Romə 2

Yálá nwɔ kiti haŋąąi

1Yɛi ə́ kaa ə́ ɓɛlaa kiti teei, mąąhvaalɛɛ hvo yɛ, ə́ mąą kɛ a nu huwui lɔpee. Mąąhɔlɔɓo, mɛ̨nįi ə́ kaa nuą kiti tɛɛi mąą mɛ̨nį hu, yɛ kpinįi yɛ ɓo a da kɛmun. A kɛ ti, yaa kɛi nuą kiti tee, ya kɛ ə́ kpɔɔ ɲɛ̨i hvalai. 2Gu gɔlɔn guɔ diɛ: Nuąi di túwɔ́ pələ kaa ti, Yálá a di kiti tee a tɛ̨ą. 3Yɛi ə́ kaa nuą kiti teei, mɛ̨nįi ə́ kaa di kiti teei ɉu, ka diɛ ni kəlee kaa gɛ; gaa ə́ kwəi Yálá nwɔ kitii kaa pai ə́ mąąhvaalɛɛi? 4A wala kɛti, ə́ ɲɛ̨i tɛɠɛ ɓoɔ ɓə mɔ̨ɔ̨ Yálá nwɔ mɛ̨inɛ̨ɛ̨ pələ da nwɔ lii kpələ hu? Hvo gɔlɔn yɛ mɛ̨inɛ̨ɛ̨ ti gaa gɛi yɛ, gaa gɛi ti, ə gɛ, ə́ ə́ hɔn mąąhvalin? 5Kɛlaa, ə́ wɔ kili walawala pələ, da ə́ wɔ lii ɲɔ̨n bələ ə́ gwəi, hvó bɔ hvo ə́ wɔ túwɔ́ pələ ɲɔ̨nŋąa mąąhvalin. Yili ɓa, Ɲələi Yálá kaa pai nwɔ kiti haŋąai teei la, akɛ tii, ə́ kaa Yálá nwɔ liiholui ɲąątɔɔi ə́ kpɔwɔ ɓa; 6yai pai nu kəlee hvɛla kulɔi yɛ bələi ə túwɔ́ la. 7Nuąi di kanąn ŋąą mɛ̨nį lɛlɛɛ kɛɛ ɓa, diɛ mąąwiɛ kwɛli, diɛ ɓə Yálá kaa pai yɛnɛ̨ɛ̨ tɛɛi di pɔ kpɛɛ hvo mą. 8Nuąi da nənə tɛ̨ą ɓa, di kwɛli təɛ, di hvilɛŋąą hvulu mɛ̨nį pulu, diɛ ɓə pai Yálá nwɔ lííholi da nwɔ liiɲąnwąną hɔlɔɓoi. 9Laa nɔ̨nwɔ̨ da mɔ̨nɔ̨ di kaa pai pui mɛ̨nį ɲɔ̨n gɛ nuą mɛ̨i, ə gɔwɔ tɔɔ Ɉuifəɠaa diɛ, yili pulu, nuąi di hvo a Ɉuifəɠaa. 10Nuąi da mɛ̨nį lɛlɛɛ kɛ, di wɔ ɓaa a: Mąąwiɛ, ɲɛ̨ipono da liilaa, ə gɔwɔ tɔɔ Ɉuifəɠaa diɛ, yili pulu, nuą di hvo a Ɉuifəɠaa. 11Mąąhɔlɔɓo, Yálá pɔɔli, huyɛɠɛɓo mɛ̨nį hvo laa.

12Nuąi di hvo Moisə nwɔ tɔ́n gɔlɔn, da nɛ̨ŋɛ̨n ɉəɠə, di nwun na a pili tɔ́n naa hva kɛ ɉu. Kɛlaa, nuąi Moisə nwɔ tɔ́n gɔlɔn da nɛ̨ŋɛ̨n ɉəɠə, dɔ́n ti ɓə a di kiti tee. 13Nuąi da di wəli tɔɔ tɔn nwoo ɓa, diɛ lɔ hvəə di tələnmoɔ Yálá ɲɛ̨i ɓa, kɛlaa, nuąi da tɔ́n nwoo pɔ yíi ɓo, diɛ ɓə a tələnmo nuą. 14Nuąi Moisə ŋą tɔ́n hvə di ɲəi, da dɔ́n ti ɓɔ yíiɓo, diɛ kpinįilee di kaa a tɔ́n di kpɔwɔ ɓa. 15Da nɛ diɛ kɛ: Yálá ŋą tɔ́n bɛ̨ɛ̨ kaa di kili pɔ, di wɔ kiliŋąhiɛ yɛ mąą kɛla hvaa ɓo, di wɔ mɛ̨nį hutɔɔ pələ yɛ nɛ, diɛ di kpɔwɔ kaa la a hɔnmąąmun awala kɛ tii, a tələnmomun. 16Yɛ bələi nwɛlɛɛ lɛlɛɛ ŋɛ̨i gáá naa həli gaa moi la, yɛ diɛ: Ɲələi Yálá kaa pai nuą túwɔ́ pələ loɔɠaa kiti teei la Jesus Kristə laa hu, ɲələi ti ɓə mɛ̨nį kəlee a too la ponoɲą.

