Okuma 30

Niburo na mukutho wa libani

1<<Osasanye ni mithanko dha akaasiya niburo na mukutho voopaha libani. 2Dhipaddi dhaatedhene dhifwanafwanege, meya meeturu; otaama wiwa okale meeturu nimohi. Matabwaya omagomelowa etogoliwe manyagaya. 3Ohuruwedhe niburo naatenene oro apama, vadhulu, ni dhipaddi dhaatedhene, ni manyagaya. Otope waapeelelihe ni oro. 4Osasanyedhe teto mangooza meenddi a oro, ohele dhipaddi biili, muddibani mootopiwa wi dhiviregemo dhimiri dhoothebana. 5Osasanyedhele dhimiri dha akaasiya, ohuruwedhe ni oro.

6<<Niburo nddo ohele osogolo wa guwo yoogawa, osogolo wa kaxa ya nipangano no waandana ni yookuneelavoya, wewo gineerigiimi gigumanegewo ni weevo. 7Aroni apahegevo libani obebehini ni obebehini, mudhidhi oneerigiiye awomihedhege panti, apahege libani.#30.7 Niburo na mukutho wa libani ni niburo na mukutho woopaha yaali maburo oogumanavo ni Mulugu, vowaalobelelavo athu amohi, mburo woolobavo oleveleliwa. Moone Mamwene Owambeela 8.22-54; Luka 1.8-23; Ovuhulela 8.3-4. 8Aroni ciguwo aahiddihaga panti, apahege libani vevale. Ekale yoovaha ya libani vameentoni va Nabwiya mudhidhi dhaatedhene ni anamabaliwelamo eenyu. 9Ahivahegevo libani nimohi, naari mukutho woopaha, naari wa dhooja, naari ahithathilelegevo vinyu. 10Vayaakani, nlabo nimohi Aroni, ahelege mwazi mmanyagani a niburo na mukutho wa libani ndde wi dhikurumuweliwege dhoothega. Niburo nddo thoweelesesa na Nabwiya>>.

Korowa dhowiyoobolana

11 Nabwiya ahiwogaga ni Mozezi, wiira: 12<<Waalebelaga alobwana aEzarayeli, voweelengiwa mmohi ni mmohi epelekege yowoobola wa Nabwiya wi ekale yowiyoobolana. Ndala kunaadheele mulili voweelengiwa. 13Oyene oneelengiwe apeleke ndala: garama tanu da parata. Garama tanu nda dhikalege dhooveleela wa Nabwiya. 14Enaalebeliwege baale yinna yaaka makumi meenddi odhowa osogolo, epelekege yooveleela ela wa Nabwiya. 15Moobolaga egumi yeenyu, ooreela kipelekege mookwaranya mpimo ola, naari oorabula kipelekege dhooyeva wa Nabwiya. 16Othukule korowa ndho dhowawoobola aEzarayeli, ovahe dhihiddiwegena mabasa mmusasani woogumanamo. Enaakale yowuubusedha vameentoni va Nabwiya wi moobolege dhigumi dheenyu>>.

Basiya

17 Nabwiya ahiwogaga ni Mozezi, wiira: 18<<Osasanye teto basiya noohabamo na mukuwa ni nthiwa niwa teto na mukuwa. Ohele vaari ni vaari va musasa woogumanamo ni niburo na mukutho, basiya nddo ohelemo mahinje. 19Aroni ni anaaye ehabegemo madada ni ohuwamo manyalo eewa. 20Yaavolowaga mmusasani woogumanamo, ehabegemo ni mahinje wi ehikwe. Teto yaaddamelaga niburo na mukutho wa libani wi elabe mabasa oopaha libani wona yooveleela yoosasanyedhiwa vamunddoni wa Nabwiya, 21ehabegemo ni ohuwamo manyalo wi ehikwe. Nenddi nikale nlamulo noohumala wa aliwa ni anamabaliwelamo eewa>>.

Makura oosakuleliwana mabasa

22 Nabwiya ahiwogaga ni Mozezi, wiira: 23<<Othukule dhoonukwela dhapama nda: kilu tanu ni emohi dha mira apama, kilu thaaru dha kaneela, kilu thaaru dha muhale, 24ni kilu tanu ni emohi dha todo dha kaneela. Otaganyihedhe dhaatedhene nda ni makura azeeti maniituru maraaru ni meya. 25Ni dhedhi osasanye makura oonukwela pama oosakuleliwana mabasa a Mulugu, esasanyedhiwe ni orandda. Eneere ekale makura oosakuleliwa ohiddana mabasa oweela.

26<<Ni alena ohele nda: musasa woogumanamo, kaxa ya nipangano no waandana, 27meeza ni dhaatedhene dhinakamihedhavo, extanti voohela panti ni yookamihedhaya, niburo na mukutho wa libani, 28niburo na mukutho woopaha ni dhookamihedhavo, vamohi ni basiya ni nthiwana. 29Ndala nda dhinoosakuleliwa, dhaatedhene dhinokala dhoweelesesa; dhego dhinakahinyege dhego dhedho dhoosakuleliwa, dhinaakalege dhoweela.

30<<Ommiminele makura Aroni ni anaaye, waweelihe wi egihiddelege mabasa oonamakutha. 31Wawaaddele aEzarayeli, wiiraga: <Malabo maatene makura aaga ala eneere ekale oweelihiwa oosakuleliwana mabasa aaga. 32Ahikalevo muthu oneedholihe makura alena naari osasanya yego yoofwanafwaniha. Makura ala boweela, pole-pole. 33Oyene oneere asasanye makura wona alena naari omuhela muthu ohuli namakutha, onoodha eegariwe vaari va mulogo waaye> >>.

Libani

(Okuma 37.29)

34 Nabwiya ahiwogaga ni Mozezi, wiira: <<Othukule dhoonukwela dhapama nda: manddela a balisamu, oonika, manddela a galibani, ni manddela a munyawa. Wiinjiva wiwa okale wumohive. 35Osasanye ni dhedhi libani, noonukwela, noosasanyedhiwa mwa orandda, otaganyihedhe ni mwiinyu wi nikale napama ni noweela. 36Nthubuliwe nifiyedhe okala nthubi, vano ohele osogolo wa kaxa ya nipangano no waandana mmusasani woogumanamo, munakumeleligiimi wa weevo. Mwaatene mukameelege libani nddo wona yego yoweelesesa. 37Kamusasanye libani nimohi neenyu noofwanafwaniha nenddi. Thoweela, pole-pole, mwiinya di Nabwiya. 38Oyene oneere asasanye libani wona nendda wi anukwelege, oyo onoodha eegariwe vaari va mulogo waaye>>.

Currently Selected:

Okuma 30: tke

Highlight

Copy

Compare