Marke 4

Tale vana saŋaa yɛiyo

(Matie 13.1-9, Luke 8.4-8)

1Mí Yeesu kandu vɛlɛ vannda pɛɛkoo o dalaa kɔngɔ. Mí sɛ́lɛ́ bɛndoo cuungian ndu ikɛi, fɔ mó luɛi, mó cal o dɛ̀ndɔ̀ɔ́ nin, mó nannun tiŋ o mɛnndan tɛɛn. Vannda va icali lɛŋ o dalaa kɔngɔ. 2Mó viaw nda pɛɛkoo taw o talelan nin. Mó va dimio o nda pɛɛkoo aa: 3«La yaŋ nilan! Paale pilɛ, mí vanndo fula le saŋɔɔ. 4O va saŋɔɔ, mí kulun o va saŋɔɔ-on pum deli o nɛiyo demullo: mí yowva hun cɔwviaa mun. 5Mí n tiŋ deli o vɔsɔkɔɔ nin nɛɛ lɛŋnde ve taw le-a. Mí n keleŋa vulɔɔ, kani puulu bɔɔ ve lon te. 6Kɛ mɛɛ paalen le fula, mí le lɔaa mun, mí n vesa, kani puundun ve le. 7Mí n tiŋ deli o yɔɔn nin, mí yɔɔn hindu, mí n mial mun, n kum te. 8Mí n tiŋ mun deli o lɛŋnde kɛndɛlen. Mí n soli yasalan, mí la hindu hindɔɔ pila. Mí yasaa pilɛ koam kullon beleyaa, o pum belaŋɔmpum, o pum yɛ kɛmɛ. 9O kon mó dimi aa: ‹Vana nɔ pɛ nilan le tueyɔɔ, ndu tuei.›»

Le kɔlɔ Yeesu soaa o talelan nin-ndo

(Matie 13.10-17, Luke 8.9-10)

10Ndáà hiovɔɔ o lesɔngi, mí vanáà balu ndu-a a kaandennda ɲuna ndu kɔlɔ o va sɔɛi o talelan nin-ndo. 11Mó mulul nda aa: «Niaa, o kennun niaa le dɛnnda viannanndan sinaa a masale Hala len o kɔɔ, kɛ le vanaa celen, maa lasanda daama la co le nda ni, 12haliko

a va bɛɛ tofaa, a ca le,

a va bɛɛ tueyɔɔ, a bii bila le.

Yɔŋii nda mangalan mà sɔla hakio malɔɔ.»

Yeesu tɛɛsiaa bundɛi vana saŋaa yɛiyo

(Matie 13.18-23, Luke 8.11-15)

13Mó dimul nda vɛlɛ aa: «La bii bundɛi he bila le. Vɛ̀ɛ̀ niaa bii yɛnin bundɔn tɔ̀un kpow bila? 14Vana saŋaa co sɔɛi Hala-e saŋɔɔ. 15Kulun deli o nɛiyo demullo-on, mun co vanaa tuɛi sɔɛi Hala-e, mì Setana hun soli nda sɔɛi nda saŋ nda ken o kɔl-le ni. 16Lende koni, kulun deli o vɔsɔkɔɔ nin-ndon, mun co vanaa tuɛi sɔɛi Hala-e, mà keleŋa ndi cɛlɔɔ a ɲaaloo-a ni. 17Kɛ nda pila nɔ n'puundu le, vanaa laalan le telen bingi-a co kan ni. Te sangaa te kon te yɛle tolaalen le komal nda dɔ́ɔ́ pɛ le sɔɛi Hala-e, ken siŋnun pow boŋaa le nda. 18Kulun deli o yɔɔn nin-ndon, mun co vanaa tuɛi sɔɛi Hala-e, 19kɛ mì buulannda ceenndan, hɔlte bolofaa a yeemɛi bɛnduei ɲɛvi nda ndi o kɔl, i nɔla komɔɔ le-a ni. 20Kulun deli o lɛŋnde kɛndɛlen-ndon, mun co vanaa tuɛi sɔɛi Hala-e, má bii ndi, mí i koam-nda ni: mí n pum koam beleyaa, n pum belaŋɔmpum, n pum kɛmɛ.»

