Matie 26
26
Simlacia yii Yeesu dúmbú
(Marke 14.1-2, Luke 22.1-2, Nsaŋ 11.45-53)
1Yeesu ciiyo sɔɔn mun kpow dimio, mó dimul kaandeŋaa ndɔa aa: 2«La sinà maa o lo palɛi ndii ŋiin le kafo-hiavaa-coo tiiyaa. À malnin Po vanacieo vannda o ba le ndu baŋɔɔ o yɔm singafilaa coo.»
3O kon, mí bolii vanaa-solia-lasálàá a simlacia lelɛŋnda cuungian o Kaif lo bɛ́ɛ̀, o va bolle vanaa-solia-lasálàá-o. 4Má kɔ mɛi le kɔlkalu vɔɔndo nuwviaa le Yeesu biyɔɔ, haliko mi ndáà dii ndu. 5Má dimi aa: «N bíìnun ndu o paale kafolen coo le, yɔŋii vɔkɔ-vɔkɔɔ yɔŋnun vannda tɛɛn.»
Vanalanɔɔ pum suu Yeesu cuɛima cun kɛndɛan Betani
(Marke 14.3-9, Nsaŋ 12.1-8)
6Tuma Yeesu va Betani o Simɔn nàà siaŋaa va-o lo cɛinin-ndo, 7mí vanalanɔɔ pum sɔɔnguu ndu ikɛi. Ndóò nɔ sianio pum o ba a cuɛima cun kɛndɛma báà kalan mapum lenin. Tuma nda va ɲɛdiaa dioo-o, mó taaliaa cuɛima man Yeesu o lebol. 8Kaandennda cɔu lende, má tambu kɔltan, má ɲuna aa: «Le yɛɛ nɛ man tɛɛmbuuo ho nuaa? 9Ndóò va fisa mí vanáà pisi cuɛima báà kalan man, mí vanáà piɔw vanaa bala fondoa ɲɛ-sɔlaa kon.»
10Mí Yeesu bii sɔɛi ken bila, mó dimul nda aa: «Le yɛɛ niaa co yɛ palaa ho? Dɛnɛ kɛndɔɔ o tosal-la ni. 11Kani la nɔnin vanaa bala fondoa lɔ́ɔ́-lɔ́ɔ̀ niaa tɛɛn. Kɛ ya ya, la nɔ́nìn ya lɔ́ɔ́-lɔ́ɔ̀ niaa tɛɛn te. 12Cuɛima cun kɛndɛma o taaliaa ya man coo-an, le lɔ́ɔ́ nda co hunɔ̀ɔ̀ ya kumbɔ̀ɔ̀-o o bɛɛndiaa ya pɔɔ lende ni. 13I co niaa toɲaa dimul, nɛɛ-nɛɛ Yoongu kɛndɔɔ ho hun yondan pɛ o ceendo coo, a diminin vɛlɛ dɛnɛ cuaa ho tosa hoo-o le loonɔnndo a ndu o kɔɔ.»
Yuda nuwviaa nɛilan le Yeesu malɔɔ vannda o ba
(Marke 14.10-11, Luke 22.3-6)
14Mí kaandennɔ pilɛ o kaandeŋaa tɔ́ a à ŋiɔnda tɛɛn, o ndáà veelu aa Yuda Iskariɔt-o kɔ komal bolii vanaa-solia-lasálàá, 15mó dimul nda aa: «Te i mal pɛ ndu niaa o ba, yɛɛ nɛ niaa ke yɛnin ya?» Má cua volin latámán beleyaa, má yɔngu ndu. 16Kandɔɔ nin tuma kon, mí Yuda kandu nɛilan nuwviaa le Yeesu malɔɔ nda o ba.
Yeesu de ɲɛdiaa kafo-hiavaa-coo nda kaandeŋaa ndɔa
(Marke 14.12-21, Luke 22.7-14,21-23, Nsaŋ 13.21-30)
17O paale tasele kafo bulu toosian a lɛvɛn too len coo, mí kaandennda hun ɲuna Yeesu aa: «Kuɛɛ nɛ n yeema yɛ mì n bɛɛndial nɔm ɲɛdiaa le kafo-hiavaa-coo?» 18Mí Yeesu mulul nda aa: «La kɔ o kobio nin, o vanndo pum ndo, mì la dimul ndu aa: ‹Kɔɔfa dimi aa telen ndɔɔ tiiya, o nɔm ndo o tosanin kafo-hiavaa-coo nda kaandeŋaa ndɔa ni.›» 19Mí kaandennda tosa mɛɛ Yeesu dimul nda yɛ. Má toosiaa ɲɛdiaa kafo-hiavaa-coo.
