Gɛlaɠaa 25

Di li a Polə Fɛstusə lii la

1Pai Fɛstusə ə mo nwɔ lɔi hu, hvóló haaɓa kulaa ɉu, ə həɠə Sesare yɛ li Ɉerusalɛmə. 2Ɲąąɓa, ɉaláá laa həli nuą kpɛa-kpɛaa da Ɉuifə kalanɉonŋaa, di Polə kalamąɓo mą a hɔlɔmąą. 3Di ɉuhvɛli mą a gbanąlaa, yɛ da kɛli ŋą mɛ̨nį lɛlɛɛ huhvɛli, diɛ kɛ, di pa a Polə Ɉerusalɛmə. Yii kɛ ɉu a neelee, ya ɓaa di kɛli pa pələ hɛlɛn dɛi tɔwɔ baa mɛ̨nį ɓa bələ pɔ. 4Kɛlaa, Fɛstusə ə di woo ŋąapənə, yɛ diɛ: Sesare ɓə mąąnɛ̨ɛ̨ Polə ə kɛ laa gaho ŋą, ɛlɛɛ mun hɔlɔɔ, yaa kpinįleei tii gaa pai pənəi ə li laa a ɉukpuaa. 5Ə mo nwɔ̨nɔ̨ yɛ diɛ: «Nuąi kani ka lɔwai di mąąnɛ̨ɛ̨ mɛ̨nįi ti ɓoi, di pa, kwa diɛni ku li Sesare, ɛlɛɛ, akɛ mɛ̨nį ta kaa ɉulɔnui ti mąą mɛ̨nį hu a ɉon, di mo.»

6Lɔwɔ tɔ̨nɔ̨ a wala kɛ ti, hvóló pow lɔ ɓə Fɛstusə da nuą ti di gɛ kee ɓa. Yili pulu, yɛ li Sesare daai. Ɉəliɛ, mąą yələ laa ɓoɔ, ə li gití tee pɛlɛ́ la, ə mo di pa a Polə. 7Ɓɛlɔwai ŋɛ̨i di paa la a Polə, Ɉuifəɠaa ti həɠə Ɉerusalɛmə diɛ pa, di Polə mąą tinɛ̨n, di mɛ̨nį tamąą ɓo a naa, yii kɛ diɛ kpinįi di hva pɛli dɛ̨ą ɓoi. 8Kɛlaa, Polə ə kɛli nwun mąąkɔ̨nwɔ̨, yɛ diɛ: «Və́ kɛ mɛ̨nį ɲɔ̨n da kɛ li a Ɉuifəɠaa di wɔ tɔ́n, ə mą kɛ a Yálá hee pɛlɛ́ da Romə lɔi nwun nąmu.»

9Kɛi Fɛstusə ə mo bɔ ə Ɉuifəɠaa liihon, ə mo kɛa Polə ɓa, yɛ mą: «Ə́ kaa bɔ də li a yɛ́ Ɉerusalɛmə, di ə́ kiti tee laa ɲɛ̨́i ɓa?»

10Kɛlaa Polə ə nwoo ɲąąpənə, yɛ mą: «Gití tee pɛlɛi ŋɛ̨i gáá mui, nɔi nwun nąmu nwɔɔ li, ɓɛ lɔ ɓə gáá lɛɛi laa, di gíti tee. Və́ kɛ mɛ̨nį ɲɔ̨n nɔpee ta kɛ li a Ɉuifəɠaa yɛ pələi yɛ́ kpinįi ə́ gbaɠala kaai la kpɔ hele-tətə. 11Akɛ kpɔ ŋą́ą́ ɉɔ́n gɛ, akɛ ŋą́ą́ mɛ̨nį ɲɔ̨nwɔ ta kɛ, a báá mɛ̨nį, və́ lənə li ɉáá mɛ̨nį ɓa. Kɛlaa, akɛ mɛ̨nįɠaa ŋɛ̨i di kaa moi a náá tɛ̨ą hvə ɉu, nu ta hva pɛli dɛ́ɛ́i di pɔ. Nɔi nwun nąmu ɓə gɛ́, ə gítí tee.»

12Nąąlɔwai, yii kɛa Fɛstusə da gwɛlɛ nuą di di nwun dɔɔ, ə nwoo ɲąąpənə, yɛ mą: «Yii yáá nɔi Nąmu laa too ɉui, ka káá lii nííla.»

