Mark 11
11
Jesus Isiqtuq Jerusalem-mun Kakaksiqł̣uni Umialiktun
(Matthew 21.1-11; Luke 19.28-40; John 12.12-19)
1Tavra qallivḷutiŋ Jerusalem-mun tikiñŋarut Bethphage-mullu Bethany-mullu maniñġaniittuagnun iġġim Olives. Jesus tiliŋagik malġuk iḷitchitquraŋni sivumiŋni, 2aasii uqallautivlugik, aullaġitchik ininun sivuniptiŋnun. Aasii tikipqaġuptik, paqinniaqtutik kakaktim nuġġaŋanik pituqaqtuamik, iñuum kakaksiġvigiŋaisaŋanik. Pituiġḷugu qaġġisiyumagiktik. 3Aasii iñuum apiġikpatik, Summan tainna pivisik? Uqallakkumautik, Atanġum atuġukkaa, tavrauvvaa utiqtinniaġaa atuanikkumiuŋ. 4Tavra aullaŋaruk sivuniġmiŋnun. Suli paqinŋagaak kakaktim nuġġaŋa pituqaqtuaq siḷami apqutini saniġaani upkuam. Pituiġñiaqsaqtillugu, 5iḷaŋisa qikaqtuat tavrani uqallautiŋagaik, Summan pituiqpitku kakaktim nuġġaŋa? 6Tavra iliŋikta uqallautiŋagaich, Jesus piraksriutaatun. Tavra iliŋisa aullaqtinŋagaich. 7Tavra Jesus-mun qaġġisiŋagaak kakaktim nuġġaŋa. Aasii iḷiŋagaich annuġaatiŋ kakaktimun, tavra Jesus kakaksirraqsiŋaruq. 8Tavra iñugiaktuat iñuich isivinŋagaich annuġaatiŋ apqunmun. Allalli kivriŋarut qisiqsiutinik napaaqtuniñ, aasii iḷiuqqaqługich apqutinun. 9#Ps 118.25, 26.Tavra iñuich sivulliuruat, aquaguaqtuallu nipaallaŋarut, Hosanna, nanġaqtauli God. God-im piḷḷuataqtilliuŋ qairuaq pisivlugu Ataniq. 10God-im piḷḷuataqtilliuŋ atanniqsimannikkumaaqtuaq maŋŋuptiktun David-tun. Nanġaqtauli God.
11Tavra Jesus tikiñŋaruq Jerusalem-mun, aasii isiqłuni aŋaiyyuvikpaŋmun. Tavra qiñiġaaganikami supayaanun aniŋaruq. Tanuġaksivḷuni, aullaŋaruq Bethany-mun piqatigivlugich qulit malġuk iḷitchitqurat.
Jesus Tuqulipkaġaa Fig-nik Siiġñalik Napaaqtuq
(Matthew 21.18-19)
12Tavra uvlaakumman, qaikamiŋ Bethany-miñ, Jesus kaaliŋaruq. 13Tavra tautukługu fig napaaqtuat uŋasiñiñ akutuqpalik, ilaan ullaŋagaa, iḷaanni paqinnasugaluni fig-nik tavraŋŋa. Tavra tikiññamiuŋ paqinŋaitchuq sumik, aglaan akutuqpaich, qanuq nauviksraŋat fig-gich tikiñŋaitchuq. 14Tavra Jesus uqallautiŋagaa, Iñupayaam siiġñaqtuġvigiŋaiḷḷisin tavraŋŋaaglaan. Iḷitchitquraŋisa tusaaŋagaat uqallaŋman.
Jesus Aŋaiyyuvikpaŋmuktuq
(Matthew 21.12-17; Luke 19.45-48; John 2.13-22)
15Tavra tikiñŋarut Jerusalem-mun, aasii Jesus isiŋaruq aŋaiyyuvikpaŋmun. Ilaan anittaŋagai tuniuqqairuat tauqsiqsuqtuallu aŋaiyyuvikpaŋmi, suli ulġuuŋagai aglagviŋich maniḷiqirit, aquppiutaŋiḷḷu tuniuqqairuat tiŋmianik. 16Suli iñupayaaq saagaqtitchumiñaiñŋagaa supayaamik aŋaiyyuvikuaġlugu. 17#Is 56.7; Jr 7.11.Tavra ilaan iḷisautiŋagai iñuich, Aglausimaruq Bible-ni God-im uqallautaa inna, “Uvaŋa igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.
