Okuma 26
26
Masasanyedho a musasa wa Mulugu
(Okuma 36.8-38)
1<<Osasanye musasa wa Mulugu ni guwo kumi dha nthoje na mutheengo wookwima#26.1 Nthoje mu ewogelo ya Ezugu nneeriwa liinyu., dhisasanyiwe ni osalu wamataakuru, waroxa ni woofiila. Waabordari dhoopaddusiwa dha odhulu dha mompelo, oosasanyedhiwa ni orandda. 2Olapa wiwa wa guwo ni guwo okalege meeturu kumi ni mannayi ni meya (14,5m). Orambalala wiwa okalege meeturu meenddi (2m). Guwo dhaatedhene dhifwanafwanege. 3Guwo tanu dhiluddeleliwe, dhimohi tanu teto dhiluddeleliwe. 4Mmagomelo moolapa mwa guwo tanu ni tanu mukalege makaando a guwo yamataakuru. 5Osasanye makaando makumi matanu (50) ohele omagomelo wa guwo emohi, osasanye teto makaando makumi matanu (50) ohele omagomelo wa guwo emohiwa, makaando ala esugwanege nimohi ni nikwaaye. 6Osasanye teto dhingowo makumi matanu (50) dha oro, ogumanihegena guwo ndo ni dhingowo. Ndala dhaatedhene nda onakala musasa mmohi.
7<<Oluwe dhookuneelana kumi nammohi dha mooya a mbuzi dhookuneelana musasa. 8Olapa wiwa wa yookuneelana ni yookuneelana okalege meeturu kumi ni matanu (15m). Orambalala wiwa okalege meeturu meenddi. Dhaatedhene kumi ni mmohi dhifwanafwanege. 9Oluddelele vamohi tanu, wamala oluddelele dhimohi tanu nammohi. Ela ya neetanu nammohi okune vadhulu osogolo wa musasa. 10Osasanyedhe makaando makumi matanu (50) ohele omagomelo wa guwo emohi, osasanye teto makaando makumi matanu (50) ohele omagomelo wa guwo emohiwa. 11Osasanye teto dhingowo makumi matanu (50) dha mukuwa, ongowena makaando ala. Ndala dhaatedhene nda onakala musasa mmohi. 12Guwo eyene enaahale, okuneelena odduli wa musasa. 13Dhipaddi dha guwo dhinaahale dhinafiya vati wi dhikuneele musasa waatene.#26.13 Ela enatapulela wi guwo ela ya mooya a mbuzi yahitthabwa olapa ohiyana ni ya nthoje ele, yoofiya vati putu dhuulubale dha musasa.
14<<Osasanye yookuneelana ya musasa ole ni makupa ookathiwa a mabila wi ekale oofiila, vadhuluviwa okuneele ni makupa a aneenyama a mwinko>>.
Abodho a musasa
15<<Osasanye mithanko dha akaasiya wi dhikale abodho owiimesana musasa ole. 16Olapa wiwa bodho ni bodho okalege meeturu matanu (5m), orambalala wiwa masentimeeturu makumi matanu nameenddi ni matanu (75cm). 17Bodho ni bodho akalegena dhoohiddeelana dhiwa biili wi dhoogumanihana abodho aatene a musasa. 18Wiinjiva wa abodho a musasa a epaddi ya wewo onadheela pevo ya murubi ekale makumi meenddi. 19Waasasanyedhe mathiwa a parata makumi mannayi wi bodho ni bodho vativiwa akalegena mathiwa meenddi. 20Epaddi ya wewo onadhowela pevo ya murubi ekalewo teto abodho makumi meenddi, 21ni mathiwa a parata, makumi mannayi bodho ni bodho vativiwa ekalegevo mathiwa meenddi. 22Odduli wa musasa, wewo onadhowela nduwa, waasasanyedhelewo abodho atanu nammohi, 23waasasanyedhe abodho abiili a mmwenddoni. 24Ala abiili elibihiwe ni mithanko dhimohi vano emagiwe ni mapago odhulu ni vati. 25Ndala ekale abodho atanu nathaaru ni mathiwaya a parata kumi ni matanu nammohi vativiwa.
26<<Osasanye mapago matanu a mithanko dha akaasiya wi ehideele abodho a nikukuru na musasa, 27osasanye teto matanu wi ehiddeelege bodho a musasa vaputuni amohiwa teto matanu wi ehiddeelege bodho a musasa a vaputuni epaddi, onadhowela nduwa. 28Nipago na vaari nivire nafiye omakuthulo wa abodho. 29Waahuruwedhe abodho ni oro, vano osasanyedhe mangooza ni oro wi ehiddeelege mapago. Mapagoya ehuruwedhiwe teto ni oro. 30Ndala wiimese musasa wona guwoonihiliimi omwaangoni wuno.
Magawelo a musasa wa Mulugu
31<<Osasanye teto guwo yoogawa ni guwo dha nthoje na mutheengo wookwima, na maganga na mataakuru, na roxa, ni noofiila. Magangaya ekale a dhoopaddusiwa dha odhulu dha mompelo oosasanyedhiwa ni orandda. 32Otomeye ni dhingowo dha oro mwaabodhoni annayi a mithanko dha akaasiya teto ehuruwedhiwe ni oro. Abodho ala ekale muwari mwa mathiwa mannayi a parata. 33Guwo yoogawa ela etomeyiwe ekale munddile wa Mburo Woweela ni Mburo Woweelesesa. Kaxa ya nipangano no waandana#26.33 Kaxa ya nipangano no waandana Yoologoleliwamo mabwe oolebiwa owiirela onamoona waandana woopangana Mulugu ni mulogo. ekale muwari, odduli wa guwo yoogawa. 34Omburoni Woweelesesa, vadhulu va kaxa ya nipangano no waandana, viheliwe yookuneelana voolobavo okurumuweliwa. 35Meeza waahele ode wa guwo enagawa. Extanti voohela panti ohele epaddi ya wewo onakuma pevo ya murubi. Waahele meeza mowaang'anana ni extanti, epaddi ya wewo onadhowela pevo ya murubi.
36<<Osasanyedhele teto guwo yuulubale vamavolowelo wa musasa, ni osalu wamataakuru, waroxa ni woofiila ni osalu wa nthoje nookwima, mabasa a namaborodaari oorandda. 37Osasanyedhele abodho atanu a mithanko dha akaasiya ehuruwedhiwe ni oro wi etomeyiwegevo guwo vamavolowelo. Dhingowodha dhikale dha oro, mathiwaya matanu ekale a mukuwa>>.
Currently Selected:
Okuma 26: tke
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
