Wambeela 47

Yakobo onowaakeliwa ni Farawo

1Zhuuze ahidhowaga omwaaddela Farawo, wiira: <<Ababa ni addibilaga ehidha oKanani, ehidhana mabila, mbuzi ni ng'ombe ni dhaatedhene dhinniiwana. Dhiinova eli elabo ya oGoxeni>>. 2Zhuuze ahaathukulaga addibile atanu wi Farawo aanone.

3Ndala Farawo ahaakohaga addibila a Zhuuze, wiira: <<Mabasa eenyu ba ddi?>> Aliwa yahimwaakulaga, wiira: <<Hiyo vano, anamalaba eenyu, nili amakambuzi a mabila, wona makolo eehu>>. 4Yahimwaaddelaga Farawo, wiira: <<Ndheele okala aleddo elabo elena vowi owanuhu kiliwo thongwe woojiha aneenyama anamalaba eenyu ala. Elabo elene ya oKanani dala ehitthabwa. Vowindo nnoloba wi munihiye hiyo, anamalaba eenyu, wi nimage elabo ya oGoxeni>>. 5Vevale Farawo ahiwogaga ni Zhuuze, wiira: <<Vowi ababo ni addibilo ehidha okala ni weevo, 6elabo ya wEgubuddu siilena. Osakule vevo vinooriyele emagevo ababo ni addibilo. Ginowaarumeedha wi ekale elabo ya oGoxeni. Wawoona wi mwa aliwa ehikalamo alobwana enaanda mabasa, waasakule wi ejihege dhoofuwa dhaaga>>.

7Zhuuze ahaadhowagana ababe wa Farawo. Yakobo ahimureelihaga mwene. 8Oliye ahimukohaga Yakobo, wiira: <<Dhiinova winna yaaka ngaasi?>> 9Yakobo ahimwaakulaga, wiira: <<Yaaka dha olenddo waaga wona namadha mwiilaboni ya vati dhili zana ni makumi maraaru (130). Dhili vang'ono ni dhookathamiheya. Kagaakwanihe ofiyedha yaaka dha olenddo dha makolo aaga>>. 10Yakobo ahimureelihaga Farawo, okwaranyavo.

11Zhuuze ahaavahaga mburo woomagavo ababe ni addibile, yasakulile dhipaddi dhapama dha wEgubuddu, oRamesesi, wona Farawo mwalamuleligiiye.#47.11 Ramesesi thi ndina nimohi na oGoxeni. 12Zhuuze owaarumihedha dhooja ababe ni addibile aatene aharihaga wiinjiva wa aniiwa.

Olamula wa Zhuuze mudhidhi wa dala

13Dhooja dhahirama elabo yaatene, dala yahitthabwa. Athu a wEgubuddu naari a oKanani yaali owiitheyeene mwaha woohukalana yooja. 14Zhuuze daakelela korowa dhaatedhene dha athu a wEgubuddu ni a oKanani, aliwa yaagulaga yooja. Ooveleela korowa nde wa Farawo. 15Korowa vaamaleliiwa aEgubuddu naari teto a oKanani, aEgubuddu yoodhowa wa Zhuuze, yiiraga: <<Munivahe dhooja! Muhunanihiya wi nikwe, munoonaga mwaha woohukalana korowa?>>

16Zhuuze ahawaakulaga, wiira: <<Mwahikalana korowa, mudheegena dhifuwo dheenyu. Dha aneenyama gineerege wuuvahani dhooja>>. 17Vevale athu yoodhowana wa Zhuuze dhifuwo dheewa: akavalo, mabila, mbuzi, ng'ombe, ni abuuru. Yaaka elene Zhuuze owaagawela dhooja, ocenjanihaga#47.17 Ocenjanihaga Naari wi: Ovembanihaga. ni dhifuwo dheewa.