18Tavra pitquranik iḷisaurrit, aŋaiyyuliqsiqpaiḷḷu taamna tusaaŋagaat, aasii ivaqłiaŋarut qanuġlugu tuqutchukługu sivuuġagiliqł̣ugu, qanuq iñupayaat aliuŋarut iḷisaurrutiŋigun.
19Tavra tanuġaksimman, Jesus-lu iḷitchitquraniḷu aullaŋarut iniqpaŋmiñ.
Iḷisaksraq Fig-nik Siiġñaliŋmiñ Napaaqtumiñ
(Matthew 21.20-22)
20Tavra uvlaami, nalautchaaqługu fig napaaqtuq tautuŋagaat tuquliŋaruaq maŋŋuġmiñunaglaan. 21Tavra Peter-m itqautivlugu uqallautiŋagaa, Iḷisaurrii, tautuguŋ, fig napaaqtuq tuquliŋaruq uqallautiŋaran siiġñaqtuġvigitquŋił̣ł̣ugu tavraŋŋaaglaan. 22Tavra Jesus kiuŋagaa, God-mun ukpiġutiqaġitchi. 23#Mt 17.20; 1 Co 13.2.Qanuq iḷumun uqallautigivsi, kialiqaa uqallautikpagu una iġġiq, Nuuttin, igitaugiñ taġiumun. Nalupqisuŋipiaġuvich, aglaan ukpiġlutin tamatkua sut uqallausiġikkatin nalaunniaġniḷugich, tavra taamna pirauniaqtuq iliŋnun. 24Tavraasii uqallautigivsi, supayaat kipiġniuġutigikkasi, aŋaiyyutigiguvsigik ukpiġitchi aitchuusiaġiniḷugich, tavra piginiaġisi. 25#Mt 6.14, 15.Suli qikaqavsi aŋaiyyuvlusi, suliqutigiŋaiġñigitchi itqaumayumiñaiġḷugich sunŋutiqaġuvsi kimulliqaa, Aapavsivsauq qiḷaŋmiittuam suliqutigiŋaiġumagai piḷuutisi itqaumayumiñaiġḷugich. 26[Ilivsi suliqutigiŋaiġñiŋitkuvsi itqaumayumiñaiġḷugich, Aapavsivsauq qiḷaŋmiittuam suliqutigiŋaiġñiaŋiñmigai itqaumayumiñaiġḷugich piḷuutisi.]
Jesus Apiqsruqtauruq Ataniġnaqutaagun
(Matthew 21.23-27; Luke 20.1-8)
27Utiġmata Jerusalem-mun, Jesus pisuaqtillugu aŋaiyyuvikpaŋmi, qaiŋarut ilaanun aŋaiyyuliqsiqpaich, iḷisaurriḷḷu pitquranik, umialiŋnallu, 28aasii apiġivlugu, Sum ataniġnaqutaagun tamatkua pivigich? Kia taavrumiŋa ataniġnaqusiqpatin tamatkua pitquvlugich? 29Tavra Jesus kiuŋagai, Apiqsriñiaqtuŋalivsauq ilivsiññiñ atautchimik apiqqunmik. Kiuguvsiŋa, uqallautiniaġivsi qanutchikun ataniġnaqutikun uvaŋa pisilaamnik tamatkuniŋa. 30Kia ataniġnaqutiksriñŋavauŋ John paptaiqsiñiksraŋagun, God-im naagga iñuum? 31Tavra uqavaaŋarut avanmun uqaqłutiŋ, Uqallakkupta God-miŋŋaqtauniḷugu ilaa uqallagniaqtuq, Summanmi ilivsi John ukpiġiŋaitpisiuŋ? 32Suli uqaġumiñaitchugut ataniġnaqutaa iñuŋniñ piñiḷugu. Iliŋisa sivuuġagiŋagaich iñuich, qanuq iñupayaat nalupqigiŋaitkaat John God-mun uqaqtautilaaŋa. 33Tavra Jesus kiuŋagaat, Nalurugut. Aasii Jesus uqallautiŋagai, Uqallautiyumiñaiñmigivsivsauq kimun ataniġnaqutiksrisilaamnik tamatkuniŋa piyumiñaqsivḷuŋa.
