Jude 1
1
1 #
Mt 13.55; Mk 6.3. Jude kivgaŋata Jesus Christ suli aniqataata James-gum tuyuġigai ukua iñuŋnun ququaŋakkaŋiñun God-im, piviuttaġikkaŋiñun God-im Aapam ukpiġutiqaqtituiññakkaŋiñullu Jesus Christ-gum. 2God-ttuq nagliktuutiqpaqaġli ilivsiññun, tutqiutiqpaqaqtillusiḷu, piviuttaqqutiqpaqaġliḷu ilivsiññun.
Iḷisaurrit Iḷumun Inŋitchuanik
3Piviuttaġirauruasii, pisuqtilaaptun tuyuġuuraġniallavsi uqautigilugu annaun atunim pigikkaqput, irrusiñiłhaaŋaruŋa tuyuġukłusi qapiŋaisaaġutinik, ukpiqsimaaqtuiññaquvlusi suli qapiqtaiḷḷisigitquvlugu iḷumun ittuaq nalaunŋapkaġniapiaġlugu God-im qaisaŋatun atausiaqługu iñuŋmiñun. 4Qanuq imma iñuich iḷaŋich god-aiḷaqtuat sagluqinnikłutiŋ iḷḷatiŋaniqsut uvaptiŋnun, aasii iḷumun inŋitchuanik iḷisaurriaqsivḷutiŋ, God-mun nagliktauvaił̣ł̣uni sugiŋiññivḷugich qanusipayaat piḷuutikun piraġautchich. Suli iliŋisa ayyaktuaġmivḷugu Jesus Christ Ataniqput Umialikpullu. Tainnatchit iñuich suksraunġiqsauyumaaqtut, suli suksraunġiqsauyumaaġniŋat uqautauganiŋaruq Bible-ni iŋiḷġaan.
5 #
Ex 12.51;
Nu 14.29, 30. Itqaqtitchukkivsi iḷaŋiññik sut iḷisimaaniŋakkavsi. Itqaqsiuŋ una. Atanġum annautiŋagaluaqługich Israel-guruat nunamiñ Egypt-miñ, aquvatigun suksraunġiŋagai ukpiġutaitchuat taipkunani. 6Itqaġmisiuŋ una. Isaġulgich qaunakłaanġiqł̣utiŋ qaaŋiulaaŋagaat ataniġnaqutiksriusiaqtiŋ God-miñ, aasii qimakługu qiḷak iñuuvikkaluaqtiŋ. God-im tigutaaŋagai taaqtuamun samuŋa qiḷiqsruirauviannun tigutaaġutinik isuitchuamun, utaqqivḷugu taimña kamanaqtuaq Uvluq suksraunġiqsauviksrautaat. 7#Gn 19.1-24.Suli itqaġlugich iñuŋich Sodom-lu Gomorrah-vlu avalliuraŋisalu nunaaqqich piḷuusiqiŋammiruat taipkunatun isaġuliktun, allatuutitigun aŋutikkaluat unnii aŋutinun. Taamna pisigivlugu nagliksaaqtut tatavsaunmi isuitchuamik igniġmi, aasii taamna kaŋiqsiñaqłuni kiliktuutauruq iluqaptiŋnun tuvraquŋił̣ł̣ugich.
8Tainna taipkua piraugaluaqtillugich tamatkua god-aiḷaqtuat iñuich piḷuksiŋarut ilaisa timimiŋnun, siññaktuŋisa piḷuksipkaqługich. Iliŋisa suuŋiḷaġivlugu God-im ataniġnaqutaa, suli uqamaqłuutigivlugich kamanaqtuat pamaniittuat. 9#Dn 10.13, 21; 12.1; Rev 12.7; Dt 34.6; Zec 3.2.Qaukłiat unnii isaġulgich Michael tainna uqalliaŋaitchuq. Qanaaqatigikamiuŋ Tuunġaq uqavaaġutigivlugu nallimiŋnun piginiaqtilaaŋanik timaa Moses, Michael-gum uqallautisaqausiiñŋagaunnii Tuunġaq qanuqinniġaġlugu pisaaŋasaġlugu uqaluŋnik, aglaan uqallautigiññaŋagaa, Atanġuptuq tainna pitquŋiḷḷisin. 10Aglaalli tainnatchich iñuich uqamaqłuutiqaġuurut supayaanik kaŋiqsiḷaisamiŋnik. Iñuusiqaqtut niġrutitun sunapayaaq pisukamirruŋ piugaqługu, aasii tainna pikamiŋ inmiŋnun suksraunġiqł̣utiŋ. 11#Gn 4.3-8; Nu 22.1-35; Nu 16.1-35.Qanutun tatamaanaqtigiruaq kasuġumaaġaat. Ilimiŋnik pasirauyumiñaqsiŋarut Cain-tauq piŋaraŋatun ittuamik. Maġġutipiallaŋarut inmiŋnik killuliqutipiaġatanun maniqallatuvaił̣ł̣utiŋ, Balaam-tuttauq. Suksraunġiqsauniaqtut qanuq makivsaallaŋarut akiḷḷiutivlutiŋ Korah-m makivsaallausiatun. 12Tainnatchich iñuich piġuaqtaġniqtun ittut niġiqatigiigñivsiññi kanŋunaqsivḷugu suurimmaanġiqł̣utiŋ. Sunapayaaq qaunagiŋaiqł̣ugu aglaan inmiŋnun kisian qaunagivlutiŋ. Nuvuyyaqłuktun ittut anuġim tiŋitaŋisun sialuguġniaġmiñaniḷu. Napaaqtutun ittut siiġñiŋitchuatun ukiaġataqtillugu, napaaqtutun maŋŋuaqługich nutchuktatun aasii tuqulipiallakłutiŋ. 13Iŋiuligruaŋisun taġium inmiut, kanŋunaqtuat piḷġusikaaŋich iłłutiŋ qapukłuliqiaŋisun qaggaum. Uvluġiatun pamiuqaqtuatun ittut taimmausuuruatun, qanuq God-im iniksriqsimagai isuitchuamun taaġniqsraqpiatchiamun.
