Matthew 11
11
John Paptaiqsim Tiligik Iḷitchitquragni Jesus-mun
(Luke 7.18-35)
1Tavra Jesus naatchikami iḷisaurrunmiñik qulit malġuk iḷitchitquramiñun, tavraŋŋa aullaŋaruq iḷisaurriyaqtuqłuni alġaqsruiyaqtuqłuniḷu nunaaqqiñun tamaaniittuanun.
2Tavra John tusaakami tigutaaqtaullaġmi savaaŋigun Christ, tilisiŋaruq uqaluŋmik iḷitchitquramigun 3aasii apiġivlugu Jesus, Taivrumiŋauvich qaiyumaaqtuaguruaq, naagga niġiugniaqpisasuli allamik? 4Tavra Jesus kiuŋagik, Aullaġlutik quliaqtuaġutiyaqtutku John sunik tusaaravsiññik tautukkavsiññiglu. 5#Is 35.5, 6; Is 61.1.Ayauŋaruat tautullasirut, tusiattuallu pisuaqtut, kiḷḷiġruaqtuqtuat mamititaurut, tusiḷḷaqtuatsuli tusaallasirut, tuquŋaruallu aŋipkaqtaurut, suli piqaqtuksrauruat tusaayugaaġiksuanik alġaqsruusiaqaqtut. 6Aasii quviasugli iñuk ukpiŋaiŋitchuaq uvamnun.
7John-gum iḷitchitquraŋik utiqsaġmaŋnik, Jesus uqautisarraqsiŋagai iñusalaich John-kun. Tautugiaqavsiuŋ John nunagluktuamun, sumik tautugniaġasugiraġivisi? Tautugiaqtaqpisiuŋ iñuk maliksuktaqsiññaqtuaq ivigruatun anuġim aulataġikkaŋatun? Naumi. 8Summanmi aullaġuuniqpisi? Tautugiaqpisiuŋ iñuk annuġaaqaqtuaq akisuruanik annuġaanik? Iḷisimarusi tamatkua akisuruanik annuġaaqaqtuat umialgich igluqpaŋiññiittut. 9Summanmi ullautiraġivisi? Tautugiaqpisiuŋ uqaqtaa God-im? Aaŋ, uqallautigivsi nalupqinaitchuq, kamanałhaaqtuq unnii uqaqtiŋiññiñ God-im. 10#Ml 3.1.John taimñauruq aglausimaruaq Bible-ni inna, “Uvva tiligiga kivgaġa sivuŋni, itqanaiyaġniaġai iñuich akuqtuiyumiñaqsiḷugich iliŋnik.” 11Iḷumun uqallautigivsi, John Paptaiqsi kamanaġniqsrauruq iñuŋniñ aniŋaruaniñ nunami. Aglaattauq uvva paŋmapaŋmiñaglaan iñuk kamanaiññiqsrauruaq tamatkunaŋŋa atanniqsimapkaqtuaniñ God-mun kamanałhaaqtuq John-miñ, qanuq iḷitchuġiłhaaġniaqtuq sunik God-im salapqiġñiakkaŋiñik uvapkun. 12#Lk 16.16.Alġaqsruisaġniŋaniñ John Paptaiqsim paŋmapaŋmunaglaan, piyumalaaqtuat iñuich siġġaqiŋarut God-mun atanniqsimatquvlutiŋ. 13Qanuq Moses aglaaŋisa iluqaġmiglu God-im uqaqtiŋisa John-munaglaan uqautigiŋagaat sivuani tikiñŋaiñŋaan God-im atanniqsimmataa. 14#Ml 4.5; Mt 17.10-13; Mk 9.11-13.Aasii ukpiġisukkuvsiuŋ uqaluat, ukpiġiyumiñaġiksi John-gutilaaŋanik sivuani uqautigikkaŋat qaiñiaġnivḷugu inniaqtuaq Elijah-tun. 15Siutiqaqtusi tusaggatiksragnik, naalaġnisiŋa.
