Acts 15
15
Kasimaruat Jerusalem-mi
1 #
Lv 12.3. Tavra iñuich iḷaŋich qaiŋarut Judea-miñ Antioch-mun, aasii iḷisautirraqsivḷugich aniqatit uqaqłutiŋ, Nalunaiñŋutchiqsauŋisuaġuvsi timivsigun nalaullugich pitqurat qaisauruat Moses-kun annaurrauyumiñaitchusi. 2Tavra Paul-lu Barnabas-lu siimmaqatigivlugich qapiqtaiḷiqatigiŋagaich taavrumuuna. Tavraasii sivunniŋarut Paul-lu Barnabas-lu iḷaŋiḷḷu allat Antioch-miittuat aullaqtuksrivḷugich Jerusalem-mun, tiliraunikun iḷitchitquranun umialiŋnanullu taavrumuuna iḷitchuġiyaqtuġlutiŋ. 3Tavra tilimmatiŋ aŋaiyyuliqiruaŋisa, iglauŋarut Phoenicia-kun Samaria-kullu, quliaqtuaġutivlugich Jew-guŋitchuat ukpiliqsilaaŋannik God-mun, aasii taavruma tusaakkaŋata quviatchaŋagai iluqaisa aniqatit. 4Tikiñmata Jerusalem-mun, paġlaŋagaich aŋaiyyuliqiruat tiliraunikullu iḷitchitqurat umialiŋnallu, aasii quliaqtuaŋaruk iluqaiññik God-im ikayuqługik piramiŋnik. 5Aglaattauq iḷaŋich ukpiqtuat iḷauruat Pharisee-ñun makinŋarut, aasii uqallakłutiŋ, Jew-guŋitchuat ukpiliqsuat nalunaiñŋutchiqsitaksraupiaqtut timimikkun, suli kamagitqulugich pitqurat qaisauruat Moses-kun. 6Tiliraunikun iḷitchitqurat umialiŋnallu katinŋarut atautchimun isummatigisukługu taamna. 7#Ac 10.1-43.Tavra uqavaaganisugruŋmata, Peter makinŋaruq, aasii uqallautivlugich, Aniqatiit, iḷisimarusi iŋiḷġaan God-im piksraqtaaġiŋagaaŋa akunnavsiññiñ, alġaqsruitquvluŋa tusaayugaaġiksuanik Jew-guŋitchuanun, tusaalutiŋ ukpiliquvlugich. 8#Ac 10.44; 2.4.Aasii God iḷisimaruaq iñuich isumaŋiññik, iḷisimanaqsiŋagaa iviġaumatilaani aitchuutigivlugu Ilitqusiġiksuaq Jew-guŋitchuanun, uvaptiŋnuttauq piḷġusiġmisun. 9Suli ilaa allakaaġiiksualiŋaitchuq uvaptiŋniglu iliŋiññiglu, ilaan suliqutigiŋaiqł̣ugich itqaumayumiñaiqł̣ugich piḷuutiŋich ukpiliġmata. 10Paŋmapak aasii summan uuktuġniaqpisiuŋ God, Jew-guŋitchuat kamaksripkaġniaġlugich pitquranik nallivsaunnii maŋŋuuptali uvagullu kamagilluatapialaisaptiŋnik? 11Aglaan ukpiqtugut uvagut annaurrauniaqtilaaptiŋnik nagliktuutiqpaŋagun Atanġum Jesus, tainnatuttauq iliŋich annaurraummiut.
12Tavra iluqaġmiŋ kasimaruat nipaiñŋarut, naalaktuaqługik Barnabas-lu Paul-lu quliaqtuaqtillugik qanutchisigun aliuġnaqtuatigun ukpiġnaqsiḷiġutitigun God-im savaaŋigun ilimikkun akunġanni Jew-guŋitchuat. 13Tavra uqaaniŋmata, James uqallaŋaruq, Aniqatiit, naalaġnisiŋa. 14Simon quliaqtuaŋaruq qanuq God-mun ukpiqtitqaaġnivḷugich Jew-guŋitchuat, ilaaguaqsisaqłuni akunġanniñ iñuksramiñik. 15Aasii taamna uqaluŋisa uqaqtiŋisa God-im atiqatigiŋagaat, aglausimarut Bible-ni uqaluŋi inna,
16 #
Am 9.11, 12. “Aquatigun taipkua taimani piŋaruat,
uvaŋa God-auruaŋaa utiġniaqtuŋa
ikayuġiaġlugich David kiŋuniŋi.
David umialguniŋa akiiḷiŋagaluaqtillugu,
kiŋuniŋa umialliutiniaġiga,
17Iñuich iluqaġmiŋ ivaqłiayumiñaqsiḷugich Ataniġmik,
iluqaġmiŋ tamatkua ququaŋakkatka nunauruaniñ uvaŋa iñugisukługich.
18Tainna Ataniq uqaqtuq, iḷitchuġipkairuaq tamatkuniŋa iŋiḷġaan.”