20Icɔllo, mí Yeesu cal ɲɛdiaa dioo nda kaandeŋaa tɔ́ a à ŋiɔnda. 21Tuma nda va ɲɛdiaa dioo-o, mó dimul nda aa: «I co niaa toɲaa dimul, vana pilɛ o niaa tɛɛn malnin ya vannda o ba.» 22Mí kaandennda kpow a tambu kɔltan taw, má va ndu ɲuuniaa a pilɛn-pilɛnnda aa: «Maalii, o co ya le le?» 23Mí Yeesu muli aa: «Vana naa n co baa vowvo naa ndu o hɛngɛi pilɔɔ nin-ndo, ndu malnin ya vannda o ba ni. 24Po vanacieo co hunɔɔ piɔ́mndo sɔla mɛɛ o sɛvan a ndu o kɔɔ o Sɛbɛ Hala-o nin yɛ. Kɛ dɛnɛ palaa co le vana malnin ndu vannda o ba-o. Ndóò va fisa hali mì vana kon ndóò vilun te.» 25Mí Yuda va ndu malɔɔ vannda o ba-o cua sɔɛi, mó ɲuna aa: «Kɔɔfa, o co ya le le?» Mí Yeesu mulul ndu aa: «Nɔm pila cii dimi.»
Ɲɛdiaa Maalii-o
(Marke 14.22-26, Luke 22.14-20, 1Korɛntea 11.23-25)
26Tuma nda va ɲɛdiaa dioo-o, mí Yeesu cua buloo, mó dɔaw ndu duaa, mó yimiyimi ndu, mó yɔngu kaandeŋaa ndɔa, mó dimul nda aa: «La bii mì la de, dialun nun co mun ni.» 27Mó cua vɛlɛ taala kólaa, mɛɛ o cii balikaa malɔɔ, mó ke nda ndu, mó dimi aa: «Niaa kpow la kol, 28kooma nian ma co man ni, kooma kpema-an, ma fula le vannda taw hakio malɔɔ-an. 29I co niaa dimul, i kol-lɛnin mɔima n'rɛsɛnndan man te, háá fɔ nin o masale Fuɲa nuu nin, mì hun kol ma sɛnɛiyan naa niaa.» 30Ndáà ciiyo condun Hala-on solio, má kɔa o Pembii oliviei coo.
Yeesu dimi maa Piɛr vuununnin sɔɛi ndɔɛi
(Marke 14.27-31, Luke 22.31-34, Nsaŋ 13.36-38)
31O kon mí Yeesu dimul nda aa: «Cɔɛllɛn, niaa kpow la kɛɛnin ya, kani o co o sɛvaa aa: ‹I lɔaanin vana mandaa n'saa, mì kunda saa puusian.› 32Kɛ telen ya tendulnin fulaa vanvílɛ́iya tɛɛn-ndo, i kɔanin niaa laci Kalile.» 33Mí Piɛr cua sɔɛi, mó dimul Yeesu aa: «Vanaa tɔ̀a kpede kɛɛ bɛɛ nɔm, ya, i kɛɛnin nɔm te few.» 34Mí Yeesu dimul ndu aa: «I co nɔm toɲaa dimul, cɔɛllɛn, nanu a sɔɔ koovaa, a vuununnin sɔɛi nii leyàá.» 35Mí Piɛr mulul ndu aa: «Hali i sɔla bɛɛ piɔ́mndo, i viinunnin sɔɛi nɔmnde le.» O kon mí kaandennda kpow dimi ɲɛ pilɛ kon.
Yeesu piɛi Hala Sɛtsemane
(Marke 14.32-42, Luke 22.39-46)
36O kon kɔɔli, mí Yeesu kɔa a kaandeŋaa ndɔa o fondaa pum diolan Sɛtsemane, mó dimul nda aa: «La cal nanu, mì kɔɛ pɔɔ piɛilen o nda.» 37Mó kɔa a Piɛr a poaa ŋiɔŋaa Sebedee-a kɔɔli. Mó kandu kɔllo tambei a buulanndo taw. 38O kon mó dimul nda aa: «Kɔl nuu sanga háá pɛɛngu piɔ́mndo, la lo pɔɔ nanu, mì la va lahɔl a ya latulu.» 39O kon mɛɛ o kɔɛ tiŋ laci, mó del o kuumbuan lɛŋ, mó piɛi Hala aa: «Pua, too nɔla pɛ tosan, cɛl mi i kol a taala kólaa sangaa ho le. Kɛ nduyɛ, o va mɛɛ ya i yeema yɛ le, tosa mɛɛ o hɛnan nɔm yɛ.» 40O kon kɔɔli, mó muungu nɛɛ kaandennda va-a, mó komal nda o lɔan, mó ɲuna Piɛr aa: «La nɔla bɛɛ vaa lahɔl a ya latulu le lɛɛlɛ pilɛ le! 41La tiondu mì la piɛi, yɔŋii niaa del o tɔɔndanndo nin. La co yiyanndo le tosaa lende, kɛ dialun vílɛ́iyon co niaa.»