14 #
Gn 5.18, 21-24. Tamatkuaptauq sivuniġivlugich Enoch-gum tallimat malġuata kiŋuniġiich Adam-miñ uqaqsiŋagaa God uqaqłuni, “Tautuksiuŋ, Ataniq qaiñiaqtuq piqatigivlugich piḷuutaitchuat isaġulisalaŋni. 15isivġiġiaġlugich iñupayaat suksraunġiġuglugich iluqaisa piḷuusiqiripayaat God-aiḷaqłutiŋ savaaġikkaŋisigun, uqalugiipiaġataqtuatigullu uqallagautiŋisigun piḷuusiqirit uqamaqłuutigivlugu God.” 16Tamatkua iñuich ataramik uqamayuutiqaqtut pasivḷugiḷḷu allat iñuich, kamagiugaqługich pigiitchuat kipiġniuġutitiŋ. Uqavigaaġutigisuummiut inmiŋnik, suli uqayuqsaaġutivlugich iñuich ilaisa pitqukkatiŋ nalautquvlugich.
Kiliktuutit Iḷisaurrutillu
17Piviuttaġirauruasii, itqaumasiuŋ una. Piiguġnagich uqaluusiaġiŋakkasi tiliraŋiñiñ Atanipta Jesus Christ. 18#2 P 3.3.Uqautiŋagaasi iliŋisa aqulliġñi uvluni iñuich iñukpalliġñiaġnivḷugich kipautikłiġñiaqtuat ilivsiññik, kamaksriugaqtuat ilaisa pigiitchuanik kipiġniuġunmiŋnik. 19Tamarra tamatkua iñuich agvisauruat atiŋirrutinun aŋalataġipkaqłutiŋ iñuŋruiññaum kipiġniuġutiŋiñun, Ilitqusiġiksuamun aŋalatitkaluaġnatiŋ. 20Aglaalli ilivsi piviuttaġirauruasii, kiikaa sivunmuktuġitchi iḷumutun iḷisaurrutitigun piḷuutaiqsaiññautaullaruakun ukpiġutiptigun, aŋaiyyuuġlusi suaŋŋasiqsuutaagun Ilitqusiġiksuam, 21aasii iñuutuiññaġlusi God-mun piviuttaġituiññaġumiñaqsiḷusi utaqqiuġnivsiññi Ataniptiŋnik Jesus Christ-mik, nagliktuġumiñaqsiḷġataġlusi qaiḷuni aitchuġiaġlusi iñuggunmik isuitchuamik.
22Naglikkutiqaġitchi iñuŋnun nalupqisuutiqaqtuanun. 23Annautisigik nuqipqaulliŋmatun igniġmiñ. Nagligisigik allattauq piḷuusiqirit sivuuqqatigillaan piḷuusiqisuŋiḷḷusi iliŋisitun, uumigilugich iluqaqpiatchiaŋisa nalunaiññiŋich piḷuutiŋisa, nagligilugich piḷuusiqirauniġmata.
Aŋaiyyun Nanġaullu
24Paŋmapak nanġaqsiuŋ ilaa piḷuksitchaiḷiraġniḷḷaruaq ilivsiññik, suli qaisaġiyumiñaqłusi pasiñaġumiñaiġḷusi suli quviasukpaglusi sivuġaani qaummaġiksuam nayuqłiataata. 25Ilaa kisimi God-auruq Annaurrigikkaqput Jesus Christ-kun Ataniptigun, ilaa nanġaqtauli suli naluruuraaŋaiqsauli umialguruaq suaŋŋatiqaqtuaġlu ataniġnaqutiqaqtuaġlu, taimaŋŋaqaŋa paŋmapaglu taimuŋalu isuitchuamun. Amen.
Currently Selected:
Jude 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)