Gɛlaɠaa 27
27
Də li a Polə Romə
1Ɓɛlɔwai di mo la diɛ ku tɛ gələn ɉu kwəli Itali lɔi hu, di Polə da gaho nąmįną takpɛliɠaa tɛɛ holahi nwun dɔ̨nɔ̨ nwun nąmu pɔ, diɛ kɛ mą Ɉuliusə, a gɔ́laɠai di kɛli kɛ mą, Augusta, ɉu yalanąmu ta. 2Ku tɛ Adramitiumə kələn da ɉu, yɛ li Asi lɔi gbonwo ɓa pələ, ku bələ hon gɛa. Masedoanə mun da ə kɛ ku pɔ, naa ɓaa: Aristarkə, bɔ taai ɓaa Tesalonikə. 3Mąą yələ laa ɓoɔ, ku tɔɔ wolo ɓo Sidɔn. Ɉuliusə ə kɛli Polə hon a ɲɛ̨imąąwɛli kaa pələ, ə Polə lɛɛ laa, ə li nwɛlikɛmąą nuą pɔ, ə gɛ, ə mąąkpaan gbɛɛ hɛnŋąa hɔlɔɓo di yəi. 4Ku həɠɛɛ laa, ku laa a Siprə lɔi goo. Mąąhɔlɔɓo, vaŋą ə kɛli hee gələn ɉu ku yəi. 5Ku Silisi gboloyá da Pamfili nwɛi teen, hvolo pow gɔw lɔɔli kulaa ɉu, ku həli Mirə daai Lisi lɔi hu. 6Ku həliɛ laa ɉolahi nwun dɔ̨nɔ̨ nąmu ə Alɛsandri kələn da kaa laa yɛ li Itali pələ, ə ku tɛ ɉu.
7Hvolo tamąą yee mu, ku hvo kɛli hiɛ a wala, ɛlɛɛ, ku həli mɛ̨nį Knidə tənən ma ə walawala, vaŋą hee pələ ku hu, ku hvo hvilɛn nɔi ɓa; ku tɛɛ Krɛtə gahin goo ɓa ɉɛɠɛɛ pələ, Salmonɛ tənən ma, 8ku tíliin nąą ɓa, ku həli kɛɛnąą ta ɓa, diɛ kɛ mą: Kələn dɔɔi lɛlɛɛ Lasaia daa lee kwɛlɛ.
9Yíi kuu tamąą aa kɛ tɛɛ, ɛlɛɛ, hiɛ kulɔ laa walawalaai kɛa kɛ gboloyá ɲą. Mąąhɔlɔɓo, hin#27.9 hin: Ɉin nɔɔ yili ə kɛ Ɉuifəɠaa yəi a hɛlii di kɛli di wɔ nɛ̨ŋɛ̨nŋąa waa la diɛ. Ɉɛlii ti hu ɓə ɉaláá laa həli mun gɛnɛ̨ a Israɛlə huwu hu nuą mąą haláá kulɔ la (ka pɛli ka gaa Ɉalaa 16.29-34) nɔ yələ aa kɛa kɛ tɛɛ. Polə ə nuą kili pu tii ɉu, yɛ diɛ: 10«Náwəini, gələn ɉu hiɛ kulɔ mɛ̨nį kɛa, gaa pai kɛi a yee lɛɛ ɉu, ɛlɛɛ, a hɛn damąą kala mɛ̨nį; diɲɛ̨ɠaa da gələn nɔ vəi, kɛlaa ə mą kɛ, kuɔ kpinįlee.»
11Ɉolahi nwun dɔ̨nɔ̨ nąmui tii, laai kɛ gələn nwun nąmu da gələn nąmįną la, ə tɛɛ Polə woo ɓa. 12Gələn dɔɔi hvo kɛ lɛlɛ li, kuɔ pɛli lɛɛi laa hamąlɔɔ yee mu, nu mɔlɔɓɛlaa di kɛ bɔ ku həɠə laa, ɛlɛɛ, pɛlimąą a kɛ ɉu, ku həli Fenisə Krɛtə lɔi hu kələn dɔɔi ta li kɛ, ɲɛ̨i tínɛ̨nŋąą voló tooi pələ, kuɔ pɛli hamąlɔɔ kɛi laa.