Ɉuifəɠaa di kulɔ nwoo mu mɛ̨nį

17Yɛ́i Ɉuifə laa kaa yɛ́, ə́ kilitɔɔ Moisə nwɔ tɔ́n ma, yɛ́ ə́ kpɔwɔ ɲąą kɛnɛ̨ Yálá laa hu, 18ə́ Yálá liiɓa kɔ́lɔn; yɛ́i dɔ́n yɛ ə́ liɛwoo kɛ, yɛ kɛ, ə́ mɛ̨nį lɛlɛɛ kɛ. 19Yɛ́ ə́ kpɔwɔ kɛ a ɲɛ̨ipu nuą tənən dɔɔ mun, ɛlɛɛ, yɛ́ ə́ kpɔwɔ kɛ a nuąi di kaa kpinį hu di wɔ kɛɛpono. 20Yɛ́ ə́ kpɔwɔ kɛ a kilikpɛɛɲəi nuą kilaa ponomun, yɛ́ ɓo a lɛapɛlɛɛ mąą kwɛlimun; mąąhɔlɔɓo, ə́ laai na yɛ́ diɛ: tɔ́n gaa ə́ yəi da mɛ̨nį kɔ́lɔn ŋąą, ɛlɛɛ, da tɛ̨ą; 21Yɛ́ kɛ diɛ: Ə́ kaa nuą kalan ɉi, hva ə́ kpɔwɔ kalan! Yɛ́ nuą kalan yɛ kɛ diɛ: 'Ká hvo nwuɔ̨ kɛ; yɛ́mun, ə́ nwuaa! 22Yɛ́ kɛ diɛ: Nu hvo wɛli hon, yɛ́mun, yɛ wɛlikɛ. Yɛ́ kɛ: Hali wɛli hvo yɛ́, yɛ́mun, yɛ́ hali kɔi hɛnŋąą nwuɔ̨! 23Yɛ́i yá ə́ kpɔwɔ ŋąąkɛnɛ̨ tɔn mɛ̨nį hu, yɛ́ Yálá ɓɛlɛ too a ə́ wɔ tɔ́n gala pələ! 24Yɛ bələi bɛ̨ɛ̨i la Yálá lawoo hɛɓɛ́ hu yɛ kɛ: Káái a Ɉuifəɠaa, kaa kaa ɓə ka gɛ huwu takpɛliɠaa diɛ Yálá ɓɛlɛ too woo ɓo.

25Akɛ yá dɔ́n nwooi pɔ mɛ̨nį kɛ, ə́ wɔ kɛ́nɛ̨lonnaa mɛlɛ kaa mą. Kɛlaa, akɛ yá wala dɔ́n nwoo pɔ mɛ̨nį, ə́ káá a kpolɔwa. 26Nui hvo a kɛ́nɛ̨-lon yɛ dɔ́n nwoo pɔ mɛ̨nį kɛ, nwɔ kɛ́nɛ̨ kpolɔwalaa a kɛ ɲəi a kɛ́nɛ̨-lonnaa. 27Nui gɛ́nɛ hvo kɛ li kɔ́lɔ ɓa pələ, a dɔ́n nwoo pɔ mɛ̨nį kɛ, yɛ́i dɔn gaa ə́ yəi, yɛ́ gala, mąą nu a pɛli ə kiti teei. 28Ɉuifə lɔ hvaa nui Ɉuifə laa kaa mą: Kɛ́nɛ̨ lon nɔ hvaa nui daa gɛ́nɛ kɛ gɔ́lɔ ɓa pələ. 29Kɛlaa, yii nu hu pələ, noɔ, ya ɓə a nu kɛ a Ɉuifə mun neelee, ɛlɛɛ, kɛ́nɛ̨lonnaa ɓaa, yii nu kili ɓa pələ yɛ bələi Yálá kaa la bɔ, ya hvaa yii ɉɛɓɛ́ hu. Mąą nu ŋą mąąwiɛ hva həɠə nuą pɔ pələ, kɛlaa a həɠə Yálá pɔ.

Currently Selected:

Romə 2: BKPG

Highlight

Compare

Copy