Psalmo 37
37
1Le Davidoske.
Na xoliavo pe le nasul,
Te na avel tu drago te keres sar kudala kai keren nasul.
2Ke von si šinde sa kadia sigo sar e čar,
Ai von šukion sar e čar zeleno.
3De tu ka o Baro Del, ai ker o mištimos;
T'avel tuke o them kai bešes ai te kjides o čačimos.
4Ker anda o Baro Del tjire dragosti,
Ai vo dela tu so tjiro ilo mangel.
5Mang katar o Baro Del te lel sama tutar,
Tho ande leste tjiro patiamos, ai vo kerela.
6Vo sikavela peski kris sar e vedaria,
Ai tjiro zakono sar o kham ka mismeri.
7Beš muto angla o Baro Del, ai ažiuker ande leste;
Na xoliavo pe kudo kai niril ande peske vurmi,
Pe o manuš kai aresel te kerel nasul sar kamel.
8Muk e xoli, muk o xoliarimos;
Na xoliavo, si nasul te keres.
9Ke le nasul si šiudine,
Ai kudala kai ažiukeren ande o Baro Del avela lengo o them.
10Mai tsiřa vramia, ai o nasul či mai avela;
Tu dikhesa o than kai vo sas, ai vo bilailo.
11Le bi laše si lengo o them,
Ai von veselin pe but katar e patia.
12Le nasul den pe godji san te keren pe le vorta,
Ai vo grintsil le dand pe leste.
13O Baro asal katar o nasul,
Ke vo dikhel ke lesko dies getol pe.
14Le nasul tsirden e xanřo,
Von phanden peski sulitsa,
Te keren te peren le čoře ai le prosti,
Te šinen e koř kudalengi kai lengi vorba si vorta.
15Lengi xanřo del andre ande pengo ilo,
Ai lengi sulitsi phagion.
16Mai mišto tsiřa katar o vorta
Ke o but katar le nasul;
17Ke le vast le nasulenge avena phage,
Numa o Baro Del ninkerel le vorton.
18O Baro Del žianel le diesa le manušenge kai si vorta,
Ai so si lengo avela le pe sakda.
19Von nai tele ande e vramia kai si nasul,
Ai von si čaile le diesa kai si bokh.
20Numa le nasul xasavon,
Ai le dušmaia le Bare Devleske, san le mai laše čaria;
Von bilan, von bilan thuvesa.
21O nasul lel vužile, ai vo či del palpale;
O vorta si leske mila, ai vo del.
22Ke kudala kai svintson le Bare Devles si lengo o them,
Ai kudala kai den armaia si šiudine.
23O Baro Del zuriarel le pasuri le manušeske,
Ai leske si drago leski vurma;
24Te perela, či avela ninkerdo tele,
Ke o Baro Del lel lesko vast.
25Me simas terno, me phurilem;
Ai me či dikhlem o vorta te muken les,
Či leske šiave te mangen manřo.
26Sakda vo si miloso, ai vo del vužile;
Ai leske šiave si svintsime.
27De tu rigate katar o nasulimos, ker mištimos,
Ai t'avel tu pe sakda tjiro kher.
28Ke o Baro Del drago leske e kris,
Ai vo či mukel kudalen kai patian;
Von si sakda tela lesko vast,
Numa le šiave katar le nasul si dine rigate.
29Le vorta avela lengo o them,
Ai von bešena pe sakda.
30O mui katar o vorta phenen o godiarimos,
Ai leski šib phenel e kris.
31O zakono leske Devlesko si ande lesko ilo;
Leske pasuri či miškin.
32O nasul lel sama kai si o vorta,
Ai vo rodel te mudarel les.
33O Baro Del či mukel les ande lenge vast,
Ai vo či kerel te pokjinel kana si pe e kris.
34Ažiuker ande o Baro Del, arakh leski vurma,
Ai vo vazdela tu t'avel tjiro o them;
Tu dikhesa le nasul šiudine.
35Me dikhlem le nasules ande sa peski zor;
Vo bariolas sar jekh kopači kai zelenil.
36Vo nakhlias, ai eta, vo manai;
Me rodav les, ai vo manai.
37Le sama katar kudo kai si vorta čačo, ai dikh pe kudo kai si vorta;
Ke si jekh vitsa le manušeske patiako.
38Numa kai buntuin pe si sa bilade,
E vitsa le nasulengi si šiudini.
39O skipimos le vortonge avel katar o Baro Del;
Vo si kai lel sama lendar ande e vramia kai o nekazo.
40O Baro Del ažutil le ai skipil le;
Vo ankalavel le katar le nasul ai skipil le,
Ke von roden ande leste kai te garadion.
Currently Selected:
Psalmo 37: KALD
Highlight
Copy
Compare
Share
Want to have your highlights saved across all your devices? Sign up or sign in
© Alliance biblique française 2004
Learn More About E Nevi Viasta o Psalmo 2004 (Maximoff - Kalderaš)
