Kundalan 1
1
ISRAƐLLA O LEŊNDE VESELƐILEN SINAI NIN
Sɛvan tase polama Israɛlla
1O paale taselen o paangii diinndɔɛi nin, o vɔsi diinndɔɔ nin, o cɔnɔn Israɛlla cɛn Esipte-o kɔɔli, mí Mɛlɛka soaa o Moise lo o cɛi-kola-toandaa-labɔɔŋianndo nin, nɛɛ nda va o lɛŋnde veselɛilen Sinai nin-nda, mó dimul ndu aa: 2«La cɔm sɛ́lɛ́ Israɛlla tɛ́kpɛ́-tɛ́kpɛ́, mì la sɛva nda diolan a kundala ndala n'vanayalan a yungula ndalan. La sɛva diola vanpiaandua a pilɛn-pilɛnnda kpow. 3Niaa Aarɔn, la cɔm vanpiaandua nɔ kandɔɔ vɔsilan bidiin-nda a á nɔ hiovɔɔ bidiin coo-a, vanaa nɔla ma va vanaa cɔwva le Israɛlla-a. 4O lepola oo lepola coo, mì la cua vana co bolle pangalen-ndo o pilɛ le vali kon tosaa niaa ndaa. 5Vanaa vanin kan niaa ikɛi-ya vanin haa ni:
o polale Rubɛn-nden coo, Elisur, po Sedeur-o,
6o polale Simeɔn-nden coo, Selumiɛl, po Surisadai-yo,
7o polale Yuda len coo, Naasɔn, po Aminadab-o,
8o polale Isakar len coo, Netaneɛl, po Suar-o,
9o polale Sabulɔn-nden coo, Eliab, po Helɔn-ndo,
10o polale Efraim, po Yosɛf-o len coo, Elisama, po Amihud-o,
o polale Manase, po Yosɛf-o len coo, Kamliɛl, po Pedasur-o,
11o polale Bɛnyamɛn-nden coo, Abidan, po Kideoni-o,
12o polale Dan-nden coo, Ahiesɛr, po Amisadai-yo,
13o polale Asɛr len coo, Pakiɛl, po Okran-ndo,
14o polale Kad len coo, Eliasaf, po Deuɛl-lo,
15o polale Nɛftali len coo, Ahira, po Enan-ndo.»
16Kan yɔŋnun vanaa sɔla veeloo le vali cɔmaa kon a vali sɛvaa kon tosaa Israɛlla tɛɛn ni. Nda va bolii lapangɛi o polama ndan coo ni. Nda koni yɔŋnun vɛlɛ simlacia o kundala vanaa cɔvaa Israɛlla coo ni. 17Mí Moise nda Aarɔn a sɔɔngun vanpiaandua Mɛlɛka pesi kan diolan-nda ikɛi, 18má veelu sɛ́lɔ́ɔ́ kpow le nda cɔmndo tɛ́kpɛ́-tɛ́kpɛ́ a le nda diolan sɛvaa. O paale taselen coo o paangii diinndɔɛi nin, mí Israɛlla sɛvan a kundala ndala n'vanayalan a á yungula ndalan. Má sɛva diola vanpiaandua a pilɛn-pilɛnnda kandɔɔ vɔsilan bidiin háá hiovɔɔ o bidiin coo, 19maa mɛɛ Mɛlɛka ndóò cɔm Moise dɛnɛ kon yɛ. Lende Moise cɔm nda tɛ́kpɛ́-tɛ́kpɛ́ o lɛŋnde veselɛilen Sinai nin ni.
20Má cɔm polale Rubɛn-nden, po tase Israɛl-lo, má sɛva cuavaa ndɔa imamaa diolan a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 21Má cɔm vanpiaandua vaalan belehiɔɔlu a laŋɔmpum a kɛmɛ leŋuɛɛnu (46 500) o polale Rubɛn-nden nin.
22Má sɛva polale Simeɔn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 23Má cɔm vanpiaandua vaalan beleŋuɛɛnu a laŋɔmahiɔɔlu a kɛmɛ leyáá (59 300).
24Má sɛva polale Kad len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 25Má cɔm vanpiaandua vaalan belehiɔɔlu a laŋuɛɛnu a kɛmɛ leŋɔmpum a beleŋuɛɛnu (45 650).
26Má sɛva polale Yuda len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 27Má cɔm vanpiaandua vaalan belaŋɔmmɛw a lahiɔɔlu a kɛmɛ leŋɔmpum (74 600).
