Yesu onomwaaddela Peduru wi oneere omukoodda

(Maruku 14.27-31; Luka 22.31-34; Zhuwawu 13.36-38)

31Nuwindo, Yesu ahiiraga: <<Mahiyu alena, nyo mwaatene muneere ogileva. Vowi Maleba Ootaleleya yiire:

<Ginoodha gimporose makambuzi,

vano mabilaya ebalaleye>. # 26.31 Zakariya 13.7.

32Vano gavenyihiwa muukwani, ginoodhowa osogolo weenyu oGalileya>>.

33Peduru ahiiraga: <<Naari aatene yuuleveni, miyo kagidha guulevani>>.

34Yesu ahimwaakulaga, wiira: <<Ebaribareene, ginowuwaaddela wi mahiyu alena, mutubi ahinandde oneere ogikoodda dila thaaru, wiiraga kuginonile>>.

35Peduru ahimwaakulaga, wiira: <<Kagidha gukooddani, naari dhakala dhoofuneya wi gikwe, ginookwa vamohi ni nyo>>. Anamasuuza aatene yahiwoga madhu mamohive.

Nlobelo na Yesu oZheesimani

(Maruku 14.32-42; Luka 22.39-46)

36Vooharela, Yesu ahidhowaga ni aliwa mburo weethaniwa Zheesimani. Vano ahawiirelaga anamasuuza aaye, wiira: <<Mukaraati veva, miyo ginadhowa wule galobele>>. 37Ahimuthukulaga Peduru ni ahima abiili a Zebedeyo, ahambeelaga wukuuwa ni ovoreyiwa. 38Nuwindo, ahiiraga: <<Murima waaga oli wowukuuwa vajinji, ofiyedha okwa, mukale veva mwiing'anelege ni miyo, kamugone>>.

39Oliye aheeddaga vang'ono, okokora, oworomihedha kove vati, olobela, wiira: <<Babani, dhakala dhoorumeedheya, mmukwaranyihe nakoma#26.39 Nakoma etoonyihedho ya owali wa Mulugu. Moone Ezaya 51.17, 19, 22; Zheremiya 49.12. oyo! Dhihiireye wona munafuneliimi, mbwenye dhiireye wona munafuneliinyu>>.

40Nuwindo, ahiwelelaga wa anamasuuza aaye, aafwanyilege egonaga. Vano ahimukoha Peduru, wiira: <<Kamwaandile wiyiing'anela ni miyo naari mudhidhi vang'ono? 41Mwiyiing'anele, mulobelaga wi muhumorele moweehiwani. Muneba onofuna wiirana, mbwenye mwiili buli woolodhowa>>.

42Ahiwelelaga ovenyavo dila ya nabiili, olobela, wiira: <<Babani, akala kadhinarumeedheya omukwaranyiha nakoma ola gihimung'wile, yiireye efunelo yeenyu>>.

43Vano awelagawo aafwanyilege egonaga mwaha wi meento eewa yowaanyemelaga. 44Ahaahiyaga, odhowa olobela dila ya neethaaru, aawelelaga madhu mamohive.

45Nuwindo, ahiwelelaga wa anamasuuza aaye, wiira: <<Munoogonave ni ovuma? Keeng'anani, mudhidhi ohufiya onaapelekiwiiye Mwaana a Muthu mmadadani mwa athu oothega! 46Mvenye, nidhowege! Onafuna ogiguliha oli vakukuuve>>.

Omagiwa wa Yesu

(Maruku 14.43-52; Luka 22.47-53; Zhuwawu 18.1-11)

47Yesu awogagave, ahifiyaga Zhudasi, mmohi mwa kumi ni abiili, ni athu ajinji eganna masupaadda ni golomonddo. Athu ala yarumiwege ni apogo a anamakutha ni apogo a aZhudewu. 48Namampeleka ahipanganelaga ni aliwa etoonyihedho ela, wiira: <<Oyene gineeriimi gimbezhari, duuyeene mummage>>. 49Mowaaguva Zhudasi ahimwaaddamelaga Yesu, wiira: <<Ginowuulojelani, Namasuuziha!>> Vevale ombezhari.

50Yesu ahimwaaddelaga, wiira: <<Mukwaaga, odheele ddi?>>

Vevale amohi yahimuthamagelaga Yesu, omwihidda, ommaga.

51Vano mmohi aaligi ni Yesu, ahixomolaga supaadda naaye, omporosana mwiimeleli a musogoleli a anamakutha, ompadha nibaru.

