Gɛlaɠaa 9
9
Solə təli mɛ̨nį
1Solə yee ə kɛ lɔ gu Ną́mu nwɔ kalan nɛai hu taɠa mɛ̨nį, da di paa mɛ̨nį hu. Ə li, 2ə hɛɓɛ́ hu hvɛli ɉaláá laa həli mun gɛnɛ̨ ɓa, yɛ pɛli lɔi la Yálá hvɛli pɛlɛ́ɠaa mu Damasə. Ə gɛ, a nuą kaa laa di ɓo bələi ti mɛ̨i, ə kɛ a hulɔnu, ə kɛ a nɛ̨ɛ̨nu, ə di hon, ə pa a diɛ Ɉerusalɛmə, a di yili.
3Gɛɛ bələ pɔ yɛ li, nɛɠɛɛ kɛa Damasə daa ɓa, ɲąąɓa, kɛɛ pono ta ə kulɔ yələi pələ lɔ wúlú, ə mąą tinɛ̨n. 4Solə ə too nɔi ɓa, ə woo ta mɛ̨n yɛ kɛ mą: «Solə! Solə! Lə mɛ̨nį ɓa ə́ kaa mɔ̨nɔ̨ɓoi?»
5Solə yɛ mą: «Gbɛɛ ɓaa yɛ́ Ną́mu?»
Yili yɛ mą: «Ɲą́ą́ ɓə a Jesus, ɲą́ą́ ka tii ə́ kaa mɔ̨nɔ̨ɓoi. 6Kɛlaa, 'Ə́ muhəɠə, 'tɛ taai, mɛ̨nįi mąąnɛ̨ɛ̨ ə́ gɛ, di kaa lii moi yɛ́.»
7Nuąi da diɛni di kɛ bələ pɔ, di kpəla di tɔɔ lɔ tin, di kwəi pili pələ ɓa diɛ. Di kɛi nwooi ti mɛ̨n, kɛlaa, di hvo kɛi nu ta kaa. 8Solə ə haŋąn ə tɔɔ, ə ɲɛ̨ilaaɓo, kɛlaa hvo kɛa pɛli kɛɛ kaai, hvo kɛli di ɉon a ɲee diɛ tɛ la Damasə. 9Ə hvóló haaɓa kɛ, hvo pɛli kɛɛ kaai, hvo kɛli hɛn da mįi, hvo kɛli gbələi.
10Kalan non da ə kɛ Damasə diɛ kɛ mą Ananiasə. Gu Ną́mu ə gbɔwɔ lɛ mą, yɛ mą: «Ananiasə!»
Yili yɛ mą: «Ną́mu, ɲą́ą́ ka.»
11Gu Ną́mu yɛ mą: «'Həɠə kpɔlɔ yiihu, ə́ ɉon a daa kwəi bələi ti da kɛ mą: Bələ haŋąnŋąą, 'li Ɉudasə yəi bɛlɛ́n, ə́ Tarsə mun, da kɛ mą: Solə, naa mąąnin kɛ. Gaa laa yɛ Yálá hvɛlii, 12ɛlɛɛ, aa nu ta kaa kpɔlɔɔ yiihu diɛ kɛ mą: Ananiasə, yili aa lɔ aa ɲee pɛlɛ mɛ̨i, ɲɛ̨i holoon mɛ̨nį ɓa.»
13Ananiasə ə nwoo ɲąąpənə yɛ mą: «Nąmu, ŋą́ą́ nu tamąą woo mɛ̨n, diɛ ɉulɔnui tii laa pələ ɓo, mɛ̨nį ɲɔ̨n kpɔ aa naa ə́ wɔ nu mąąhəɠɛɛɠaa diɛ Ɉerusalɛmə, diɛ ɉukulɔ. 14Ɛlɛɛ, pai ŋɛ̨i ə mo ɓɛ, ɉaláá laa həli nuą kpɛa-kpɛaa ɓə dɔɔ, daa mąąlaa tɛɛ bɔ, ə gɛ, ə ə́ hvɛli nuą, hon, ə di tɛ yɛlii.»
15Kɛlaa, gu Ną́mu yɛ mą: «'Li, mąąhɔlɔɓo, ŋą́ą́ ɉəɠə ɉu a níiɓa, a nwɔ́ kóló kɛ hɛn, yɛ pɛli náá mąą kɛla hvaaɓoi huwu takpɛliɠaa da tɔɔɓɛlaa diɛ, ə mą kɛ, Israɛlə lonnii. 16Mɔ̨nɔ̨i gaa pai mįi náá mą́ą́ mɛ̨nį hu, ɲą́ą́ gbínįlee gáá pai yili kəlee lɛi mą.»
