Matewuzhi 20
20
Musibe wa anamalaba
1<<Sowi Omwene wa Odhulu onaligana ni mwiinya a mudda avenyilege bebeheene wi aasayele anamalaba a mudda waaye wa uuva. 2Agamalile wiiwananela mutheengo wowaakela korowa emohi ya parata#20.2 Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi. Moone teto maverisikulu 9, 10, ni 13. va nlabo, ahaarumaga omudda.
3<<Agamaruwe wora ya neetanu nennayi ya bebehi, ahawoonaga athu amohi vamusika yahannaga yoohidda; 4ahawiirelaga: <Nyo teto mudhowe omudda waaga, ginowuulivani korowa mowaakwanela>. 5Vano aliwa odhowa. Ahimaruwaga olenddo mmohiwa mudhidhi waaddamelaga wora ya neekumi nabiili ya mutana, mwiinya ahiiragana emodha-modhave, ahiwelelaga wawiithana anamalaba amohiwa teto mudhidhi waakwanaga wora ya neethaaru ya ciguwo ahiiragana emodha-modhave.
6<<Omaruwa teto wora ya neetanu ya ciguwo, ahaafwanyaga amohiwa yahannaga yoohidda, waakoha, wiira: <Kamwinna yoohidda nlabo naatenene mwaha bwaddi?> 7Yahimwaakulaga, wiira: <Mwaha wi kalivo onivahile mabasa>. Vano mwiinya a mudda ahiiraga: <Dhowani ninyeene omudda waaga wa uuva>.
8<<Ociguwoni mwiinya a mudda ahimwiithanaga musogoleli a mudda, wiira: <Wawiithane anamalaba, waalivele; wawambeele oogomihedha, waamarihedhe owambeela>.
9<<Egafiyile ale yambeelege moogomihedha yahaakela korowa emohi ya parata kadda muthu. 10Vano egafiyile owambeela yoobuwelaga wi eneere waakela mookwaranya, mbwenye naaliweene yaakelilege korowa emohi ya parata. 11Egaakelile yomwaabaga mwiinya a vaade, 12yiiraga: <Anamalaba ala elabile wora emohi baahi; vano eliganihiwa ni hiyo, navilelena olaba ni oviha nlabo naatenene>.
13<<Mwiinya a mudda ahimwiirelaga mmohi mwa aliwa: <Mukwaaga, kaguwiiyele, kaweewanane ni miyo waakela korowa emohi ya parata? 14Othukule eli yaawo, odhowege, miyo difunile waalivela oogomihedha ala mooliganiha ni we. 15Kadhifwaneele wiirana dhaaga munafuneliimi? Naari winna nrima ni owoma murima waaga?>
16<<Mowindo oogomihedha enoodha ekale owambeela, owambeela enoodha ekale oogomihedha>>.#20.16 Enofwanyeya madhu owi: owambeela enoodha ekale oogomihedha, mwaha wowi ajinji enowiithaniwa, mbwenye oosakuliwa eli ooyeva elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi mwaha wowi ajinji enowiithaniwa, mbwenye oosakuliwa eli ooyeva madhu ala kiyalebiwe ni murumiwi Matewuzhi.
Yesu onowoga dila ya neethaaru dha okwa ni ovenyihiwa waaye
(Maruku 10.32-34; Luka 18.31-34)
17Yesu agwelaga odhowa oZheruzalemi, ahawiithanelaga ombali anamasuuza kumi ni abiili, wawaaddela, wiira: 18<<Mwiiwe, nili voolenddoni woodhowa oZheruzalemi, wewo miyo, Mwaana a Muthu, gineere opelekiwa mmadadani mwa apogo a anamakutha ni anamasuuziha a Malamulo. Aliwa eneere olamula wi gipiwe. 19Miyo gineere opelekiwa mmadadani mwa athu oode wi egibeddege, egiwaxule, egikomele vamuraddini, mbwenye nlabo na neethaaru givenyihiwe muukwani>>.
Dhooloba dha mma mmohi
(Maruku 10.35-45)
20Vano ahidhaaga wa oliye mwadha Zebedeyo ni anaaye, ahikokoraga vameentoni vaaye, omuloba yego.
21Yesu ahimukohaga, wiira: <<Onafuna ddi?>> Oliye ahaakulaga, wiira: <<Olamule wi ahima aaga ala abiili muuMweneni weenyu ekaraati mmohi ola omoononi weenyu wooja, mmohiwa ola omoononi weenyu woong'oto>>.
22Mbwenye Yesu ahawaakulaga, wiira: <<Kamunonile enalobiinyu. Dhinowaandeya nyo omung'wela nakoma#20.22 Naari wi: kopo. a goyi onaamung'weliimi?>>
Yahimwaakulaga, wiira: <<Ee, dhinowaandeya>>.
23Yesu ahiiraga: <<Ebaribareene munoomung'wa nakoma a goyi yaaga; mbwenye okaraati epaddi yaaga wi muthongege ni miyo, kadhili mwa miyo. Mburo ndo dhili ni Ababa wa ale yaasasanyedheliiye>>.
24Vevale amohiwa kumi veewiligiiwa madhu ale yahitakaleliwaga ni akwiiwa abiili ale. 25Vano Yesu ahawiithanaga, wiira: <<Muhunona wi anamathonga a dhilabo enowaajela athu eewa, apogo binaalamula aliwa. 26Kadhikale ndo wa nyoovo. Moohiyaniha, oyene onafuna okala mpogo vaari va nyo, akale mwiimeleli eenyu. 27Vano onafuna okala owambeela vaari va nyo akale mudhaari eenyu; 28muliganege wona Mwaana a Muthu, kadheele wi eemeleliwege mbwenye odheele eemelelege ni ovaha egumi yaaye okala yowoobola ya athu ajinji>>.
Yesu onowaayiliha aliba ohoona abiili
(Maruku 10.46-52; Luka 18.35-43)
29Emaruwaga nluwa na oZheriko athu ajinji yoomuharaga Yesu. 30Vano athu abiili oohoona yakaraatilege seresere ya rampa, egeewile wi Yesu avira wewule yahikuwaga, wiira: <<Nabwiya, Mwaana a Davidi,#20.30 Mwaana a Davidi Ndda naali ndina nimohi na Misiya nanoniwiiyena ni aZhudewu. Moone teto verisikulu 31. muneeddiwele thagaraga!>>
31Vevale anamwinji yowaahiihaga wi emaale. Mbwenye yoweenjedhedhagave okuwa, yiiraga: <<Nabwiya, Mwaana a Davidi, muneeddiwele thagaraga!>>
32Vano Yesu ahiimelaga, wawiithana, waakoha, wiira: <<Ki munafuna guwiireleni ddi?>>
33Yahimwaakulaga, wiira: <<Nabwiya, nnafuna noonege>>.
34Vevale Yesu ahaweeddiwelaga thagaraga, okahinya meento eewa. Vano mowaaguva yahambeelaga woona, omuharaga.
Currently Selected:
Matewuzhi 20: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
