2 Samuela 12
12
Palopita Naitani navalea
1 #
Same 51
Beqa Iave napalopita Naitani ivetuneni inaqo Deibida waineye. Tutuyanina Naitani ilekwa Deibida ivoneni ivo, “Tomoqovo kadikailuqa imiamia taoni tamoqana waineye. Tamo tomoqo guyoguyona we tamo yomuyomuna. 2We tomoqo guyoguyona nasipivo wete nabulumakauvo boudi, 3we tomoqo yomuyomuna nakaisaya kaia tamoqana sipi natudi vavinena itakonai imaieni ikisavekavini natunavo taiauda ivebwaiga. Kana siaidi beqa sipinina iekania, kanavedi'eqa ieyemuya wete taiauda dimaneye ikenokeno kaia mesaida natuna vavinena.
4“Tamo kaiata waineye tomoqo guyoguyona kana'ulatau imai navanuqe, we tomoqo guyoguyona ge wayaqina taunina nakaisayaeqa inanigei inakalaqeieni kana'ulatau inakania, beqa inaqo tomoqo yomuyomuna nasipi natudi inigei ivetavoqi kana'ulatau iveleni.”
5Tutuyanina Deibida vesipupunina inoqai kanakapoka ioqala-otoqa tomoqonina paipaina beqa Naitani ivoneni ivo, “Iave miamiavaqaina Kanawavaqaeqa aivesipupu mwaqitana no tomoqonina guyoguyona dede mesaida ivalabubunedi ilaubwaineni idawapa! 6Dede valabubunanina ivalabubuni tomoqo yomuyomuna waineye ge idavenua'ina'inaqeyeni, beqa ailoina kanabaivila nasipivo 4 inaveleni.”
7We Naitani Deibida ivoneni ivo, “Tomoqonimu! Iave me Isileli da Yaubada dede mesaida ivesipupu paipaimu ivo, ‘Asilagaimu kunukunumu ai'iwaqi bunamaeqa komu kuvekini me Isileli paipaidi. Aketoyavumu Saulo naveluluna waineye'eqa. 8We kamutogumeta Saulo navanuqa, mwanenavo wete nakabaloina Isileli wete Iuda akalaqeiedi waimue kiloinedi. Kago kinuani dede sakunidiavo siaiotoqidi waimue, Yau kanasala wete tabwaneye adayatodi. 9Uvale guloina ge kudavekimataneni? Uvale kapoina dede kuvalabubuni? Komu Ulaia tomoqo Ititi kuluvewapai me Amomoni dikepataeqa we mwanena kuvainaqodi. 10Komu ge kudavekimatanegu we Ulaia mwanena kukewadi mwanemu, beqa deqoina inaqonaqo mususuvo kepataeqa kaia inaetalaqamo.’
11 #
2 Sam 16:22
“Iave dede mesaida ivesipupu ivo, ‘Muvalabubuna kapoina paipaina, taunimu mususu wete muvanuqa kanatomianavo aivekapokaoqaoqalidi inavedumwekaikaiemu. Kawaie matamue Yau mwanemwavo aikewadi tamo tomoqo aiveleni taiauda inakenoluqa maleweye tomo'otoqa matatabudi inakisedi. 12Komu dede kapoinanina vaigavueqa kuvalabubuni, we Yau kamukaimatavuloqa ailausimataleni kaiate me Isileli matatabudi matadie.”
13We Deibida Naitani ivoneni ivo, “Yau akapoina Iave mataneye.”
We Naitani ibaivila ivo, “Iave mukapoina gunabeida inuataqonidi beqa ge kiwapa. 14Paina komu Iave ge kudavekimataneni we kuvedumwekaikaieni beqa kawaie natumu Bedisiba inavetubuqi inawapa.”
15Tutuyanina Naitani ivesipupu ikakava inaqo navanuqe. We gwamananina Ulaia mwanena Bedisiba Deibida taiauda ivetubuqi, Iave viqa bwaigina iveleni. 16Deibida ivelaukui Iave waineye gwamananina paipaina beqa ivekudiqana, we inaqo natutudaba waineye lovana matatabuna ikenokeno pwayepwayeye. 17We Deibida navanuqa kanatomoqovo bwaigidi imai Deibida ilaunuagemai inatovoi inakani, we ibailedi ge wayaqina taiauda inakani.
18Kaiata 7 waineye gwamana iwapa. We Deibida natolituqavo igololo Deibida ge wayaqidi inavoneni gwamana nawapa paipaina. We kaisedi ivesipupu ivo, “Tutuyanina gwamana imiamia taesipupu Deibida waineye, we bonada ge idanoqai. Banikodiqa, taivoneni gwamana gunabeida iwapa? Kago mesaida taunina inakavekapoi!”
19We Deibida ikisedi natolituqavo kaisedi iekawa'aya'aya we iyagovi gwamana gunabeida iwapa. Beqa Deibida natolituqavo ivelautoliedi ivo, “Gwamana gunabeida iwapa?”
Ibaivila ivo, “Mesaida.”
20Matautauda Deibida itovoi pwayepwayeye'eqa, itoa, ibunama wete kanakaleko kaivaudi isilagaidi mulineye inaqo Iave na Ukweta Maqemaqetana waineye inasobwanu. Ikakava ivila inaqo navanuqe, natolituqavo ivelaukuiedi kanikani imaieni ikani.
21We Deibida natolituqavo ivesipupu waineye ivo, “Uvale dede mesaida kuvalabubunedi? Tutuyanina gwamana meyawaina kuekudiqana wete kutaitaiqa paipaina. We tutuyanina gwamana iwapa kutovoi kukani!”
22Deibida ibaivila ivo, “Tutuyanina gwamana imiamia avekudiqana wete ataiqa paina anuanua avo, ‘Oge Iave inavenua'ina'inaqeyegu we gwamana idakavegiagiamaia meyawaina idamiamia. 23We deqoina gwamana iwapa. Vakai paipaina aivekudiqana? Ge kanasala gwamana wapaeqa aivileni aimaieni. Tamo kaiata yau ainaqo gwamana waineye, we gwamana ge kanasala inavila inamai waigue.”
24Beqa Deibida inaqo mwanena Bedisiba iluaqavudi taiauda ikenoluqa mulineye ivetubuqa natudi lamoqina, we Deibida iqoleni Solomoni. We Iave Solomoni ivenapwayeweni. 25Beqa Iave palopita Naitani ivetuneni inaqo Deibida waineye ivoneni gwamananina inaqoleni Iedidia, kananuakawananaqai Iave ivenapwayeweni.
Currently Selected:
2 Samuela 12: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
