Matewuzhi 13
13
Musibe wa namadhala
(Maruku 4.1-20; Luka 8.1-15)
1Nlabo nendde Yesu ahivenyaga vaade, okaraati seresere ya nyaza. 2Vano athu ajinji yahitugumanaga vakukuuve ni oliye. Mwaha wa eyo ahivolowaga mmwanddeyani okaraati, athu aatene egeemelile vamuseengani. 3Owawaaddelaga dhego dhijinji mwa misibe eeraga: <<Namadhala ahimaruwelaga okuthela. 4Akuthelaga bewu dhimohi dhahimorelaga seresere ya dila, balame dhahidhaaga ojavo. 5Bewu dhimohi dhamorelege theya ya mabwe, vaaligi theya vang'ono. Dhahimelaga mowaaguva, vowi kavaali theya ejinji. 6Nduwa nigoobile dhahummaga okwa, vowi misisidha kadheetibele. 7Bewu dhimohi dhamorelege vamiingani, miinga ndo dhunnuwaga dhahihoga. 8Dhimohi dhiwa dhahimorelaga theya yapama, dhahivahaga dhilo moweenjedhedheya, zana (100), emohi yahivahaga dhilo makumi matanu ni emohi (60), emohi yahivahaga dhilo makumi maraaru okwaranya nde dhakutheliwege. 9Ole winna obaruni,#13.9 Enofwanyeya madhu owi: Ole winna obaruni wowiiwana, eewe mu dhoolebiwa ni madada dhimohi dhixa. Mbwenye anamasuuza ajinji enoobuwela wi wowiiwana madhu ala kiyalebiwe ni murumiwi Matewuzhi. eewe>>.
10Nuwindo, anamasuuza aaye yahimwaaddamelaga, omukoha, wiira: <<Mwaha bwaddi munaawogana athu ala mwa misibe?>>
11Oliye ahaakulaga, wiira: <<Mwaha wi nyo muhuvahiwa ononelamo dha wipiini dha Omwene wa Odhulu, mbwenye aliwa kivahiwe. 12Vowi ole winna onowaakela moweenjedhedha wi akalena mootthabwa. Mbwenye ole ohinna, naari eng'onong'ono yinniiyena onowaakiwa. 13Mwahaya buuyene onaawogeliimina mwa misibe: Vowi yoonaga, kinoona; yiiwaga, kineewa, naari kineewelelamo. 14Nda dhahipadduwa wi dhaakwanele dhawogile Mulugu odheela mwa namavuhulela Ezaya, eeriliiye:
<Odhowe wa nlogo nddo
wawaaddele wi:
Nyo muneerege ovuruwana,
mbwenye kamudha mwiiwelelagamo.
Nyo muneerege osugwa,
mbwenye kamudha mudidelaga.
15 Vowi mirima dha athu ala
dhili dhovaadda;
mabaru eewa kineewa,
yahaafuga meento eewa wi ehoone ni meento.
Yaheere ehiira ndo,
meento eewa yeerege woona,
obaruni weewa weerege wiiwa
yeerege ononelamo moobuwelelo eewa,
aliwa yeere owelela wa miyo,
miyo geere waayiliha!
Owogile di Nabwiya.>#13.14-15 Ezaya 6.9-10.
16Mbwenye ooreelihiwa bi meento eenyu vowi enowoona, wooreelihiwa fu obaruni weenyu vowi onowiiwa. 17Ebaribareene ginowuwaaddelani wi anamavuhulela ajinji ni athu ooharihamo efunelo ya Mulugu yahifunesesa woona dhinooniinyu mbwenye kayoonile teto yahifunesesa wiiwa dhineewiinyu mbwenye kayeewile.
