Matie 8

Yeesu singi vana nàà siaŋaa

(Marke 1.40-45, Luke 5.12-16)

1Yeesu tolɔɔ pembei, mí sɛ́lɛ́ bɛndoo kɔa ndu kɔɔli. 2O kon, mí vana nàà siaŋaa pum sɔɔnguu, mó baŋ vulan ndu o labɛngunin, mó dimi aa: «Yandi, Maalii singi ya, kani a nɔla.» 3Mí Yeesu siɛndi baa, mó pilan ndu, mó dimi aa: «I cɛl, siongu!» Fɔ́ɔ́fɔ̀, mí nàà siaŋa va ndu-o siangu. 4O kon mí Yeesu dimul ndu aa: «Dimul vana-vana ndi le, kɛ kɔ cɔmnun vanaa-solia-lasálàá, mà soli sálà Moise dimi-o, haliko mi ndu va seilen le nda.»

Vana baala simlacinɔ vanaa cɔvaa kɛmɛa sɔla siongɔɔ

(Luke 7.1-10, Nsaŋ 4.43-54)

5Yeesu kandɔɔ tiiyaa Kapɛrnaum, mí simlacinɔ vanaa cɔvaa kɛmɛa komal ndu, 6mó tɛɛlun ndu aa: «Maalii, vana ni baalaa co ihini cɛinin, falon kpede n vi ndu, o co sangaa taw.» 7Mí Yeesu dimul ndu aa: «I co lakɔ ndu singi.» 8Mí simlacinɔ kon muli aa: «Maalii, i co o sɔvɛ le nɔm kɔlan o ya lo cɛinin te. Dimio bɛɛ n dimi ni maa o siongu, o nɔla mo sengu. 9Kani ya co hoo-o, vanaa co ya bollen-nda co. I nɔ vanaa cɔwva ya o ba bɛngu. O ya dimul pɛ aa ‹Kɔ›, ndu kɔɛ, i dimul pɛ o celen aa ‹Hun›, ndu hin. I vem pɛ vana ni baalaa le ikɛ́-kɛ̀ tosaa, o tosa.» 10Yeesu tueyɔɔ ndu sɔɔn mun dimio, mí ɲɔɔ hɛnan ndu a langbanɔ kon. Mó dimul vanaa va ndu kɔlan kɔɔli-a aa: «Mì dimul niaa toɲaa, hali Israɛl, i seelun-ndɔ vana nɔ laalan bɛndu vaa nuaa le. 11Mì dimul niaa, vanaa bɔɔ-bɔɔ a fulanin a ba paalen le can-ndo a á ba paalen le del-lo, mà de o tabali pilɔɔ nda Abraham, Isaak a Yakɔb o masale halataala len nin. 12Kɛ mà viow vanáà bɛnda le masalen loo kɛɔ-va o ɲumndan nin o bɛ́ɛ̀, nɛɛ vannda vanin caŋndan a ciŋndon sɔmndo-a.»

13O kon mí Yeesu dimul simlacinɔ kon aa: «Kɔnnun o nɔm ndo. Màá i tosalan nɔm mɛɛ laalan nɔmndo co yɛ!» O telen kon kpafii, mí buɛi ndɔɔ siangu.

Yeesu singi vanaa lanàá taw

(Marke 1.29-34, Luke 4.38-41)

14O kon kɔɔli, mí Yeesu kɔa o Piɛr lo cɛinin, mó komal lefu ndɔ laandoo a dialun tuwvon. 15Mó pilan ndu baa, mí dialun tuwvon pɛngi. Mí ndu lefoo Piɛr kalaa can, mó ke Yeesu ɲɛdiaa.

16Paalen delɔɔ, má cuu ndu vanaa nààla ɲinaa. Mó soaa, mí ɲinaa va vanaa kan kɔɔli-a ɲaanun. Mó singi vanaa lanàá kpow. 17O kon mí sɔɛi Esai vana-tɛɛngaa-diom Hala-o dimi-e peelun aa: «O cua namtale naalen, mó siilun nààla naalan.»

Mɛɛ vana del Yeesu kɔɔli yɛ

(Luke 9.57-62)

18Yeesu mɛɛndanndo sɛ́lɛ́ óò balu ndu-o, mó dimi le taŋɔɔ kɔngɔɔ leeloo. 19Mí vana pɛɛkaa latɔŋndo pum sɔɔnguu, mó dimul ndu aa: «Kɔɔfa, ba-ba n kɔɛ pɛ, i kɔanin nɔm kɔɔli.» 20Mí Yeesu mulul ndu aa: «Kàá nɔ buulula nda lɔl nin-ndan, yovaa co kelaa coocoo-a bɛɛ a nɔ vɛɛnde, kɛ Po vanacieo ndu nɔ bɛɛ nɛɛ yambaa lebol te.»

