Okuma 27
27
Niburo na mukutho dhoopaha dha aEzarayeli
(Okuma 38.1-7)
1<<Osasanye niburo na mukutho dhoopaha ni mithanko dha akaasiya. Olapa wiwa ni orambalala wiwa ofwanafwanege, meeturu meenddi ni meya (2,5m), otaama wiwa okale meeturu nimohi ni meya (1,5m). 2Otogole mithanko dhiwa wona manyaga#27.2 Manyaga mBibiliyani enatapulela owodha. Mwazi wa mukutho oli waatene wadholihiwa vamanyagani alena. mannayi mmagomelo mwiwa, ohuruwedhe ni mukuwa. 3Ni mukuwa osasanye teto biya dhoohelamo nddoora, apaya, mabasiya, magaarufu oolapa, ni biya dhoohelamo makala. Osasanye dhaatedhene nda dhikale dha mukuwa. 4Osasanyedhevo olalo wa mukuwa okalena mangooza mannayi mmonddoni mwiwa. 5Okaraatihe olalo ola muwari mwa niburo na mukutho, ekale vaari va odhulu ni vati. 6Osasanyedhe teto dhimiri dha mithanko dha akaasiya, ohuruwedhe ni mukuwa. 7Niburo na mukutho naathukuliwaga, dhimiri dhedhi dhivirihiwege muwari mwa mangooza, nimohi epaddi ela nimohiya teto epaddi emohi. 8Osasanye niburo na mukutho ni matabwa, muwari mukale nikungunene wona guwoonihiliimi omwaangoni wuno>>.
Cinga na nthaddo na musasa wa Mulugu
(Okuma 38.9-20)
9<<Osasanye cinga na musasa wa Mulugu. Epaddi ya wewo onakuma pevo ya murubi, osasanyedhewo guwo yowiimela ya nthoje na mutheengo wookwima, olapa wiwa meeturu makumi matanu (50m). 10Abodhoya ekale makumi meenddi ni mathiwaya teto makumi meenddi, esasanyiwe ni mukuwa. Dhingowo dha ni dhoolibihana dhikale dha parata. 11Emodha-modhave teto, epaddi ya wewo onadhowela pevo ya murubi, olapa wiwa wa guwo okale meeturu makumi matanu (50m). Abodhoya makumi meenddi ni mathiwaya teto makumi meenddi dhikale dha mukuwa, vamohi ni dhingowo ni dhoolibihana dha parata. 12Orambalala wiwa wa cinga, epaddi ya wewo onadhowela nduwa, ekalewo guwo ya meeturu makumi meenddi ni matanu (25m), ni abodhoya kumi ni mathiwaya kumi. 13Epaddi ya wewo onakuma nduwa, cinga nikale meeturu makumi meenddi ni matanu (25m). 14Vamavolowelo nikukuru na moono wooja guwo yowiimela ekalena meeturu matanu nameenddi ni meya (7,5m); abodhoya ekale araaru ni mathiwaya maraaru. 15Ekale teto ndala nikukuru nimohiniwa guwo yowiimela ekalena meeturu matanu ni meenddi ni meya (7,5m); abodhoya ekale araaru ni mathiwaya teto maraaru. 16Vamavolowelo vikale guwo ya meeturu kumi (10m), ya nthoje na mutheengo wookwima ekale yooborodaariwa ni osalu wamataakuru, waroxa, ni woofiila esasanyedhiwe ni orandda. Abodhoya ekale annayi ni mathiwaya mannayi. 17Abodho aatene a cinga elibihiwe ni parata, ni dhingowo dha parata, mathiwaya ekale a mukuwa. 18Cinga ndda nikalena olapa wiwa meeturu makumi matanu (50m), orambalala wiwa meeturu makumi meenddi ni matanu (25m), otaama wa guwo ya nthoje nookwima meeturu meenddi ni meya (2,5m). Mathiwaya ekale a mukuwa. 19Dhookamihedha dhaatene dhinalaba mmusasani, ni dhikomo dhoolibihana musasa, ni dhikomo dha cinga dhikale dha mukuwa>>.
Makura a panti
(Levitiku 24.1-4)
20<<Waalamule aEzarayeli wi edhena makura apama azeeti wi ehiddihegena panti mahiyu maatene. 21Aroni ni anaaye ekamihedhege ni ohiddiha panti ciguwo ni ciguwo wi dhimoneyelege vameentoni va Nabwiya ofiyedha obebehini wiwa.#27.21 Obebehini wa malabo maatene panti dhookumihiwa wi dhifufuthiwege ni odhaaliha ni makura nihinafiye ciguwo nimohi. Panti nde dhikale muwari mwa musasa woogumanamo ni Mulugu, osogolo wa guwo yoogawa, odduli wa okale kaxa yowaandana. Ndda thi nlamulo noohumala na aEzarayeli ni aniiwa ni anamabaliwelamo eewa>>.
Currently Selected:
Okuma 27: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