Tale fitinaa

(Luke 8.16-18)

21Mí Yeesu ɲuna nda vɛlɛ aa: «Vɛ̀ɛ̀ vana mɛndul pá fitinaa mà kuumbuu hɛngɛiyo lecoo, te kon te mà kɛsi ndu o kpeloo bɛngu? Vɛ̀ɛ̀ o co o ɲɛ kɛsiaa lafitinaa coo le vana kɛsi ndu le? 22Kani ɲɛ-ɲɛ co o viannan, o fulanin ceen, ɲɛ-ɲɛ co o kumbaa, ndu baayannin ipala déŋ. 23Vana nɔ pɛ nilan le tueyɔɔ, mɛɛ ndu tuei.» 24Mó dimul nda vɛlɛ aa: «La mandan a ɲɛ niaa co tueyɔɔ-o. A tuunin niaa a ɲɛ niaa co tuuvo-o, mà cɔɔlu vɛlɛ handɔɔ lecoo. 25Kani a kenin vana nɔ-o, kɛ vana nɔ loo, hali o ó nɔ-o hialunnin ndu.»

Tale kulii vil a ba ndɔ-e

26Mó dimi vɛlɛ aa: «Masale Hala len le co maa langbanɔ saŋ yɛiyo lɛŋ-ndo. 27O va o malɔ, o va lahɔl, paalen a ɲumndan, o sina bɛɛ mɛɛ yɛi kalaa co vulɔɔ mo va hindɔɔ yɛ le. 28Lɛŋnden len pila le co fɔlɔn billo soli, o kon kɔɔli mì yasalan la fula. O mɛɛlulan, maalon pɛ o yasalan cá-cá. 29Te kullon diw dɔ́ɔ́ pɛ, a kɔ baa vɔlɔtɔɔ, kani telen koavaa co kon ni.»

Tale kulii mutarde

(Matie 13.31-32,34, Luke 13.18-19)

30Mó dimi vɛlɛ aa: «A yɛɛ naa n tuu yɛnin masale Hala len, te kon te a sanda kuɛɛ naa n tuu yɛnin masale Hala len? 31Masale Hala len le co ko kpen a kulii mutarde. O ndi saŋɔɔ, ndi hiow dɔɔnanndo a kulun co o lɛŋnden coo-on kpow. 32Kɛ i cuu pɛ saŋɔɔ, i vil, i hiow yɔmii co o nakɔɔ nin-nde kpow, lɛvun bɛndon fula, yowva hun luɛi o vunduma ndɔan.»

33Bundɔn vaa lende Yeesu ndóò dimi taw le vannda sɔɛi Hala-e dimullo ni, le mɛɛ vanaa o va sɔɛi o nda lo-a ndáà bii ndu bila yɛ. 34Ndóò suu o nda lo mì ndóò kɛɛ taloo dimi le, kɛ te ndóò cal pɛ landɔ nda kaandeŋaa ndɔa, o tɛɛsial nda mun kpede.

Yeesu kpaa piɔɔ hoeyii fùkù-fùkoo

(Matie 8.23-27, Luke 8.22-25)

35Paalen delɔɔ ɲinkon, mí Yeesu dimul kaandeŋaa ndɔa aa: «N taŋnun o kɔngɔɔ pilɔɔ!» 36Ndáà dimullo sɛ́lɔ́ɔ́ le kɔnndan, má kɔa nda Yeesu-aa o dɛ̀ndɛ̀ o va nin-ndo nin, dɛ̀ndɛ̀la celen la va ndu ikɛi. 37Fɔ́ɔ́fɔ̀, mí hoeyii felenfelennde can hɔŋndo, mí mɛmma va biiŋɔnndo-an ma va dɛ̀ndɔ̀ɔ́ kumbɔɔ, mí dɛ̀ndɔ̀ɔ́ va piɔu a mɛnndan. 38Yeesu ndu va o lɔan o dɛ̀ndɔ̀ɔ́ tumndo, mó handu bollen o bɔlɔ handaa lebollo coo. Má tindi ndu, má dimul ndu aa: «Kɔɔfa, vuo naa n co nuaa ni! Vɛ̀ɛ̀ a cen mà soo le naa le?» 39Ndóò tiondɔɔ, mó soaa o hoeiye lo a kpaayaa, mó dimul mɛnndan aa: «Mei! I tuɛi lɛhau le dɛ!» Mí hoeiye pɛngi hɔŋndo, mí ɲɔɔ mei kpili. 40O kon mó ɲuna nda aa: «Le yɛɛ niaa nɔ yɛ siòònde nuaa taw? La nɔ manɔa laalan te?» 41Mí siòònde bii nda taw, má dimulan vellaa-velle aa: «Vanaciee súú yɛɛ co yɛ hoo, le mì hoeiye a mɛnndan ma tuei ndu diom?»

Currently Selected:

Marke 4: BKG

Highlight

Copy

Compare