Matewuzhi 15

Yesu onosumulula magano a makolo a aZhudewu

(Maruku 7.1-23)

1Nahimaruwaga oZheruzalemi nikuru na aFarizi ni anamasuuziha a Malamulo odhowaga wa Yesu omukoha, wiira: 2<<Mwaha bwaddi anamasuuza aawo ehiharihagamo magano a makolo? Mwaha bwaddi kinahaba mmadani yaajaga?>> 3Oliye ahawaakulaga, wiira: <<Ki nyo mwaha bwaddi teto munaruniha malamulo a Mulugu mwaha wa magano eenyu? 4Vowi Mulugu ahilamula, wiira: <Waariihege ababo ni amaayo>,#15.4 Okuma 20.12; Deteronomiyo 5.16. vano teto <ole onaaruwana ababe naari amaaye athongiwe avahiwe goyi ya opiwa>.#15.4 Okuma 21.17; Levitiku 20.9. 5Mbwenye nyo munasuuziha wi muthu mmohi awoga ni ababe naari amaaye, eera: <Miyo kaginookamihedheni vowi ele yafuniimi wi guukamihedhenaani gimulogolele Mulugu>. 6Muthu oyo kadha awaddihedhiwa waakamihedha ababe naari amaaye. Mowindo munavevusa madhu a Mulugu mwaha wa magano eenyu. 7Nyo anamanyengetha! Ezaya ahivuwiha pama vawogiliiye madhu a Mulugu mwaha wa nyo, eeraga:

8 <Nlogo ndda nnageebedha ni milomo,

mbwenye mirima dheewa dhili woolapela ni miyo

9 Nnageebedha ebeweene

vowi masuuziho enasuuzihiisu eli malamulo

oosasanyiwa ni athu, ehili oosasanyiwa ni miyo> # 15.9 Ezaya 29.13. >>.

10Nuwindo, Yesu ahawiithanaga anamwinji wi emwaaddamele, wiira: <<Mvuruwane, mwiiwelelemo. 11Enamutakaliha muthu kahuwo enavolowa muwano, mbwenye enakuma muwano sinamutakaliha muthu>>.

12Anamasuuza aaye yahimwaaddamelaga, wiira: <<Muhunona wi aFarizi viiwiliiwa madhu eenyu yahitakaleliwa?>>

13Oliye ahaakulaga, wiira: <<Yoodhala yaatene aBaba a odhulu ehidhaliliiwa eneere odduliwa. 14Mwaahiye. Aliwa asogoleli oohoona.#15.14 Enofwanyeya madhu owi: boohoona, osogoleliwa wa oohoona elebiwe mu dhoolebiwa ni madada dhimohi. Mbwenye anamasuuza ajinji enoobuwela wi Aliwa asogoleli oohoona madhu ala yalebiwe ni murumiwi Matewuzhi. Vano oohoona ammeza oohoona mukwaaye, aabiileene enomorela mmuliddini>>.

15Vevale Peduru ahimulobaga, wiira: <<Munitapulele musibe ola>>. 16Yesu ahiiraga: <<Teto nivano ninyeene kamwiiwelelemo? 17Kamunanonelamo wi dhaatedhene dhinavolowela omulomoni dhinakitela mmwiilini, dheera ndo dhinokumamo mmwiilini? 18Mbwenye dhinakuma muwano dhinadheela mmurimani, dhedho sinamutakaliha muthu. 19Vowi pu mmurimani munakuma moobuwelo ootakala, dhoopa, dhooraruwa, dhoojeberuwe, dhowiiya, onamoona wooratha, dhoonyemula. 20Dhego dhedhi sinamutakaliha muthu; mbwenye oja ohuhabile mmadani kunamutakaliha muthu>>.

Mwihiyana a oKanani

(Maruku 7.24-30)

21Yesu agavenyile vevale, ahidhowaga mirudda dha oTiru ni oSidoni. 22Mwihiyana mmohi a oKanani akumilege mirudda nde, ahidhaaga wa oliye, wiira: <<Nabwiya, Mwaana a Davidi,#15.22 Mwaana a Davidi Ndda naali ndina nimohi na Misiya nanoniwiiyena ni aZhudewu. mugeeddiwele thagaraga! Mwaanaga a mwihiyana onorabula vajinji mwaha wa muneba wootakala>>.

23Yesu kamwaakulilege yego. Vano anamasuuza aaye yahimwaaddamelaga, wiira: <<Mmwaaddele adhowege, vowi onoodha alobagave mundduli mweehu>>.

24Yesu ahimwaakulaga, wiira: <<Mulugu ogirumile wa nlogo na Ezarayeli, ayene eli wona mabila oorimeela>>.

25Vano mwihiyana ole ahidhaaga, okokora, omweebedha, wiira: <<Nabwiya, gikamihedheni!>>

26Oliye ahimwaakulaga, wiira: <<Kahuwo yapama othukula dhooja dha ahima waavokedha anaanabwa>>.

27Mwihiyana ole ahiiraga: <<Ebaribari, Nabwiya, mbwenye anaanabwa enoja dhoonyenyeya dhinamora vameeza va anya>>.

28Vano Yesu ahiiraga: <<Mwihiyana we, nroromelo naawo thi nuulubale, dhiireye ndo wona munafuneliiwe>>. Wambeela mudhidhi olene mwaanaye ahiyilihiwaga.

Yesu onowiinjiviha mikaathe ni somba olenddo wa nabiili

(Maruku 8.1-10)

29Yesu agamaruwe vevale, agelege seresere ya Nyaza ya oGalileya, ogwela vamwaangoni, okaraati vevale. 30Athu ajinji yahidhowaga wa Yesu yahaadhowagana ooragala, ootopinya, oohoona, oohuwoga ni aredda amohiwa ajinji. Waahiya vakukuuve vaaligi Yesu, oliye waayiliha. 31Ofiyedha anamwinji otikina vowawoona oohuwoga ewogaga, ooragala egayilihiwe, ootopinya yeeddaga, oohoona yoonaga. Vano yoomuthithimihaga Mulugu a Ezarayeli.

32Yesu ahawiithanaga anamasuuza, wiira: <<Ginowaweeddiwela thagaraga athu ala, vowi vihivira malabo maraaru ekalaga ni miyo, kinna yego yooja. Kaginafuna waapaganya ehijile, ginakathamiheyela wi enaadhe ehileye mundila>>.

33Mbwenye anamasuuza yahiiraga: <<Okokolani wuno nnaafwanye waani mikaathe dhowawaakwana anamwinji aatene alena?>>

34Yesu ahaakohaga, wiira: <<Mwinna mikaathe mingaasi?>> Yahimwaakulaga, wiira: <<Ninna mikaathe mitanu ni miinddi ni somba vang'ono dhing'onong'ono>>.

35Yesu ahawiirelaga anamwinji wi ekaraati vati. 36Ahithukulaga mikaathe mitanu ni miinddi ni somba otamaalela, ogwaddanya, waavaha anamasuuza, aliwa waagawela athu. 37Aatene yahijaga orubala. Vevale anamasuuza yahiddoddelaga dhoohaladhiwa, odhaaliha middanga mitanu ni miinddi. 38Yajilege yaaligi alobwana macikwi mannayi (4.000), ehaweelengile ahiyana ni ahima. 39Yesu ahaapaganyaga anamwinji, ogwela mmwanddeyani, odhowaga elabo ya oMagadani.

Currently Selected:

Matewuzhi 15: tke

Highlight

Copy

Compare