17Ananiasə ə li, ə lɔ bɛlɛ́n, ə ɲee pɛlɛ mɛ̨i, yɛ mą: «Ną́n non Solə, gu Ną́mu Jesus ɓə dɔ́ɔ́, yai gbɔwɔ lɛ yɛ́ bələ pɔi, ə gə, ə́ kɛɛ kaa, ɛlɛɛ, ə́ Nįį-Mąąhəɠɛɛ hɔlɔɓo.»
18Ɲąąɓa, hɛn da ə kulɔ ɲɛ̨i ə too yɛ hɔ̨nwɔ̨lee kala, ɲɛ̨i ə hvólóon. Ə muhəɠə ə li di mąąwaa; 19yili pulu, ə kɔ̨nɔ̨n mįi ɉu ə walawala.
Solə ə Yálá mąą mɛ̨nį laa həli Damasə
Galan nɛai kɛ Damasə, da diɛni di yíi kuu ta wolo kɛ di kee ɓa. 20Solə ə nɛɛ ɲąąɓa yɛ mo Yálá hvɛli pɛlɛ́ɠaa mu, yɛ kɛ diɛ: Jesus kaa a Yálá lon. 21Nuąi kpɔ kɛi nwoo mɛ̨n, di kwəi ə pili diɛ, diɛ kɛ: «Kɛlɛi nui ŋɛ̨i ɓə kɛ vilɛnŋąą kpɔ a nwąnąlɔ, nuąi kɛli naa ŋɛ̨i hvɛli Ɉerusalɛmə di pulu, a kɔ-e? Kɛlɛi ba mɛ̨nį ɓɛ nwun maa: ə di hon, ə di yili, ə li a diɛ ɉaláá laa həli nuą kpɛa-kpɛaa pɔ-ee?»
22Kɛlaa, Solə nwɛi, nwɔ liikpələ ta lɔ ɓə kɛli pɛlɛ mą, yɛ Damasə Ɉuifəɠaa woo pulu pənə a gɔw, yɛ nɛ diɛ, yɛ kɛ: Jesus ɓə a Nwun mąąɓomun Yálá ə naakwɛlanmo.
23Yíi kuu tamąą kulaa ɉu, Ɉuifəɠaa ti, di di nwun dɔɔ baa mɛ̨nį ɓa. 24Kɛlaa, Solə kili ə pu di wɔ nwun dɔɔ ɲɔ̨nwɔ̨ɔ̨ ti hu. Yələ kəlee di kɛi ɉíila mąą hɛŋį, ə gɛ, da gaa laa di baa. 25Kɛlaa kpinį tɔ̨nɔ̨ mu, Solə yeepɔ nuą, di ɉee kpɔlɔ ta hu, di ɲɛɛ a ɉįinwąną koo.
Solə ə li Ɉerusalɛmə
26Solə həliɛ Ɉerusalɛmə, ə gɛ pələ kwɛli mą, ə gɛ, ə mąąlɛɠɛ Jesus nwɔ kalan nɛai diɛ, kɛlaa, yiliɠaai di kɛi ɲɔw mą. Mąąhɔlɔɓo, di hvo kɛ laa li na, diɛ kɛ Solə aa kɛ a Jesus nwɔɔ a neelee. 27Barnabasə ɓə kɛa ɉəɠə ə li la gɛlaɠaa pɔ. Bələi kpɔ Solə ə gu Ną́mu Jesus kaa la Damasə pələi mɛ̨i, da bələi nwɔ̨nɔ̨ gu Ną́mu Jesus ə pələ ɓo la mą, ə gəlee hukulɔ diɛ, ɛlɛɛ, bələi Solə ə Kristə mąą mɛ̨nį lɛ la Damasə daai a tɛ̨ą, ə yili kəlee hukulɔ diɛ. 28Ə həɠə kɛa ɲələ ɓa, Solə ə kɛ di pɔ, yɛ li Ɉerusalɛmə nąą kəlee yɛ gu Ną́mu Jesus mąą mɛ̨nį laa həli a tɛ̨ą. 29Ɉuifəɠaai kɛi Grɛkə woo ɓo, da diɛ ni di kɛi hɛa too di kee lɔwai, kɛlaa, yiliɠaai di kɛli baa pələ kwɛli. 30Nąn nonnii di gbaɠala kaa, di ɉəɠə, də li la Sesare, ɛlɛɛ, di dɛɛ Tarsə. 31Nąąlɔwai, ə gɔwɔ tɔɔ Ɉude lɔi hu, Galile lɔi da Samari lɔi hu, gbɔn ə kɛ liilaa hu nąą kəlee, ɉu yɛ walawala, diɛ lɛɛ gu Ną́mu Jesus woo mu, diɛ tɛ tɔwɔ Nįį-Mąąhəɠɛɛ háálai.
