Numbers 6
6
Maliġiraksraŋich Nazirite-guruat
1Atanġum piraksriġaa Moses 2ukuniŋa piraksriqsuquvlugich Israel-gum kiŋuvaaŋich. Nalliqsi, aŋutaugaluaġuvsi naakka aġnaugaluaġuvsi, ilaaguaqtaulugu unniqsuqłiiŋaguvsi Nazirite#6.2 Hebrew-guruat uqaluat “Nazirite” sivuniqaqtuq “taamna ilaaguaqtauŋaruaq” naagga “taamna unniqsuqłiiŋaruaq.” Atanġum savaaŋanun kisian tuktinŋavluni.-ŋuġugniḷusi suli qaitkuvsi Ataniġmun, 3#Lk 1.15.imiqtuksrauŋitchusi wine-mik naaggaunnii imiŋasiñaqtuamik. Imiqtuksrauŋitchusi vinegar-mik wine-miḷḷu allaniḷḷu imiŋasiñaqtuaniñ piḷianik. Imiqtuksrauŋiñmiusi imiḷianik grape-niñ, niġiruksrauŋitchusiḷu grape-niglu raisauraniglu. 4Nazirite-gullavsi, niġiñiaŋitchusi nauruanik grape napaaqtuayaaŋiññiñ, nautchiaksranik, naaggaunnii amiŋiññik grape-gum.
5Nazirite-guruam unniqsuqłiisaani illavsi, kivraġniaŋitkisi nuyasi naakka umŋiyaġlusi. Unniqsuqłiisigiŋaraqsi maliġuaqtuksraġiniġiksi piviksraq naalġataġlugu ilaaguaqtauniqsi Ataniġmun, aasii nuyasi naupkaqtaksraġiniaġisi. 6-7Nuyasi nalunaiñŋutaurut ilaaguaqtauŋatilaavsiññik God-mun, tavraasii ilivsiññun salumaiḷiruksrauniaŋiñmiusi qalliḷugu tuquŋaruam timaa, aapagigaluaġuvsiuŋ-unnii, aakagigaluaġuvsiuŋ, aniqatigigaluaġuvsiuŋ aŋun, naakka aniqatigigaluaġuvsiuŋ aġnaq. 8Nazirite-gullaqpich, ilaaguaqtauŋaniaqtutin Ataniġmun.
9Ilaaguaqtauŋaruat nuyatin salumaiḷiñiqpata saniġaqłiġiran iñuk tavraŋŋatchiaq tuquliġluni, utaqqiruksraurutin tallimat malġugni uvluni taimmaasii kivraġlugu niaqun iluġaaġlugu; tavra piraġausikun salumasiñiaqtutin. 10Tallimat piŋayuanni uvlut qaġġirriruksraurutin malġugnik dove-nik naakka malġugnik pigeon-nik aŋaiyyuliqsiqpaum paaŋanun Tupqum Atanġum nayuqtauviŋata. 11Aŋaiyyuliqsiqpaum aitchuutiginiaġaa atausiq piḷuunmun aitchuutaulugu suli igḷua ikipkautaulugu, nalaullugu piraġausiq salummaqtauniġum ilignun piḷuusiqiŋavlutin nayuutigavich tuquŋaruamun. Taaptumani-suli uvlumi ilaaguaqtaġitqigñiaġitin nuyatin. 12Ilaaguaqtaġitqigḷugulu Ataniġmun piviksran Nazirite-guniġni. Sivuani pirauniġiñ ikayuutauŋitchuq, qanukkii ilaaguaqtauŋaruat nusatin salumaiḷirauvlutiŋ. Nunuurautikun aitchuutausaġlugu qaġġirrigisirutin atausimik ukiuqaqtuamik imnaiyaamik.
13 #
Ac 21.23, 24. Naatkupku Nazirite-guruam unniqsuqłiisaa, una piraġausiq nalautitkisigiñ. Paaŋanuglutin Tupqum 14qaitchiḷutin Ataniġmun piŋasunik niġrutinik surruutaitchuanik: atausimik ukiuqaqtuamik aŋusallumik imnaiyaamik ikipkaġlugu aitchuutiksramik, atausimik ukiuqaqtuamik aġnasallumik imnaimik piḷuunmun aitchuutiksramik, suli aŋusallumik imnaimik iḷammiuġunmun aitchuutiksramik. 15Aitchuiḷutin suli punniġmik imaksrautaitchuamik aguummagmittuamik: mapturuanik punniġnik piḷianik palauvagmiñ akunŋaruamik olive uqsruanik suli maptukitchuanik siḷaavyagnik nanuŋaruanik olive uqsruanik, suli iḷagilugich aitchuutauruksrauruat palauvaksrallu wine-lu.
16Aŋaiyyuliqsiqpaum qaisaġiniaġaich iluqaisa taapkua Ataniġmun suli aitchuiḷuni piḷuunmun aitchuutauruamik suli ikipkautikun aitchuunmik. 17Aitchuutiginiaġaa aŋusalluq imnaiq Ataniġmun iḷammiuġunmun aitchuutigilugu, suli aitchuutigilugu punniq aguummagmiittuaq; qaiññiaġmigaich aitchuutauruat palauvaksrat wine-lu. 18Tavraasii, paaŋani Tupqum Nazirite-guruasii kivraġisigisi nutchasi aasii iḷaulugich ikipkaivigmun aitchuutauruanun iḷammiuġutikun.
19Tavraasii, kiasiŋa aŋusallum imnaim qalatitparruŋ, aŋaiyyuliqsiqpaum tigulugu iḷigisigaa, atautchikun punniġlu mapturuaq suli atausiq siḷaavyak aguummagmiñ, argaŋiñun Nazirite-guruam. 20Taamna pianikpan, aŋaiyyuliqsiqpaum qaisaġigisigaich ilaaguaqtaulugich aitchuutaulugich Ataniġmun; ilaaguaqtaġiŋalugich aitchuutauniaqtut aŋaiyyuliqsiqpagmun, iḷḷatilugich sakiaŋiñullu niuŋanullu aŋusallum imnaim pitqurakun pigiruksraġiraŋich aŋaiyyuliqsiqpaum. Taamna pianikpan, Nazirite-guruaq wine-tuġumiñaqtuq.
21Tavra taapkua maliġiraksraŋich Nazirite-guruat; aglaan unniqsuqłiiŋaguvich aitchuunmik qaaŋiġḷugu piraksraġiran unniqsuqłiutigni, taŋŋiqsaġlugu nalaupiallaglugu unniqsuqłiisigiŋaran.
Aŋaiyyuliqsiqpauruat Anniqsuusiaŋich
22Atanġum piraksriġaa Moses 23uqautitquvlugich Aaron-lu iġñiŋiḷḷu ukuniŋa uqaluqaquvlugich quviasaaġunmik qaitchikpata Israel-gum kiŋuvaaŋiññun:
24Atanġum-tuq anniqsuġlisin munaġilutillu;
25Atanġum-tuq iviġaumagilisin nagliktuutiqaġluniḷu iliŋnun;
26Atanġum-tuq qiñiġlisin iviġaumanaqtuakun tutqiutiqaqtillutillu.
27Tavra Ataniq uqallaktuq, “Taikparruŋ atiġa anniqsuutausaġlugu Israel-gum kiŋuvaaŋiññun, Uvaŋa anniqsuġniaġmigitka.”
Currently Selected:
Numbers 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
