Acts 24
24
Paul Pasigaat Jew-guruat
1Tavra tallimat uvlut pianiŋmata aŋaiyyuliqsiqpaich qaukłiat Ananias tikiñŋaruq Caesarea-mun, umialiŋnallu iḷaŋich, pitquraliqirilu atiqaqtuaq Tertullus-mik. Iliŋisa uqautigiŋagaat kavanamun pasikkurriŋ Paul-mun. 2Tavra Tertullus qaitquraukami, uqautigirraqsiŋagaa Paul uqaqłuni, Kamanaqtuatiin Felix, isumatuvlutin aullarriñiqpich sivisuruamik aŋuyautairrutiqaqtinŋagaatigut, iñugiaktuatigullu iłuaqsruutitigun savautiŋagiptigut anniqsuutauruanik nunauniptiŋnun. 3Taamna quyyatigigikput sumiḷiqaa ataramik, aasii quyanaapiaġataġiptigiñ. 4Piviksran atuqpaitchuŋitkiga aasii apiġipiaġikpiñ, qiñuiḷḷutin naalaġniḷḷaquvlutin uqaluksraptiŋnik. 5Una iñuk iḷitchuġigikput iññuqłuuvlugu, ilaan aullaqisuugai tuavaallatit Jew-guruani nunami iluqaani, aullarrauvluniḷu Nazarene-guruanun. 6Ilaan suli Jew-guŋitchuat itqutiniataŋagai aŋaiyyuvikpaŋmun, salumaiḷḷisauyumiñaqtuat. Aasii tigutaaŋagikput, isivġiġuqługu pitquraptigun. 7Aasii qaukłiata aŋuyaktit Lysias-gum upaktuŋagaatigut, aasii piaqłuktaqłuta aullautiŋagaa uvaptiŋniñ. 8Aasii Lysias piraksriŋaruq Paul pasiriŋi iliŋnun uqaġiaquvlugich. Qanuqitilaaġlugu iliŋnik iḷitchuġiyumiñaġniaqtutin ilaaniñ supayaatigun pasikkutiptiŋnik ilaanun. 9Tavra Jew-guruattauq iḷaŋammigaat pasikkutaat uqaqłutiŋ iḷumun innipiaġataqługich pasikkutiŋich.
Paul Patchisaiññiruq Sivuġaani Felix-gum
10Tavrali kavanam urriqavigimmani Paul uqaquvluni, Paul uqallaŋaruq, Iḷisimaruŋa atanġuŋarutin ukunuŋa nunauruanun ukiuni iñugiaktuani. Quviasupiaġataqtuŋa uqautigigupku patchisaisilaaġa sivuġaġni. 11Iḷitchuġiniaqtutin iliŋnik qulit malġuk uvlut sipinŋaitchut aŋaiyyuyaqtuaqama Jerusalem-mi. 12Jew-guruat iḷitchuġiŋaitkaluaġaanŋa qapiqtaiḷiqatiqaqtilluŋa iñuŋmik aŋaiyyuvikpaŋmi, naaggaunnii iḷitchuġiŋaitkaanŋa piallaktitchiñiaġluŋa iñuŋnik aŋaiyyuviŋiññi, naaggaunnii Jerusalem-mi. 13Naaggaunnii ukpiġnaqsiḷiġumiñaitkaat iliŋnun paŋmapak pasikkutigikkaqtiŋ uvamnun. 14Uvvaaglaan una piiḷaaġiyumiñaitkiga iliŋnun. Ukpiġigiga God-iŋat maŋŋuupta, tuvraqługu nutauruakun ukpiġniq iḷumun ittuaġiŋisaŋat ukua iñuich. Ukpiġimmigitka suli iluqaisa aglausimaruat pitqurani qaisauruani Moses-kun, makpiġaaŋiññiḷu Uqaqtiŋisa God-im. 15Niġiugimmigiga ukunatuttauq iñuktun God-mun iñupayaat aŋipkaġniaġnivḷugich tuqqunmiñ, nakuuruallu nakuuŋitchuallu. 16Tavraasii iñuuniḷuktuŋa pisuqtilaaptun patchisaiññiaqłuŋa God-mun iñuŋnullu.
17 #
Ac 21.17-28. Piitqaaqłuŋa ukiuni iñugiaktuani Jerusalem-miñ, utiŋaruŋa saagaqługich maniich aitchuutit uvagut iñuptiŋnun, aitchuiyaqtuqłuŋalu ikipkautinik. 18Taamna savaaġipkaqtillugu, paqinŋagaanŋa aŋaiyyuvikpaŋmi, naatchianikłuŋa salummaqtauganikłuŋa pitqurat uqaluatigun. Iñuŋnik iñugiaktuanik piqatiqaŋaitchuŋa pialaŋaitchugullu. 19Aglaan iḷaŋich Jew-guruat qairuat nunaaqqiŋiñiñ Asia-m tavraniinŋarut. Taipkua iliŋich qairuksraugaluaqtut sivuġaġnun aasii sunik pasikkutiksraqaġumiŋ uvapkun uqautilutin. 20Naaggaunnii ukua iñuich uqaġlich sunik killukuaġutinik iḷitchuġikkamiŋnik uvapkun makitakama uqaqsitaaġviŋmi. 21#Ac 23.6.Aglaan uvvauna atausiq pisigivlugu nivliutigiŋagiga nipatusivḷuŋa makitakama sivuġaanni. Isivġiġivsiŋa uvlupak pisigivlugu ukpiġniġa tuquŋaruat aŋipkaġniaġnivḷugich.
22Tavra Felix iḷisimmaġikł̣uni ukpiqtuaguruat piḷġusiŋiññik, aġiupkaŋagai kasimaruat uqallakłuni, Lysias qaukłiat aŋuyaktit qaikpan sivunniġñiaġiga uqavaaġutiksi. 23Tavra piraksriiŋaruq atanauraŋiññik aŋuyaktit Paul qaunaksriqaquvlugu aglaan tigutaaqsimavaiñŋaiġḷugu, avilaitqatiŋiññullu ullallaayumiñaqsiḷugu ikayuġiaqsaqparruŋ.
Paul Qaġġisigaat Felix-mun Drusilla-mullu
24Uvlut qavsich pianiŋmata Felix qaiŋaruq nulianiḷu Drusilla, Jew-guruaq aġnaq. Ilaan qaitquŋagaa Paul aasii naalaaqsivḷugu uqautiqaġman qanuġlutiŋ iñuich ukpiliġumiñaqtilaaŋannik Christ Jesus-mun. 25Tavra Paul uqaaġataviksillugu iñuich nalaunŋaruakun iñuuruksrautilaaŋannik, qaaŋiulaaŋairrutikullu iñuuniaġniġmik, tikitchumaaqtuakullu isivġiġviksrautikun, Felix sivuuġatchaŋaruq aasii uqallakłuni, Piiḷḷagiñ uvaŋŋa. Piviksranikkuma qaitquvsaaġniaġikpiŋ. 26Tavranivsauq Felix maniḷitquyumaŋagaluaqtuq Paul-mun. Tavra taamna pisigivlugu qaitquraġigaa akulaitchuamik suli uqaluqatigivlugu. 27Tavra ukiuk malġuk naanmaŋnik, Felix kavanauruaq simmausiŋagaa Porcius Festus-gum, aasii Felix-gum iviġallagumavlugich Jew-guruat, qimaŋagaa Paul tigutaaqtauvlugu.
Currently Selected:
Acts 24: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