42Mí Yeesu faŋan vɛlɛ faŋan diinndɔɔ, mó kɔ piɛi Hala aa: «Pua, te o nɔla tosan mì taala kólaa sangaa ho faŋan ya ikɛi le, maa fɔ mi i kol a ndu, maa hɛnan nɔmndo tosan!» 43Ndóò muungoo, mó komal nda vɛlɛ o lɔan. Kani lɔan ma va nda o hɔl taw. 44Mí Yeesu faŋan nda vɛlɛ, mó kɔ piɛi Hala o yàándɔɔ, mó miinguu sɔɔn pilɛn mun. 45O kon kɔɔli, mó muungu nɛɛ kaandeŋaa ndɔa va-a, mó dimul nda aa: «La co vɔ o lɔan a pɛngio háá sisa? Telenndo cɛn tiiyaa, mì Po vanacieo del vanaa yɔŋ vɔɔnda o ba. 46La cɔn, n kɔnnun. La tofa vɔ vana co ya malɔɔ nda o ba-o hunɔɔ!»
A kɔɛ Yeesu biyɔɔ
(Marke 14.43-50, Luke 22.47-53, Nsaŋ 18.3-12)
47Yeesu lo sɔɛi, mí Yuda, vana pilɛ o kaandeŋaa tɔ́ a à ŋiɔnda tɛɛn hun a vannda sɛ́lɛ́ bɛndoo kɔɔli. Mɔɔn cɔwvon a yɔmii bingiei va nda o laba. Bolii vanaa-solia-lasálàá a simlacia lelɛŋnda ndáà vem nda ni. 48Mí vana va nda Yeesu malɔɔ o ba-o cɔm nda tɔɔmasele ndáà sinanin ndu-o aa: «Vana ya yilnin mì kɔman-ndo, mɛɛ ndu ni, la bii ndu!» 49Fɔ́ɔ́fɔ̀, mí Yuda sɔɔnguu Yeesu ikɛi, mó yil ndu aa: «Kɔɔfa isɛ!» Mó kɔman ndu. 50Mí Yeesu dimul ndu aa: «Caan nuu, tosa ɲɛ n hin tosa-o.» O kon mí vanaa tɔ̀a sɔɔnguu, má bii Yeesu. 51Mí vana pilɛ o vanaa va Yeesu kɔɔli-a tɛɛn siɛndi baa, mó nan mɔɛi ndɔɛi cɔwve, mó kialu buɛi bolle vanaa-solia-lasálàá nilen. 52O kon mí Yeesu dimul ndu aa: «Míngi mɔɛi nɔmii cɔwve o boo nin. Kani vana cɔlɔba pɛ a mɔɛi cɔwve, a dii ndu a mɔɛi cɔwve. 53Sina pɛngu maa te yáà dimul pɛ Fuɲa nuu le ya malaa, ndóò nɔla mì ndóò yɔŋ ya mɛlɛkaa cɔwva kundalan tɔ́ a latiɔn. 54Kɛ te i tosa pɛ lende, vɛ̀ɛ̀ ɲɛ sɛvan o Sɛbɛ Hala-o nin-ndo peelun yɛnin? Kani o co o sɛvaa maa lende i bɛnda le tosan-ndo ni.»
55O kon kɔɔli, mí Yeesu dimul sɛ́lɔ́ɔ́ aa: «La vɛ hunɔɔ le ya biyɔɔ a mɔɔn cɔwvon a á yɔmii bingiei maa vui? Lepalaa-lepala, i va icali o Cɛi-Hala-o nin niaa tɛɛn le pɛɛkulan yɔngoo, la bii ya le. 56Kɛ hee kpede tosan, haliko mi sɔɔn vanaa-tɛɛngaa-diom Hala-an sɛvan-ndon peelun.» O kon mí kaandennda kpow mal ndu, má sɔɔndian.
