Sakari 14
14
Cɔw mɛɛlaa a hunɔɔ Mɛlɛka-o
1«Niaa vanaa co Yerusalɛm-nda,
paale Mɛlɛka len le co le tiiyaa.
Vannda piɔwnin ɲɛm nda puunin niaa o laba-on.
2I cuungiaanin vanaa-mangalaa-isɔɔa kpow
mà hinul Yerusalɛm a cɔwvo.
A biinin kobio mà cɔwviaa ɲɔɔn cɛilan nin,
mà kpuwviaa vanlaandua,
mà bii vannda a tiŋ,
mà kɔɛ a nda o cɛlen nin.
Kɛ vanaa tɔ̀a lonin-nda,
nda cúúnìn faŋan o kobi kalaa nin te.
3O kon, Mɛlɛka fulanin ceen,
mò cɔlɔba vanaa-mangalaa-isɔaa kan,
mɛɛ o cɔlɔba o paale cɔwlen coo yɛ.
4Pelun ndɔn pilannin ɲinkon Pembii oliviei,
i co Yerusalɛm o hɔl-ndɔ
a ba paalen le can-ndo-e pɛɛn.
Pembii oliviei ken tɛndanin tɛɛn kpala-kpala,
kandɔɔ a ba paalen le can-ndo háá ba le del-lo,
mì ból bɛndu-bɛndoo del o fonda kon.
Pembei kpengei pilɛ
nannunnin a ba luaŋ-ndo
mì kpengei pilɛi nannun a ba too.
5La keinin o ból vanin kon
o pembun mun tɛɛn-ndo nin mì la ɲaanun,
kani ból kon tiiyanin háá Asal.
La ɲaanunnin ɲinkon
mɛɛ niaa ɲaanun sindɛ
lɛŋnde ɲiiyaalen o paale Osias,
va masaa Yuda-o len yɛ.
O kon kɔɔli, Mɛlɛka Hala nuu hunnin
a mɛlɛkaa ndɔa diandaa kpow.
6Paale len, ɲɛ-tengaa ve lɛnin te,
hoeyii misisiei a mɛmma liimianndan bɛɛ ma venin te.
7Paale len le vanin teengen,
Mɛlɛka ndu pilɛ kpé sina paale len ni.
Ipala ve lɛnin te, icɔl ve lɛnin te.
Hali icɔllo, ɲɛ-tengaa vanin.
8O palɛi ken, mɛmma soonndan
ma vanin fulaa Yerusalɛm.
Matiŋ ma vanin kɔlan
a ba mɛmma ihɛlma co
a ba paalen le can-ndo-an,
mì matiŋ ma va kɔlan
a ba mɛmma ihɛlma
co a kpengii paalen le del-lo-an.
Lende ɲɔɔ vanin tosanndo
vɔɔlen a sialten ni.
9Mɛlɛka tosanin masalen
o lɛŋnden kpow coo.
O palɛi ken nin, Mɛlɛka ndu pilɛ kpé
vanin biilɔnndo ni.
Diola ndɔlan daama
la vanin diola kpeekpei lan ni.
10Tàndá balu Yerusalɛm-ndo kpow
siŋnunnin dɛɛlaa vesɛiyo,
cɔnɔnndo Keba háá tiiyaa Rimɔn,
Yerusalɛm a ba too.
Yerusalɛm sɔlanin heeloo
mo lo o fonda ndɔɔ.
Kandɔɔ a dio Bɛnyamɛn-ndo
háá o fonda dio tasoo,
kɔlan háá o dio lasɔngio,
keiyo a cɛi coocoo Hananeɛl-lo,
kɔlan háá o doolala nda vayia mɔiyan le masaa-a.
11Vannda calnin Yerusalɛm lon,
kɔngɔlan ve lɛnin kobio kɔɔli le ndu tɛɛmbuu le,
o vannunnin nila ɲulu.
12Tofa vɔ kpundɛ Mɛlɛka tuisinin
vanaa-mangalaa-isɔɔa cɔlɔbanin
Yerusalɛm-nda coo-o:
vana-vana lonin yoomu
mì dialun ndɔn sɛ kpow.
Hɔltan la lonin vannda o koongolan nin mì la sɛ,
diɛɛmuei lonin nda o lasondo mì sɛ.
13O palɛi ken nin, Mɛlɛka hiiluunin nda vokuu-vokuu,
a biyannin a sɔngɔɔ vellaa-velle,
mì vana-vana del vana nda cɛɛlan-ndo coo.
14Vannda Yuda tosanin cɔwvo
le Yerusalɛm baŋaa.
À hialunin bolofaa vanaa-mangalaa-isɔaa balu nda-a
mà cuungiaa ndu:
sianion, volion a volɔɔla cuɛinanndan taw-taw.
15Kpundɛla vaa lende la toalnin soa,
milɛɛa, ɲɔɔmɛɛa, sofɛlɛa
a cɔlua vanin o dɔ́ɔ́ngɔ́ɔ̀ nin-nda kpow coo,
mɛɛ la tol vanndacieea coo yɛ.
16O vanaa hinulnin Yerusalɛm a cɔwvo-a tɛɛn,
vanaa lonin yoomu-a
vanin helɔɔ Yerusalɛm ciee vɔsi oo vɔsi
le kɔlan vulan baŋɔɔ Masaa o labɛngunin,
Mɛlɛka-Nɔ-Kpaayaa-Kpow-vo pɛɛn,
a le kafo lakùùo tosaa.
17O yungula co o lɛŋnden coo lan tɛɛn,
yungu oo yungu kɛɛ pɛ le helɔɔ Yerusalɛm,
le kɔlan vulan baŋɔɔ Masaa,
o co Mɛlɛka-Nɔ-Kpaayaa-Kpow-vo-o o labɛngunin,
piɔɔ senin o nda lo le.
18Te Esiptea kɛɛ pɛ le helɔɔ Yerusalɛm,
le kafo lakùùo tosaa-a,
kpundɛ toalnin vanaa-mangalaa-isɔaa tɔà
kɛɛnin le kafo lakùùo tosaa-a coo-o
toalnin nda Esiptea kan coo.
19Lende Esiptea a vanaa-mangalaa-isɔaa
kɛɛnin le kafo kon tosaa-a
a sɔlanin soŋɔɔ ni
20Telen kon, hali o bamban pɔmbɔn soa coo,
o vanin o sɛvaa aa:
«O siŋnun teengen le Mɛlɛka-o!»
Hali kpɛɛnɛn co o Cɛi-Hala-o nin-ndon vanin
n'diandaa maa taalala kólaala co
o fonda-loamaa-lasálàá hɔl-ndɔ lan.
21Kpɛɛnɔn Yerusalɛm ciee a mun Yuda kpow
n vanin n'solianndon sálà le baala
Mɛlɛka-Nɔ-Kpaayaa-Kpow-vo-o.
Mì vanaa vanin hunɔɔ sálàlan solio-a
cua kpɛɛnɛn mun le vision yawvo lenin.
O telen kon, yulaa ve lɛnin
o cɛi Mɛlɛka-Nɔ-Kpaayaa-Kpow-vo o nin te.»
Currently Selected:
Sakari 14: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