Fɛstusə ə Polə mąą mɛ̨nį hukulɔ Agripa da Berenisə diɛ

13Yíi kuu tawolo kulaa ɉu, tɔɔmun Agripa da Berenisə#25.13 Berenisə: Tɔɔmun Agripa mąąhala ka ti kɛ ɲəi a nɛ̨ą, diɛ kɛ naa ɓa: Berenisə. di pa Sesare di woo pili Fɛstusə ɓa. 14Yɛ bələi di kɛi pa hvolo tamąą kɛi la bɔɔli, Fɛstusə ə Polə mąą mɛ̨nį hukulɔ tɔɔmun Agripa ɓa, yɛ mą: «Hulɔnu ta kaa ɓɛ, Felisə ə nɛɛ gaho ŋą yɛ li.» 15Ɓɛlɔwai ŋį́ li la Ɉerusalɛmə, ɉaláá laa həli nuą nwun nąmįną, da Ɉuifə kalanɉonŋąa, di ɉulɔnui ti kalamąɓo mą́ą́, diɛ ŋį́ gití tee yɛ mɛ̨nį ɲɔ̨n gɛmun. 16Ŋą́ di woo ŋąapənə, gɛ́ diɛ: Romə nuą yíi pələ hvaa, di kiti kala nu ɓa, yii da galamąɓo nuą di hvo di woo hukulɔ li; ɛlɛɛ, hvo kɛli mąą nu a pɛli gbɔwɔ nwun mąąkɔ̨nwɔ̨i mɛ̨nįɠaai di kaa bɛlɛi nwuɔ di yəi. 17Ya ɓə, di lɛɛ bɔ́, kwa diɛni ku pa ɓɛ, və́ ɉu kwɛa, mąą yələ laa ɓoɔ, ŋį́ mo gɛ́ diɛ, di pa a ɉulɔnu kpɔ. 18Dɔɔ ŋį́ mo galamąɓo nuą ɲɛ̨i ɓa, mɛ̨nįɠaai gíli ə kɛ mą, yiliɠaai di hvo da lɔpee ɓo. 19Hvaa ta lɔ ɓə kɛ da nui tii ni di lɔwai, yɛ hvilɛn na di wɔɔ kalan mɛ̨nį ɓa, gəlee ə mąn kɛ ləi, yɛ hvilɛn na Jesus laamun da ɓa, yai aa haa, ɛlɛɛ, Polə yɛ gaa lɔ ni yɛnɛ̨ɛ̨. 20Bələi kpɔ kɛ, ŋį́ mɛ̨nįi ti hon na, və́ kɛli bələ kaa. Ya ɓə gɛ, ŋį́ kɛ Polə ɓa; akɛ yá vaai mą, ká li Ɉerusalɛmə, ká mɛ̨nįi ŋɛ̨i ɓo laa. 21Kɛlaa, Polə ə mo yɛ, nwɔ mɛ̨nįi ə lɛɛ nɔi nwun nąmu yee kɔnma, ŋį́ mo kani, di di yee kɛ mą gaho ɲą, ə lɛɛ ɉu, ŋį́ tɛɠɛ pa dɛɛi nɔi nwun nąmu pɔ.

22Agripa yɛ Fɛstusə ɓa: «Ɲą́ą́ gbɛli mąn gáá bɔ, ŋį́ ɉulɔnui ti woo mɛ̨n.»

Mɛlan yɛ mą: «Yá tínąą nwoo mɛ̨n.»

23Mąą yələ laa ɓoɔ, Agripa da nɛ̨ą Berenisə di pa a tɔɔmun ba pələ, nu kpulu yɛ ɓo di pɔ, di lɔ mɛ̨nį ɓo kɛ pɛlɛ mu, da yala nąmįną kpɛa-kpɛaa tamąą, ə pɛlɛ la daai kalanɉonŋaa diɛ. Ya ɓə Fɛstusə ə mo, di pa a Polə. 24Fɛstusə ə bələ həɠə, yɛ mą: «Ə hə́li yɛ́! Tɔɔmun Agripa, da kaai kpɔ gwa kááni ku kaa ɓɛ, ə hə́li káá! Ka káá ɉulɔnui ŋɛ̨i káái, ya ɓə Ɉuifəɠaa kəlee piliɛ gee mɛ̨i di pa gáái mą́ą́ ɓa Ɉerusalɛmə, ə mą kɛ ɓɛ, diɛ tómą, diɛ kɛ, mąą hvo nɛ̨ɛ̨li hvo lɛɛ yɛnɛ̨ɛ̨. 25Yii ɓaa nwɛ́i və́ mɛ̨nį ta kaa li mą, yɛ pɛli ɉu haa ɓo. Kɛlaa, yɛ bələi yaa kpinįi ə ɉuhvɛli la, yɛ nwɔ mɛ̨nįi ə ɓo nɔi nwun nąmu lii la, ya ɓə gɛ, gɛ́ diɛ: gáá dɛɛi mą. 26Mɛ̨nįi kpɔ ŋį́ bɛ̨ɛ̨ a mąą kpalaa, ŋį́ dɛɛ nɔi nwun nąmu ɓa, yaa ŋɛ̨i mąą mɛ̨nį ɓa, hvo ɲə́i. Yili ɓə gɛ, gɛ́ də li ka lii la, gəlee mą kɛ ləi, yɛ́ tɔɔmun Agripa, ə gɛ, gwa kpɛɛ a mąąni kɛɛ, mɛ̨nį ta ə kɛ ɲə́i, gɛ́ pili bɛ̨ɛ̨. 27Mąąhɔlɔɓo, ɓowo mɛ̨nį ɓaa, nu ya gaho nąmu tɛɛ, hva pɛli ɉɔn nɛi.»

Currently Selected:

Gɛlaɠaa 25: BKPG

Highlight

Compare

Copy