A kɔɛ a Yeesu o vanaa bɛndua kialu yaman lelɛŋndon-nda lo
(Marke 14.53-65, Luke 22.54-55, Nsaŋ 18.13-14,19-24)
57Mí vanaa bii Yeesu-a kɔa a ndu o Kaif bolle vanaa-solia-lasálàá lo, vanaa pɛɛkuu tɔŋ Hala-o-a a simlacia va a cuungiannda lo. 58Háá má tiiya a Yeesu o bolle vanaa-solia-lasálàá lo bɛɛ, Piɛr va ndu kɔlan kɔɔli lándán. Mó luɛi o bɛ́ɛ̀ lon, mó kɔ cal kpalilla tɛɛn le sinaa mɛɛ sɔɛi ken i va mɛɛlu yɛ.
59Mí bolii vanaa-solia-lasálàá a vanaa bɛndua kialu yaman lelɛŋndon-nda va nɛilan nuwviaa le Yeesu còòlan ɲiinduuo, haliko mi ndáà dii ndu. 60Kɛ a sɔɔn lacòòvan vannda dimi mun-ndon kpede, a seelun ɲɛ-ɲɛ le. O mɛɛlulan, mí vanaa ŋiɔn fula, má dimi aa: 61«Langbanɔɔ ho dimi ni maa o nɔla Cɛi-Hala-o tɛɛmbuu mò mingi ndu tangalu o palɛi ndii yáá bɛngu.» 62Mí bolle vanaa-solia-lasálàá can, mó ɲuna Yeesu aa: «Vɛ̀ɛ̀ a co ɲɛ-ɲɛ dimi a seile vannda ha co tɛndaa a nɔm o kɔɔ len te?» 63Kɛ Yeesu kuŋ te, o soli le. O kon, mí bolle vanaa-solia-lasálàá dimul ndu aa: «Mɛnan le Hala co yoomu-o, mà dimul naa, te nɔm co Krista Po Hala-o ni.» 64Mí Yeesu mulul ndu aa: «Nɔm pila cii dimi. I co niaa vɛlɛ dimul, la canin Po vanacieo icali Hala vana kpaayaa kpow o ba kɛndɔɔ coo, mo va hunɔɔ o yumbuyumbu halataala-o nin.»
65O kon, mí bolle vanaa-solia-lasálàá sɛɛsian volɔɔlan lekɔɔ, mó dimi aa: «O dimi sɔɛi tana-i a Hala. Ɔ́ɔ̀ seyaa naa n co vɛlɛ ɲuna le hee-a? Kámáá niaa pila langa tuei mɛɛ o dimi sɔɛi tanɛi a Hala yɛ! Ɔ́ɔ̀ yiyan niaa?» 66Má muli aa: «O bɛnda mò sɔla piɔ́mndo.»
67O kon kɔɔli, má tufu ndu lɔluan o hɔl, má kuindikuindi ndu. Mí vannda pum lɔaa ndu kpaŋnde, má dimul ndu aa: 68«Krista! Cɔm ndɔ naa vana lɔɔ nɔm-ndo.»
Piɛr viinun le Yeesu
(Marke 14.66-72, Luke 22.56-62, Nsaŋ 18.15-18,25-27)
69Piɛr ndu va icali o dio o bɛ́ɛ̀ lon, mí buɛi laanndoo pum sɔɔngu ndu ikɛi, mó dimul ndu aa: «Nɔm bɛɛ a va Yeesu langbanɔ fula hoo Kalile-o kɔɔli.» 70Kɛ mó vuunun sɔɛi ken vannda kpow o hɔl, mó dimi aa: «I sina bɛɛ sɔɛi n co hee dimio-e le.» 71O kon kɔɔli, mó kɔannun a kpengii dio bɛɔ. Mí buɛi laandu celen ca ndu, mó dimul vanaa va lon-nda aa: «Langbanɔɔ ho bɛɛ va Yeesu fula Nasarɛte-o kɔɔli.» 72Mí Piɛr vuunun vɛlɛ, mó mɛnan po aa: «I sina langbanɔɔ ho le.»
73Telen bingi hiovɔɔ vɛlɛ, mí vanaa va lon-nda sɔɔnguu Piɛr ikɛi, má dimul ndu aa: «A toɲa, a co vana pilɛ o vanaa kan tɛɛn, kani vana tuei dɔ́ɔ́ pɛ nɔm sɔɛi, a sina.» 74O kon mí Piɛr kandu vuunɔnndo a mɛɛnianndan aa: «I sina poo ho le. Te còòlan ya co dimio ni, màá Hala tuisi ya dɛnɛ palaa coo!» Fɔ́ɔ́fɔ̀, mí kongillo koova. 75O kon, mí Piɛr yiyan sɔɛi Yeesu ndóò dimul ndu-e aa: «Lɔ́ɔ́ pá kongillo koova, a vuununnin leyáá maa a sina ya le.» Mí Piɛr fula, mó kɔ caŋ taw.
