Wawa 14
14
Tomo'otoqa Mosese wete Eloni ibwaduyedi
1Tomo'otoqa matatabudi bonadi bwaiginaeqa itaiqavolovoloqa lovananina waineye inaqo vanuqa ikawananaqai. 2Me Isileli matatabudi Mosese wete Eloni ibwaduyedi ivo, “Kima ilaubwainema kadawapa Itipita waineye o dede pwayapwayamaiqe. 3Uvale Iave dede pwayapwayanina waineye imaieda? De waineye inaluvewapada vetalaqa waineye! We mwanedavo wete natudavo inakewadi dipilisinavo. We kida kadalaubwaina kago tadavila Itipita waineye mia giamaina tadababaneni.” 4Beqa ivesipupu ediavo waidie ivo, “Kida datogumeta taunida taivesinueni taivila Itipita.”
5Tutuyanina Mosese wete Eloni divonakapo inoqai isobwanu pwayepwayeye me Isileli matatabudi matadie. 6We Nuni natuna Iosua wete Iepune natuna Kelebi, gumanidiavo pwayapwayanina kanatokisavetovetonova, nuadi ikapo beqa kadikaleko isilabukidi. 7We kadikailuqa ivesipupu me Isileli yoko waidie ivo, “Kanaqo no pwayapwayanina kanamatatabu kakisavetovetonovi kakiseni giamaiotoqina. 8Kago Iave inamwasaneda, inanaweda pwayapwayanina waineye inakalaqeieni waideye. Pwayapwaya guyoguyona, tanoqa giamaidi wete kaisaya pueotoqidi. 9We Iave ge kwaivedumwekaikaieni wete no pwayapwayanina kanatomo'otoqavo ge kwaigololoyedi. Kida kanasala tailautonotononidi paina Iave taiauda we gumanidiavo ge mekaditokaivaisa. Beqa ge kwaigololo.”
10We tomo'otoqa matatabudi wayaqidi gileueqa Iosua wete Kelebi inaluvewapadi. We Ukweta Maqemaqetana waineye Iave maqetana mata'udu'udulina isauyeni me Isileli matatabudi waidie.
Iave ivona me Isileli inakaimatavuloqidi
We Iave Mosese ivoneni inasivilai tomo'otoqa inakedagumetedi Ligwagwa Yamoyamoina kanakedeye inanawedi pwayapwayamaiqa waineye.
26Matautauda Iave Mosese wete Eloni ivonedi ivo, 27“Dede tomo'otoqanidiavo kapoidi tutuya matatabuna ibwadubwaduyegu. Yau gunabeida anoqai me Isileli dibwadu paipaigu, beqa akabiawa-otoqa dibwadunina paipaina. 28Bonagu dede kivesipupuyeni waidie kunavo, ‘Yau Iave miamiavaqaigu beqa avona-mwaqitana waimie, mibwadunidiavo paipaidi kwaesipupu, aivalabubunidi waimie.
29“ ‘Minaqonina pwayapwayamaiqa waineye matatabumi gumanimiavo kwabwaduyegu, kamidiqaba 20 we ilaga wete kamiwavaqa senisisi naqeneye kwaimavuqa wapa waineye. 30Matatabumi ge kwailugu pwayapwayanina avonadabedabeni me Isileli waidie. We kaia Iepune natuna Kelebi wete Nuni natuna Iosua gumanidiavo kaisedi pwayapwayanina waineye inalugu.
31“ ‘Komi kwavona kamiqaviavo natumiavo inakavikavinidi inakewadi, we Yau Iave natumiavo aikewadi ailuguvedi dede pwayapwayanina waineye. Komi pwayapwayanina kwabaileni we natumiavo waineye inamiana. 32We komi matatabumi dede pwayapwayamaiqanina waineye kwaimavuqa-kakava. 33#Aposi 7:36Mivedumwekaikai kanaveviqa natumiavo inakavalai diqaba 40 naqedie, inavetokisavekavina sipi dede pwayapwayamaiqanina waineye we inasasasala kanaketoava matatabumi kwaiwapa-kakava.
34“ ‘Paina komi pwayapwayanina kwakisavetovetonovi kaiata 40 naqedie, beqa diqaba 40 naqedie kwaisasasala pwayapwayamaiqa waineye—diqaba tamoqana kaiata tamoqana pwayapwayanina kwakisavetovetonovi paipaina. Mikapoina kanabaivila veviqanina kwaivebaeni wete no waineye nuami inakawananaqai kwaiyagovi Yau kamitalavuala. 35Yau Iave avona-mwaqitana beqa vakai aivesipupuyeni aivalabubuni. Meqavoi ivedumwekaikaiegu wete ibwadubwaduyegu matatabudi aikavekapoidi inawapa-kakava pwayapwayamaiqa waineye.”
Currently Selected:
Wawa 14: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