Tulɔ-hvąŋą
13Hvaŋą hviikpɛɛ ta wolo ə muhəɠə, di gaa, diɛ, da pɛli di wɔ kilii tii pɔ mɛ̨nį kɛi, ya ɓə di gələn voloon, diɛ hiɛ Krɛtə lɔi koo ɓa 14Kɛlaa, ɉu hvo kpɛli kwɛa, tulɔ-hvaŋą kɛnɛ̨ ta ə həɠə nɔi ɓa pələ, diɛ kɛ naa ɓa: Eurakilon, ə kpɛ̨ɛ̨ di hu; 15Ə gələn nwɛan, yɛ li la ɲą hąąi pələ, gələn hva pɛli kɛ tɔɔi vąŋą tɔwɔ, ku ku kpɔɔ lɛɛ lɔ kɛa ɲee kɔnma. 16Ku tɛɛ tín da ɓa, diɛ kɛ mą: Koda. Nąą ɓə ku pɛli gələn non voloon ɉii laa a mɔ̨nɔ̨ kɛnɛ̨. 17Ku dɛ gələn gɛnɛ̨ hu, kuɔ kɛa ku nwun mąąkɔ̨nɔ̨ a pələ huwu lɔpee gəlee, ku gələn gɛnɛ̨ hu yili a gɔtɔyɛli, ɛlɛɛ, ku kwɛnį kpuwulu ta hɛlɛn gələn ma, hvo pa nəi li hvo kɛlɛ muugbɛ-kwɛnį ta ɓa, ku ku kpɔwɔ lɛɛ vąŋą yee kɔnma. 18Vaŋą ə lɛɛ kpɔ dɛɛi a nwalawala, ə lɛɛ la ɉu, mąą yələ laa ə bɔ, hvo kɛli ku diɲɛ̨ɠaa pili ɲái. 19Volo ɉaaɓa yələ, kələn ɉiɛ nuą di gələn ɉu hɛnŋaa kəlee pili ɲái. 20Yíi kuu tamąą ə tɛɛ, hvóló mąn, pɛmɛ̨lɛ̨n-gɔw mąn, ku hvo da kaa; ɛlɛɛ, dulɔ-hvaŋą ə kɛ lɔ ni a gɛnɛ̨. Ku kili hvo kɛa kɛ tɔɔ li hɛn nɔpee ta ɓa, ku ɓalo mɛ̨nį hu.
21Ɉu aa kwɛa kɛa kɛ, ku hvo ni kɛ hɛn lɔpee ta mįi li. Nąąlɔwai Polə ə həɠə ə tɔɔ yɛ diɛ: «Mɔ́lɔ́ni! Kali kɛ ka wəli tɔɔ nwóó ɓa, Krɛtə lɔi hui, gu hvo li həɠə laa. Mɛ̨nį ŋɛ̨i hvəli həli guɔ, kɛɛ tamąą hvəli kala gu yəi. 22Kɛlaa yiihu, ə kɛ a pələi lɔpee, gáá moi káá, ka ká liikpələ, ká ta nwun və pai lɛɛi ɉu, gələn yaa tanɔ̨n nɔ ɓə pai kalai. 23Háá, a kwii hɛ̨ą, Yálái gáá ɲee kɔnma, gɛ́ tíi mą, nwɔ malaka ta ə gbɔwɔ lɛ mą́ą́, 24yɛ mą́ą́: ‹Polə! 'Hvó ɲɔw, mąąnɛ̨ɛ̨ ə́ həli nɔi nwun nąmu nwɔ kiti haŋai ɓa, ɛlɛɛ, nuąi kpɔ ka diɛni ka káá gələn ɉu, Yálá aa di wɔ yɛnɛ̨ɛ̨ lɛɛ di yəi ə́ háálai.› 25Yili ɓa, mɛ́laani, ka ká liikpələ kani, mąąhɔlɔɓo, gílitɔɔi Ɲálái ti ɓa. Bələi ə mo la, pələ ɓə gaa kɛi la. 26Vąŋą kaa pai gu pilii tín da ɓa.»
27Gbini pow-kɔw-nąąn nąą li kɛ, ɛlɛɛ, vaŋą ə kɛli lɔ ni ku takpa-takpa ɓo Adriatikə gboloyá ŋą; kwii hɛ̨ą ɓɛla ɓoi lɔwai, gələn ɉiɛ nuą di gaa diɛ ku kaa lɛɠɛi kahin da ɓa. 28Di kwɛli kpuwulu ta kpúlon yɛli ɓa di doo ɲái, diɛ ɉukwɛa pələ kɔɔn na, ə kɛ a yeehaŋąnna pow-hveelɛ, di di mąą ta wolo tɛ, di bili, di ɉɔlɔɓo pow kɔw lɔɔli. 29Di kɛi ɲɔw diɛ gələn və pa kɛlɛ kwɛni ta hu. Yili ɓə gɛ, di gələn dɔɔ kwɛli nąąn yɛɛ ɲái gələn bulu pələ, di ɲɛ̨i ə ɓo yələɓɔɔ tɔwɔ a nwalawalaa. 30Kɛlaa, gələn ɉiɛ nuą di kɛi di pu pələ kwɛli, di gələn non yɛɛ gboloyá hu, diɛ nuą ɓowo, diɛ kɛ diɛ, ku kaa lii gələn dɔɔ kwɛli kpuwuluɠaa tooi gələn dɔwɔ pələ ɲái. 31Polə yɛ ɉolahi nwun dɔ̨nɔ̨ nąmu da nwɔ holahiɠaa diɛ: «Gələn ɉiɛ nuąi ŋɛ̨i da wala lɛɛ gələn ɉu, ká nwun hva kulɔ ɉu.»
