Wambeela 43

Addibile Zhuuze enowelela wEgubuddu

1Dala mwiilaboni yooweenjedhedheyave. 2Vamaliliiwa dhooja dhende dhadhiliiwana wEgubuddu, Yakobo ahiwogaga ni anaaye, wiira: <<Muwelele wEgubuddu mwagule dhooja>>. 3Zhuda ahimwaakulaga, wiira: <<Mulobwana ole ahinoopopiha wi hiyo nihidhowewo nihimuthukulile ddibilihu ethogohiya, kananaakela. 4Mwarumeedhela wi ddibilihu athaanane ni hiyo nnodhowawo, nooguleleni dhooja. 5Mbwenye mwahirumeedhela, kannayawo, vowi mulobwana ole ahinaaddelaga wi kananaakelela naahimuthukula ddibilihu>>.

6Ezarayeli ahaakulaga, wiira: <<Mwaha bwaddi wamwaaddeleliinyu mulobwana oyo wi muhukalana ddibilinyu mmohi? Muhugitakalihedha!>> 7Mbwenye aliwa yahimwaakulaga, wiira: <<Sowi mulobwana ole dambeelege onikoha dha emudhi yeehu. Ahinikohaga wi babiinyu ohukalawo? Wiira muhukalana ddibilinyu mmohi? Hiyo kanawogilege dhego dhimohi dhoohukala dhedho dhanikohiligiiye. Hiyo naanone addi wi onoodha anilamule omudhowanaawo ddibilihu?>>

8Zhuda ahiwogaga ni ababe Ezarayeli, wiira: <<Mmwihiye muzombwe agiharege. Nnomudhowana, nihikwe dala: Hiyo, nyo naari ahima eehu. 9Miyo ginowuuroromelihani egumi yaaga, gineerege omwiing'anela. Oneere akale mmadani mwaaga. Gahimudhanaawo, guuvahani, gineere gikalena muladdu ni nyoovo egumi yaaga yaatene. 10Naheere nihiribeliwa wuno, neerege hivano nigadhowilewo, nigawelelewo dila ya nabiili>>.

11Vevale babiiwa Ezarayeli ahawaakula, wiira: <<Akala ndo, mwiirena. Mwaadhowaga muthukule mmasakwini mweenyu dhego dhoofuneyesesa dhinniihuna elabo elena wi mwamvahe mulobwana oyene. Muthukule manddela mithanko oonukwela vang'ono, enwi, dhoonukwela dhimohi ni makura, vamohi ni furuuta dhimohi. 12Muwelihedhewo korowa dhafwanyiliinyu mmasakwini mweenyu; kaahi ehikalavo yavirigane. Muthukule korowa dhimohi. 13Mmuthukule teto ddibilinyu, muwelele wa mulobwana oyo. 14Vano Mulugu oowodha-wodha eerena wi mulobwana oyo oweeddiweleni thagaraga, oohiyedheni addibilinyu Simiyoni ni Benzhami. Wa miyo, gakala ndo gikale>>.

15Vevale alobwana ale yahithukulaga mvahi, omaruwa odhowaga wEgubuddu wi yeeveleele wa Zhuuze, egathukule teto korowa dhimohi vamohi ni Benzhami. 16Zhuuze agamoonile Benzhami, ahimwaaddelaga musogoleli a anamalaba a vaade, wiira: <<Waathukule alobwana ale odhowena vaade vaaga. Wampe mwaneenyama, mmusasanyedhe dhiinoveva. Mutana ginafuna wi nije vamohi>>.

