Leviticus 4
4
Aitchuutit Pisaaġiŋił̣ł̣utiŋ Piḷuksiruat Pisigivlugich
1Atanġum piraksriŋagaa Moses 2uqautitquvlugich Israel-gum kiŋuvaaŋich kiñaliqaa piḷuusiqiruaq suli kamagiŋiḷḷugich Atanġum piraksriutiŋich pisaaġigaluaġnani, maliġiruksraġigaich ukua maliġiraksriat.
3Aŋaiyyuliqsiqpak piḷuusiqiniqpan aasii taputilugich iñuich, aitchuiruksrauruq immulivium aŋusalluayaaŋanik surruutaitchuamik aasii ikipkaġvikun aitchuutigilugu Ataniġmun piḷuutini pisigilugu. 4Immulivium aŋusalluŋa paaŋanuutigisigaa Tupqum, argani niaquanuglugu, aasii tuqullugu tavrani Atanġum sivuġaani. 5Tavraasii Aŋaiyyuliqsiqpaum Tupiġmuutiniaġaa iḷaŋa auŋa. 6Tikini misuglugu auŋanun aasii siqił̣ł̣aktiġutigilugu tallimat malġugni sivuġaanun talukiyaaŋata Inim Salumaniqsram. 7Tavraasii auliqsuġisigaich nagruich kaŋiġallullaaŋaniittuat tivraġiksautinun ikipkaiviuruam Tupiġmi. Kuvigisigaa iḷakua augum alliġaŋanun ikipkaivium, paaŋaniittuam Tupqum. 8Taaptumaŋŋa immulivium aŋusalluaniñ piḷugu iluqaan qaunnaŋa, itchauraŋiḷḷu, 9taqtuŋiglu taqtuġutiqaġlugik, takiniŋalu tiŋuum, 10aasii taapkua iluqaisa ikipkaġlugich ikipkaivigmi, aitchuisimisun sivuani iḷammiuġnikun aitchuutauruamik. 11Aglaan pigisigaa amiŋa, iluqaan niqaa, niaqua, niuŋich, suli ilġaviŋich, iḷagilugich iŋaluaŋich, 12annisilugich nullaummiviuruamiñ piraġausiq nalaullugu salumaruaguruamun aġrat naavirviannun, aasii tavrani ikipkaġisigaa qiruich ikualavianni.
13Iluqaġmi nunaaqqiŋat Israel-gum kiŋuvaaŋisa piḷuusiqiniqpan pisaaġigaluaġnatiŋ, pasiraulutiglu navgiñiḷugich iḷaŋannik Atanġum piraksriutaanik, 14tavra iḷitchuġipqauraġumiŋ piḷuutautilaaŋanik, nunaaqqiuruat qaġġirrigisirut immulivium aŋusalluayaaŋanik piḷuunmun aitchuutausaġlugu. Tupiġmuutigisigaat Atanġum nayuqtauvianun; 15aullarrauruat nunaaqqimi argatiŋ niaquanuglugich, aasii tavrani tuqullugu sivuġaani Atanġum. 16Aŋaiyyuliqsiqpak Tupiġmuurrisaqtuq immulivium aŋusalluayaam auŋata iḷaŋanik, 17misuglugu tikini, aasii siqił̣ł̣aktautigilugu tallimat malġugni sivuġaanun talukiyaam. 18Auliqsuġisigaich nagruich kaŋiġallullaaŋaniittuat tivraġiksautinun ikipkaivium iḷuani Tupqum aasii kuviḷugu iḷakua alliġaŋanun ikipkaivium aitchuutauruanun, paaŋaniittuamun Tupqum. 19Tavraasii iluqaan qaunnaŋat ikipkaġlugu. 20Ilaata tainnasuli piñiaġaa taamna aŋusalluayaaq piusimisun sivuani piḷuutinun aitchuutauruamun, aasii tainna pigumi ikipkaiḷuni aitchuutiqaġniaqtuq iñuich piḷuutiŋiñun, aasii iliŋich suliqutigiŋaiqsauniaqtut. 21Tavra immulivium aŋusalluayaaŋa annisiniaġaa nullaummivigmiñ aasii ikipkaġlugu, ikipkausimisun aŋusalluayaamik aitchuutauruamun ilaata nanmiñiq piḷuutimiñun. Taamna tavra aitchuutauruq piḷuutaiqsaqługu nunaaqqiuruaq.
