Marke 6

Yeesu kɔɛ Nasarɛt

(Matie 13.53-58, Luke 4.16-30)

1Mí Yeesu faŋan ndon, mó kɔa o lɛŋnde ndɔlen nin. Mí kaandeŋaa ndɔa kɔa ndu kɔɔli. 2Paale pɛngiaalen tiiyaa, mó kɔa vannda pɛɛkoo o cɛi lekaando nin. Mí sɛ́lɛ́ bɛndu va ndu nilan yaŋɔɔ-o dɔawnun kɔndɔfili. Mí vannda va dimio aa: «Kuɛɛ o fula yɛ a hee kpow? Kɔlkalu súú yɛɛ kennun yɛ ndu hoo? Vɛ̀ɛ̀ o looku yɛ dɛnnda kaamaalan ndan kpow tosaa? 3O co langbanɔɔ cua hoo yindɔlan-ndo le? O co po Mari-o le, bɛndoo Nsaki, Yosɛf, Yude a Simɔn pɛɛn? O co yemaa ndɔa le co naa haa tɛɛn nanu le?» Mí ken yɔŋnun pow boŋaa le nda. 4Kɛ mí Yeesu dimul nda aa: «Vana-tɛɛngaa-diom Hala-o sɔla biiloo o lɛŋnde ndɔlen nin te, vanayan ndɔn tɛɛn a o ndu lo cɛinin pɛɛn.» 5Yeesu nɔ́lá kaamaa kɛ́-kɛ̀ tosa lon te, fɔ vanaa o handu balan coo mó singi nda-a. 6Mó dɔawnun kɔndɔfili le laalan nda kɛɛ-o.

Ɲɛ kaandeŋaa tɔ́ a à ŋiɔnda tosa-o

(Matie 10.5-15, Luke 9.1-6)

Mí Yeesu balu o cieon va lon-ndon nin kpow le vannda pɛɛkoo. 7O kon kɔɔli, mó veelu kaandeŋaa tɔ́ a à ŋiɔnda, mó va nda vomɔɔ a ŋiɔn-ŋiɔn. Mó ke nda kpaayaa ɲinaa vɔɔnda coo, 8mó congun nda aa: «La cua ɲɛ-ɲɛ o kɔlan te, fɔ sionnden daama. La cua ɲɛdiaa le, la cua bɔlɔ le, la vownun n'voli o yifɔ le. 9Kɛ la vownun samtalan, la cua domala tiɔn te.»

10Mó dimul nda vɛlɛ aa: «Cɛi niaa luɛi pɛ, la lo lon háá mi la faŋan o fonda kon. 11Nɛɛ niaa kɔɛ pɛ mì vannda cɛl niaa le, te kon te mà yeŋ niaa lani le, la va pɛ faŋanndo lon, la koŋ cundu vanin niaa o n'pelu-o, cundu kon vanin lesei le nda.» 12Má kɔa, má kɔ yonda Sɔɛi Hala-e maa vannda mal yɔŋ vɔɔndo mà mangalan. 13Má va ɲinaa vɔɔnda tovɔɔ taw, má va vanaa lanàà bɔɔ-bɔɔ pɔlaa, má va nda singio.

Piɔ́m Nsaŋ Vana yinaa-o

(Matie 14.1-12, Luke 9.7-9)

14Mí masaa Herɔde tuɛi sɔɛi ken, kani Yeesu ndóò kela nin tɔ́ɔ́ taw. Mí vannda va dimio aa: «Nsaŋ Vana-yinaa tendu fulaa vanvílɛ́iya tɛɛn, o fula ciee-piɔ́m mó muungu yoomu, lelan o nɔ kpaayaa le dɛnnda kaamaalan tosaa nuaa ni.» 15A pum a va dimio aa: «Elii ni.» Mì a pum nda va dimio aa: «Vana-tɛɛngaa-diom Hala-o maa haa sindɛ cɛn nuaa ni.» 16Herɔde tueyɔɔ sɔɔn vannda va mun dimio-on kpow, mó dimi aa: «Nsaŋ Vana-yinaa ya vem vannda má kialu ndu bollen-ndo ni, ndu muungu yoomu nuaa ni!»