16Aglaan sumun arriḷisiginiaqpik ukua paŋmapak iñuuruat? Miqłiqtutun ittut avutqautiruatun piuraaqłutiŋ kasimaraġaġviŋñi, katirrusiqiŋŋuaqłutiglu, tuquruaniglu aŋaiyyurriŋŋuaqtuatun. 17Piuraallaġmiŋ ququullativlutiŋ avanmun inna, atuqtuurautigaluaġivsi uaminŋitchusi. Kiŋunġuŋŋuaqłuta qiaŋŋuaqapta, qiaŋitchusi. 18John Paptaiqsi qaikami niġiḷaitqataŋaruq imiġaluaġnaniḷu wine-mik, aasii uqautigigiksi ilaa ilitqusiqł̣uqaġnivḷugu. 19Iġñiŋa Iñuum qaiŋaruq niġivḷuni imiqłuniḷu allatun iñuktitun, aasii uvyauġiksi, Marra niġġiqsuruaq wine-tuqtiqpaglu, avilaitqataat tax-iñik katitchirit, piḷuusiqirillu. Suliqutauŋitchuq qanuq uqaġaluaġuvsi, qanuq isumaturuat iñuich puttuqsriḷḷagaat God-im isumattutaa.
Ukpiŋitchuat Nunaaqqich Iḷaŋiññi
(Luke 10.13-15)
20Tavra Jesus suarraqsiŋagai iñuich nunaaqqiñi iñuuruat savagvigiŋarani iñugiagniqsranik aliuġnaqtuanik, qanuq isumalitqiŋiñmata. 21#Is 23.1-18; Ez 26.1—28.26; Jl 3.4-8; Am 1.9, 10; Zec 9.2-4.Qanutun naglignaqtigirusi ilivsi, Chorazin-miut. Qanutun naglignaqtigimmiusi ilivsi Bethsaida-ġmiut. Qanuq aliuġnaqtuat savaat savaaguruat ilivsiññi savaaguŋakpata Tyre-miḷu Sidon-miḷu, taimaniuvva isumalitqikkumiñaŋagaluaqtut annuġaaġlutiŋ miitchugnik suli aquppiḷutiŋ aġrani. 22Tavra uqallautigivsi, uvluani isivġiġvium isivġiusiaksraŋat Tyre-vlu Sidon-lu iñuŋisa tunikił̣haaġniaqtuq ilivsi isivġiusiaksravsiññiñ. 23#Is 14.13-15; Gn 19.24-28.Aasii ilivsi Capernaum-miut, isumavisi tugliqsruutinasugalusi qiḷaŋmun kamanaunmi? Nunaaqqiqsi suksraunġiqsauniaqtuq. Qanuq aliuġnaqtuat savaaguruat ilivsiññi savaaguŋakpata Sodom-mi, napanayaġaluaqtuq uumuŋaaglaan uvlumun. 24#Mt 10.15; Lk 10.12.Aglaan uqallautigivsi, tunikił̣haaġniaqtuq isivġiusiaksraŋat iñuŋisa Sodom, uvluani isivġiġvium ilivsiññiñ.
Qaiḷusi Uvamnun Unaŋuiqsiġitchi
(Luke 10.21-22)
25Tavrani Jesus uqallaŋaruq, Quyyavigigikpiñ, Aapaaŋ, Atanġuruatiin qiḷaŋmun nunamullu, iriqsimaŋakapkich iḷumun ittuat pisin isumatunasugiruaniñ iḷisimanasugiruaniḷḷu, aasii satqummiqł̣ugich iñuŋnun miqłiqtutun ittuanun. 26Aaŋ, Aapaaŋ. Tainna pisuutigiŋagiñ iviġaumagivlugu.
27 #
Jn 3.35;
Jn 1.18; 10.15. Aapama supayaat qaiñŋagai uvamnun, aasii kialiqaa iḷisimaŋitkaa Iġñiq aglaan kisimi Aapam. Kialiqaa suli iḷisimmaġiitkaa Aapa aglaan Iġñiġum kisimi, kiapayaaġlu Iġñiġum iḷitchuġipkakkaŋa Aapamik. 28Iluqasi uqumaiḷḷiraqtuasii uŋiarrisaġivlugich piḷuutisi akuqtuqtauniksraqsiḷu God-mun, qaisitchi uvamnun unaŋuiqsiqsitchumagivsi. 29#Jr 6.16.Anuqasiutisitchi uvamnun, aasii iḷisaġlusi uvamniñ, qanuq uvaŋa piaqłuktaŋitchuŋa qimmaksaliyaitchuŋalu, aasii unaŋuiqsiġñiaqtusi. 30Qanuq anu aitchuutiga ilivsiññun naammaktuq, aasiisuli savaaksraq piraksriutiginiakkaġa ilivsiññun nagniġutauniaŋitchuq.
Currently Selected:
Matthew 11: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