Currently Selected:
Matie 26: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
Matie 26
26
Simlacia yii Yeesu dúmbú
(Marke 14.1-2, Luke 22.1-2, Nsaŋ 11.45-53)
1Yeesu ciiyo sɔɔn mun kpow dimio, mó dimul kaandeŋaa ndɔa aa: 2«La sinà maa o lo palɛi ndii ŋiin le kafo-hiavaa-coo tiiyaa. À malnin Po vanacieo vannda o ba le ndu baŋɔɔ o yɔm singafilaa coo.»
3O kon, mí bolii vanaa-solia-lasálàá a simlacia lelɛŋnda cuungian o Kaif lo bɛ́ɛ̀, o va bolle vanaa-solia-lasálàá-o. 4Má kɔ mɛi le kɔlkalu vɔɔndo nuwviaa le Yeesu biyɔɔ, haliko mi ndáà dii ndu. 5Má dimi aa: «N bíìnun ndu o paale kafolen coo le, yɔŋii vɔkɔ-vɔkɔɔ yɔŋnun vannda tɛɛn.»
Vanalanɔɔ pum suu Yeesu cuɛima cun kɛndɛan Betani
(Marke 14.3-9, Nsaŋ 12.1-8)
6Tuma Yeesu va Betani o Simɔn nàà siaŋaa va-o lo cɛinin-ndo, 7mí vanalanɔɔ pum sɔɔnguu ndu ikɛi. Ndóò nɔ sianio pum o ba a cuɛima cun kɛndɛma báà kalan mapum lenin. Tuma nda va ɲɛdiaa dioo-o, mó taaliaa cuɛima man Yeesu o lebol. 8Kaandennda cɔu lende, má tambu kɔltan, má ɲuna aa: «Le yɛɛ nɛ man tɛɛmbuuo ho nuaa? 9Ndóò va fisa mí vanáà pisi cuɛima báà kalan man, mí vanáà piɔw vanaa bala fondoa ɲɛ-sɔlaa kon.»
10Mí Yeesu bii sɔɛi ken bila, mó dimul nda aa: «Le yɛɛ niaa co yɛ palaa ho? Dɛnɛ kɛndɔɔ o tosal-la ni. 11Kani la nɔnin vanaa bala fondoa lɔ́ɔ́-lɔ́ɔ̀ niaa tɛɛn. Kɛ ya ya, la nɔ́nìn ya lɔ́ɔ́-lɔ́ɔ̀ niaa tɛɛn te. 12Cuɛima cun kɛndɛma o taaliaa ya man coo-an, le lɔ́ɔ́ nda co hunɔ̀ɔ̀ ya kumbɔ̀ɔ̀-o o bɛɛndiaa ya pɔɔ lende ni. 13I co niaa toɲaa dimul, nɛɛ-nɛɛ Yoongu kɛndɔɔ ho hun yondan pɛ o ceendo coo, a diminin vɛlɛ dɛnɛ cuaa ho tosa hoo-o le loonɔnndo a ndu o kɔɔ.»
Yuda nuwviaa nɛilan le Yeesu malɔɔ vannda o ba
(Marke 14.10-11, Luke 22.3-6)
14Mí kaandennɔ pilɛ o kaandeŋaa tɔ́ a à ŋiɔnda tɛɛn, o ndáà veelu aa Yuda Iskariɔt-o kɔ komal bolii vanaa-solia-lasálàá, 15mó dimul nda aa: «Te i mal pɛ ndu niaa o ba, yɛɛ nɛ niaa ke yɛnin ya?» Má cua volin latámán beleyaa, má yɔngu ndu. 16Kandɔɔ nin tuma kon, mí Yuda kandu nɛilan nuwviaa le Yeesu malɔɔ nda o ba.
Yeesu de ɲɛdiaa kafo-hiavaa-coo nda kaandeŋaa ndɔa
(Marke 14.12-21, Luke 22.7-14,21-23, Nsaŋ 13.21-30)
17O paale tasele kafo bulu toosian a lɛvɛn too len coo, mí kaandennda hun ɲuna Yeesu aa: «Kuɛɛ nɛ n yeema yɛ mì n bɛɛndial nɔm ɲɛdiaa le kafo-hiavaa-coo?» 18Mí Yeesu mulul nda aa: «La kɔ o kobio nin, o vanndo pum ndo, mì la dimul ndu aa: ‹Kɔɔfa dimi aa telen ndɔɔ tiiya, o nɔm ndo o tosanin kafo-hiavaa-coo nda kaandeŋaa ndɔa ni.›» 19Mí kaandennda tosa mɛɛ Yeesu dimul nda yɛ. Má toosiaa ɲɛdiaa kafo-hiavaa-coo.
