1 Samuela 1
1
Samuela natubuqa
1Tamo tomoqo kanawavaqa Alekana imiamia Lamataimu-Dipimu taoni waineye, manuqa Ipileimu dikoya siaidi waidie. Gumanina Ielomu natuna, Eliu tubuna, Tou yaitena wete Dapusi tubutubuna manuqa Ipileimu waineye'eqa. 2We Alekana mwanenavo kadikailuqa, Ana wete Penina. Penina gumanidi menatudiavo we Ana gagalidi.
3We diqaba tamoqana tamoqana Alekana menasusuvo inaqonaqo Sailo taoni bwaigina waineye isobwasobwanu wete ielomu Iave Tovelulunaotoqa waineye. Tutuyanina waineye Iave natovelomuvo kadikailuqa, Ilai natunavo Opini wete Peniasi. 4No kaiatanidiavo waidie Alekana velomu inakalaqei, we kaisaya pilumina mwanena Penina wete natudiavo iveleveledi. 5Oge Iave Ana ikavegagalidi ge idavenatuna we Alekana ivenapwayewedi bwaigina, beqa kaisaya pilumidi kailuqa iveleveledi. 6Iave Ana ikavegagalidi beqa tutuya matatabuna Penina isasaidibiedi wete vovodi iemayaqi paina ge menatudi. 7Diqaba tamoqana tamoqana Alekana menasusuvo inaqonaqo Iave navanuqe, Penina Ana ilalauvulewedi beqa medinuakapo itaitaiqa ge idakanikani. 8Alekana mwanena ivelautoliedi ivo, “Ana, uvale isaki kwataitaiqa kanikani ge kwadakanikani? We uvale nuami ikapo-otoqa? Kago natumiavo lamoqidiavo teni kwadamwasana, we paina yau komi taiauda wete aivenapwayewa-otoqemi beqa ilaubwainemi kwadamwasana-otoqa!”
Ana we Ilai
9Tamo tutuya Sailo taoni waineye velomu kanakani ikakava, Ana itovoi inaqo ivelaukui Iave waineye. We tovelomu Ilai imiabui imiamia Iave navanuqa kawana vivineye. 10We Ana nuadi ikapo-otoqa, itaitaiqa we ielaukui Iave waineye. 11Ana ivonadabadaba Iave waineye ivo, “O Iave Tovelulunaotoqa, yau mutolituqa. Kago kamamwau kudakiseni wete mavelaukui kudanoqai kudavenua'ina'inaqeyema natugu lamoqina kudavelema kawaie wete kaivele-vaituqanemu. Gwamananina kaia komu paipaimu yawaina kanamatatabu waineye, kanakiakiaya navakauna ge inagusuya.”
12No mesaida Ana ielaukuiedi Iave waineye, we Ilai kawadi ietonovi. 13Paina nuapoudieqa ielaukui beqa ge kanasala bonadi inanoqai, we kaia gabuladiqa ipetopeto. Beqa ienuana ivo, “Oge bwasi veluvelulunina iyemu nuadi iqau.” 14We iyaqaidi ivo, “Uvale kwayemu bwasi veluvelulunina kwamai Iave navanuqe? Bwasi veluvelulunina kwabaileni.”
15We Ana ibaivila ivo, “Tomwaya Ilai, gebuka! Yau ge bwasi veluvelulunina kadayemu, we mwaqitana manuanuana wete manuakapo'otoqa kaesipupuyeni Iave waineye. 16Ge nuamu kunavo oge vavina kapoidi, we mwaqitana yau mataiqa'otoqa wete manuakapo'otoqa paipaidi kaelaukui Iave waineye.”
17We Ilai ivo, “Niwalovaeqa kwanaqo! We me Isileli da Yaubada idavelemi vakai kwaelaukuieni paipaina.”
18We Ana ivo, “Tomwaya, kaiwa bwaigina munuavekavina paipaina waimeye.” Mulineye dinuakapo ikakava ivila inaqo ikani.
19Ikawananaqai kawakawaiotoqe, Alekana nasusuvo taiauda itovoi inaqo Iave waineye isobwanu mulineye ivila iobu divanuqe Lama waineye. Alekana memwanena Ana ikenoluqa, we Iave divelaukui inuani beqa ibaivilai. 20We Ana mwau ibabaneni natudi lamoqina ivetubuqi iqoleni Samuela#1:20 Samuela kananoqaya mesaida Ibeliu divona velautoli paipaina. ivo, “Dede gwamananina paipaina kavelaukui Iave waineye.”
Ana Samuela ikalaqeieni Iave waineye
21Tamo diqaba ikakava mulineye Alekana menasusuvo inaqo vaituqana Sailo, inavelomu wete navonadabadaba inavalabubuni Iave waineye. 22We Ana ge idanaqo kaia mwanediqa ivoneni ivo, “Kanaketoava gwamana kaidabai, matautauda kaikewai kainaweni kaikalaqeieni Iave waineye. Yawaina kanamatatabu waineye Iave navanuqe inamiamia.”
23Alekana ivo, “O giamaina, vakai kwanuani giamaikavana, we kwailalaugamasa kanaketoava gwamana kwaidabai. Iave idakaivaisemi mivonadabadaba kwaivalabubuni mesaida kwavesipupuyedi.” Beqa vanuqe imiamia gwamana iekisabodebodeni kanaketoava idabai.
24Tutuyanina gwamana idabai giladi gibwaigina inana wete tamana ikewai inaweni Sailo, Iave navanuqa waineye. We dinaqonina waineye dede sakunidiavo ikewadi inawedi velomu paipaina, bulumakau kanadiqaba kaitonu, pwalawa kanaketoava bwaigina kaitamoqana wete oine kaba'iwaqa tamoqana. 25Tutuyanina bulumakau inigei divelomu igabunidi Iave waineye ikakava, matautauda gwamana ikewai imaieni Ilai waineye. 26We Ana ivo, “Tomwaya Ilai, kunuani base diqaba tupwaidiavo ikakava waidie, yau vavinenima gunabeida kukisema vilamue katovotovoi kaelaukui Iave waineye. 27We kavelaukui Iave waineye gwamana paipaina, beqa mavelaukui ibaivilai dede gwamananina ivelema. 28Beqa deqoina gwamananina kamaieni kakakalaqeieni Iave waineye. Gumanina yawaina kanamatatabu waineye kaia Iave paipaina.” Ivesipupu ikakava matatabudi isobwanu Iave waineye.
Currently Selected:
1 Samuela 1: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