18<<Mvuruwane, mwiiwe yootapulela ya musibe wa namadhala. 19Athu eneewa muselu wa Omwene, ehiiwelelamo, eli wona bewu yamorelege seresere ya dila. Nambure#13.19 Nambure Naari wi: Sathana. ahidhaaga, ovenyihamo yadhaliwe mmurimani mweewa. 20Bewu dhamorelege vaali mabwe majinji bi athu eneewa mutheenga, eroromela mowaaguva ni ohagalala. 21Mbwenye enalogela vang'ono mwaha wi kinna misisi. Vano yagumana ni dhookathamiha, oharahariwa mwaha wa mutheenga, aliwa enohiya nroromelo neewa. 22Bewu yamorelege vamiingani baale eneewa mutheenga, mbwenye dhookathamiha dha elabo ela teto ofuna dhooreela, dhinohoga mutheengaya, vano athu ala kinavaha dhilo. 23Bewu dhamorelege theya yapama bi athu ale eneewa mutheenga yiiwelelamo, vano enovaha dhilo dhijinji: Enovaha dhilo moweenjedhedheya zana (100), mmohi onovaha dhilo makumi matanu ni emohi (60), dhimohi dhiwa dhinovaha dhilo makumi maraaru okwaranya nde dhadhaliwe>>.
Musibe wa nthaaje
24Yesu ahiwogaga musibe mmohi, wiira: <<Omwene wa Odhulu onafwanafwana ni muthu akuthelilege bewu yapama mmiddani mwaaye. 25Mbwenye, athu aatene egonaga, ahidhaaga mwiiddani aaye, odhala nthaaje#13.25 Nthaaje Naari wi: joyo. Moone teto maverisikulu 26, 27, 28, 29, 30, 35, 36, 38, 40. vaari va tirigu, ovenyavo. 26Vano bewu dhigonnuwile, dhivahaga mangala, nthaaje teto nahikumaga.
27<<Vevale amwiimeleli a muliba mudda yahiiraga: <Nabwiyani, kanikuthelile bewu yapama mmiddani mu? Ki nthaaje nikumile waani?>
28<<Oliye ahawaakulaga, wiira: <Mwiiddani mmohi diirilena dhedho>. Vano amwiimeleli ale, yahiiraga: <Munofuna wi naddulemo nthaaje ndde?>
29<<Oliye ahawaakulaga, wiira: <Eehi, mwaaddulaga nthaaje teto muneerege omuddula ni tiriguya. 30Mwihiye dhunnuwelege vamohi ofiyedha mudhidhi woohadda. Miyo ginowawaaddela anamalaba enadhowa ohadda wi vowambeela muddule nthaaje, mmage mapithika wi nipahiwe, vooharela mmuddulege tirigu, mmuhelege vatatani vaaga> >>.
Musibe wa kogolo ya mpeza ni emela
(Maruku 4.30-34; Luka 13.18-21)
31Yesu ahawaaddelaga musibe mmohi, wiira: <<Omwene wa Odhulu onafwanafwana ni kogolo ya mpeza eyene muthu yathukuligiiye adhala va mudda vaaye. 32Ela enakala eng'onong'ono, mbwenye yoonnuwa enokwaranya bewu dhimohi dhidhaliwe, okala wona muthanko, ofiyedha balame dha odhulu, odha omagagamo dhitunji dheewa mmijinddani mwiwa>>.
33Ahawaaddelaga musibe mmohi, wiira: <<Omwene wa Odhulu onaligana ni emela mwihiyana yathukuligiiye, ataganyihedha ni saambale nijinji#13.33 Saambale nijinji Naari wi: mpimo miraaru. Dhedho wiinjiva wiwa waali wowaakwana vakuukuvi maniituru makumi meenddi ni maniituru meenddi. ofiyedha onyakuwa naatenene>>.
34Dhaatedhene dhedhi Yesu aawogagana anamwinji mwa misibe; kaawogaga yego ehili mwa musibe 35wi dhaakwanele dhawogiwe odheela wa namavuhulela, dheeriliiye:
<<Gineere ofugula mulomo giwoge misibe;
gilaleyele dhego dha wipiini
wambeela omapadduwelo wa elabo>>.#13.35 Masaalimu 78.2.
Waaddelihiwamo wa musibe wa nthaaje
36Vano Yesu ahaapaganyaga anamwinji, odhowaga vaade. Anamasuuza aaye yahimwaaddamelaga, wiira: <<Munaaddelihemo musibe wa nthaaje na mmiddani>>.
