Wambeela 48

Yakobo onowareeliha ahima a Zhuuze

1Ogavirile mudhidhi, Zhuuze ahaaddeliwaga wi ababe enoobulela. Oliye ahidhowaga ni anaaye abiili, Manasesi ni Efarayimu. 2Yakobo veewiligiiye wi: <<Mwaanawo Zhuuze ohudha>>, ahiilibihedhaga ovenya okaraati vakonaantiligiiye, 3wiira wa Zhuuze: <<Mulugu oowodha-wodha ahooneyelaga wa miyo oLuzi, elabo ya oKanani, ogireeliha, 4eeraga: <Ginoodha gaweenjedhedhe anaawo wi mwa we ekumemo malogo majinji. Ginoodha gaavahe anaawo a musogolo elabo elena wi ekale yeewa mudhidhi dhaatedhene>. 5Ahima aawo ala abiili yaabaliliiwe wEgubuddu wuno, gihinadhe, alena teto ahima aaga.#48.5 Ahima abiili a Zhuuze yalebeliwe ni Yakobo. Yahisadduwa abiili mwa malogo aEzarayeli, ooligana ni amohiwa malogo kumi. Enatapulela wi Abarahamu akwa, ala teto yeere waakela epaddi emohi ya dhookalana dhaaye wona anaaye aatene. Efarayimu ni Manasesi baaga, wona Rubeni ni Simiyoni. 6Mbwenye ayene yaaharele odduli baawo. Eneere yaakele mburo dheewa mwiilaboni, mu ndina na addibiliwa ala abiili. 7Sowi miyo gidhaaga oPadani, ahikwaga mwihiyanaaga Rakeli mundila, elabo ya oKanani, waaddamela oEfarata. Gahimulogohaga niburo nendde seresere ya mundila ya Efarata (ela sowi oBetelemi)>>.

8Aasugwaga ahima a Zhuuze, Ezarayeli ahikohaga, wiira: <<Ala baani?>> 9Zhuuze ahimwaakulaga babe, wiira: <<Ala ahima aaga ayene Mulugu egivaahiliiye wuno>>. Yakobo, ahiiraga: <<Waadhena va wi gaareelihe>>. 10Vowi Yakobo ahuuluvala, meento aaye kayaanda wawoona. Ndala Zhuuze ahawaaddamihedhaga ababe, waabezhari, waakubaarela. 11Vevale Ezarayeli ahiiraga wa Zhuuze: <<Mbwenye miyo kagajejihedha wi nnodha noonane, Mulugu ohugihiya teto wi gawoone anaawo!>>

12Zhuuze ahaavenyihagavo anaaye vameddoni va Yakobo, ahikokoraga va oliye, agaworomihedhe kove vati. 13Ndala Zhuuze ahaathukulaga anaaye waadhowagana wa Ezarayeli. Efarayimu ni ndada noojana omwiimesa moono woong'oto wa ababe, Manasesi ni ndada noong'oto omwiimesa moono woojana wa ababe. 14Mbwenye Yakobo ahipilinganyaga moono dhaaye, ahitadeelelaga ndada naaye noojana ohela vamuru va Efarayimu, aali amung'onong'ono, ahitadeelelaga teto ndada naaye noong'oto, ohela vamuru va Manasesi oyene aali pogoya. 15Ahireelihaga nlogo na Zhuuze ni madhu ala:

<<Wi Mulugu, oyene aali ni makolo aaga,

oyene yamweeddeliiwa, yamwiiweleliisu Abarahamu ni Ezaaki,

Mulugu oyene agisogolela agikumbuzaga

okuma omambeelelo ofiyedha dhiinova,

16olene mungero aaye adhiile agoobola

wa dhootakala dhaatedhene,

aareelihe azombwe ala.

Ndina naaga nromoliwege mwa alena,

vamohi ni ndina nowi makolo aaga Abarahamu ni Ezaaki.

Alena, aniiwa yeenjedhedheye mwiilaboni>>.

17Zhuuze vooniliiye wi babe omuhelile ndada noojana vamuru va Efarayimu, kaafunile; ahaahiddaga ndadana ababe, ahixixaga otamihedha vamuru va Manasesi. 18Wawiirela ababe: <<Kahuwo ndala, babani. Ola dili mwaana mpogoya. Mmuheliliinyu ndada neenyu na elobwana vamuru vaaye>>. 19Mbwenye ababe yahikooddaga, wiira: <<Miyo gihinona, mwaanaga, gihinona. Naari ndala Manasesi ola onoodha akale nlogo nuulubale. Mbwenye ddibile amung'onong'ono onoodha akale pogo omukwaranya oliye, anaaye a musogolo enoodha ekale malogo majinji>>. 20Yakobo ahaareelihaga mudhidheene olene ni madhu ala:

<<AEzarayeli enoodha eromolege mandina eenyu,

yaamureelihaga muthu, yiiraga:

<Mulugu owunnuwihe wona Efarayimu ni Manasesi> >>.

Ndala Yakobo ahimuhelaga Efarayimu osogolo wa Manasesi.#48.13-20 Ndada na moono wooja natapulela mareeliho ookwaranya ni ooriiheya mwiimudhini, naakale na mpogo aaye. Yakobo ahiwaddihedha wi amung'onong'ono akale pogo. Ebaribareene nihimo na Efarayimu nahifiyedha okala nuulubale mu mwene oyene waali omadheelo wa pevo wa Ezarayeli mu mudhidhi wa mamwene. Anamavuhulela dila dhijinji yalabiha ndina na Efarayimu yaafunaga oromola nlogo na Ezarayeli. 21Egamalile ela, Ezarayeli ahiiraga wa Zhuuze: <<Miyo ginookwa, mbwenye Mulugu onoodha akale ni we, ooweleliheni elabo ya makolo eenyu. 22Wa weevo ginowuuvaha elabo#48.22 Elabo Naari wi: Dhipaddi dha mwaango. Mu ewogelo ya eHeberi eneeweya wona: Nluwa na oXikemu. Moone Wambeela 33.18, 19; Zhozuwe 24.32. waakwaranya addibilo, eyene gawaakiliimi a Amori, giwanaga ni supaadda naaga ni orwa waaga>>.

Currently Selected:

Wambeela 48: tke

Highlight

Copy

Compare