Filipea 4
4
1Lelan puapilɛa nia hɛnan ya-a, yeemɛi co ya le niaa cɔw vɛlɛ. Niaa co ɲaale nuu a bɛɛle nilen ni. Lelan, caaŋaa nia hɛnan ya taw-va, la lo lende yili o Maalii nin.
Congɔnndan a silala yɛ́-yɛ́lan
2I co Evodi nda Sɛntis ɲɔɔlu le yiyan pilɛ nda nɔ o Maalii nin-ndo. 3Nɔm vana naa n co baalaa latulu ɲɛkɛndɛi-yo bɛɛ, i co nɔm dimul mà mala vanlaandua ŋiɔŋaa kan. Kindinndo pila nda co le Yoongu kɛndɔɔ yondaa naa ndaa a Kileman a caaŋaa naa tɔ̀a naa n va vallo latulu-a ni. Caaŋaa naa diola ndalan la co lasɛvaalan o sɛbɛ cindaa nin-nda pɛɛn.
4La dɔwnun ɲaale lɔ́ɔ́-lɔ́ɔ̀ o Maalii nin, mì tɔla vɛlɛ dimi, la dɔwnun ɲaale.
5Màá vannda kpow a sínà vanakɛndɛyɛi niɛi. Maalii co nin le hunɔ̀ɔ̀. 6La buulan le ɲɛ-ɲɛ le, kɛ o dɛnɛ oo dɛnɛ nin, la cɔm Hala balahavɛila niaalan o piɛilen nin a o tɛɛlɔnndo nin a kɔl sinaa ikɛndɔɔ. 7O kon mì kɔlɲulu Hala-o, o hiow kɔlkalu kɛ́-kɛ̀-o manda kɔlta niaalan a yiyannda niaalan o Yeesu Krista nin.
8Le sɔɔn tɔ̀un yɛ puapilɛa nia, la va kɔllo keelaa o dɛnndan ndan coo: dɛnnda toɲa lan kpow, dɛnnda lebɛɛlan kpow, dɛnnda sandaalan kpow, dɛnnda diandaa lan kpow, dɛnnda vannda hini kɔltan-ndan kpow a dɛnnda vanà sɔlà lisaa lan kpow. 9La kelà o dɛnnda niaa pɛɛku ya o ba lan coo, dɛnnda niaa sɔla mì la tuɛi lan, a dɛnnda niaa ce ya o ba lan. O kon Hala kɔlɲuloo vanin niaa ikɛi.
Pol mel Filipea balika le ɲɛm nda yɔŋ ndu-on
10I naŋ kɔl taw le yiyan sɛnɛi niaa sɔla vɛlɛ le ya o Maalii nin-ndo. I sínà maa niáà nɔ ya kɔllo coo, kɛ niáà nɔ vɔ mɛɛ niáà cɔm ndi o dɛnɛ nin te. 11O co le mɛɛ ya co o bahavɛiyo nin yɛ le ya co sɔɛi nuaa le, kani i dɛli nini a kɔllo naŋɔɔ a ɲɛ ya nɔ-o. 12I caa calii bala fondoei, i caa vɛlɛ calii ɲɛ-sɔlaa bɛnduei. O dɛnndan kpow nin a nɛɛ-nɛɛ ka, i dɛli a pumndo, mí dɛli a yiaan biuvɔnndo. I dɛli a sɔla bɛndoo, mí dɛli a pɛŋnden. 13I co dɛnndan kpow nɔlaa o hɛnan vana co ya kpaayaa keo-vo bɛngu. 14Kɛ nduyɛ, la bɛɛndiaa tosà mí la mala ya o pɛŋnde nilen nin.
15Niaa pila Filipea, la sínà maa telen Yoongu kɛndɔɔ kandu yondanndo-o ya faŋan Maseduan ni, niaa pilɛ kpé yɔŋnun vanaa laalaŋaa mala ya-a ni. 16Kabi telen ya va Tesalonike-o, la va ya ɲɛm yáà nɔ makoo-on yoo. 17Ken co dimi le maa ɲɛm-kéan niaan ya co kɔɔli ni, o ya co kɔɔli-o co ni, mì la sɔla tɔnɔɔ taw. 18I sɔla ɲɛm niaa yɔŋ ya-on kpow, mí n hiw kuiyo ya o ba. I pɛ, Epafrodite langa yɔngu ya ɲɛm niaa yɔŋ ya-on, n co macoaa maa lasikɔlɔ cun kɛndɛ, sálà hɛnan Hala-o. 19Hala nuu nɛŋinin kpekula niaalan kpede maa mɛɛ bɔɔbɔɔyɛi ndɔɛi a biilu ndɔɔ co o Yeesu Krista nin yɛ. 20Biiloo co le Hala Fuɲa naa le fɛɛn a le fɛɛn. Amiina!
Yilɔɔla mɛɛlaalan
21La yil vanaa laalan Yeesu Krista má va o kunda niaa nin-nda kpow. Puaapilɛa co ya ikɛi-ya yil niaa. 22Vanaa laalaŋaa naa n co nanun-nda yil niaa, taama-taama a co baalaa o masaa Sesar lo cɛinin-nda.
23Màá kɛndɛi Maalii Yeesu Krista-e i lo niaa o lakɔl!
Currently Selected:
Filipea 4: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