18Yaaka egamalile yahidha owoga ni Zhuuze, wiira: <<Kanili ookuwa wa nabwiya eehu wi hiyo nihimaleliwa korowa, dhifuwo dheehu si dhedho mwinniinyuna. Kanihalilena yego emohi nabwiya, ahili hiyo, ni midda dheehu. 19Muhunihiye orimeela vameentoni veenyu mwiilaboni mweehu! Munigule ni dhooja, vamohi ni midda dheehu. Ndala hiyo nneere nikale adhaari a Farawo, midda dheehu dhikale teto dhaaye. Mbwenye nivahiwe bewu nihikwe dala wi midda dheehu dhinasadduwe kokola>>.

20Vevale Zhuuze ahimugulela Farawo midda dhaatedhene dha wEgubuddu. Dala vathabwiiwa, kadda muthu a wEgubuddu ooguliha mudda waaye. Midda dhaatedhene dhaali dha Farawo. 21Athu aatene yamagile wEgubuddu yahidhowiwana mmaluwani.#47.21 Yahidhowiwana mmaluwani Ninafwanyeya madhu owi: yahiiriwa adhaari elebiwe mu dhoolebiwa ni madada dhimohi.

22Midda dhahalile dhihiguliwe dhaali dha anamakutha vowi yowaakelihiwa dhooja ni mwene. Aliwa yaaja dhedho, va mwaha olena kayagulihile midda dheewa.

23Vevale, Zhuuze ahiiraga wa athu: <<Peeno guhuugulani, vamohi ni midda dheenyu wi mukale a Farawo. Bewu ela mudhale mmiddani mweenyu. 24Muneeriinyu muhaddege, mudheegena wa Farawo ya neetanu, dhinahalavo dhikalege dheenyu wi mudhale mmiddani, dhimohi mujege ni aniinyu ni ayene avaade veenyu>>. 25Aliwa yahaakulaga, wiira: <<Nabwiya, muhuvulumusa egumi yeehu, muhuniirela opama. Nneere nikale muudhaarini mwa Farawo>>.

26Ndala Zhuuze ahilebaga nlamulo mwaha wa midda dha wEgubuddu wi eveleeliwege wa mwene ya neetanu ya dhoohadda, elena enowiireya ofiyedha peeno. Mbwenye midda dha anamakutha kahuwo dha Farawo.

Yooloba yoomariha ya Yakobo

27AEzarayeli yamagile wEgubuddu, elabo ya oGoxeni. Yahivahiwaga mburo dhapama, vano yahaabala ahima ajinji.#47.27 Ezarayeli thi ndina Mulugu nimvahiliiye Yakobo muniivuru Wambeela 32.28. Vala nihimo na Yakobo fambeeliiwa wiithaniwa aEzarayeli. 28Yakobo aali wEgubuddu yaaka kumi ni tanu nabiili. Ndala yaaka dha egumi yaaye dhaali zana ni makumi mannayi ni yaaka tanu nabiili (147). 29Vooniliiye wi malabo ookwa waaye enowaaddamela, ahimwiithanaga mwaanaye Zhuuze, wiira: <<Mwarumeedhela, muhele ndada neenyu vathabalani vaaga, mulibele moodhivela wi munowiirana mwa ebaribari yooloba yaaga. Ginowuulobani wi gakwa, muhugilogohe wEgubuddu wuno. 30Gakwa gakale vamohi ni makolo aaga, mugithukule wuno, mwagilogohe onsiyeni weewa>>. Zhuuze ahimwaakulaga, wiira: <<Ginoodha giirena wona mugilobeliinyu>>. 31Mbwenye Yakobo ahididelaga, wiira: <<Mulibele!>> Zhuuze ahilibelaga. Ezarayeli ahiworomaga, olobela voolilini vaaye.#47.31 Voolilini vaaye Niharihaga eGerego enatapulela agasameele mukogodho waaye mulubale. Moone AHeberi 11.21.

Currently Selected:

Wambeela 47: tke

Highlight

Copy

Compare