37Oliye ahawaakulaga, wiira: <<Onadhala bewu yapama di Mwaana a Muthu. 38Mudda si elabo; bewu yapama bi ahima a Omwene; nthaaje bi ahima a Nambure.#13.38 Nambure Naari wi: Sathana. 39Mwiiddani odhalile di Ddiyabo;#13.39 Ddiyabo Naari wi: Sathana. ohadda fu omakuthulo wa dhaatedhene, anamahadda bi angero.
40<<Wona nthaaje nnadduliwa nivokedhiwa omunddoni, dhinadha dhiireyege ndo omakuthulo wa mudhidhi ola. 41Mwaana a Muthu onoodha aarume angero aaye wi yaakumihemo muuMweneni mwaaye aatene alene enaathegiha akwiiwa ni aatene alene eneerana dhootakala. 42Vano evokedhiwe othukuthani ya munddo, wewo oneere okala wuundda ni otakuna meeno. 43Vano ooharihamo efunelo ya Mulugu enoodha yaarege wona nduwa muuMweneni wa Ababa. Ole winna obaruni,#13.43 Mudhoolebiwa dhawale muli: <<Ole winna obaruni, eewe.>> Mbwenye dhoolebiwa dhixa dhini: Ole winna obaruni wowiiwana, eewe. eewe.
Misibe dha dhooreela dhoologohiwa ni mabwe a mutheengo wookwima
44<<Omwene wa Odhulu onafwanafwana ni dhooreela dhoologohiwa mmiddani, dhedho muthu agafwanyile, ahilogohaga dila biili. Vano odhaaliwa ohagalala onoodhowa oguliha dhaatedhene dhanniiyena, korowadha ogulana mudda ole.
45<<Omwene wa Odhulu teto onafwanafwana ni muthu a nagooso onasayela mabwe oofuneya. 46Vano afwanya nibwe nimohi na mutheengo wookwima, onodhowa oguliha dhaatedhene dhanniiyena, vano korowadha ogulana nibwe ndde.
Musibe wa nthavi
47<<Omwene wa Odhulu teto onafwanafwana ni nthavi navokedhiwa munyaza, nnohidda somba dha musawo dhaatedhene. 48Nadhaala anamatota somba enoburulela vamuseengani, yeera ndo enokaraati, osakulelaga dhapama dhiwa ohelaga mmatogwani, dhabure dhiwa othathilelaga okwibi. 49Dhinaakale ndo omakuthulo wa dhaatedhene: Enoodha angero yaamwalanihe athu abure ni athu ooharihamo efunelo ya Mulugu, 50vano yaavokedhe athu abure ale othukuthani ya munddo, wewo oneere okala wuundda ni otakuna meeno>>.
51Nuwindo, Yesu ahaakohaga anamasuuza aaye, wiira: <<Mwihiiwelelamo dhego dhaatedhene dhedhi?>> Yahimwaakulaga, wiira: <<Ee!>>
52Vano wiira: <<Mwaha wa ela anamasuuziha a Malamulo aatene enasuuza dha Omwene wa Odhulu enafwanafwana ni baabi a emudhi onakumiha vatatani vaaye dhego dhixa ni dhego dhawale>>.
Yesu onokooddiwa ni athu a oNazarethi
(Maruku 6.1-6; Luka 4.14-30)
53Yesu agawogile misibe nde, ahivenyagawo wewule. 54Agafiyile owaniwa owasuuzihaga athu mu nyuba dha matugumano,#13.54 Nyuba dha matugumano Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. yoomvuruwanaga etikinaga, yiiraga: <<Onadhana waani tthottho ni owodha wula oneeriiyena dhootikiniha? 55Ola kahuwo mwaana a namasema? Amaaye kineethaniwa Mariya, addibile kahuwo Tiyago, Zhuuze, Simawu ni Zhudasi? 56Arogoriye kinakala vaari va hiyo? Ki dhinamukuma vaavi dhaatedhene dhedhi?>> 57Vevale aliwa yahitakaleliwaga ni oliye. Nuwindo, Yesu ahiiraga: <<Namavuhulela onoriihiwa dhipaddi dhaatedhene, mbwenye veelaboni vaaye ni vaade vaaye kanariihiwa>>.
58Vano Yesu keerilewo dhootikiniha dhijinji mwaha woohukalana nroromelo weewa.
Currently Selected:
Matewuzhi 13: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