Currently Selected:
Mark 11: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
Mark 11
11
Jesus Isiqtuq Jerusalem-mun Kakaksiqł̣uni Umialiktun
(Matthew 21.1-11; Luke 19.28-40; John 12.12-19)
1Tavra qallivḷutiŋ Jerusalem-mun tikiñŋarut Bethphage-mullu Bethany-mullu maniñġaniittuagnun iġġim Olives. Jesus tiliŋagik malġuk iḷitchitquraŋni sivumiŋni, 2aasii uqallautivlugik, aullaġitchik ininun sivuniptiŋnun. Aasii tikipqaġuptik, paqinniaqtutik kakaktim nuġġaŋanik pituqaqtuamik, iñuum kakaksiġvigiŋaisaŋanik. Pituiġḷugu qaġġisiyumagiktik. 3Aasii iñuum apiġikpatik, Summan tainna pivisik? Uqallakkumautik, Atanġum atuġukkaa, tavrauvvaa utiqtinniaġaa atuanikkumiuŋ. 4Tavra aullaŋaruk sivuniġmiŋnun. Suli paqinŋagaak kakaktim nuġġaŋa pituqaqtuaq siḷami apqutini saniġaani upkuam. Pituiġñiaqsaqtillugu, 5iḷaŋisa qikaqtuat tavrani uqallautiŋagaik, Summan pituiqpitku kakaktim nuġġaŋa? 6Tavra iliŋikta uqallautiŋagaich, Jesus piraksriutaatun. Tavra iliŋisa aullaqtinŋagaich. 7Tavra Jesus-mun qaġġisiŋagaak kakaktim nuġġaŋa. Aasii iḷiŋagaich annuġaatiŋ kakaktimun, tavra Jesus kakaksirraqsiŋaruq. 8Tavra iñugiaktuat iñuich isivinŋagaich annuġaatiŋ apqunmun. Allalli kivriŋarut qisiqsiutinik napaaqtuniñ, aasii iḷiuqqaqługich apqutinun. 9#Ps 118.25, 26.Tavra iñuich sivulliuruat, aquaguaqtuallu nipaallaŋarut, Hosanna, nanġaqtauli God. God-im piḷḷuataqtilliuŋ qairuaq pisivlugu Ataniq. 10God-im piḷḷuataqtilliuŋ atanniqsimannikkumaaqtuaq maŋŋuptiktun David-tun. Nanġaqtauli God.
11Tavra Jesus tikiñŋaruq Jerusalem-mun, aasii isiqłuni aŋaiyyuvikpaŋmun. Tavra qiñiġaaganikami supayaanun aniŋaruq. Tanuġaksivḷuni, aullaŋaruq Bethany-mun piqatigivlugich qulit malġuk iḷitchitqurat.
Jesus Tuqulipkaġaa Fig-nik Siiġñalik Napaaqtuq
(Matthew 21.18-19)
12Tavra uvlaakumman, qaikamiŋ Bethany-miñ, Jesus kaaliŋaruq. 13Tavra tautukługu fig napaaqtuat uŋasiñiñ akutuqpalik, ilaan ullaŋagaa, iḷaanni paqinnasugaluni fig-nik tavraŋŋa. Tavra tikiññamiuŋ paqinŋaitchuq sumik, aglaan akutuqpaich, qanuq nauviksraŋat fig-gich tikiñŋaitchuq. 14Tavra Jesus uqallautiŋagaa, Iñupayaam siiġñaqtuġvigiŋaiḷḷisin tavraŋŋaaglaan. Iḷitchitquraŋisa tusaaŋagaat uqallaŋman.
Jesus Aŋaiyyuvikpaŋmuktuq
(Matthew 21.12-17; Luke 19.45-48; John 2.13-22)
15Tavra tikiñŋarut Jerusalem-mun, aasii Jesus isiŋaruq aŋaiyyuvikpaŋmun. Ilaan anittaŋagai tuniuqqairuat tauqsiqsuqtuallu aŋaiyyuvikpaŋmi, suli ulġuuŋagai aglagviŋich maniḷiqirit, aquppiutaŋiḷḷu tuniuqqairuat tiŋmianik. 16Suli iñupayaaq saagaqtitchumiñaiñŋagaa supayaamik aŋaiyyuvikuaġlugu. 17#Is 56.7; Jr 7.11.Tavra ilaan iḷisautiŋagai iñuich, Aglausimaruq Bible-ni God-im uqallautaa inna, “Uvaŋa igluqpaga taggisiqaġniaqtuq iñupayaat aŋaiyyuyaqtuġviannik.” Aglaalli ilivsi iriqtuġviḷiutiŋagiksi tigligayuktinun.