20Icɔllo, mí Yeesu cal ɲɛdiaa dioo nda kaandeŋaa tɔ́ a à ŋiɔnda. 21Tuma nda va ɲɛdiaa dioo-o, mó dimul nda aa: «I co niaa toɲaa dimul, vana pilɛ o niaa tɛɛn malnin ya vannda o ba.» 22Mí kaandennda kpow a tambu kɔltan taw, má va ndu ɲuuniaa a pilɛn-pilɛnnda aa: «Maalii, o co ya le le?» 23Mí Yeesu muli aa: «Vana naa n co baa vowvo naa ndu o hɛngɛi pilɔɔ nin-ndo, ndu malnin ya vannda o ba ni. 24Po vanacieo co hunɔɔ piɔ́mndo sɔla mɛɛ o sɛvan a ndu o kɔɔ o Sɛbɛ Hala-o nin yɛ. Kɛ dɛnɛ palaa co le vana malnin ndu vannda o ba-o. Ndóò va fisa hali mì vana kon ndóò vilun te.» 25Mí Yuda va ndu malɔɔ vannda o ba-o cua sɔɛi, mó ɲuna aa: «Kɔɔfa, o co ya le le?» Mí Yeesu mulul ndu aa: «Nɔm pila cii dimi.»
Ɲɛdiaa Maalii-o
(Marke 14.22-26, Luke 22.14-20, 1Korɛntea 11.23-25)
26Tuma nda va ɲɛdiaa dioo-o, mí Yeesu cua buloo, mó dɔaw ndu duaa, mó yimiyimi ndu, mó yɔngu kaandeŋaa ndɔa, mó dimul nda aa: «La bii mì la de, dialun nun co mun ni.» 27Mó cua vɛlɛ taala kólaa, mɛɛ o cii balikaa malɔɔ, mó ke nda ndu, mó dimi aa: «Niaa kpow la kol, 28kooma nian ma co man ni, kooma kpema-an, ma fula le vannda taw hakio malɔɔ-an. 29I co niaa dimul, i kol-lɛnin mɔima n'rɛsɛnndan man te, háá fɔ nin o masale Fuɲa nuu nin, mì hun kol ma sɛnɛiyan naa niaa.» 30Ndáà ciiyo condun Hala-on solio, má kɔa o Pembii oliviei coo.
Yeesu dimi maa Piɛr vuununnin sɔɛi ndɔɛi
(Marke 14.27-31, Luke 22.31-34, Nsaŋ 13.36-38)
31O kon mí Yeesu dimul nda aa: «Cɔɛllɛn, niaa kpow la kɛɛnin ya, kani o co o sɛvaa aa: ‹I lɔaanin vana mandaa n'saa, mì kunda saa puusian.› 32Kɛ telen ya tendulnin fulaa vanvílɛ́iya tɛɛn-ndo, i kɔanin niaa laci Kalile.» 33Mí Piɛr cua sɔɛi, mó dimul Yeesu aa: «Vanaa tɔ̀a kpede kɛɛ bɛɛ nɔm, ya, i kɛɛnin nɔm te few.» 34Mí Yeesu dimul ndu aa: «I co nɔm toɲaa dimul, cɔɛllɛn, nanu a sɔɔ koovaa, a vuununnin sɔɛi nii leyàá.» 35Mí Piɛr mulul ndu aa: «Hali i sɔla bɛɛ piɔ́mndo, i viinunnin sɔɛi nɔmnde le.» O kon mí kaandennda kpow dimi ɲɛ pilɛ kon.
Yeesu piɛi Hala Sɛtsemane
(Marke 14.32-42, Luke 22.39-46)
36O kon kɔɔli, mí Yeesu kɔa a kaandeŋaa ndɔa o fondaa pum diolan Sɛtsemane, mó dimul nda aa: «La cal nanu, mì kɔɛ pɔɔ piɛilen o nda.» 37Mó kɔa a Piɛr a poaa ŋiɔŋaa Sebedee-a kɔɔli. Mó kandu kɔllo tambei a buulanndo taw. 38O kon mó dimul nda aa: «Kɔl nuu sanga háá pɛɛngu piɔ́mndo, la lo pɔɔ nanu, mì la va lahɔl a ya latulu.» 39O kon mɛɛ o kɔɛ tiŋ laci, mó del o kuumbuan lɛŋ, mó piɛi Hala aa: «Pua, too nɔla pɛ tosan, cɛl mi i kol a taala kólaa sangaa ho le. Kɛ nduyɛ, o va mɛɛ ya i yeema yɛ le, tosa mɛɛ o hɛnan nɔm yɛ.» 40O kon kɔɔli, mó muungu nɛɛ kaandennda va-a, mó komal nda o lɔan, mó ɲuna Piɛr aa: «La nɔla bɛɛ vaa lahɔl a ya latulu le lɛɛlɛ pilɛ le! 41La tiondu mì la piɛi, yɔŋii niaa del o tɔɔndanndo nin. La co yiyanndo le tosaa lende, kɛ dialun vílɛ́iyon co niaa.»