52Nuwindo, Yesu ahiiraga: <<Ovolosihe muthumbani supaadda naawo, vowi aatene alene enalabiha supaadda, enadha epiwe ni supaadda. 53Kaahi onoobuwela wi kaginaanda waaloba Ababa, dhiinoveva wi egirumihedhe angero ajinji akoddo, ookwaranya makuru kumi ni meenddi?#26.53 Makuru kumi ni meenddi mu ewogelo ya aRoma yeera lezhiyawu. Naali nikuru nimohi nakanna anyakoddo owaakwana macikwi matanu ni nimohi, (6.000). 54Miyo geera ndo enaakwanele addi Maleba Ootaleleya enawoga wi soofuneya dhiireye?>>

55Mudhidhi olene Yesu ahaakohaga anamwinji, wiira: <<Mudhiile ni masupaadda ni golomonddo wi mugihidde wona gili owiinyuwela? Malabo maatene gakaraatesa mu nyuba ya Mulugu gisuuzihaga, kamugihiddile. 56Dhaatedhene nda dhihipadduwa wi yaakwanele Maleba a anamavuhulela>>. Vevale anamasuuza aaye aatene yahithawaga, omwihiya yeeka.

Yesu va Nikuru nuulubale na apogo a aZhudewu

(Maruku 14.53-65; Luka 22.54-55, 63-71; Zhuwawu 18.12-14, 19-24)

57Ale yammagilege Yesu yahimudhowagana vaade va Kayifa, Musogoleli a anamakutha, wewo watugumanilege anamasuuziha a Malamulo ni makolo a aZhudewu. 58Peduru owaaharaga voolapelavene, ofiyedha ovolowa vathaddo vaade va musogoleli a anamakutha. Nuwindo, Peduru ahivolowaga, okaraati vamohi ni anamaang'anela wi oone omagomelo wiwa.

59Apogo a anamakutha ni Nikuru nuulubale na apogo aZhudewu naatene yoosayelaga onamoona wooratha wi Yesu apiwe. 60Mbwenye kayamfwanyilegena mwaha. Athu ajinji yoomurathelaga Yesu, naari ndo, onamoona weewa kawaakwanaga. Omakuthulowiwa yahivenyaga athu abiili omurathelaga, yiiraga:

61<<Mulobwana ola wiire: <Miyo ginowaanda obwanyula nyuba ya Mulugu, gimage muwari mwa malabo maraaru> >>.

62Agavenyile musogoleli a anamakutha, ahimukohaga Yesu, wiira: <<Kunaakula yego, athu ala dhinoosumeliiwa?>> 63Yesu kaakulilege yego. Vano musogoleli a anamakutha, ahiiraga: <<Miyo ginowuulamula wi olibele vameentoni va Mulugu mugumi onaaddele akala we oli Kirixtu#26.63 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 68. ole aroromelihiwe, Mwaana a Mulugu>>.

64Yesu ahawaakulaga, wiira: <<Fu mwemo munawogeliinyu. Vano ginowuwaaddelani wi okuma dhiinoveva munomoona Mwaana a Muthu agakaraatile omoononi wooja wa Oowodha-wodha, adheelaga mmuraboni dha odhulu>>.

65Vano musogoleli a anamakutha ageewile madhu alena ahitalaga dhoowara dhaaye, wiira: <<Muhumwiiwa onyemula waaye! Ki nnaasayelege onamoona wa ddi? 66Munoobuwela avi?>> Apogo amohi yahaakulaga, wiira: <<Ofwaneelele apiwe>>.

67Vevale amohi yoomutaperaga mare wiintoni, emvahaga masoko, amohiwa emuddwadhaga mbarutuni, 68yiiraga: <<Ovuhulele, we Kirixtu. Wuuddwadhile baani?>>

Peduru onokoodda wi ohumunona Yesu,

(Maruku 14.66-72; Luka 22.55-62; Zhuwawu 18.15-18, 25-27)

69Vevale Peduru agakaraatile vathaddo, mwiimeleli a namwali ahimwaaddamelaga, wiira: <<We teto waali ni Yesu ole muGalileya>>.

70Peduru ahikooddaga vameentoni va aatene, eeraga: <<Miyo kaginonile enawogiiwe>>.

71Vano Peduru ovenyavo, odhowa vamavolowelo, mwiimeleli mmohi a mwihiyana omoona, wawaaddela yaaligi vevale wiira: <<Ola teto aali ni Yesu a oNazarethi>>.

72Oliye ahikooddaga dila ya nabiili ni olibela, eeraga: <<Miyo kagimunonile muthu oyo>>.

73Vigavirile mudhidhi vang'ono yahimwaaddamelaga Peduru athu yaaligi vevale, wiira: <<Ebaribareene, oli mmohi mwa aliwa, vowi mawogelo aawo enowuunoneyiha>>.

74Vevale ahambeelaga okoodda olibela, wiira: <<Miyo kagimunonile mulobwana oyo! Mulugu agoonihe goyi akala ginooratha!>> Mowaaguva mutubi ahunddaga.

75Vano Peduru ahuubuwelelaga madhu a Yesu yeeriligiiye: <<Mutubi ahinaandde, we oneere ogikoodda dila thaaru>>. Peduru ahimaruwaga vevale, okumela ode, anddaga ni okubanya wuulubale.

Currently Selected:

Matewuzhi 26: tke

Highlight

Copy

Compare