Exodus 2
2
Animman Moses
1Taimani iñuk maŋŋuqaqtuaq Levi-mik nuliaŋaniqsuq aġnamik inmisuttauq maŋŋuqaqtuamik Levi-mik, 2#Ac 7.20; He 11.23.aasii taamna tuvaaqataa iġñiqaŋaruq. Tautukkamiuŋ aakaŋata miqłiqtuuraq piññaġnaŋuluksimamman iriqsimaŋagaa piŋasuni tatqiñi. 3Aglaan iriqsimalguiḷikamiuŋ, ivigruanik savaaq aguummak immallaiyaŋagaa anŋumik. Miqłiqtuuraq ikuvlugu inillagniġaa takiruanun ivigruanun siñaanun kuugum Nile-gum. 4Miqłiqtuuram aatauraŋa qikaŋaruq uŋasiuraqhuni naipiqtuqługu suniaġmagaan.
5Pharaoh-m paniŋa kuugmuŋaruq ivvaġiaqhuni, kivgani aġnat munaqsripkaqługich siñaani. Tautuniqłaŋagaa aguummak takiruani ivigruani aasii tilivḷugu kivgani isaquvlugu. 6Pharaoh-m paniŋata agmaqamiuŋ tautuŋagaa miqłiqtuuraq aŋutaiyaaq qianiqsuaq, aasii nagliksratchaŋaruq ilaanik. “Uvva una iḷaginiġaat Hebrew-guruat miqłiqtuŋisa,” uqallaktuq.
7Tavraasii miqłiqtuuram aatauraŋata apiġigaa Pharaoh-m paniŋa, “Aikł̣iquviŋa Hebrew-guruamik aġnamik ikayuġumagaatin miluktillugu?”
8“Ki, aigguuŋ,” kiugaa. Tavraasii aġnaiyaam aivḷugu ilaata miqłiqtuuram aakaŋa. 9Pharaoh-m paniŋata uqallautigaa aġnaq, “Una miqłiqtuuraq miluktitchaġiñ, aasii uvaŋa akiḷiññiaġikpiñ.” Tavra aakaŋata miqłiqtuuram piŋagaa aasii qaunagiaqsivḷugu. 10#Ac 7.21.Aquvatigun, aglimman miqłiqtuq, aakaŋata aanŋagaa Pharaoh-m paniŋanun. Tiguaŋagaa paniŋata aasii iġñiġiliutivlugu. Atchiŋagaa Moses-mik, uqallakłuni, “Qanukkii, amuŋagiga immamiñ.”
Moses Annaksaqtuq Midian-mun
11 #
Ac 7.23-28. #
He 11.24. Moses qatqitkami, ullautiŋaruq takuvlugich iñuni, Hebrew-guruat, aasii tautugniġaich siġġaġnaqtuanik savaaqaqtitautilaaŋiññik nunurivḷugich. Tautugmiñiġaa Egypt-mium piyugmagu Hebrew-guruaq, Moses-gum ilaata nanmiñiq iḷaŋa. 12Moses qiñiqtiqaġmagaaqqaaqłuni, tautuŋiññami iñugmik, tuqunŋagaa Egypt-miu aasii iriqługu timaa maġġamun. 13Uvlaakumman utiŋaruq aasii tautukługik malġuk Hebrew-guruak qinnaktuak. Uqallautigaa taamna patchisauruaq, “Immaimña suruaq piyukpiuŋ Hebrew-gummiruaq iliktun?”
14Aŋutim kiugaa, “Immaimña kia aullarriġuqpatin suli isivġiqsiġuqłutin uvaptinnun? Tuqunniaġmiviŋa iñuaqtaqtun Egypt-miutun?” Tavraasii Moses iqsiḷiŋaruq isumaalutchakłuni, “Araa imma iñuich iḷitchuġiŋamarut suŋatilaamnik.” 15-16#Ac 7.29; He 11.27.Pharaoh tusaakami nalautittuamik, Moses tuqutitchaġaluaġniġaa, aglaan Moses qimaŋaruq aasii aullaqłuni iñuuniaġiaqłuni nunami Midian-mi.
Uvlut iḷaŋanni, Moses aquppipkaqługu saniġaani nivviam, tallimat malġuk paniŋich Jethro#2.15-17 Hebrew-t uqaluanni uvani Jethro Reuel-mik taisuugaat.-m, aŋaiyyuliqsiqpauruam Midian-mi, imiqtaġniqsut immiġiaqługich aapamiŋ imnaiŋisalu nagruliŋisalu imiqaġviŋich. 17Aglaan iḷaŋisa imnaiḷiqirit qimaariŋagaich Jethro-m paniŋich. Tavraaglaan Moses-gum anniqsuŋagaich taapkua aġnat, imiqtautivlugich nivviamiñ imiqtiłługiḷḷu niġrutiŋich. 18Utiġmata aapamignun, apiġigai, “Summan imña utiġnaġiaqpisi uvlupak?”
19Kiugaat, “Egypt-mium annautiraatigut imnaiḷiqiriniñ imiqtautimmivḷuta suli imiqtiłługich niġrutivut.”
20“Imma sumiitpa?” apiġigaich paniutini. “Summan unitpisiuŋ taimña aŋun taavuŋa? Aiyugaaġiaqsiuŋ niġiqatigitquluta.”
21Tavraasii Moses sivunniŋaruq tamaani iñuuniaġukłuni, aasii Jethro-m qaiñŋagaa paniñi Zipporah tuvaaqatigitquvlugu, 22aasii iġñiqaŋaruk. Tavra Moses isumavluni inna, “Uvaŋauvva aaŋŋaġmiuguruŋa maani nunami, tainnamik atchiġiga Gershom-mik.#2.22 Gershom-gum sivuniŋa “iglaaguruaq taavani.””
23Iñugiaktuat ukiut qaaŋianigmata Pharaoh tuquŋaruq, aglaan Israel-gum kiŋuvaaŋich iiqtuaqtut kivgauvlutiksuli aasii ikayuqtisiularut. Qirrataat ikayuquvlutiŋ God-im tusaaŋagaa, 24#Gn 15.13, 14.tusaagamiuŋ itqaġaa sivunniuġutiktiŋ Abraham-lu, Isaac-lu, Jacob-lu. 25Tautuŋagai kivgauniŋat Israel-gum kiŋuvaaŋich, aasii ilaan isumaaluutigiŋagaich.
Currently Selected:
Exodus 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)