Romans 6
6
Iliñiq Tuquŋaruatun Piḷuunmun Aglaan Iñuuvluni Christ-mi
1Taamna tainnainman, piḷuusiqiugaqtuksrauŋitchugut uuktuġniaqsiññaġlugu qanutun God nagliktuutiqpaqaqtilaaŋa. 2Piḷuusiqiruksrauŋipiaġataqtugut. Ukpiliqapta Christ Jesus-mun, iñuutchivut piḷuksisuguuruat tuqummatun piut. Taamna pisigilugu piḷuusiqiugaqtuksrauŋitchugut. 3Iḷisimarusi iluqata paptaiqsaukapta, Atausiŋŋuqatauŋarugut Christ Jesus-mun. Aasii ilaa tuqumman, uvagut piḷuksisuguuruat iñuutchivut tuqummiut. 4#Col 2.12.Tavra paptaiqsaukapta, piḷuktuat iñuutchivut iḷuviqataummatun piŋarut ilaa tuqumman. Aasii Christ-tun aŋipkaqtauruatun tuqqunmiñ suaŋŋataagun Aapam, uvaguttauq aitchuusiaqaŋammiugut nutauruamik iñuggunmik, aasii iñuuruksraurugut taavrumuuna nutauruakun iñuutchikun.
5Tavra atausiŋŋuqatigiŋaguptigu tuqqutaani, nalupqinaitchuq atausiŋŋuqatiginiaġmigikput aŋŋisaani. 6Iḷisimarugut ilaa kikiaktuurraumman uvagut piḷuksisuguuruat iñuutchivut kikiaktuurrauqatauŋarut ilaanun, piḷuunmun aŋalanŋaiquvluta, kivgauŋaiquvluta piḷuunmun. 7Iñuk tuqukami, aŋalatinŋaiġuuruq piḷuunmun. 8Piqatauŋaniqapta Christ tuqqutaani, ukpiqtugut piqatauniaqtilaaptiŋnik iñuusianun Christ. 9Qanuq iḷisimarugut Christ aŋipkaqtauganikami tuqqunmiñ, tuqutqikkumiñaipiaqtuq, tuqqutim atanniqsimatqikkumiñaitkaa. 10Christ tuqukami, tuquŋaruq atausiaqłuni, akiḷiġukługich piḷuutivut. Paŋmapak iñuuruq, iñuutuiññaqłuni God-mun. 11Ilivsiḷiasii isummatigiruksraurusi ilivsiññik tuquŋaruatun iḷiḷusi piḷuunmun, aŋalatinŋaiġḷusi piḷuunmun, aasii iñuulusi God-mun, qanuq atausiŋŋuqatigiŋagiksi Christ Jesus.
12Piḷuunmun aŋalatinnasi. Kamaginagich pigiitchuat pisuguutisi. 13Atuġnagu sulliñipayauraŋa timivsi piḷuusiqutigisuglugu. Aglaan God-im aŋalallisi qanuq tavraŋŋaaglaan aŋalatinŋaiŋarusi piḷuunmun iñuusarraqsikavsi God-mun. Aŋalatitchiuŋ sulliñipayauraŋa timivsi God-mun, nalaunŋarualiqiyumausi. 14Piḷuutim aŋalataġiŋaiġñiaġaasi, qanuq iñuuŋaiŋarusi kamaginiataglugich pitqurat, aglaan iñuurusi God-im nagliktuutiqpaŋagun.
Kivgauniq Nalaunŋarualiqiniġmun
15Taamna tainnainniġman, piḷuksiñata pisigilugu iñuuniqput God-im nagliktuutiqpaŋagun, kamaksriñiatagniġmiñ pitquranik qaisauruanik Moses-kun. Piḷuksiruksrauŋipiaġataqtugut. 16Iḷisimarusi nalliqsi kivgaliutiniġumi kimulliqaa, kamagiraksraġigaa kivgatun. Tainnatulli ilivsi piḷuunmun aŋalatitkuvsi kivgaummatun piḷuunmun inniaġmiusi, tasammaasii tatavsaqtaulġiñaġlusi isuitchuamun. Aglaan aŋalatitkuvsi kamagisuglugu God, nalaunŋaruaguniaqtusi ilaan sivuġaani. 17Tavra God quyyavigirauli, qanuq paŋmapak kamaksripialiqsusi uummativsiññiñ taavrumiŋa iḷisaurrutaanik God-im iḷisausiavsiññik, kivgausuuŋagaluaqtuasii piḷuunmun. 18Annaktitauganikłusi piḷuunmiñ, kivgaġuqtusi iłuatun iñuuniaġniġmun sivuġaani God-im. 19Uqautisaaqsigivsi uuktuusiġḷuŋa kivgauniġmik, kaŋiqsimmaġiksitquvlusi. Taimani aitchuutigisuuŋagaluakkasi timivsi sulliñipayauraŋich piḷuusiqiniġmun suli kamasuutaiqsaiññaġniġmun, tavrali paŋmapak aitchuutigisigik timivsi sulliñipayaaŋi nalaunŋaruakun iñuuniaġniġmun ilaaguaqtauyumausi God-mun.
20Kivgausuuŋŋavsi piḷuunmun, aŋalataġipkaŋaitchusi iñuuniaġniġmun nalaunŋaruamun sivuġaani God-im. 21Tainnatchim iñuutchim paŋmapak kanŋugilikkavsi anniqsuŋaitkaasi aglaan tatavsaqtaupkaġumiñaġaasi isuitchuamun. 22Paŋmapak-aasii atanġiqsitaurusi piḷuunmiñ kivgaliutivlusi God-mun, anniqsuusiaqaġniaqtusi ilaaguaqtauniġmik iñuggunmiglu isuitchuamik iñuutqulusi God-mun. 23Kiñaliqaa piḷuusiqirauruaq akiḷiusiaqaġniaqtuq tatavsaqtauluni isuitchuamun, aglaan God-im akiiḷaaq aitchuutigigaa iñuggun isuitchuaq tamatkunuŋa atausiŋŋuqatauruanun Christ Jesus-mun.
Currently Selected:
Romans 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