17Kani mí Herɔde ndóò dimi maa a bii Nsaŋ, mà baa ndu yɔlɔn o kaasoo le Herodiade, lanɔɔ Filipe puapilɛ ndɔ ndu Herɔde ndóò yil o nɔ̀u nin-ndo pɛɛn. 18Kani Nsaŋ ndóò dimul ndu Herɔde ni aa: «A bɛnda ma cua lanɔɔ puapilɛ nɔmndo o nɔ̀u nin te!» 19Herodiade va nɛyɔnndo a Nsaŋ, ndóò yeema le ndu diyɔɔ. Kɛ ndóò nɔla le, 20kani Herɔde va Nsaŋ vou, bau o va sinaa maa vana sandaa a vana diandaa Nsaŋ va ni, o va ndu vɛlɛ kandaa. Telen oo telen ndóò yaŋ pɛ Nsaŋ nilan, kɔllo ndóò laasian ndu. Kɛ nduyɛ, ɲɔɔ pila ndóò hɛnan ndu le ndu yaŋnɔnndo ni. 21Kɛ paale pilɛ, ɲin Herɔde va paale ndɔle vialannden yelelaa-o, mó yaw ɲɛdiaa le vanaa ndɔa lebɛɛa, simlacia vanaa cɔwva a vanaa sɔvɛa kɛ́-kɛ̀ va Kalile. 22Mí cua Herodiade-o luɛi, mó ya. Mí ɲɔɔ hɛnan Herɔde nda vanaa ndɔa o veelu-a. Mí masaa dimul cuaambɔɔ aa: «Piɛi ya ɲɛ n yeema-o, mì ke nɔm ndu.» 23Mó mɛnalan ndu aa: «Ɲɛ-ɲɛ n yeema pɛ, i kenin nɔm ndu, hali o va bɛɛ aa tala masale nilen ni.» 24Mí cuaambɔɔ fula, mó kɔ ɲuna kala ndɔ aa: «Yɛɛ ya kɔ piɛi yɛ ndu?» Mí kala ndɔ mulul ndu aa: «Bolle Nsaŋ Vana-yinaa len.» 25Mí cuaambɔɔ keleŋa muungu cɔ́-cɔ́ o masaa lo, mó dimul ndu aa: «I yeema ma ke ya bolle Nsaŋ Vana-yinaa len sunsun o siɛtio nin.» 26Mí mɔnɛi bii masaa, kɛ le tùú ndóò cii nin mɛnan-ndo, a le tùú vanaa ndóò veelu-a va icali-o, o kɛɛ ndu diom te. 27Fɔ́ɔ́fɔ̀, mó viam vana cɔwvo le kɔlan hunɔɔ a bolle Nsaŋ Vana-yinaa len. 28Mí vana cɔw kon kɔa, mó kɔ kialu Nsaŋ bollen nɛɛ o va o kaasoo-a, mó hun a len o siɛtio nin. Mó ke cuaambɔɔ len, mí cuaambɔɔ ndu yoo kala ndɔ. 29Kaandeŋaa Nsaŋ-nda tueyɔɔ lende, má hun cua dialun ndɔn, má kɔ kumbu.

Yeesu dɔw vannda vàála ŋuɛɛnu balo

(Matie 14.13-21, Luke 9.10-17, Nsaŋ 6.1-14)

30Mí kaandennda cuungian o Yeesu lo, má dimul ndu ɲɛ-ɲɛ nda tosa a ɲɛ nda pɛɛku vannda-o. 31Mó dimul nda aa: «La fula vannda tɛɛn mì la kɔɛ lándán o lɛŋnde veselɛilen nin, mì la kɔ pɛngi ɲɛ-pɔmbɔ.» Kani vannda taw a va kɔlan a hunɔɔ, ndáà nɔ bɛɛ fonda hali le ɲɛdiaa dioo le. 32Má luɛi o dɛ̀ndɔ̀ɔ́ nin, má kɔa lándán nɛɛ vana ve le-a. 33Mí vannda taw ca nda kɔlan, má sina nɛɛ nda va kɔlan-nda. Má fula o kobilan kpow nin, má ɲaanun a n'pelu, má hiaw nda laci, má kɔ cum nda lon.