42Mí Yeesu faŋan vɛlɛ faŋan diinndɔɔ, mó kɔ piɛi Hala aa: «Pua, te o nɔla tosan mì taala kólaa sangaa ho faŋan ya ikɛi le, maa fɔ mi i kol a ndu, maa hɛnan nɔmndo tosan!» 43Ndóò muungoo, mó komal nda vɛlɛ o lɔan. Kani lɔan ma va nda o hɔl taw. 44Mí Yeesu faŋan nda vɛlɛ, mó kɔ piɛi Hala o yàándɔɔ, mó miinguu sɔɔn pilɛn mun. 45O kon kɔɔli, mó muungu nɛɛ kaandeŋaa ndɔa va-a, mó dimul nda aa: «La co vɔ o lɔan a pɛngio háá sisa? Telenndo cɛn tiiyaa, mì Po vanacieo del vanaa yɔŋ vɔɔnda o ba. 46La cɔn, n kɔnnun. La tofa vɔ vana co ya malɔɔ nda o ba-o hunɔɔ!»
A kɔɛ Yeesu biyɔɔ
(Marke 14.43-50, Luke 22.47-53, Nsaŋ 18.3-12)
47Yeesu lo sɔɛi, mí Yuda, vana pilɛ o kaandeŋaa tɔ́ a à ŋiɔnda tɛɛn hun a vannda sɛ́lɛ́ bɛndoo kɔɔli. Mɔɔn cɔwvon a yɔmii bingiei va nda o laba. Bolii vanaa-solia-lasálàá a simlacia lelɛŋnda ndáà vem nda ni. 48Mí vana va nda Yeesu malɔɔ o ba-o cɔm nda tɔɔmasele ndáà sinanin ndu-o aa: «Vana ya yilnin mì kɔman-ndo, mɛɛ ndu ni, la bii ndu!» 49Fɔ́ɔ́fɔ̀, mí Yuda sɔɔnguu Yeesu ikɛi, mó yil ndu aa: «Kɔɔfa isɛ!» Mó kɔman ndu. 50Mí Yeesu dimul ndu aa: «Caan nuu, tosa ɲɛ n hin tosa-o.» O kon mí vanaa tɔ̀a sɔɔnguu, má bii Yeesu. 51Mí vana pilɛ o vanaa va Yeesu kɔɔli-a tɛɛn siɛndi baa, mó nan mɔɛi ndɔɛi cɔwve, mó kialu buɛi bolle vanaa-solia-lasálàá nilen. 52O kon mí Yeesu dimul ndu aa: «Míngi mɔɛi nɔmii cɔwve o boo nin. Kani vana cɔlɔba pɛ a mɔɛi cɔwve, a dii ndu a mɔɛi cɔwve. 53Sina pɛngu maa te yáà dimul pɛ Fuɲa nuu le ya malaa, ndóò nɔla mì ndóò yɔŋ ya mɛlɛkaa cɔwva kundalan tɔ́ a latiɔn. 54Kɛ te i tosa pɛ lende, vɛ̀ɛ̀ ɲɛ sɛvan o Sɛbɛ Hala-o nin-ndo peelun yɛnin? Kani o co o sɛvaa maa lende i bɛnda le tosan-ndo ni.»
55O kon kɔɔli, mí Yeesu dimul sɛ́lɔ́ɔ́ aa: «La vɛ hunɔɔ le ya biyɔɔ a mɔɔn cɔwvon a á yɔmii bingiei maa vui? Lepalaa-lepala, i va icali o Cɛi-Hala-o nin niaa tɛɛn le pɛɛkulan yɔngoo, la bii ya le. 56Kɛ hee kpede tosan, haliko mi sɔɔn vanaa-tɛɛngaa-diom Hala-an sɛvan-ndon peelun.» O kon mí kaandennda kpow mal ndu, má sɔɔndian.
