Ruth 1
INUPIAQ
1
Elimelech-lu Aimaaġviqatiiniḷu Nuuttut Moab-mun
1-2Qaŋasaaq, Israel umialgiñŋaan, niqaiḷḷiuŋarut tamaani nunami. Aŋun atiqaqtuaq Elimelech-mik, kiŋuniiqaqtuaq Ephrath-mik iñuuniaqtuamik Bethlehem-mi Judah-miittuami, aullaŋaruq Moab-mun tuvaaqatiniḷu, Naomi, malġuglu iġñigni, Mahlon-lu Chilion-lu. Tavraniitillugich, 3Elimelech tuquŋaruq, aasii Naomi kisiŋŋuŋagaa igñitiglu malġuk, 4nuliaŋaruak Moab-miugnik aġnagnik, Orpah-miglu Ruth-miglu. Qulit ukiut qaaŋianigmata 5Mahlon-lu Chilion-lu tuquŋammiuk, aasii Naomi kisiŋŋuŋagaat, uiŋatalu iġñiŋiksalu.
Naomi-ḷu Ruth-lu Utiqtuk Bethlehem-mun
6Naomi tusaamaruq Ataniġmun ikayuġnivḷugich iñuni nauriaŋich naupkaqługich; tavraasii itqanaiyaŋaruq aullaġukłuni Moab-miñ ukuagni kaluġlugik 7Aullaŋarut atautchikun utiqsaqłutik Judah-mun, aglaan iglaullaġmik 8uqallautiŋagaik, “Utiġusik aakavsigñiitchaqtuaġitchik. Atanġuptuq nakuugutilisik ilivsik nakuugutimmatun uvaŋalu taipkualu tuquŋaruat. 9Suli Atanġum savaaġiliuŋ allanik katillasiḷusik aimaaġviqallasiḷusik.”
Tavraa Naomi-m kuniŋagaik aullaqsaġami. Aglaan qianagutiŋaruk 10uqallautivlugu inna, “Naumi! Maligniagivsiġiñ ilvich nanmiñiq iḷaŋnukkuvich.”
11“Utiqtuksraurusik, paniimaaŋ,” Naomi-m kiuŋagaik. “Summan maligukpisiñŋa? Iġñiqavsaaġniaġnasugivisiñŋa katitchumiñaqtavsigñik? 12Aisitchik, utuqqauvaitchuŋa uiñitqigñiaŋitchuŋa. Isumagaluaġuma piviqallanasugiluŋasuli aasii katitilluŋa unnuapak aasii iġñiqaġluŋa, 13utaqqiñiaqpisik iñuguġataqtillugik? Tavra taamna uiñitchaiḷutaġiniaqpisiuŋ allamik? Naumi, paniimaanŋ, tainaitchumiñaitchuq. Atanġum tunutkaaŋa, aasii nagligiqpakkivsik.”
14Qianagutilgitchuk. Tavra Orpah-m kunikł̣ugu aakaruani aisaŋaruq, aglaan Ruth-gum tigummisiññaŋagaa. 15Tavraasii Naomi-m uqallautigaa, “Ruth, nukaunġun utiqtuq iñugmiñullu god-imiñullu. Utiġiḷḷi aiñmun maliglugu.”
16Aglaan Ruth-gum kiugaa, “Unitquuŋaiġiñ! Maliglakpiñ. Sumupayaaġuvich, maligniaġikpiñ; sumipayaaq iñuuniaġniaġuvich uvaŋaptauq tavrani iñuuniaġniaġmiuŋa. Iñuich ilvich pigiratin uvaŋaptauq piginiaġmigitka, God-in God-iginiaġmigiga. 17Sumipayaaq tuquguvich, tuquniaġmiuŋa, aasii tavrani iḷuviqtauluŋa. Atanġum tatavsautiŋisa suaŋaniqsrauruam tatavsaqsaġaaŋa unitkupkiñ patchisiqaġluŋa allamik avataagun tuquttutim!”
18Naomi-m iḷitchuġikamiuŋ Ruth maligupiaġataqtilaamiñik uqallatqiŋitchuq.
19Iglauŋaruk tikiḷġataqhutik Bethlehem-mun. Tikiñmagnik nunaaqqim iñuŋich quviasuŋarut, suli aġnat uqaŋarut inna, “Uvvauna tavra Naomi?”
20“Taiñasiñŋa Naomi-mik,” Naomi-mim kiuŋagaich; “taisiñŋa Marah-mik, qanukkii Suaŋaniqsrauruam God-im iñuusiġa quviiġaa. 21Maaŋŋa aullaġama, susuksiuŋaiñŋaruŋa, aglaan Atanġum utiqtitkaaŋa suiḷaaqłuŋa. Summan Naomi-mik taiñiaqpisiñŋa Atanġum suksraaġmaŋalu nagliksaaliqsiłł̣uŋalu?”
22Tainna tavra Naomi utiŋaruq Moab-miñ ukuamiñik Ruth-mik Moab-miumik, piqatiqaqłuni. Tikiñŋaruk Bethlehem-mun palauvaksrat pukugnaqsimmiullu.

North Slope Iñupiaq Bible

New Testament, Genesis 1-11, Ruth, Esther, Psalms 1-30 and 119, Jonah, and Obadiah © American Bible Society.

Remaining portions of Old Testament © Canadian Bible Society.

All rights reserved.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Canadian Bible Society, 10 Carnforth Road, Toronto, ON M4A 2S4 (www.biblesociety.ca)

Learn More About Iñupiatun Mumiksat Uqalugiksuat