Piɛrə ə Ene kɔ́lɔi pono Lida
32Piɛrə ə kɛi hiɛ yɛ kulɔ galan nɛa mɛ̨i, nɔi nąą kəlee, nu mąąhəɠɛɛɠaai kɛ Lida daai, yələ ta ə li nwoo pilii diɛ. 33Ə hulɔnu ta kaa laa, diɛ kɛ mą: Ene, aa kɛ kwɛlan mɛ̨ihaaɓa kɛ ɲɔ̨n ɉaɠa ɓa; nąą kəlee haa mą. 34Piɛrə yɛ mą: «Ene! Jesus Kristə aa ə́ ɓalo, ə́ muhəɠə, ə́ ə́ wɔɔ haɠai gbinįn.»
Ɲąąɓa, Ene ə muhəɠə. 35Nąą kaai Lida nuą di mo, da Sarɔn nɛŋɛ̨ hu nuą kəlee, di tínɛ̨n gu Ną́mu Jesus pɔ pələ.
Dɔrkasə nwun mɛ̨nį Ɉope
36Laa na nɛ̨ɛ̨nu ta ə kɛ Ɉope daai diɛ kɛ mą: Tabita (mukulaa ɓaa: lómą; akɛ Grɛkə woo hu da kɛ mą: Dɔrkasə) ə kɛli mɛ̨inɛ̨ɛ̨ kɛ yələ kəlee nuą diɛ, yɛ kpɔnmąą tɛɛ yeehvowolo nuą pɔ. 37Yaa ɓə too a ɲɔ̨n, ə nɛɛ mą ə haa. Yii kɛa di bowa waa, di naa ɲələi pɛlɛ́ tɔ̨nɔ̨ mu. 38Ɉope kalan nɛa di bələ mɛ̨n diɛ, Piɛrə kaa Lida. Daa hveelɛi ti lɔwai hvo kɛ kwɛa li gee ɓa. Di nu hveelɛ tɔɔ, ə gɛ, də li di nwəlɛɛ ɓo Piɛrə ɓa, diɛ kɛ mą: «Ku kaa nɛ̨ɛ̨mąą hvəə yɛ́, kuɔ ə́ pa ku pɔɔli, hvo ɉu kwɛa.» 39Ɲąąɓa, Piɛrə ə muhəɠə da diɛni diɛ li. Ɓɛlɔwai di həli la, di tɛ ɲələi pɛlɛ́ hu, galanin nɛ̨ąą diɛ ɓo laa diɛ wɔlɔ, diɛ doogwąną həɠəɠaa da yíi-həɠəɠaai Dɔrkasə ə kɛi bala, ɓɛlɔwai ə kɛ la vulú kɔ́wɔ ŋą, diɛ nɛ Piɛrə ɓa. 40Piɛrə ə nu kəlee kulɔ ɲɛnɛ̨ɛ̨, ə pu gbəlin na, ə Yálá hvɛli, yili pulu, ə tínɛ̨n nu powa pɔ pələ yɛ mą: «Tabita! 'Ə́ muhəɠə!»
Nu powai ə ɲįnąąɓo, ə Piɛrə kaa, ə muhəɠə ə hee. 41Piɛrə ə ɲee hon, ə ɉaŋą ə dɔɔ, ɛlɛɛ, ə galan nɛa da galanin nɛ̨ąą təli, ə Dɔrkasə hvulú mąą lɛ diɛ. 42Ɉope nuą di mɛ̨nįi tii bələ mɛ̨n, nu tamąą di laa gu Ną́mu la. 43Yili pulu, Piɛrə ə hvóló tamąą kɛ Ɉope daai, kɔlɔtɔɔmun da yəi bɛlɛ́n, diɛ kɛ mą: Simɔn.
Currently Selected:
Gɛlaɠaa 9: BKPG
Highlight
Share
Compare
Copy
Want to have your highlights saved across all your devices? Sign up or sign in
