2 Peter 1
1
1Simon Peter, kivgaŋa tiliŋaraŋalu Jesus Christ, tuyuqtuq ukuniŋa iñuŋnun ukpiġutiniŋaruanun piqpaŋnaqtuamik uvaptiktuttauq, nalaunŋasipkaqtiqaŋaruanun God-mik Ataniptiŋniglu Jesus Christ-mik. 2Nagliktuusiaqpaqaġitchisuq tutqiunmiglu iḷitchuġiŋalugu God, Ataniqpullu Jesus.
God-im Ququaġutaa Iñuksraġniŋalu
3Ilaan qiḷaŋmiŋŋaqtauruam suaŋŋataata ikayuġaatigut supayaakun iñuutquvluta god-iliqiruaguluta, iḷitchuġigupta taavrumiŋa ququaqtiptiŋnik iḷaŋiutitquvluta ilaan kamanaunmiñun nakuunmiñullu. 4Suli ilaan suaŋŋanmigun unniqsuqłiiŋaruq piqpaŋnapiaġataqtuanik kamanapiaġataqtuaniglu unniqsuqłiisinik, aasii ukpiġiguvsigik tamatkua unniqsuqłiisiŋi nalaunniaŋitkiksi maquliñiksraq, pipkaġuukkaŋat iñuusiġiruni pigiitchuat kipiġniuġutit iluqaiññi nunam iñuŋiñi, aasii piqataullasivḷusi God-im iñuusianun, ilaatun iḷivḷusi. 5Tamatkua pisigilugich pisuqtilaavsisun nakuuniaġitchi taamna iḷḷatigilugu ukpiġutivsiññun, suli nakuuniaġnivsiññun iḷḷatigilugu iḷitchuġimmaġiksaaġniq God-mik, 6suli iḷitchuġimmaġiksiñivsiññun God-mik, iḷḷatigilugu iłuatun inmun aŋalarrutilluataq, igḷutuutiugaġlusi suli igḷutuutinivsiññun iḷḷatigilugu iñuuniaġniq god-iliqivluni, 7suli god-iliqinivsiññun iḷḷatigilugu piviuttaqsriñiq aniqatinik piviuttaġilugich iñupayaat. 8Tamarra tainnatchich iñuusiksrat pigiraksrasi. Aasii iñuusiġituiññaġuvsigik tamatkua aunniummaġiksisaiññaġniaġiksi Ataniqput Jesus Christ, iḷitchuġimmaġiksiḷugu ilaanun anniqsuutigisuktilaaqsi. 9Kiñaliqaa iñuusiqaŋitchuaq tamatkuniŋa ayauŋaruatun ittuq tautuksiḷaitchuatun, piiguqtaallaġmi piḷuutini suliqutigiŋaiqsautilaaŋannik itqaumayumiñaiqł̣ugich.
10Aniqatiitkaa, tamatkua tainna inmata pisuqtilaavsisun iñuusitchi, ukpiġnaqsisaġlugu God-mun ququaŋatilaaqsi piksraqtaaġiŋatilaaqsiḷu. Aasii tainna iñuuguvsi, nalupqinaitchuq annaurrauniaqtusi. 11Suli paġlakkusiaqaġluataġniaqtusi isiġuvsi isuitchuamun atanniqsimavianun Atanipta Annaurriptalu Jesus Christ.
12Tavraasii piyummatigigiga ataramik itqautisukłusi tamatkuniŋa, iḷisimaluġisiunnii aunniuġusimalluataqługulu God-im iḷumun ittuaŋa pigikkaqsi. 13Nalaunŋaruaġigiga iñuuniqtutilaaptun itqaqtitaġukłusi tamatkuniŋa piyumasaaġlusi. 14Qanuq iḷisimaruŋa qimakkumaaqtilaaŋanik una tuquyumaaqtuaq timi, tainna Atanipta Jesus Christ nalupqinaiqł̣ugu uqallautiŋavluŋa. 15Aglaan tuquŋaiñŋaġma piiguiyumiñaiġñiḷuŋniaġivsi itqaumayumiñaqsiḷusi tamatkuniŋa ataramik.
Tautukługu Quliaqtuallasiŋaruat Christ Qaumanġa
16Qanuq uvagut unipkaaligiññaġluta quliaqtuaġutiŋaitkivsi iḷitchuġipkaqsaqavsi suaŋŋataanik Atanipta Jesus Christ qaitqigñiksraŋaniglu. Uvagut tautupiaġataŋagikput kamanaqtuaq qaumaniŋa. 17#Mt 17.1-5; Mk 9.2-7; Lk 9.28-35.Nayuŋagikput kamanaqsipkaqtaumman, nanġaġmagulu God-im Aapam, taavruma nipim nivliutimmagu kamanaġniqsrauruam supayaaniñ uqallakłuni, “Uvva uvaŋa nanmiñiq Iġñiġa, iviġaummatigilluatakkaġa.” 18Uvagut tusaaŋagikput taamna nipi nivliqsuaq qiḷaŋmiñ, itqatigiŋavlugu Jesus iġġimi God-im salapqiġmagu kamanautini.
19Taamna pisigilugu nalupqigiŋaimmaġiksaagaksraġigivut iḷumun itilaaŋat uqaluich aglaaŋich God-im uqaqtiŋisa Bible-ni. Nakuuruq ilivsiññun naalaġniguvsigik uqaluŋich, qanuq uqaluŋich ittut qaummaqtun qaummatauruatun unnuami qausaġataġniŋanun aglaan. Uqaluŋisa ikayuġaatigut kaŋiqsiñiksraptigun tikitchiaġivlugu iḷitchuġilluataġniksraqput Christ niptaqpan uvluġiatun iḷitchuqqutauruatun qauyasisilaaŋanik. 20Supayaamiñ uvva itqaumaraksraqsi. Iñuum kialiqaa inmisuġruiññaq sivunniuġumiñaitkai nallipayaaŋich God-im uqaluŋisa Bible-niittuat, 21qanuq God-im uqaqtiŋi uqaŋaitchut tamatkuniŋa uqaluŋnik uqaġuktuaqsiññaġlutiŋ. Iliŋich uqaŋarut uqaluŋnik God-im puttuqsripkaġmatiŋ aŋalatillaġmiŋ Ilitqusiġiksuamun.
Currently Selected:
2 Peter 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
