Exodus 7
7
1Tavraasii Ataniq uqallaktuq Moses-mun, “God-auruatun iḷiñiaġikpiñ Pharaoh-mun, aasii aniqatikpich Aaron-gum uqautiniaġaa iliŋnun uqaqtauluni. 2Uqallautilugu Aaron supayaamik piraksriutigirapkun iliŋnun, aasii uqallautiniaġaa Pharaoh Israel-gum kiŋuvaaŋich aullaqtitqulugich nunaŋaniñ. 3-4#Ac 7.36.Aglaan uqayunaiqsinniaġiga Pharaoh, aasii naalaġniñiaŋitkaatin, qanutun unnii tatamaanaqtigiruanik savakkaluaġuma Egypt-mi. Igḷutulgunaitchuatigun tatavsaġniaġiga Egypt suli aullatilugich kiŋuniġiiḷḷaaruat iñugiratka taavsrumaŋŋa nunamiñ. 5Tavraasii Egypt-miut iḷitchuġiñiaqtut uvaŋa Atanġutilaamnik, suammatipkun akiḷḷiqsruġlugich isaaġupku argaga aasii aullautilugich Israel-gum kiŋuvaaŋich iliŋisa nunaŋanniñ.” 6Moses-lu Aaron-lu savaŋaruk Atanġum piraksriutaanik. 7Tavrani uqautikamitku Pharaoh, Moses ukiuqtutigiŋaruq sisamakipiatun (80), aasii Aaron ukiuqaqłuni sisamakipiaq piŋasutun (83).
Aaron-gum Pisuaqami Ayauppiaŋa
8Ataniq uqallaktuq Moses-mullu Aaron-mullu, 9“Pharaoh-m nalupqinaiyaqupiaqpasik aliuġnaqtuanik savaglusik, uqallautisaġiñ Aaron ayauppiaŋa miḷuqsautitqulugu sivuġaanun Pharaoh-m, taimmaasii nimiġiaġuġniaqtuq.” 10Tavra Moses-lu Aaron-lu umialigmuŋaruk Atanġum piraksriutaatun. Aaron-gum miḷuqsautiŋagaa ayauppiani sivuġaannun Pharaoh-vlu qaukłiuraŋisalu, aasii ayauppiaŋa nimiġiaġuŋaruq. 11Tavraasii Pharaoh-m ququaŋagai iñuni aŋatkulasuuruat, aasii aŋatkuaqłutiŋ tainnaptauq piḷḷammiñiqsut. 12Miḷuqsautigaich ayauppiatiŋ, aasii nimiġiaġuŋarut. Aglaan Aaron-gum ayauppiaŋata iiŋagaich taapkua ayauppiaŋich. 13Pharaoh aglaan uqayunaitchuq-suli, Atanġum uqallausiatun, Pharaoh-m naalaġnisuŋitkaik Moses-lu Aaron-lu.
Iluirrutiqpaich Tikitchut Egypt-mun
Auk
14Tavra Ataniq uqallaktuq Moses-mun, “Pharaoh uqayunaipiallaktuq suli aullaqtitchuŋitkaich iñuich. 15Tainnamik kasuġiaġumagiksik uvlaami samuŋa Nile-mun kuugmukpan. Ayauppiaqsik kaluġlugu nimiġiaġuŋaruaq, aasii utaqqiaqsiḷugu kuugum siñaani. 16Aasii uqallaglusik Pharaoh-mun, ‘Atanġum, God-auruam Hebrew-guruanun, tiligaaŋa uqallautitquvlutin aullaqtitquvlugich iñuni, nanġautiqaġumaut ilaanun nunagluktuami. Aglaan uvva pagmanun-aglaan naalaġniŋaitchutin. 17#Rev 16.4.Tavraliasii, Umialguruatiin, Ataniq uqallaŋaruq iḷitchuġiñiaqtutin ilaa kiutilaaŋanik savaaġiniaqtaŋagun. Sammahii, anauniaġiga kuugum qaaŋa mattumiŋa ayauppiamik, aasii imaq auguġniaqtuq. 18Iqaluich tuquniaqtut, suli kuuk tippakpaiḷḷuni Egypt-miuguruat imiġvigiyumiñaiġniaġaat.’”
19Atanġum uqautigaa Moses, “Uqallauttuuŋ Aaron tigummitqulugu ayauppiaŋa qulaatigun kuugaurat, imaġaurat, kuugauraliat imaġauraliallu Egypt-mi. Imaq auguġniaqtuq, suli iluqaani nunami auqaġniaqtuq, qirugni puggutaqpagni suli uyaġagni imiqaġviḷiani.”
20Tavra Moses-lu Aaron-lu savaŋaruk Atanġum piraksriutaatun. Takkuanni Pharaoh-m suli atanauraŋisa, Aaron-gum isaaġutiniġaa ayauppiani aasii anauvlugu kuugum qaaŋa, aasii iluqani imaq auguŋaruq. 21Iqaluich kuugmiittuat tuquŋarut, aasii tippakpaił̣ł̣uni Egypt-miut imiġumiñaiñŋarut tamaaŋŋa. Sumipayauraq tamarra auk Egypt-mi. 22Aglaan Pharaoh-m aŋatkuŋich aŋatkuaġaġniqsut piḷġusimiktun tuvraqługu Aaron, Pharaoh uqayunaivsaaŋaruq tainnasuli. Atanġuruam uqallausiatun, Pharaoh-m naalaġnisuŋaitkaik Moses-lu Aaron-lu. 23Tavraaglaan tunurruiññaqłuni Pharaoh utiŋaruq igluqpagmiñun suliqutigigaluaġnaguunnii tamanna qiñiqtani. 24Egypt-miupayaat nivasuŋaiññaliŋarut siñaani kuugum imiġviksramignik, qanukkii imiġumiñaił̣ł̣utiŋ imġaniñ kuugum.
25Tallimat malġuk uvlut qaaŋiŋarut Atanġum auguqtinmauŋ kuuk.
Currently Selected:
Exodus 7: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