32Ɉolahiɠaa di nɛɛmą di gɔtɔyɛli tee gələn non ma, di doo ɲái, di nɛɛ laa ə li.
33Di kɛɛ yələɓoɔ mąąkpɔn ɉii, Polə ə mo, nu kəlee ə kɔ̨nɔ̨n da wolo mįi; yɛ kɛ diɛ: «Háá ɓaa volo pow-kɔw-nąąn, káá pulu həɠə a liihɛlɛn, ká hvo hɛn da mįi. 34Gáá ká mąąnɛ̨ɛ̨i, gɛ́ ká gu kɔ̨nɔ̨n mįi, mąąhɔlɔɓo, yili ɓə a ka nɔ̨ɔ̨ lɛɛ ka hu. Ka ta nwun nɛɠa tɔ̨nɔ̨ kpɛli hvo pai lan ɉii ɉu.»
35Moi Polə ə mo tii, ə lɛɠɛ həɠə, ə Yálá hɛɠɛɛɓo nu kəlee ɲɛ̨i ɓa, ə ɉu yali, yɛ kɛa mįi. 36Nu kəlee hvaŋą ə lɔ, diɛ kpɛlimąn di kɔ̨nɔ̨n mįi. 37Kuɔi kɛ gələn ɉu, ku lonoɔ ə kɛ a nu nwun-veelɛ-yee-mɛ̨ihveelɛ-kɔw-mɛ̨ida. 38Yii kɛa di kɔ̨nɔ̨n mįi, di pilɛ, mɔ̨nun mɔlɔɠaai kɛ gələn ɉu, di bili gboloyá hu, gələn, da wolo lɛɛ mɛ̨nį ɓa hoa-hoa.
39Yələ ɓɔɔ kɛa, gələn ɉiɛ nuą, di hvo nɔi tii kɔlɔn, gbonwo ɲą ta lɔ ɓə di kɛli gaa, nɔɔ nɔi hu pələ, di kɛli kɛ, a kɛ a pɛlimąą mɛ̨nį, di li laa a gələn, di nɛɛ laa. 40Di gələn dɔɔ yɛliɠaa hvólóon, di bu ɲái, di gələn dənən dɔɔ hɛn nwɔ yɛli hvólóon. Di ɉəɠə ɓɛla hu hvólóon gələn ɲɛ̨i tɔwɔ pələ, ə gɛ, vaŋą ə dənən dɔɔ ɲá kwɛlɛ. 41Kɛlaa, gələn ɉɔnwɔ̨ ə lɔ ɲɛa-koonɛ̨ą hu, ə kanąn naa, ɲá yɛ kɛlɛ bulu pələ hu, ə gulɔ gee la.
42Ɉolahiɠaa di kɛ bɔ di gaho nąmįną paa, ə gɛ, di hvo pa too ɲą ŋą, di hvo pu di yəi, 43kɛlaa, ɉolahi nwun dɔ̨nɔ̨ nąmu nwɛi, ə kɛ bɔ ə Polə nwun gulɔ ɉu, ya ɓə gɛ, hvo hvaa di woo ti ɓa. Ə mo yiiɠaai kɛ di wəlɛɛ yá kɛlɛi, di too ɲąi, di li tɔlɔɔ gbonwo ɓa. 44Nuą yiiɠaai ti, di tɔɔ a di nwąnąi, di ɲá teen di həli gbonwo ɓa wulu ɓɛlaɠaa mɛ̨i, awala kɛ tii, gələn ɉu hɛn da mɛ̨i. Bələ ɓə di kəlee di həli la nɔi ɓa a di hvulúmąą.
Currently Selected:
Gɛlaɠaa 27: BKPG
Highlight
Share
Compare
Copy
Want to have your highlights saved across all your devices? Sign up or sign in
