Leviticus 1
1
Ikipkaqtat Aitchuutit
1Atanġum ququulaŋagaa Moses Tupqaniñ Atanġum nayuqtauviŋata aasii aitchuqługu ukuniŋa maliġiraksraŋiññik 2Israel-gum kiŋuvaaŋich atuaksraŋiññik aitchuigumiŋ ikipkaivikun.
Aitchuiguvsi niġrunmik ikipkaġlugu, pamiqsaaguyumiñaqtuq, imnaiguyumiñaqtuq, naaggaunnii nagruliuluni. 3Aitchuiguvsi iḷaŋannik pamiqsaat ikipkaŋaruamik, qaġġirriruksraurusi aŋusallumik surruutaitchuamik sumik unnii. Paaŋanuglugu Tupqum Atanġum irvianun, ilaata akuqtullayumagaasi. 4Argaiñ niaquanuglugu, aasii akuqtuqtauniaqtuq ikipkaaksrauluni aitchuun piḷuutaiqsaġlutin. 5Tavrani tuqullugu immulivium aŋusalluŋa sivuġaani Atanġum, aasii Aaron iġñiŋisa aŋaiyyuliqsauruat qaġġisiniaġaat auk aasii siqił̣ł̣aqtiġutigilugu iluqaiññun saniġaŋiññun ikipkaivium paaŋaniittuam Tupqum. 6Tavraasii amiiyaqqaaġlugu piḷaglugu, 7aasii Aaron iġñiŋisa qirriġñiaġaat ikipkaivik ikillugulu. 8Iḷigisigaich igniġmun avguŋaruat niqiŋich niġrutim, taputilugik niaqualu qaunnaŋalu. 9Iġġuġisigisi iḷuġutiŋich suli kiŋulliik niuŋik, aasii aŋaiyyuliqsiqpaum ikipkaġniaġaa iluqaan aitchuutauruaq ikipkaivigmi. Tivraġigñiŋa ikipkaqtam iviġaumanaqtuq Ataniġmun.
10Aitchuutigiguvsiuŋ iḷaŋat imnaivsi naakka nagrulik, aŋusalluuruksrauruq surruutaiḷḷuniḷu. 11Tuqunniaġiksi ikipkaivium salliani, aasii aŋaiyyuliqsiqpaich siqił̣ł̣aqtiġutiginiaġaat auŋa iluqaiññun saniġaŋiññun ikipkaivium. 12Siqumitanikkuvsiuŋ, aŋaiyyuliqsauruam iḷiñiaġaich igniġmun iluqaisa avguat, taputilugik niaqualu qaunnaŋalu. 13Iġġuġlugich aasii iḷuġutiŋich kiŋulliiglu niuŋik, aasii aŋaiyyuliqsiqpaum ikipkaġniaġaa iluqaan aitchuutauruaq ikipkaivigmi. Tivraġigñiŋa ikipkaqtam iviġaumanaqtuq Ataniġmun.
14Ikipkaġlugu aitchuiñiaġuvich tiŋmiamik, dove-guruksrauruq naakkaunnii pigeon-guluni. 15Aŋaiyyuliqsim ikipkaivigmuutiniaġaa, qipillugu niaquiġñiagaa aasii ikipkaġlugu ikipkaivigmi. Auŋa maqipkaġlugu saniġaagun ikipkaivium. 16Puviaŋa piiġḷugu aasii igillugu kivallianun ikipkaivium aġrat iḷḷiviannun. 17Tigulugik isaġuŋik alikkisigaa timaa agmaġlugu, isaġuŋik piiġaluaġnagik, aasii ikipkaġlugu suġaiḷḷugu ikipkaivigmi. Tivraġigñiŋa ikipkaqtam iviġaumanaqtuq Ataniġmun.
Currently Selected:
Leviticus 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