17Namalaba a Zhuuze ahiiragana dhende dhalamuleliwigiiye, ahaathukulaga athu ale waadhowagana owaniwa wa Zhuuze. 18Vooniliiwa wi yahivolosihiwaga mba mwa Zhuuze, yowoovaga, ewogaga mmohi ni mukwaaye, yiiraga: <<Ola oddilu wa korowa dhende dhafwanyiliihu mmasakwini mweehu olenddo wowambeela. Onafuna anipele malango, anihidde, nikale adhaari aaye, anaake abuuru eehu>>. 19Vowindala, ehinavolowe mba mwa Zhuuze, yahimwaaddamelaga namalaba, omukoha, 20wiira: <<Ninowuulobani, nabwiya, olenddo wowambeela vadhiiligiihu wuno ogula dhooja, 21nidhowaga, vagoniligiihu, nigatapule masakwi eehu, mmohi ni mmohi a hiyo oofwanyagamo korowa dhaaye dhigali omulomoni wa nsakwi, dhihivenyihiwemo naari emohi wene. Nihidhana korowadha. 22Nihidhana dhimohi wi nigule dhooja dhimohi. Kanimunonile oyene awelihedhilegemo korowa nde mmasakwini mweehu>>.

23Musogoleli a anamalaba ahawaakula, wiira: <<Maalani! Kamoove! Mulugu eenyu, Mulugu a babiinyu, oyene dahelilemo ya mahala mmasakwini mweenyu, vowi korowa dheenyu miyo daakelelege>>. Vevale namalaba ahimuthukulaga Simiyoni, omudhowana waaligi addibile. 24Namalaba ahaadhowagana mba mwa Zhuuze, waavaha mahinje ohabihagana manyalo eewa, waavaha abuuru eewa dhooja. 25Vaaddeliwiisu alobwana ale wi Zhuuze onoodha aje ni aliwa mutana, yahisasanyedhaga mvahi dheewa.

26Zhuuze agafiyile yahimvahaga mvahi nde dhadhiiligiisuna, okokora, oworomihedha kove vati. 27Agamalile waaselusa, ahaakohaga, wiira: <<Babiinyu ole owuuluvala amuwogigiinyu, dapameene? Mugumi?>> 28Aliwa yahaakulaga, wiira: <<Namalaba eenyu, babiihu, mugumi dapameene>>. Yahiwelelaga okokora, oworomihedha kove vati. 29Vaasugwiligiiye, Zhuuze ahimoonaga Benzhami, ddibile oobaliwana, ahaakohaga, wiira: <<Duulena ddibilinyu eethogohi, oyene mwagaaddeligiinyu?>> Ahiwogaga teto, wiira: <<Mulugu ooreelihe, mwaanaga>>. 30Zhuuze ahidhaaleliwaga munukwela ni ddibile, ofunaga wuundda. Ahivenyagavo mowaaguva, odhowa mburo wowiipiteya, wuunddaga wewo.#43.30 Zhuuze oomudhivela vajinji Benzhami vowi yabaliwe egulu emohi. Zhuuze kanna ojejiha wi oodha amoone Benzhami. 31Agasusure wiintoni ahiilibihedhaga, owelela waaligi addibile, ahilamulaga, wiira: <<Mudhena oja>>.

32Zhuuze ajaga yeeka, addibile yajagavo weekiiwa, aEgubuddu yaaligi mba mwemule yajagavo weekiiwa. Vowi aEgubuddu kayaja vamohi ni aHeberi, yaali yootadhiwa mwa aliwa.

33Addibile a Zhuuze yahivahiwaga mburo osogolo waaye, okaraatihiwa eharihaga obaliwa weewa, wambeela a mulubale ofiyedha wa eethogohi eewa. Vevale yahitikinaga, wang'ananaga kadda muthu ni mukwaaye. 34Yahivahiwaga yooja ya vameeza va Zhuuze. Benzhami ahivahiwaga dila tanu waakwaranya addibile aatene amohiwa. Yahijaga mathanga aatene ni Zhuuze, ong'wa wona vafuneligiisu.#43.34 Zhuuze ahimvaha Benzhami oja dila tanu omvirusedha ohiyana ni amohiwa wi awoone akala nivano yahikalanaave moobuwelelo alene a nrima yamwiireliiwa oliye. Ahawiirela weeha weewu.

Currently Selected:

Wambeela 43: tke

Highlight

Copy

Compare