28Má sɛva polale Isakar len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 29Má cɔm vanpiaandua vaalan beleŋuɛɛnu a lahiɔɔlu a kɛmɛ lehiɔɔlu (54 400).
30Má sɛva polale Sabulɔn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 31Má cɔm vanpiaandua vaalan beleŋuɛɛnu a laŋɔmmɛw a kɛmɛ lehiɔɔlu (57 400).
32O polama poaa Yosɛf-a coo, má sɛva polale Efraim-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 33Má cɔm vanpiaandua o polale Efraim-nden nin vaalan belehiɔɔlu a kɛmɛ leŋuɛɛnu (40 500).
34Má sɛva polale Manase len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 35Má cɔm vanpiaandua vaalan beleyaa a latiɔn a kɛmɛ lediin (32 200).
36Má sɛva polale Bɛnyamɛn-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 37Má cɔm vanpiaandua vaalan beleyaa a laŋuɛɛnu a kɛmɛ lehiɔɔlu (35 400).
38Má sɛva polale Dan-nden a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 39Má cɔm vanpiaandua vaalan belaŋɔmpum a latiɔn a kɛmɛ leŋɔmmɛw (62 700).
40Má sɛva polale Asɛr len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 41Má cɔm vanpiaandua vaalan belehiɔɔlu a ò pilɛ a kɛmɛ leŋuɛɛnu (41 500).
42Má sɛva polale Nɛftali len a kundala ndala n'vanayalan a yungula ndalan a pilɛn-pilɛnnda, kandɔɔ vanpiaandua nɔ vɔsilan bidiin-nda a vanaa nɔ hiovɔɔ bidiin-nda, a tiwba le vali cɔwvo tosaa-a. 43Má cɔm vanpiaandua vaalan beleŋuɛɛnu a layàá a kɛmɛ lehiɔɔlu (53 400).
44Vanaa Moise nda Aarɔn a sɛva kpow-va yɔŋnun kan ni. N'van tɔ́ a vanaa ŋiɔŋaa va bolii lapangɛi o poloma tɔ́ a mamiɔmma Israɛlla coo-a mala nda sɛva kon ni. 45Vanaa nda sɛva kpede-a, vanpiaandua nɔ vɔsilan bidiin a hiovɔɔ bidiin coo-a, a tiwba le vali cɔwvo tosaa-a, 46a va vaalan kɛmɛ leŋɔmpum a layàá a vannda kɛmɔɔ leŋuɛɛnu a beleŋuɛɛnu (603 550).
Vali Mɛlɛka yɔngu polale Levii len le tosaa-o
47Vanaa fula o polale Levii len nin-nda nda sɛvan a Israɛlaa tɔ̀a latulu le. 48Kani mí Mɛlɛka ndóò soaa o Moise lo, mó dimul ndu aa: 49«Sɛ́và leviia le. Cɔm nda nda Israɛlaa tɔ̀a latulu le. 50Yɔngu nda vallo o Calta Mɛlɛka lan nin, nɛɛ sɛbɛ kpemaa co-a, mà tosa vallo a ɲɛm-laandun co o cɛi kon nin-ndon a á ɲɛm ndɔn vallon kpow. Nda bɛnda ni mà vili ɲɛm nda tangul Calta Mɛlɛka la lan-ndon a ɲɛm ndɔn valin co lenin-ndon kpow, nda bɛnda vɛlɛ le vallo tosaa o Calta Mɛlɛka la lan nin ni. 51Te la faŋan pɛ o dɔ́ɔ́ngɔ́ɔ̀ nin, nda bɛnda ni mà puusiaa Calta Mɛlɛka lan. Te la kila pɛ dɔ́ɔ́ngɔ́ celen, nda bɛnda ni mà tondu Calta Mɛlɛka la lan. Te vana celen, vana co leviinɔ loo sɔɔnguu pɛ ikɛi, o sɔla piɔ́mndo. 52Israɛlla kpow, vana-vana bɛnda mò cal o fonda yɔngun ndu-o nin, o kunda vanaa cɔvaa o co tɛɛn-nda nin, o lɛfɛ ndaa bɛngu. 53Leviia balunin calle o Calta Mɛlɛka la sɛbɛ kpemaa co kon nin-ndan ikɛi ni sɔ́, yɔŋii kɔl ni tuwvo tol Israɛlla coo. Leviia bɛnda ni mà tosa vallo o Calta Mɛlɛka la kpemala lan nin.» 54Mí Israɛlla cɛl sɔɔn Mɛlɛka dimul Moise-on kpow, má kela lecoo.
Currently Selected:
Kundalan 1: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