22Aullarriuruaġli piḷuusiqiniġumi pisaaġigaluaġnani aasii pasirauluni navginiḷugu Atanġum piraksriutaanik, 23tavra iḷitchuġipqauraġumi piḷuusiqitilaamiñik, qaġġirrigisiruq aitchuutigilugu aŋusalluq nagrulik surruutaitchuaq. 24Argani niaquanuglugu nagruligum aasii tuqullugu ikipkaivium salliñaaŋani, niġrutit aitchuutiksrat ikipkaaksrat tuqurvianni. Taamna aitchuutauniaqtuq piḷuutaiqsaġlugich. 25Aŋaiyyuliqsim misuglugu tikini auŋanun niġrutim, auguaqtaġniaġaich nagruich kaŋiġallullaaŋaniittuat ikipkaivium, aasii kuviḷugu iḷakua alliġaŋanun ikipkaivium. 26Tavraasii ikipkaġisigaa iluqaan qaunnaŋa, ikipkausimisun qaunnaŋannik niġrutit tuquttaŋisa iḷammiuġunmun aitchuutauruanun. Tainna tavra aŋaiyyuliqsiqpaum ikipkaġlugu aitchuutiginiaġaa piḷuutaa pisigilugu aullarriuruam, aasii ilaa suliqutigiŋaiqsauniaqtuq.
27 #
Nu 15.27, 28. Nalliqsi piḷuusiqikpan pisaaġigaluaġnani aasii pasirauluni navginiḷugu iḷaŋannik Atanġum piraksriutiŋisa, 28tavra iḷitchuġipqauraġumi piḷuusiqitilaamiñik, qaġġirrigisiruq aitchuutiksramiñik aġnasallumik nagruligmik surruutaitchuamik. 29Argani niaquanuglugu tuqutkisigaa salliñaaŋani ikipkaivium, niġrutinik ikipkaġlugich aitchuutiksranik tuqutchivianni. 30Aŋaiyyuliqsim misuglugu tikini auŋanun niġrutim, auguaqtaġisigaich nagruich kaŋiġallullaaŋaniittuat ikipkaivium, aasii iḷakua kuviḷugu alliġaŋanun ikipkaivium. 31Tavraasii qaunnaŋa iluqaan piiġñiaġaa, qaunnaŋat piiġusiatitun niġrutit tuqunmatigik iḷammiuġunmun aitchuutauniaqtuat, aasii aŋaiyyuliqsiqpaum ikipkaġniaġaa ikipkaivigmi tipaa iviġaumanaġniaġmiuq Ataniġmun. Tainna tavra aŋaiyyuliqsiqpaum aitchuutiginiaġaa iñuum piḷuutiŋiñun, suli ilaa suliqutigiŋaiqsauniaqtuq.
32Imnaimik qaġġirrigumi piḷuunmun aitchuutausaġlugu, aġnasalluuruksrauruq surruutaiḷḷuni. 33Argani niaquanugulugu aasii tuqullugu salliñaaŋani ikipkaivium, niġrutinun ikipkaqługich aitchuutauniaqtuanun tuqutchivianni. 34Aŋaiyyuliqsim misuglugu tikini auŋanun niġrutim, auguaqtaġniaġaich nagruich kaŋiġallullaaŋaniittuat ikipkaivium, aasii kuviḷugu iḷakua alliġaŋanun ikipkaivium. 35Tavraasii iluqaan qaunnaŋa piiġisigaa, qaunnaŋa piiġmatun imnaimiñ tuquttaŋanniñ iḷammiuġunmun aitchuutausaqługu, aasii ikipkaġisigaa ikipkaivigmi iḷagilugich niqit aitchuutauruat Ataniġmun. Tainna tavra pigumi aŋaiyyuliqsiqpaum aitchuutiginiaġaa ikipkaġlugu piḷuutiŋanun, aasii suliqutigiŋaiqsauniaqtuq.
Currently Selected:
Leviticus 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