18Tavra pitquranik iḷisaurrit, aŋaiyyuliqsiqpaiḷḷu taamna tusaaŋagaat, aasii ivaqłiaŋarut qanuġlugu tuqutchukługu sivuuġagiliqł̣ugu, qanuq iñupayaat aliuŋarut iḷisaurrutiŋigun.
19Tavra tanuġaksimman, Jesus-lu iḷitchitquraniḷu aullaŋarut iniqpaŋmiñ.
Iḷisaksraq Fig-nik Siiġñaliŋmiñ Napaaqtumiñ
(Matthew 21.20-22)
20Tavra uvlaami, nalautchaaqługu fig napaaqtuq tautuŋagaat tuquliŋaruaq maŋŋuġmiñunaglaan. 21Tavra Peter-m itqautivlugu uqallautiŋagaa, Iḷisaurrii, tautuguŋ, fig napaaqtuq tuquliŋaruq uqallautiŋaran siiġñaqtuġvigitquŋił̣ł̣ugu tavraŋŋaaglaan. 22Tavra Jesus kiuŋagaa, God-mun ukpiġutiqaġitchi. 23#Mt 17.20; 1 Co 13.2.Qanuq iḷumun uqallautigivsi, kialiqaa uqallautikpagu una iġġiq, Nuuttin, igitaugiñ taġiumun. Nalupqisuŋipiaġuvich, aglaan ukpiġlutin tamatkua sut uqallausiġikkatin nalaunniaġniḷugich, tavra taamna pirauniaqtuq iliŋnun. 24Tavraasii uqallautigivsi, supayaat kipiġniuġutigikkasi, aŋaiyyutigiguvsigik ukpiġitchi aitchuusiaġiniḷugich, tavra piginiaġisi. 25#Mt 6.14, 15.Suli qikaqavsi aŋaiyyuvlusi, suliqutigiŋaiġñigitchi itqaumayumiñaiġḷugich sunŋutiqaġuvsi kimulliqaa, Aapavsivsauq qiḷaŋmiittuam suliqutigiŋaiġumagai piḷuutisi itqaumayumiñaiġḷugich. 26[Ilivsi suliqutigiŋaiġñiŋitkuvsi itqaumayumiñaiġḷugich, Aapavsivsauq qiḷaŋmiittuam suliqutigiŋaiġñiaŋiñmigai itqaumayumiñaiġḷugich piḷuutisi.]
Jesus Apiqsruqtauruq Ataniġnaqutaagun
(Matthew 21.23-27; Luke 20.1-8)
27Utiġmata Jerusalem-mun, Jesus pisuaqtillugu aŋaiyyuvikpaŋmi, qaiŋarut ilaanun aŋaiyyuliqsiqpaich, iḷisaurriḷḷu pitquranik, umialiŋnallu, 28aasii apiġivlugu, Sum ataniġnaqutaagun tamatkua pivigich? Kia taavrumiŋa ataniġnaqusiqpatin tamatkua pitquvlugich? 29Tavra Jesus kiuŋagai, Apiqsriñiaqtuŋalivsauq ilivsiññiñ atautchimik apiqqunmik. Kiuguvsiŋa, uqallautiniaġivsi qanutchikun ataniġnaqutikun uvaŋa pisilaamnik tamatkuniŋa. 30Kia ataniġnaqutiksriñŋavauŋ John paptaiqsiñiksraŋagun, God-im naagga iñuum? 31Tavra uqavaaŋarut avanmun uqaqłutiŋ, Uqallakkupta God-miŋŋaqtauniḷugu ilaa uqallagniaqtuq, Summanmi ilivsi John ukpiġiŋaitpisiuŋ? 32Suli uqaġumiñaitchugut ataniġnaqutaa iñuŋniñ piñiḷugu. Iliŋisa sivuuġagiŋagaich iñuich, qanuq iñupayaat nalupqigiŋaitkaat John God-mun uqaqtautilaaŋa. 33Tavra Jesus kiuŋagaat, Nalurugut. Aasii Jesus uqallautiŋagai, Uqallautiyumiñaiñmigivsivsauq kimun ataniġnaqutiksrisilaamnik tamatkuniŋa piyumiñaqsivḷuŋa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)