21Mí vana celen o kaandennda tɛɛn dimul ndu aa: «Maalii, cɛl-la mì kɔ kumbu fɔlɔn fuɲa nuu.» 22Kɛ mí Yeesu mulul ndu aa: «Del-la kɔɔli. Mal vanvílɛ́iya vanvílɛ́yaa ndaa kumbɔɔ.»

Yeesu kpaa piɔɔ hoeyii fùkù-fùkoo

(Marke 4.35-41, Luke 8.22-25)

23Yeesu luɛyɔɔ o dɛ̀ndɔ̀ɔ́ nin, mí kaandeŋaa ndɔa luɛi ndu kɔɔli. 24Fɔ́ɔ́fɔ̀, mí piɔɔ hoeyii fùkù-fùkù bɛndoo pum can siaa o dalaa coo, mí mɛnndan ma va biiŋɔnndo, mí ma va dɛ̀ndɔ̀ɔ́ kumbɔɔ. Kɛ Yeesu ndu va o lɔan. 25Mí kaandennda sɔɔnguu ndu ikɛi, má tindi ndu, má dimi aa: «Maalii, ciindiaa naa, cuuo naa n co nuaa ni!» 26Mó dimul nda aa: «Le yɛɛ niaa co yɛ a siòònde? Laalan niaa dɔɔnan dɛ!» O kon, mó can, mó kpaa hoeiye a mɛnndan#8.26 mó kpaa hoeiye a mɛnndan: O fondaa ho, mɛɛ o dimin o krɛkiei nin yɛ, kɔngɔlanndo Yeesu kɔngɔlan hoeiye a mɛnndan ni, vana nɔla vɛlɛ mì vana dimi maa vueinɔnndo o vueinun hoeiye a mɛnndan ni. O co kpaa sondo fondo le o kpaa man te., mí ɲɔɔ mei o lepilɔɔ doŋ. 27Mí kɔndɔfili bɛndoo bii vanaa kan kpow, má va dimulanndo aa: «Vanaciee súú yɛɛ co yɛ hoo? Hali hoeiye a mɛnndan ma bii sɔɛi ndɔɛi!»

Yeesu singi langbaa ŋiɔŋaa ɲinaa vɔɔnda va kɔɔli-a

(Marke 5.1-20, Luke 8.26-39)

28Yeesu tiiyaa o kɔngɔɔ pilɔɔ o lɛŋnde Kadareniia nin, mí langbaa ɲinaa vɔɔnda va kɔɔli-a pum a fula nda ŋiɔn nɛɛ ndáà kumbu vanvílɛ́iya-a, má hun ndu laci. Siòòŋii ndɛi va vannda taw-taw, lelan vana óò cɛl lɛ le keiyo a kpengii ken te. 29Má can yoondiaa aa: «Yɛɛ n yeema yɛ le naa yɔŋndo, nɔm po Hala-o? Vɛ̀ɛ̀ le naa saangiaa n hin ni lɔ́ɔ́ pá mì telenndo tiiya?»

30Pevaa sɛ́lɛ́ bɛndua pum a va diólan a kpengii ken, 31mí ɲinaa vɔɔŋaa kan a ɲɔɔlu Yeesu aa: «Te tovɔɔ n co naa ni, mɛɛ yɔɔ naa mì n kɔ luɛi pevaa kundaa ha tɛɛn.» 32Mí Yeesu dimul nda aa: «La kɔ!» Má fula langbaa kan nin, má kɔ luɛi pewva nin. O kon mí pevaa kundaa kan kpede a toal a kiltan o kɔngɔ feke-feke va lon-ndo, má kɔ deli o dalaa nin, má vu kpow o mɛnndan nin. 33Mí vanaa va nda mandaa-a ɲaanun, má kɔa ciee, má kɔ dimul vannda dɛnɛ yɔŋnun-ndo kpede. Kɛ taama-taama o yɔŋnun a langbaa ɲinaa vɔɔnda va nin-nda-o. 34O kon, mí vanaa va o ciee kon nin-nda kpede a fula, má kɔa nɛɛ Yeesu va-a. Mɛɛ nda ce ndu, má tɛɛlun ndu maa a faŋan o lɛŋnde ndalen nin.

Currently Selected:

Matie 8: BKG

Highlight

Copy

Compare