19Aasiuvva sivunniutiga, uvagut iḷaksiaŋaiḷḷavut tamatkua Jew-guŋitchuat mumiksuat God-mun. 20#Ex 34.15-17; Lv 18.6-23; Lv 17.10-16.Aglaan tuyugaksraġigivut uqautilugich niġitquŋiḷḷugich niqinik ilaaguaqtauruanik iñuuraqpaŋnun, allatuquŋiḷḷugiḷḷu, niġitquŋiḷḷugiḷḷu niġrutinik auŋich maqiŋaitchuanik, auktuquŋiḷḷugiḷḷu. 21Qanuq pitqurat qaisauruat Moses-kun taiguaġuugaich qaŋapak Jew-guruat aŋaiyyuvianni Savaisuaġmata, uqaluŋiḷu alġaqsruutauvlutiŋ nunaaqqipayaani.
Tuyuutit Jew-guŋitchuanun Ukpiqtuanun
22Tavra tiliraunikun iḷitchitqurat umialiŋnallu iluqaġmiglu aŋaiyyuliqiruat sivunniŋarut piksraġukłutiŋ iñuŋnik iḷamiŋnik, aasii tiliḷugich Antioch-mun piqatigilugik Paul-lu Barnabas-lu. Tavra piksraqtaaġiŋagaich Judas-lu taggisiqaqtuaq Barsabbas-mik, Silas-lu, iññuk isumakkusiaqaġluataqtuak aniqatiniñ. 23Ukuniŋa tuyuutinik tuyuŋarut. Aniqatisi, iluqatiŋ tiliraunikun iḷitchitqurat, umialiŋnallu, tuyuqtut paġlanmiŋnik iluqaiññun aniqatinun Jew-guŋitchuanun, iñuuruanun Antioch-mi Syria-miḷu Cylicia-miḷu. 24Tusaaŋarugut iñuich iḷaŋiññun, uvaptiŋniñ aullaqtuanun, nalupqitchaktinnivḷusi uqaluanun, uvaptiŋnun qaitchiŋaitkaluaqtillutiŋ tainna pitqutinik. 25Aasiuvva kasimaŋarugut atautchimi, aasii iluqata atisivḷuta piksraŋarugut aŋutinik, aasii aullaqtillugich ilivsiññun, piqatigilugik piviuttaġikkavut Barnabas-lu Paul-lu, 26iññuk anayanniuqtitchiŋaruak iñuggunmiŋnik savautivlugu Ataniqput Jesus Christ. 27Tavraasii tiliŋagivut Judas-lu Silas-lu, inmiŋnik uqautiniaġmigaasi tainnatuttauq tuyuutiptiktun. 28Qanuq Ilitqusiġiksuam uqallautiŋagaatigut, uvaguttauq aasii iviġaumagivlugu aitchuġuŋił̣ł̣usi pitquravsaanik siġḷiġnaqtuanik kamaginiaqtuni, ukuniŋałhiñaq piraksriġivsi, 29ilivsi niġiñasi niqinik ilaaguaqtauruanik iñuuraqpaŋnun, auktuġnasiḷu, suli niġiñasi niġrutinik auŋich makinŋaitchuanik, allatuġnasiḷu. Ilivsiññik qaunagiguvsi taapkunaŋŋa piḷḷuataġniaqtusi. Kutpaiġivsi.
30Tavra aullaqtitaukamiŋ Antioch-muŋarut, aasii katitanikamisigik ukpiqtuat atautchimun, qaiñŋagaich tuyuutit. 31Aasii taiguaganiŋmatigik, quviasuŋarut qapiŋaisaaġusiamikkun. 32Tavra Judas-lu Silas-lu, iliŋiktauq uqaqtauvlutiŋ God-mun, uqautiŋagaich aniqatit sivisuruamik qapiŋaisaaqługich, suaŋasiḷaaqługiḷḷu ukpiġutaatigun. 33Tavra tavraniisugruaniŋmaŋnik, aullaqtinŋagaich tutqiunmi aniqatit taamapkunuŋa tiliriŋiññun. 34Aglaan Silas sivunniŋaruq tavraniitchukłuni. 35Tavra Paul-lu Barnabas-lu Antioch-miinŋaruk, iḷisaurrivḷutik piqatigivlugich allat iñugiaktuat alġaqsruutigiŋagaat Atanġum uqalua.
Paul-lu Barnabas-lu Piqatigiiŋaiqsuk
36Uvliuganikamiŋ, Paul uqallaŋaruq Barnabas-mun, Utaqqiḷavuk takulugich aniqatiit iniqpapayaani alġaqsruivigiŋakkaptiŋni uqaluanik Atanġum, aasii iḷitchuġilugich qanuqtilaaŋannik. 37Tavra Barnabas piqatigisuaqsiŋagaa John Mark maliquvlutik. 38#Ac 13.13.Paul isumaniqsuġli iłuałhaaġasugalugu maliŋitpatik, utiqsaŋamman inmiŋniñ Pamphylia-mi naatkaluaqtinnagu alġaqsruiñiqtiŋ. 39Tavra qapiqtaiḷirrapiaŋaruk avanmun isummatillaamiŋnik piqatigiiŋaiqsaallaġmiŋ, Barnabas-li piqasiutiŋagaa Mark, aasii tiŋinnaaqłutiŋ Cyprus-mun. 40Paul-li piksraqtaaġiŋagaa Silas aasii aullaqłutiŋ, aŋaiyyutiqqaaqtillutiŋ aniqatinun, God-mun qaunagitquvlugik. 41Aasii iliŋik iglauŋaruk Syria-kun Cilicia-kullu, aasii Paul suaŋasiḷiŋagai aŋaiyyuliqiruat ukpiġutiŋich.
Currently Selected:
Acts 15: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