A kɔɛ a Yeesu o vanaa bɛndua kialu yaman lelɛŋndon-nda lo
(Marke 14.53-65, Luke 22.54-55, Nsaŋ 18.13-14,19-24)
57Mí vanaa bii Yeesu-a kɔa a ndu o Kaif bolle vanaa-solia-lasálàá lo, vanaa pɛɛkuu tɔŋ Hala-o-a a simlacia va a cuungiannda lo. 58Háá má tiiya a Yeesu o bolle vanaa-solia-lasálàá lo bɛɛ, Piɛr va ndu kɔlan kɔɔli lándán. Mó luɛi o bɛ́ɛ̀ lon, mó kɔ cal kpalilla tɛɛn le sinaa mɛɛ sɔɛi ken i va mɛɛlu yɛ.
59Mí bolii vanaa-solia-lasálàá a vanaa bɛndua kialu yaman lelɛŋndon-nda va nɛilan nuwviaa le Yeesu còòlan ɲiinduuo, haliko mi ndáà dii ndu. 60Kɛ a sɔɔn lacòòvan vannda dimi mun-ndon kpede, a seelun ɲɛ-ɲɛ le. O mɛɛlulan, mí vanaa ŋiɔn fula, má dimi aa: 61«Langbanɔɔ ho dimi ni maa o nɔla Cɛi-Hala-o tɛɛmbuu mò mingi ndu tangalu o palɛi ndii yáá bɛngu.» 62Mí bolle vanaa-solia-lasálàá can, mó ɲuna Yeesu aa: «Vɛ̀ɛ̀ a co ɲɛ-ɲɛ dimi a seile vannda ha co tɛndaa a nɔm o kɔɔ len te?» 63Kɛ Yeesu kuŋ te, o soli le. O kon, mí bolle vanaa-solia-lasálàá dimul ndu aa: «Mɛnan le Hala co yoomu-o, mà dimul naa, te nɔm co Krista Po Hala-o ni.» 64Mí Yeesu mulul ndu aa: «Nɔm pila cii dimi. I co niaa vɛlɛ dimul, la canin Po vanacieo icali Hala vana kpaayaa kpow o ba kɛndɔɔ coo, mo va hunɔɔ o yumbuyumbu halataala-o nin.»
65O kon, mí bolle vanaa-solia-lasálàá sɛɛsian volɔɔlan lekɔɔ, mó dimi aa: «O dimi sɔɛi tana-i a Hala. Ɔ́ɔ̀ seyaa naa n co vɛlɛ ɲuna le hee-a? Kámáá niaa pila langa tuei mɛɛ o dimi sɔɛi tanɛi a Hala yɛ! Ɔ́ɔ̀ yiyan niaa?» 66Má muli aa: «O bɛnda mò sɔla piɔ́mndo.»
67O kon kɔɔli, má tufu ndu lɔluan o hɔl, má kuindikuindi ndu. Mí vannda pum lɔaa ndu kpaŋnde, má dimul ndu aa: 68«Krista! Cɔm ndɔ naa vana lɔɔ nɔm-ndo.»
Piɛr viinun le Yeesu
(Marke 14.66-72, Luke 22.56-62, Nsaŋ 18.15-18,25-27)
69Piɛr ndu va icali o dio o bɛ́ɛ̀ lon, mí buɛi laanndoo pum sɔɔngu ndu ikɛi, mó dimul ndu aa: «Nɔm bɛɛ a va Yeesu langbanɔ fula hoo Kalile-o kɔɔli.» 70Kɛ mó vuunun sɔɛi ken vannda kpow o hɔl, mó dimi aa: «I sina bɛɛ sɔɛi n co hee dimio-e le.» 71O kon kɔɔli, mó kɔannun a kpengii dio bɛɔ. Mí buɛi laandu celen ca ndu, mó dimul vanaa va lon-nda aa: «Langbanɔɔ ho bɛɛ va Yeesu fula Nasarɛte-o kɔɔli.» 72Mí Piɛr vuunun vɛlɛ, mó mɛnan po aa: «I sina langbanɔɔ ho le.»
73Telen bingi hiovɔɔ vɛlɛ, mí vanaa va lon-nda sɔɔnguu Piɛr ikɛi, má dimul ndu aa: «A toɲa, a co vana pilɛ o vanaa kan tɛɛn, kani vana tuei dɔ́ɔ́ pɛ nɔm sɔɛi, a sina.» 74O kon mí Piɛr kandu vuunɔnndo a mɛɛnianndan aa: «I sina poo ho le. Te còòlan ya co dimio ni, màá Hala tuisi ya dɛnɛ palaa coo!» Fɔ́ɔ́fɔ̀, mí kongillo koova. 75O kon, mí Piɛr yiyan sɔɛi Yeesu ndóò dimul ndu-e aa: «Lɔ́ɔ́ pá kongillo koova, a vuununnin leyáá maa a sina ya le.» Mí Piɛr fula, mó kɔ caŋ taw.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée