Gɛlaɠaa 12
12
Ɉakə paa mɛ̨nį, Piɛrə too gaho mɛ̨nį ŋą da gulɔ mɛ̨nį
1Nąąlɔwai tɔɔmun Herodə ə gɔwɔ tɔɔ yɛ gbɔn ɉu nuą taɠaa mɔ̨nɔ̨ɓo. 2Ə Ɉaan niɛ Ɉakə paa a ɓɔwa kwɛa. 3Gaa Herodə ə mo yɛ yili aa nɛ̨ɛ̨ Ɉuifəɠaa diɛ, ə mo di Piɛrə yaa kpɛli ɉon; nąąlɔwai ə kɛ a ɉɛlii da kɛ bui a lɛɠɛi dɛ-hɛn və ɉu, bui lɔwai. 4Ə mo di Piɛrə hon, di doo gaho ɲą, ə dɛɛ holahi kpulu nąąn ɉeei nąąn, bɔ, diɛ di ɲɛ̨i kɛ mą. Ə kɛ bɔ ə giti tee nɔi lonnii ɲɛ̨i ɓa pakə hɛli puɔ pulu. 5Piɛrə kɛɛ gaho pɛlɛ́ mu, gbɔn ɉu nuą di kɛi Yálá hvɛli kpɔ a di lii kəlee, mąą mɛ̨nį ɓa.
6Ɲələi ŋɛ̨i Herodə ə kɛi pa giti teei la, nu kəlee ɲɛ̨i ɓa, mąąyíi yələ, Piɛrə ə kɛ laa ni holahi hveelɛ lɔwai yɛ yíi ɲilɛɛ a yɔwɔn veelɛ, gaho pɛlɛ́ mɛ̨ikaa nuą kəlee tɔɔ di tɔɔi bɛlɛ́ laa ləi, diɛ nąą mąąkpɛ. 7Gu Ną́mu nwɔ malaka ta ə kulɔ lɔ mą wúlú, gaho pɛlɛ́ mu kəlee ə pono. Malaka ə Piɛrə mąą kɛlɛ, ə ɲɛ̨ilaa ɓo yɛ mą: «'Ə́ muhəɠə ɉa!»
Ɲɔwɔnŋąą kəlee di tee ɲee ɓa di pu. 8Yili pulu, malaka yɛ mą: «'Ɲala tɔɔ! 'Gɔ́lɔ lɔ!»
Piɛrə ə gɛ ti, malaka yɛ nwɔ̨nɔ̨ mą: «'Yɛ́ biliɉui pili ə́ kala ɉu, 'ə́ hvilɛn búlú.»
9Piɛrə ə kulɔ ə hvilɛn bulu. Gili hvo kɛ ɉu, yɛ kɛ mɛ̨nįɠaa ti kɛi tɛɛ a Malaka kɛ mɛ̨nį, neelee li kɛ, ə kɛ gwəi yɛ kɛ hįi pələ li. 10Di tɛɛ gaho pɛlɛ́ mɛ̨ikaamun dɔlɔɔ ɓa, di tɛɛ veelɛnąą ɓa, di həli gwɛli kpon ma, yai ɲɛ̨i heɛ kɛ taai pələ. Naa ə ɓo gbɔwɔ ɓa di tɔwɔ, di kulɔ. Di li lɔ kɛa bələ kpəlai, ɲąąɓa, malaka ə pili Piɛrə yəi.
11Nąąlɔwai mɛ̨nį ti di gɛ, Piɛrə ə gbaɠala kaa kɛa yɛ kɛ: «Yiihu ŋą́ą́ gbaɠala kaa, ŋą́ą́ gbaɠala kɔlɔn gɛ́ kɛ, Ną́mu aa nwɔ malaka tɔɔ, aa gúlɔ Herodə yəi da Ɉuifəɠaai kɛ bɔ di mɛ̨nį ɲɔ̨n gɛ a ɲą́ą́.»
12Yii kɛa ə mąą mɛ̨nį kpaɠala kaa, ə li Ɉaan ŋɛ̨i naa mɛ̨i hee ɓaa Markə, nee Mari yəi bɛlɛ́n. Nu kpulu tamąą daa di ɲąąkpɔn gɛ laa diɛ Yálá hvɛli. 13Piɛrə ə gbon gɛlɛ, kólo kɛ nɛ̨ɛ̨nu ta ə kɛ laa diɛ kɛ mą: Rodɛ, ə pa ə nwəli mąąlaŋąn gbon ma. 14Ə Piɛrə woo kɔ́lɔn gwəinɛ̨ɛ̨ pələi ti kɛnɛ̨, hvo tɔɔ, hvo bɛlɛ́ laa ɓo, ə gilɛ həɠə ə li ə mo bɛlɛ́n bələ nuą diɛ yɛ diɛ: Piɛrə aa pa. 15Diɛ mą: «A kɛ ti ɓowo ɓə yáá mo?»
Kɛlaa, ə mo kpɔ diɛ a nwąnąi yɛ diɛ: A tɛ̨ą Piɛrə li! Diɛ mą: «Akɛ gaa tii, nwɔ malaka li kani.»
16Bələi mąn ə kɛ la ti, Piɛrə nwɛi ə kɛli lɔ gbon gɛlɛ. Di bɛlɛ́ laa ɓo, di gaa, diɛ yaa kpinįlee li, di kwəi ə pili diɛ. 17Piɛrə ə mo diɛ a ɲee, yɛ di di mɛ̨iháá. Ɛlɛɛ, bələi gu Ną́mu ə gulɔ la gaho pɛlɛ́ mu, ə ɉukulɔ diɛ; ə nwoo laa kulɔ, yɛ diɛ: «'Ká li ká ɉukulɔ Ɉakə ɓa da gu Nán nonnii yiiɠaai ti.»
Yili pulu, ə kulɔ ə li pələ takpɛli.
18Yələ ɓoɔ kɛa, gɔ́kulááɠaa kwəi ə pili, diɛ tɔɔ lɔ bɛ-bɛ a Piɛrə mąą mɛ̨nį, diɛ kɛ; gɛ pələ ə kɛ kpɔ ləi? 19Herodə ə nuą tɔɔ diɛ Piɛrə kwɛli, kɛlaa, di hvo gaa. Ə mo di pa a ɉolahiɠaa di di mąąni kɛ. Yili pulu, Piɛrə ə həɠə Ɉude ə li Sesare daai, nąą ɓə ə yíi kuu ta wolo kɛ laa.
Herodə haa pələ
20Mɛ̨nį ta ə too Herodə da Tirə nuą di lɔwai, ɛlɛɛ, da Sidɔn nuą. Yiliɠaai woo ə laa mą, di pa di həli mą. Di pili tɔɔmun ɉeegwɛlɛ kɛnɛ̨mun Blastusə kɔwɔi, diɛ kɛ, di pɔnnaa kpɛɛ, mąąhɔlɔɓo, di wɔ lɔi ə kɛli gɔnɔ̨n ɉɔlɔɓo tɔɔmun nwɔ lɔi hu.
21Mąą yələ həliɛ, Herodə ə nwɔ tɔɔ həɠəi too gwąną, ə hee dɔɔ kpəlin ɉu. Ɛlɛɛ, gɛɛ bələ ɓoi nuą diɛ, 22Nuą kəlee diɛ tomą, diɛ kɛ: «Yii nwɛi vaa woo kaa kpɔ a yálá ta woo, nu kan nwoo hvəli.»
23Kɛlaa, nąąlɔwai ti kpɔlɔ, gu Ną́mu nwɔ malaka ta ə gɛlɛ, mąąhɔlɔɓo, hvo kɛ Yálá mąąwiɛ li. Ɲąą ɓa, koló ə pu ɉu, ə haa.
24Yálá lawoo ə kɛi taɠa, yɛ ɓuwuɓo.
25Ɓɛlɔwai Barnabasə da Solə di kpɛɛ la a di wɔ hiɛi kulaa Ɉerusalɛmə, di Ɉaan hvilɛn di pɔ, yai naa mɛ̨i hee ɓaa: Markə.
Currently Selected:
Gɛlaɠaa 12: BKPG
Highlight
Share
Compare
Copy
Want to have your highlights saved across all your devices? Sign up or sign in