34Yeesu fulaa dɔ́ɔ́ o dɛ̀ndɔ̀ɔ́ nin, mó ca vannda sɛ́lɛ́ bɛndoo, mí ɲííye bii ndu a nda, kani maa saa nɔ vana mandaa le-a nda va ni, o kon mó can nda pɛɛkoo o sɔɔn taw coo. 35Le tùú telenndo ndóò kɔɛnnun nin taw-vo, mí kaandeŋaa ndɔa sɔɔnguu ndu ikɛi, má dimul ndu aa: «Vana co o fondaa ho le, nduyɛ paalen le kɔɛnnun. 36Mìngì vannda, mà kɔɛ o sɔndɔkɔltan a o cieon co macɛlu-on, mà kɔ piondu ɲɛdiaa.» 37Mí Yeesu mulul nda aa: «Niaa pila ke nda ɲɛdiaa.» Kɛ má mulul ndu aa: «Mò va maa n kɔ piondu buloo a volin latámán kɛmɛ lediin, mì n hun ke nda ni?» 38Mó mulul nda aa: «Vɛɛ niaa nɔ yɛ bululan? La kɔ tofa vɔ!» Ndáà mɛɛndianndo, má dimi aa: «Bululan tan ŋuɛɛnu a suwva nda ŋiɔn naa n nɔ nanu ni.» 39Mó dimul nda le vannda kɛsio a kundalan o bil puiyaa coo. 40Má cal a polan, n'van kɛmɛ-kɛmɛ, n'van beleŋuɛɛnu-beleŋuɛɛnu. 41Mó cua bulula ŋuɛɛnula lan a suvaa ŋiɔŋaa kan, mó heelu hɔlla o halataala, mó dɔaw duaa. O kon mó yimiyimi bululan, mó ke kaandennda le sɛ́lɔ́ɔ́ lan piɔwvo. Mó piɔw vɛlɛ suvaa ŋiɔŋaa kan vannda kpow tɛɛn. 42Mí nda kpow a dia, má pum, 43má kɔa a bulu tɔ̀ lo-o a á suvaa tɔ̀a lo-a kambɛilan tɔ́ a latiɔn lapiaa cá-cá. 44Vanáà de bulu kon-nda va vanpiaandua vàála ŋuɛɛnu.

Yeesu kɔɛ o mɛnndan coo

(Matie 14.22-33, Nsaŋ 6.15-21)

45Sɔɔn mun cuvɔɔ dɔ́ɔ́, mí Yeesu baŋ kaandeŋaa ndɔa helɔɔ o dɛ̀ndɔ̀ɔ́ nin le ndu hiovɔɔ laci o kɔngɔɔ pilɔɔ, a kpengii kobio Bɛtsaida, o kon mì ndu pila koma lo sɛ́lɔ́ɔ́ mingio. 46Tuma o cii sɛ́lɔ́ɔ́ mingi-yo, mó kɔa o pembei coo le piɛilen. 47Ɲumndan tolɔɔ, dɛ̀ndɔ̀ɔ́ va o mɛmma ihɛllan tɛɛn, mí Yeesu ndu va o kɔngɔ. 48Mó ca maa kaandennda va sangaa le dɛ̀ndɔ̀ɔ́ yɔɔ nɛɛ ndáà yeema mì ndóò kɔɛ-a, kani hoeiye ve lakɔ nɛɛ ndáà yeema-a le. A telen di-tɛɛn paale siaa, mó kei o mɛnndan coo le kɔlan nɛɛ nda va-a, o va le nda hiovɔɔ. 49Ndáà cɔu ndu kɔlan o mɛnndan coo, má yiyan maa ɲinaa ni, má mɛli yeelan. 50Kani nda kpow a va ndu cɔu, má laasian kɔltan. Fɔ́ɔ́fɔ̀, mí Yeesu soaa o nda lo, mó dimul nda aa: «La laalan maa ya ni, siòòŋii bii niaa le.» 51O kon kɔɔli mó luɛi nda ikɛi o dɛ̀ndɔ̀ɔ́ nin, mí hoeiye cal. Mí kɔndɔfili bɛndoo bii kaandennda, 52kani a bii kaamaa ndóò tosan a buloo-o bila le, kani nila kalulan la va nda.

Yeesu singi vannda o tàndá Kenesarɛt-o nin

(Matie 14.34-36)

53Ndáà siowvo taŋɔɔ, má tiiya o lɛŋnde Kenesarɛt len nin. 54Ndáà fulaa dɔ́ɔ́ o dɛ̀ndɔ̀ɔ́ nin, mí vannda sina Yeesu, 55má balu lɛŋnde len kpow, nɛɛ-nɛɛ vannda ndáà tuei pɛ maa o co lon, ndáà hin a vanaa lanàá o yalalan nin. 56O va o kobi nin, o va o cieon a o sɔndɔkɔltan, nɛɛ-nɛɛ Yeesu ndóò luɛi pɛ, a sooluu vanaa lanàá o ifal, vannda kɔ tɛɛlun maa o cɛl mì vanaa lanàá pilan bɔɔle doma ndɔɔ daama. Nduyɛ vanaa-vanaa va ndu pilanndo, a va siongɔɔ sɔlaa.

Currently Selected:

Marke 6: BKG

Highlight

Copy

Compare